Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Jehová Diosar uñtʼjjasajj kuns luräta?

¿Jehová Diosar uñtʼjjasajj kuns luräta?

“Ukampis jichhajj Diosarojj uñtʼjjapjjtawa.” (GÁL. 4:9)

1. Janïr avión tuytaykasajja, ¿kunatsa avión apnaqerinakajj mä listarjam avión wali sum uñakiptʼapjjañapa?

AVIÓN apnaqerejja, janïra avión tuytaykasajj kunjamakïskis avionajj uk 30 jila toqenakatwa mä listarjam uñakipañapa. Janitï sapa kuti uk lurkaspajja, inas chijinakar purtʼaschispa. Avión apnaqerinakatjja, ¿khitinakarus uka listarjam uñakipapjjañapataki mayisi? Wali experiencianïpki ukanakaruw mayisi. ¿Kunatsa? Kunattejj experienciaparukiw atinisipjjaspa ukat janiw sum avión uñakipapkaspati.

2. ¿Kunsa mä cristianojj sapa kuti amuykiptʼasiñapa?

2 Kunjamtï avión apnaqerejj amuyumpi listarjam avión uñakiptʼkejja, ukhamarakiw jiwasajj kunjamakïskis iyawsäwisajj uk mä listarjam amuykiptʼasiñasa. Jichhakis jan ukajj walja maranakas bautisatäjjstanjja, iyawsäwisajj chʼollqhëskiti ukat Diosarojj taqe chuymati yupaychasktan uk sapa kuti amuykiptʼasiñajj wali wakiskiriwa. Janitï ukham lurkañänejja, Diosar yupaychañanjja aynachtʼsnawa. Bibliajj akham sasaw ewjjtʼistu: “Khititejj chʼamanïtapa amuyasejja, wal amuytʼaspan ukatarak tinkuskaspan” sasa (1 Cor. 10:12).

3. ¿Kunsa Galacia markankir cristianonakajj lurapjjañapäna?

3 Ukatwa Galacia markankir cristianonakajja, iyawsäwipajj kunja chʼollqhëskisa uk amuykiptʼasipjjañapäna ukat Diosar yupaychañjja wali askitwa uñjapjjañapäna. Jesusan loqtasïwipaw Jehová Diosar uñtʼañatakejj mä thakïkaspas ukham jistʼarawayi, ukhamat jupan loqtasïwipjjar iyawsapki ukanakajj Diosan wawanakapjam jakʼachasipjjañapataki (Gál. 4:9). Diosaru ukham jakʼachasiskakiñatakejja, Galacia markankir cristianonakajj Moisesan Leyiparjam phoqhayañ munir judío jaqenakan yatichäwinakapjja, janiw istʼapjjañapäkänti. Ukampisa jan judiöpkäna ukanakajja, janiw uka Leyirjam taman sarnaqapkänti. Ukhamasti,  judionakasa ukat jan judionakasa, Diosar yupaychañ toqet nayrar sartapjjañapaw wakisïna. Jehová Diosajj janiw Moisesan Leyiparjam phoqhapjjañap jaqenakar mayjjänti, ukwa jupanakajj amuyapjjañapäna.

KUNJAMATSA JEHOVÁ DIOSAR UÑTʼAÑ QALLTSNA

4, 5. ¿Apóstol Pablojj Galacia markankir cristianonakarojj kuna toqetsa ewjjtʼäna, ukat kunjamsa jiwasar yanaptʼistu?

4 Kuntï Jehová Diosajj apóstol Pablo toqejj Galacia markankir cristianonakar siskäna uka arunakajja, kuna cheqa yatichäwinaktï Bibliat yateqawayktan uk jan jaytañasatakiw amtayistu. Janipuniw kuntï jaytawayktan ukar kuttʼañasäkiti. Galacia markankir cristianonakar carta qellqatajja, janiw jupanakarukejj Jehová Diosaru taqe chuyma jan jitheqtasa yupaychañapataki yanaptʼkänti, jan ukasti taqeniruw yanaptʼistu.

5 Kunjamsa kʼari yatichäwinakat qhespiyatäsin Jehová Diosan Qhanañchiriparu tukuwaytan uk taqeniw amtañasa. Ukatakisti, aka pä jisktʼat amuytʼañäni: “¿Bautisasiñatakejj kunanaksa phoqhawayta? ¿Kunjamsa Diosar uñtʼawayta ukat kunjamsa Jupajj uñtʼawaytam uk amtastati, ukhamat kʼari yatichäwinakat qhespita jikjjatasta?”.

6. ¿Kuna listatsa yatjjataskañäni?

6 Jehová Diosan Qhanañchiripäñatakejj kunanaksa lurawayta uk llätunka toqetwa mä listarjam amuytʼañäni. ( “Bautisasiñatakejj akanakwa phoqhañasa, ukaw jiltaskakiñatak yanaptʼistu” siski uka recuadro uñjjattʼäta.) Ukanak sapa kuti amtañajja, akapachar jan kuttʼañatakiw yanaptʼistani. Kunjamtï avión apnaqerejj experiencianïkasas wali amuyumpi mä listarjamajj kunjamakïskis avionapajj uk uñakipasin jan llakisisa avión apkejja, ukhamarakiw jiwasajj sapa kuti uka listarjam amuykiptʼasisajj jan kun ajjsaras Jehová Diosar taqe chuyma yupaychaskakiñäni.

DIOSAN UÑTʼATÄPKI UKANAKAJJA, DIOSAR YUPAYCHAÑAN JILTASIPKAKIWA

7. ¿Kuna yatichäwinakarjamas sarnaqañasa, ukat kunatsa?

7 Janïr avión tuytaykasajja, kunanaksa sapa kutejj lurañapa ukwa listapajj avión apnaqerirojj amtayi. Jiwasajj ukhamarakiw Diosar yupaychañan kunjamäsktansa ukat bautisasktan ukhatpachajj kunsa lurawaytan uk listasarjam amuykiptʼasiñasa. Pablojj akham sasaw Timoteor säna: “Kuna suma yatichäwtejj churksma ukatjja janipun saraqamti, iyawsäwinrak jakam, ukhamarak munasiñasajj utjkistu Cristo Jesusampi mayaru tukutas layku ukansa” sasa (2 Tim. 1:13). Uka ‘suma yatichäwinakajja’, Biblianwa jikjjatasi (1 Tim. 6:3). Kunjamtï uta lurañataki planonakajj kunjamänis utajj uk amuytʼaykistojja, ukhamarakiw Biblian cheqa yatichäwinakapajj kunsa Jehová Diosajj jiwasat suyi uk amuytʼayistu. Ukatwa, kunanaksa bautisasiñatakejj lurawaytan uk amtañasa, ukhamat kawkhakamas Biblian cheqa yatichäwinakaparjam sarnaqasktan uk amuytʼañataki.

8, 9. 1) Jehová Diosar uñtʼañansa ukat iyawsäwinsa, ¿kunatsa jiltaskakiñasa? 2) ¿Kunatsa Diosan yupaychañ toqet jiltaskakiñasajj wakisi, ukat kunatsa mä qoqan jiltatapampi sasispa?

8 Nayraqatjja, Jehová Diosar uñtʼañwa qalltawaytanjja, ukat ukajj iyawsäwinïñatakiw yanaptʼawayistu. Ukampisa Diosar jukʼamp uñtʼaskakiñasawa ukat iyawsäwisas jiljjattaskakiñapawa (2 Tes. 1:3). Ukhamasti bautisasjjtan uka qhepatjja, Diosar yupaychañanjja nayrar sartaskakiñasawa, janiw ukharuk qheparañasäkiti.

Qoqanakajj jilasipkakiwa, ukhamarakiw cristianonakajj jilaskakiñasa

9 Diosar yupaychañ toqet jiltañajja, mä qoqan jiltatapampi sasispawa. Uka qoqasti muspharkañaw jilsuspa, yamas uka qoqatï manqhakama ukat suma saphintatächi ukhajj jukʼampïspawa. Libanonkir cedro qoqanakat amuytʼañäni, uka qoqanakat yaqhepajja, 37 metronakwa jilsuspa, saphinakapas wali chʼollqe ukat manqhakamaw saphintarakispa, troncopasti 12 metronakat  jilarakiw thuruptaspa (Cant. de Cant. 5:15). Nayraqatjja, qoqajj jankʼakiw jilsu, ukat janis amuyañjamäkchejja, marat maratjamaw troncopajj thurupti ukat saphinakapas jukʼampi manqhar saphinti, ukhamatwa qoqajj suma saytʼatäjje. Niya ukhamarakiw mä cristianojj Diosar yupaychañ toqet jilti. Qalltanjja, Bibliat yatjjatasin bautisasiñkamaw jankʼak jiltsna; ukat inas precursorjam irnaqtʼañatakejj kuna mayitanaktï phoqhañäki uk phoqharaksna jan ukajj taman yaqha luräwinak katoqaraksna. Ukham jiltatasjja kusisitaw tamankir jilat kullakanakajj qhan amuyapjje. Ukat marat maratjamajja, inas jiltatasajj jan qhan amuyañjamäkchiniti. Ukampis iyawsäwisansa ukat Diosar uñtʼañansa jiltaskakiñasawa, “Cristojj qawqchʼäkitejj ukar puriñaskama” (Efe. 4:13). Ukhamatwa Diosar yupaychañ toqetjja, mä jiskʼa qoqat mä jachʼa ukat suma thurtʼat qoqar tuktanjja.

10. Diosarojj walja maranakas yupaychasipkchejja, ¿kunatsa mä cristianojj Diosar yupaychañan jiltaskakiñapa?

10 Ukampis jiltatasajj janiw ukharuk qheparañapäkiti. Jan ukasti, Diosan Arupat jukʼamp yatjjataskakiñasawa ukat iyawsäwisas chʼollqheptañapawa. Ukhamatwa suma saphintat qoqäksnas ukhamäñäni (Pro. 12:3). Walja jilat kullakanakaw ukham lurawayapjje. Mä jilatajja, 30 maranak jilaw irpir chuymanjam taman irnaqtʼaski ukat Diosar yupaychañ toqet jiltaskakitapwa amuyasi. Jupasti akham siwa: “Bibliarojj jukʼamp askitwa uñj-jjta. Ukat kunjamsa Biblian yatichäwinakapajj maynirojj suma amtar puriñatak yanaptʼaspa uk yateqaskaktwa. Ukhamarusa Diosan arunakap yatiyasajj kusisitarakiw jikjjatasta” sasa.

DIOSAMP SUM APASISKAKIM

11. ¿Kunjamsa Jehová Diosarojj sum uñtʼaskaksna?

11 Jiwasatï Diosar yupaychañ toqet jiltañ munstanjja, Jehová Diosarojj Awkisarjama ukat Amigosarjamaw jakʼachasiñasa. Suma katoqtʼata, munata ukat jarkʼaqtʼata jikjjatassna ukwa Jupajj jiwasatak muni, kunjamtï mä wawajj awkipan ichjjaruta jikjjataski ukhama, jan ukajj jan jaytjasir ukat cheqpach amigompi jikjjatasktan ukhama. Ukampis Jehová Diosampejj janiw mä akatjamatak sum apasksnati. Jan ukasti Jupar sum uñtʼañataki ukat munasiñatakisa walja tiempow wakisi. Ukhamasti Biblia sapür liyiñataki tiempo apstʼasiñasawa. Ukat Yatiyañataki, ¡Despertad! revistanaka ukhamaraki Bibliat apstʼat yaqha qellqatanaksa liytʼañasarakiwa.

12. ¿Jehová Diosampi sum apasiskakiñatakejj kun lurañasasa?

12 Mayisitanakasa ukat suma amigonakampi sarnaqañaw Jehová Diosampi sum apasiskakiñatakejj yanaptʼistani (Malaquías 3:16 liytʼasiñapawa). Jehová Diosajj “aski jaqenakarojj  imiwa, mayisitanakapsa istʼarakiwa” (1 Ped. 3:12). Jupasti wali munasir awkjamaw yanaptʼa mayisktan ukhajj istʼistu. Ukhamajj janiw ‘Jehová Diosat oracionan mayisiñjja armasipjjañasäkiti’ (Rom. 12:12). Diosan jan yanaptʼapampejja, janiw Jupan amigopäskaksnati. Akapachan jan waltʼäwinakaparojj janipuniw chʼamasampikejj atipjksnati ni yantʼanakarus saykatksnati. Jehová Diosar jan mayisjjañäni ukhajja, jiwasatakejj kuna chʼamañchtʼäwitï wakiski uk janiw katoqjjañäniti. ¿Jehová Diosar mayiskta ukhajj atiniskay amigomarjamat parlta? ¿Jan ukajj uka toqet chʼamachasiñamach wakisispa? (Jer. 16:19.)

13. Jehová Diosampi sum apasiskakiñatakejja, ¿kunatsa jilat kullakanakampi tantachasiñajj wali wakiskirejja?

13 “Khitinakatejj jupar confiasipki ukanakarojja” Jehová Diosajj wali askitwa uñji. Ukhamasti, Jupar uñtʼjjasinjja khitinakatï Jupar uñtʼapki ukanakamp chikajj tantachasiskakiñasawa (Nah. 1:7). Akapachajj llakinakampi phoqhantatawa, ukatwa chʼamañchtʼir jilat kullakanakampi chikachasiñasa. Ukat ¿kuna askinaksa jikjjatañäni? Tamanjja, “maynit maynikama [...] munasiñanïñasataki, ukhamarak suma luräwinak uñachtʼaya[ñasatakiw]” chʼamañchtʼir jilat kullakanakar jikjjatañäni (Heb. 10:24, 25). Pablon uka ewjjtʼaparjam phoqhañatakejja, jilat kullakanakamp tantachasiñaw wakisi. Ukatwa tantachäwinakarojj sarañasapuni ukat arstʼañasaraki.

14. ¿Kunatsa arrepentisiñatakisa ukat jan wali luräwinak apanukuñatakis jankʼakïñasa?

14 Cristianöñatakejja, juchanakasatwa arrepentistan ukat jan wali luräwinaksa apanukuraktanwa. Ukampis arrepentisiñatakejj jankʼakïñasapuniwa ukat Diosatakjamaw sarnaqañasaraki. Kunattejj pantjasir jaqenakjamajj juchar purtʼasikipunsnawa. Juchajja, mä asirur uñtataw achutatañatak uñchʼukiskistu (Rom. 3:9, 10; 6:12-14). Janipunis pantjasirïksna ukham janiw amuyañasäkiti. Jan wali luräwinak apanukuñataki chʼamachasitasjja, Jehová Diosajj wali pacienciampiw suytʼistu (Fili. 2:12; 2 Ped. 3:9). Tiempsa ukat qollqsa Jehová Diosar serviñatakiw apstʼasiñasa, ukat kuntï jiwasatakik munktan uks apanukuñasawa. Mä kullakajj akham siwa: “Diosar yupaychir familianwa jilsuwayta, ukat Jehová Diosatjja janiw mayninakjam amuykayätti. Diosarojj wal ajjsarayäta ukat janipuniw Jupajj askit uñjkitaniti sasaw amuyirïta”. Uka kullakajja, kunayman jan waltʼäwinakan uñjasisaw Diosar yupaychañan aynachtʼäna. Jupajj saskakiwa: “Jehová Diosarojj munasiskchiyätsa, janiw uñtʼkayätti. Ukampis Jupar walja kuti mayisisajja janiw ukham amuyjjayätti. Jehová Diosajj wali munasiñampiw jan waltʼäwinakat mistuñataki yanaptʼawayitu ukat kun lurañajas wakisi uks amuytʼayitu, ukham lurasajj mä wawarjamas irpkitaspa ukhamwa amuyasiyäta” sasa.

15. ¿Kunsa Jesusasa ukat Awkipas uñjapjje?

15 Diosan suma yatiyäwinakapjja, “taqe jaqenakaru yatiyanipjjam” sasaw Diosan angelapajj Pedroru ukat mayni apostolonakaru säna. Uksti mä milagro toqe carcelat qhespiykäna uka qhepatwa säna (Hech. 5:19-21). Sapa semana yatiyir mistuñajja, kuna toqenakattï Diosar yupaychañan amuykiptʼasiñasäki uka listankarakiwa. Jesusasa ukat Awkipasa janiw iyawsäwisak uñjapkiti, jan ukasti yatiyaskatasjja uñjapjjarakiwa (Apo. 2:19). Ukhamasti, Diosan arunakap yatiyañajj jakäwisan nayrankañapapuniwa.

16. ¿Jehová Diosar jakäwis katuyastan uka toqet kunatsa lupʼiñasa?

16 Jehová Diosar jakäwis katuyastan uka toqetwa lupʼiñasa. Taqe kunat sipansa Jehová Diosampi sum apasiñaw wali wakiskirejja. Jupar uñtʼapki ukanakarojj Jupajj uñtʼarakiwa (Isaías 44:5 liytʼasiñapawa). Kunjamsa Jehová Diosampejj apasiskta uk amuykiptʼasim ukat Jupampi sum apasiskakiñatakejj oracionan yanap mayisirakim. Ukatsti kuna urunsa bautisasiwayta uk amtasipunim, ukhamatwa Jehová Diosaru jakäwi katuyasitam jan armkätati.  Uka amtar puritamajj wali wakiskiripuniwa.

JEHOVÁ DIOSAT JAN JITHEQTAÑATAKEJJ AGUANTAÑASAWA

17. ¿Jehová Diosat jan jitheqtañatakejj kunatsa aguantañajj wakisi?

17 Galacia markankir jilat kullakanakar Pablojj qellqkäna uka arunakajja, aguantapjjañapatakiw chʼamañchtʼäna (Gál. 6:9). Jiwasajj ukhamarakiw aguantañasa, kunattejj jan waltʼäwinakanwa uñjasiñäni, ukampis Jehová Diosaw yanaptʼistani. Ukhamasti janipuni qollan ajayup mayisiñ armasiñäniti. Kunapachatï Jupajj llakisiñanakas kusisiñaru tukuyani ukat tʼaqhesiñanakasa sumankañar tukuyani ukhajja, chuymachtʼataw jikjjatasiñäni (Mat. 7:7-11). Aka toqet amuytʼañäni: Jehová Diosajj wali sumwa jiskʼa jamachʼinakarojj uñji. Uka jiskʼa jamachʼinakat sipansa jukʼampwa jiwasar munasistu, kunattejj jiwasajj Jupar munasiraktanwa ukat jakäwis Juparurakiw katuyastanjja (Mat. 10:29-31). Kuna jan waltʼäwinakan uñjasisas janipun aynachtʼañäniti. Diosar yupaychañ laykojj kunanaktï apanukuwayktan ukarojj janipun kunäkipansa kuttʼañäniti. ¡Jehová Diosamp uñtʼatäsajja, wali muspharkañ bendicionanakwa katoqañäni!

18. Jehová Diosar uñtʼjjasajja, ¿kuns jichhajj lurañama?

18 Jumatï jichhak Diosar uñtʼasin bautisasiwaystajja, ¿kun lurañamas wakisi? Jehová Diosarojj uñtʼaskakiñamawa ukat Diosar yupaychañansa jiltaskakiñamawa. ¿Ukat walja maranak bautisatäjjstasti? Ukhamarakiw Jehová Diosarojj jukʼamp uñtʼaskakiñama. Ukat Jupampi sum apasiñanjja, janipuniw ukharuki qheparañamäkiti. Jan ukasti, kunjamsa Jehová Diosampejj apasiskta ukjja, kuna toqenakattï aka yatichäwin yatjjatawayktan uka listarjamaw sapa kuti uñakiptʼasisin amuytʼasiñama, ukhamat munasiri Jehová Dios Awkisata ukat Amigosata jan jitheqtañataki (2 Corintios 13:5, 6 liytʼasiñapawa).