Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jaqe masisar yatiyañatak jukʼamp chʼamachasipjjañäni

Jaqe masisar yatiyañatak jukʼamp chʼamachasipjjañäni

Khä 1900 maranak qalltajja, wali kusisitaw jaqenakajj mä video uñtapjjäna, ukanjj janiw arojj istʼaskiti. Ukat uka tiempon kunjamsa San Francisco (Estados Unidos) markan jakapjjäna ukwa uka videojj uñachtʼayi. Uka película grabañatakejja, amparamp apnaqañ camarwa auto patan nayräjjaparu uchapjjäna, ukat Market sat phoqha callenjamaw saräna. Uka videonjja, caballomp qatatit carronaka, uka tiempon utjir autonaka, periodiconak lakiririnaka ukat alasiri jan ukajj yaqha lurañanakapar saraskiri jaqenakaw uñjasi.

Uka video uñtktan ukajj wali llakkañawa, kunattejj amuyatajj uka videojj abril phajjsin 1906 maranwa grabaspachäna, janïr oraq khatatisa ukat nina aqtäwis abril 18 urun utjkäna uka tiempona. Ukanjja, waranqa waranq jaqenakaw jiwarapjjäna ukat uka cheqajj qʼala tukjatarakïnwa. Videon uñstki uka kusisit jaqenakajj inas mä qawqha urunakak jakjjapjjchini. “Uka jaqenakar uñjasasa ukat kuna jan walinsa uñjasipjjani uk jan yatipjjatap uñjasasa, maynejj sinttʼasiwa, ukampis janiw yanaptʼkaspati” sasaw Scott Miles sat chachajj saraki, jupajj uka video grabirinakat maynïrin familiapat jutiriwa.

Oraq khatatisa ukat nina naktäwis 1906 maran utjkäna ukajja, mä akatjamatwa San Francisco marka taypi niya taqpach tukjawayi

Jiwasajj ukhamarakiw jaqe masisat wal sinttʼastanjja. Jupanakajja, kunatï sapüru lurapjjañapäki ukakwa lurasipki ukat kuna jan walitï jutkani uks janirakiw amuyapkiti, mä arunjja, aka jan wali pachan tukusiñap janiw yatipkiti. Oraq khatatejj kunürus pasani uk janiw yatiskaspati, ukampis Jehová Diosan jachʼa urupat jaqenakar yatiysnawa. Jiwasajj utat uta yatiyir sarañatakejj semanan mä uru tiempo apstʼastanwa, ukampis ¿jaqe masisar yatiyañatak jukʼamp chʼamachassnati?

JESUSAJJ YATIYAÑATAKEJJ JANKʼAKÏNWA

Jesusajja, jaqenakar yatiyañatakejj jankʼakïnwa. Khitinakampitï jikisirïkäna taqe ukanakampiw parlirïna, impuesto cobririrusa ukat chika urojj samartʼkäna ukhas mä warmirojj yatiyarakïnwa (Luc. 19:1-5; Juan 4:5-10, 21-24). Samartʼañatak tiempo apsuskäna ukhasa, jaqenakar yatichañ laykojj amtap mayjtʼayänwa. Khuyaptʼayasiñatwa jaqenakar yatiyañatak jukʼamp chʼamachasïna (Mar. 6:30-34). ¿Jichhürunakan kunjamsa waljanejj Diosan arunakap jankʼak yatiyañ Jesusat yateqasipjje?

TAQE CHEQAN YATIYAÑATAKIW CHʼAMACHASIPJJE

Melika sat kullakajj wali suma jarkʼaqat jachʼa altus utanwa jakasi. Uka pachpa utan jakasirinakat waljanejj yaqha markat jutir yateqerinakäpjjewa.  Jupanakan sutinakapajj uka utan jakasirinakan sutinakap taypin janiw uñstki ukat celularanakapan numeropas janirakiw uñstkiti. Kullakajja, uka utar mantañäki ukana jan ukajj ascensoran Diosan Arupat yatiyañ wali askit uñji. Jupajj akham siwa: “Nayarus ukan yatiyañajj waktʼkitaspa ukham uñjta” sasa. Bibliat apstʼat qellqatanak kunayman arunakat apasajja, walja tratadonaka ukat revistanakwa jaytawayi. Ukhamarusa, Internetat jw.org cheqwa uñachtʼayi. Melika kullakajja, waljaniruw Bibliat yatichañ qalltawayi.

Sonia kullakajja, taqenir yatiyañatakiw chʼamachasiraki. Jupajj mä clinicanwa irnaqe ukat ukan irnaqapki ukanakat taqenir yatiyañwa amtawayi. Nayraqatjja, irnaqer masinakapajj kunan yanaptʼatäñsa munapjje ukat kunanaksa yatjjatañ munapjjaspa ukwa yatjjatäna. Ukatjja, Diosan arunakap parltʼañatakiw manqʼasiñ horasajj sapa maynir thaqherïna. Ukhamatwa paninir Bibliat yatichañ qalltawayi. Jichhajj samartʼki uka horasajj suyasipki ukanakar yatiyañwa amtaraki.

UKHAM LURARAKIÑÄNI

Oraqe khatatejj 1906 maran utjkäna ukat qhespirinakat maynejj akham sänwa: “Janipuniw yaqha markajj ukham qʼala tukjat uñjasiwaykiti” sasa. Ukampis kuna jan waltʼäwinakatï jichhürunakan utjki ukanakajja janiw kunäkanisa, kunapachatejj Jehová Diosajj Jupar “jan katoqerinakar” tukjkani ukampejja (2 Tes. 1:8). Diosajja, jaqenakan Jupatakjam sarnaqapjjañapa ukat qhanañchirinakapajj kuna yatiyawtï apapki uk istʼapjjaspa ukwa muni (2 Ped. 3:9; Apo. 14:6, 7).

¿Diosan arunakapat yatiyañatakejj sapür luräwinakasat tiempo apstʼasiñäniti?

Jiwasaw jaqenakarojj kuna tiemponsa jakasktan uk amuyasipjjañapataki, munañanakap apanukupjjañapataki ukat Jehová Diosar thaqapjjañapatak yanaptʼsna (Sof. 2:2, 3). ¿Irnaqer masinakasaru, vecinonakasaru ukat khitinakampitï sapür luräwisan jikisktan ukanakar yatiysnati? ¿Jaqe masisar yatiyañatak jukʼamp chʼamachasiñäniti?