Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jehová Diosar munasipki ukanakatakejj janiw lanktʼasiñajj utjkiti

Jehová Diosar munasipki ukanakatakejj janiw lanktʼasiñajj utjkiti

“Arunakam munirinakajj suman jakasipjje, janiw kunas jupanakarojj tinkuykiti.” (SAL. 119:165)

1. ¿Kunjamsa mä tʼijurejj jan ukharuk qheparatap uñachtʼayäna?

KHÄ 1984 maranjja, Mary Decker sat tawaqojj 3.000 metronak tʼijüwin jupaw qorit lurat medalljja katoqani sasaw taqenejj amuyapjjäna. Ukampis janiw katoqkänti, kunattejj mayni tʼijurin kayupamp lanktʼasisaw tinküna. Ukat usuchjasitapatjja janiw tʼijuyjjapjjänti. Mary tawaqojj walpun jachäna. Ukampis janiw ukharuk qheparkänti. 1985 maranjja, tinkutapat janïr mä mara phoqhaskipanjja, wasitatwa tʼijuñatak wakichtʼatäjjäna ukat jupaw wali tʼijurit uka maran uñtʼatäna, jupat nayrajj janipuniw ukham jankʼak tʼijur tawaqojj utjkänti.

2. ¿Cristianonakajj kuna kasta tʼijüwinsa tʼijtanjja, ukat kuna amtampisa?

2 Cristianonakajj ukhamarakiw tʼijtanjja, ukampis janiw mä cheqpach tʼijüwin tʼijktänti ukat kunas kunäpan kawkharutï puriñasäki ukar puriñwa amttanjja. Ukampis uka tʼijüwinjja, janiw laq jalañakejj wakiskiti. Jan ukasti puriñkam aguantañaw wakisi. Ukajj janiw kʼachat tʼijuskaña jan ukajj samartʼasis samartʼasis jalaskaña sañ munkiti. Apóstol Pablojj Corinto markankir cristianonakar apaykäna uka nayrïr cartapanjja, tʼijurinakatwa parläna, uka markajj kunayman atiptʼasïwinak utjatapat uñtʼatänwa. Pablojj akham sänwa: “Jumanakajj yatipjjtawa, mä atipasiñanjja taqeniw jalapjje, ukampis maynikiw premio katoqejja. Jumanakasti jalapjjamaya premio katoqañkama” sasa (1 Cor. 9:24).

3. ¿Khitinakas wiñay jakañ premio katoqapjjaspa?

3 Bibliajj uka tʼijüwin jalañasatakiw chʼamañchtʼistu (1 Corintios 9:25-27 liytʼasiñapawa). Premiojj wiñay jakañawa; ajllitanakatakejj alajjpachana ukat jupanakamp chika tʼijurinakatakisti aka Oraqena. Uka tʼijüwejja, janiw mayni tʼijüwinakjamäkiti, kunattejj khitinakatï puriñkam tʼijupkani ukanakajj taqeniw premio katoqapjjani (Mat. 24:13).  Ukat kunjamtï tʼijupjjañapäki ukham jan tʼijupki ukat kawkharutï puripjjañapäki ukar jan puripki ukanakakiw premio jan katoqapkiti. Ukhamarusa, uka tʼijüwinakwa wiñay jakañ jikjjatsna.

4. ¿Kunatsa wiñay jakañ katoqañataki jalañajj chʼamakïspa?

4 Uka tʼijüwinjja, kawkharutï puriñasäki ukar puriñajj chʼamakiwa, kunattejj jiwas pachpa apnaqasiña ukat tʼijüwejj janiw inamayäkaniti sasin confiyañaw wakisi. Uka tʼijüwinjja, Jesucristo mayakiw jan lanktʼasisa, mä arunjja, jan pantjasis tukuykam tʼijuwayi. Ukampis Jesusan arkirinakapajja, “taqeniw walja pantjasïwinak lurtan” sasaw Santiagojj säna (Sant. 3:2). Uka arunakajj cheqapunïskiwa. Janiw pantjasirïkti ukat mayninakan pantjasitanakapajj janiw kamachkitaspati sasin janiw khitis siskaspati. Inas awisajj lanktʼassna, kʼachak jalsna jan ukajj tinksna, ukampis sarthapisajj tʼijuskakiñasawa. Yaqhep cristianonakajj tʼijkasinwa lanktʼasiwayapjje ukat sarthapiñatakejj yanaptʼayasipjjañapaw wakisïna, ukhamat tukuykam tʼijuskakiñataki. Ukhamasti, inas awisasa jan ukajj walj kutis lanktʼasisin tinkchiñäni (1 Rey. 8:46).

Jumatï tinkstajja, yanaptʼayasim ukat sartarakim

LANKTʼASÏTA UKHAS TʼIJUSKAKIM

5, 6. 1) Cristianonakatakejj janiw lanktʼasiñajj utjkiti sasajja, ¿kunatsa sissna, ukat kunjamsa ‘sartapjje’? 2) ¿Yaqhepajj tinkusin kunatsa jan sartjjapjje?

5 Maynejj Diosar yupaychañ toqet aynachtʼjje ukhajja, inas lanktʼasiwa jan ukajj tinkuwa, mä arunjja, aynachtʼiwa sasin jupat sissna, ukat uka arunakajj pachpakïkaspas ukham inas amuyaraksna. Ukampis janiw ukhamapunïkiti. Proverbios 24:16 (NM) qellqatat amuytʼañäni, ukan akham siwa: ‘Aski jaqejj paqallq kutis tinkchispajja, sartaskakiniwa; ukampis jan wali jaqenakarojj jan waltʼäwinakaw lanktʼayani’ sasa.

6 Khitinakatï Diosar taqe chuym atinisipki ukanakajja, inas jan waltʼäwi utjatapata jan ukajj jan wali amtar puripjjatapat lanktʼasipjjchi jan ukajj tinkupjjchi. Ukampis Diosajj jankʼakiw jupanakar yanaptʼi, janiw ukhamak jaytkaniti. Jupaw taqe chuyma serviskakiñasatakejj yanaptʼistani sasaw confiytanjja. Cheqansa, ukajj Jehová Diosar munasipki ukanakatakejj wali chuymachtʼkayapuniwa. Ukampis jan wali jaqenakajj tinkusajj janiw sartañ munapkiti, janirakiw Diosan qollan ajayupampi ni markapampi yanaptʼayasiñs thaqhapkiti ni munapkisa.  Ukampis Jehová Diosan kamachinakapar munasipki ukanakatakejj janiw lanktʼasiñajj utjkiti, mä arunjja, janipuniw kunas wiñay jakañ katoqañatak tʼijüwit qheparaykaspati (Salmo 119:165 liytʼasiñapawa).

7, 8. Maynejj lanktʼaschini ukhasa, ¿kunjamsa Diosampejj askit uñjatäskakispa?

7 Yaqhep jilat kullakanakajj pantjasisaw juchar purtʼasipjje, ukampis janiw jachʼa juchanakäkiti, awisajj walj kutiw ukhamar purtʼasipjje. Ukampis cheqpachapuni arrepentisini ukat Diosar taqe chuyma serviñataki chʼamachasini ukhajja, Jehová Diosajj jupar askit uñjaskakiniwa. Kunjamsa Diosajj nayra Israel markar uñjäna uka toqet yatjjatasaw uk sumpach amuysna (Isa. 41:9, 10). Proverbios 24:16 qellqatan siski uka arunakarjamajja, janiw tinkuñajj añcha jan walïkaspas ukham parlkiti, jan ukasti khuyaptʼayasiri Diosasampi yanaptʼayasisajj sartsnawa, ukwa qhanstayi (Isaías 55:7 liytʼasiñapawa). Jehová Diosasa ukat Jesucristosa, sartañasatak chʼamañchtʼasaw jiwasar confiyapjjatap uñachtʼayistu (Sal. 86:5; Juan 5:19).

8 Mä tʼijuritï tʼijkasajj lanktʼasisin tinkuspa ukhajja, inas jankʼak sarthapisin kawkharutï puriñapäki ukar puriñkam tʼijuskakchispa. Khitinakatï wiñay jakañ katoqañatak tʼijusktan ukanakajja, ‘kuna horasasa jan ukajj kuna urusa’ tʼijuñajj tukuyani uk janiw yatktanti (Mat. 24:36). Ukhamäkchisa, janitï añch lanktʼaskchiñänejja, tʼijuskakiñäniwa ukat kawkharutï puriñasäki ukharus purirakiñäniwa. Ukampis jan lanktʼasiñatakejj ¿kuns lursna?

KUNANAKAS LANKTʼASIYISTASPA

9. ¿Kuna phesqa toqetsa yatjjataskañäni?

9 Kunanakas lanktʼasiyistaspa uk phesqa toqet amuytʼañäni: pantjasitanakasa, jañchin munañanakapa, jilat kullakanakan jan cheqapar uñjatapa, tʼaqhesiyatäña jan ukajj arknaqatäña ukat jilat kullakanakasan pantjasitanakapa. Ukampis lanktʼasstan ukhajja, ak amtapuniñäni, Jehová Diosajj wali paciencianiwa. Janipuniw Jupajj jankʼaki jaytanukkistuti.

10, 11. ¿Kunar atipañatakis Davitajj chʼamachasiñapäna?

10 Pantjasitanakasajja, mä tʼijurin thakipan qalanakajj uñstki ukampi sasiwa. Rey Davitata ukat apóstol Pedron sarnaqäwipat yatjjatasaw pä pantjasïwinakat amuytʼañäni. Davitajj janiw jupa pachpa apnaqasirïkänti, Pedrosti jaqenakaruw ajjsarirïna.

11 David reyejj janiw jupa pachpa apnaqasirïkänti. Ukjja, Nabal chachajj jan wali arunakamp jupat parlkäna, ukat Davitajj niya jan walinak lurañampiskäna ukhaw uñachtʼayäna. Qhepatjja, kunanaktï Betsabé warmimpi juchar purtʼasis lurkäna ukharakiw jupa pachpa jan apnaqasirïtap uñachtʼayäna. Davitajj ukhamäkchïnsa, Jehová Diosar kusisiyañatakejj chʼamachasiskakïnwa. Yaqhanakampi yanaptʼataw Diosar yupaychañ toqetjja nayrar sartaskakïna (1 Sam. 25:5-13, 32, 33; 2 Sam. 12:1-13).

12. Pedrojj lanktʼaskchïnsa, ¿kunjamsa wiñay jakañ jikjjatañatakejj tʼijuskakïnjja?

12 Apóstol Pedrojj jaqenakaruw ajjsarirïna, ukat janis Jehová Diosatsa Jesusatsa jitheqtkchïnjja, awisajj jucharuw purtʼasïna. Amtañäni, kims kutiw jaqenak nayraqatan Jesusar jan uñtʼir tuküna (Luc. 22:54-62). Uka qhepatjja, janiw suma cristianjam amuykänti, kunattejj jan judiöpkäna uka jilat kullakanakarojj janiw circuncidat judío jilat kullakanakarjam uñjkänti. Ukampis apóstol Pablojj janiw ukham amuykänti, jupatakejj tama taypin janiw yaqhachasiñajj utjañapäkänti. Ukhamajj Pedron amuyunakapajj jilat kullakanakar janïr mayjtʼaykipanjja, Pablojj qhana arunakampiw ukjjat ewjjtʼäna (Gál. 2:11-14). ¿Ukampejj jiskʼachapunituwa sasat Pedrojj wiñay jakañ jikjjatañatak tʼijüwi jaytawayjjpachäna? Janiwa. Jan ukasti, kuntï Pablojj ewjjtʼawaykäna uka toqet sum amuytʼäna ukat ukarjamaw lurarakïna, ukhamatwa wiñay jakañ jikjjatañatak tʼijuskakïna.

13. ¿Kunjamatsa usuntañajj lanktʼayistaspa?

13 Usuntañaw jakäwisan jan waltʼayarakistaspa, ukatwa wiñay jakañ jikjjatañatak tʼijüwin jan tʼij-jjsnati. Japón markanjja, mä kullakajj 17  mara bautisatäjjäna uka qhepatwa usuntäna, ukajj wal llakisiyäna, ukatwa Diosar yupaychañ toqet jukʼat jukʼat aynachtʼäna. Tiempompejj janiw yatiyiris mistjjänti. Ukat pä irpir chuymaniw juparojj visittʼapjjäna, jupanakamp chʼamachtʼataw wasitat tantachäwinakar sarjjäna. Jichhajj akham siwa: “Kunja munasiñampis jilatanakajj katoqtʼapjjetu ukajj chuym chʼalljjtayapunituwa” sasa. Kullakasajj wasitatwa jichhajj tʼijuskaki.

14, 15. Kunapachatï jan wali amuyunakajj jutistani ukhajja, ¿kun lurañas wakisispa? Mä uñachtʼäwimp qhanañchtʼam.

14 Jañchin munañanakapajj walja jilat kullakanakaruw tinkuyi. Kunapachatï jan wali munañanakasajj Jehová Diosan kamachinakaparjam sarnaqañat pantjasiyirjam amuyasiñäni ukhajja, amuyusansa, sarnaqäwisansa, Jehová Diosar yupaychañ toqensa, qʼom sarnaqañatakiw wal chʼamachasiñasa. Kunanakatï juchar puriyirjamäktam, inas amparächi jan ukajj nayrächi, uk apsusina jan ukajj khareqasin liwtam sasaw Jesusajj säna. Ukhamasti, ¿kuna jan wali luräwinakatï jan ukajj amuyunakatï wiñay jakañ jikjjatañatak tʼijüwisat apsustaspa ukanak chhaqtayañajj janit wakiskaspa? (Mateo 18:8 liytʼasiñapawa.)

15 Mä jilatajj Jehová Diosar yupaychir familiansa jilsuwaykchejja, chacha masipar munapayañ amtanïnwa, ukat uka amuyup apanukuñatakejj waynitutpachaw chʼamachasiskäna. Jupajj akham siwa: ‘Janiw kawkinsa sum jikjjataskayätti, janirakiw waltʼaskayätti. Ukat 20 maranïkayäta ukhajja, precursor regular ukat irpir chuymaninakan yanapiripjamaw taman irnaqtʼayäta. Ukatjja, mä jucharuw purtʼasta ukat cheqañchataw uñjasta, ukampis irpir chuymaninakaw yanaptʼapjjetu’ sasa. ¿Kunas sartañataki yanaptʼäna? Jehová Diosar mayisiña, Bibliat yatjjataña ukat mayninakar yanaptʼañataki chuym churaña. Ukat mä qhawqha maranaka qhepat akham siwa: “Awisajj uka jan wali amuyunakajj pʼeqejar kuttʼasinkakiwa, ukampisa janiw uka amuyunakamp atipayaskti. Kunapachatï yantʼanakajj utjki ukhajj Jehová Diosajj ukanakat mistuñjja kunjamatsa yanaptʼapunistaniwa, ukwa yateqawayta. Ukhamajj jan wali amuyunakar atipjirjamätaj Jupajj sum amuypacha. Taqe jan walinak aguantatajatjja, jutïr pachanwa askinak katoqä. ¡Ukwa muntjja! Uka uru puriniñapkamajj chʼamachasiskakiwa” sasa. Uka jilatajj wiñay jakañ katoqañatak tʼijüwit janiw qheparañ munkiti.

16, 17. 1) Janis cheqapar uñjapkaspa ukhamwa mä jilatajj amuyasïna, ¿kunas jupar yanaptʼäna? 2) Janitï lanktʼasiñ munkstanjja, ¿khititsa yateqasiñasa?

16 Jilat kullakanakan jan cheqapar uñjatapajj lanktʼayarakistaspawa. Francia markankir mä jilatat amuytʼañäni. Jupasti irpir chuymanjamaw taman yanaptʼaskäna ukat jilat kullakanakamp janis cheqapar uñjatäkaspa ukhamwa amuyasïna. Ukatwa tantachäwinakar jan sarjjänti ni yatiyiris mistjjänti. Ukatjja pä irpir chuyman jilatanakaw jupar visittʼapjjatayna ukat wali amuyumpiw kuntï jupajj siskäna uk istʼapjjatayna. Jehová Diosar confiyañapatakiw chʼamañchtʼapjjäna ukat taqe kunat sipansa Diosar kusisiyañajj wali wakiskirïtapwa qhanstayapjjarakïna. Uka jilatasti, ewjjtʼanak istʼasajj jankʼakirakiw wiñay jakañ katoqañatak tʼijüwir kuttʼanjjäna. Jichhajja, wasitatwa taman luräwinakapan yanaptʼaski.

17 Cristianonakajja, taqeniw Jesucristot yateqasiñasa. Juparuw Jehová Diosajj tama Pʼeqtʼañapatak uttʼayawayi, janiw pantjasir jaqenakar uttʼayawaykiti. Jupan “nayranakapasti aqaskir ninjamarak[iwa]”, ukat taqe kunsa cheqaparupuniw uñji, janipuniw jaqejj ukham uñjksnati (Apo. 1:13-16). Amuytʼañataki, inas maynin jan wali luratap amuyassna, ukampisa jiwasakiw ukham amuyasksna, Jesusajj ukhamwa amuyi. Ukat taman jan waltʼäwinakapjja tiempoparu ukat cheqaparuw uñjaraki. Ukhamasti, janipun jilat kullakanakan jan wali luratanakapasa jan ukajj amtäwinakapas lanktʼaykistpati.

18. ¿Kunjamsa jan waltʼäwinakan aguantsna?

18 Kunanakas lanktʼasiyistaspa uk pä toqempitwa yatjjataskañäni: tʼaqhesiyatäña jan ukajj arknaqatäña ukat jilat kullakanakasan pantjasitanakapa.  Phawir mä jaqet parlkasajja, akham sasaw Jesusajj säna: “Aru layku tʼaqhesiñasa, uñisïwisa, jutipanjja, jankʼakirakiw lankti” sasa. Ukajj khititsa jutaskpan, familiatäpasa, uta jakʼankiritäpasa jan ukajj marka apnaqeritäpasa, khitinakatï ‘jupapachpa jan saphinïki’, mä arunjja, ajay toqen aynachtʼatäpki ukanakaruw lanktʼasiyaspa (Mat. 13:21, MT). Ukampis Jehová Diosattï jan jitheqtkañänejja, Diosan Apnaqäwipat suma yatichäwinakajj chuymaruw purtʼistani ukat Diosar yupaychañ toqet suma saytʼatäñäniwa, wali saphintat qoqar uñtata. Ukat kunapachatï jan waltʼäwinakajj utjkani ukhajja, “taqe kunatejj sumäki yupaychañatakïki ukanakat[wa]” Diosar mayisis lupʼiñasa (Filipenses 4:6-9 liytʼasiñapawa). Jehová Diosaw jan waltʼäwinakan aguantañatak yanaptʼistani ukat mayninakan luratanakapas janiw lanktʼaykistaniti.

Janipun kunas tukuykam tʼijuñat qheparayistpati

19. Mayninakajj chuym ustʼaychistpasa, ¿kunjamsa ukajj jan lanktʼayistaspa?

19 Yaqhep jilat kullakanakajj mayninakan pantjasitanakap laykuw Jehová Diosaru jan yupaychjjapjjeti, ukajj wali llakkañapuniwa. Inas maynejj kuns lurchispa, ukampisa ukajj maynin amuyataparjamajj jan ukajj concienciaparjamajj janiw walïkaspati, ukaw yaqheparojj lanktʼasiyi (1 Cor. 8:12, 13). Maynitï chuym ustʼaychistojja, ¿colertʼasisat cheqa yupaychäwit jitheqtjjañäni? Jan yaqhanakarojj juchañchapjjamti ni jumanakan askinakamaksa thaqhapjjamti, jan ukasti perdonasirïpjjam sasaw Bibliajj ewjjtʼistu (Luc. 6:37). Maynin luräwinakapatï lanktʼayirjam amuyastan ukhajj akham sasaw jisktʼasiñasa: “¿Amtajarjamakit mayninakar juchañchtjja? ¿Jilat kullakanakan pantjasitanakap laykuti cheqa yupaychäwit jitheqtjäjja?” sasa. Kunsay mayninakajj lurasipkpan, Jehová Diosar munasitas laykojj kawkharutï puriñasäki ukar puriñkam tʼijuskakiñasawa.

JAN QHEPAQTAS TʼIJUSKAKIM

20, 21. Wiñay jakañ katoqañatak tʼijüwinjja, ¿jumajj ‘tukuykam jalañatakiti’ amtta?

20 ¿Jumajj ‘tukuykam jalañatakiti’ amtta? (2 Tim. 4:7, 8.) Ukhamächi ukhajja, kunanakas lanktʼasiyiristam uk yatiñataki ukat amuytʼasiñamatakejja, Biblia ukat Bibliat apstʼat qellqatanak Jehová Diosan markapajj apayankistu ukanakat yatjjatam. Ukat Jehová Diosaru qollan ajayup mayisim, ukaw Diosar yupaychañ toqet suma saytʼatäskakiñatak yanaptʼätam. Ak amtapunim, lanktʼasïta jan ukajj tinküta ukhasa, kawkharutï puriñamäki ukar puriñkam tʼijuskakismawa. Ukat pantjasitanakamatsa yateqarakismawa, ukhamat jukʼampi suma tʼijuskakiñataki.

21 Wiñay jakañ katoqañataki tʼijüwinjja, janiw maynejj ukhamaki qheparañapäkiti, jan ukasti chʼamachasiñapawa. Janiw kunjamatï mä autor sarjjatawayasin kawkharutï puriñasäki ukar puriykistu ukhamäkiti. Sapa mayniruw jalañasajj waktʼistu. Ukat Jehová Diosaw ‘sumankañap’ churistani (Sal. 119:165). Khitinakatï tukuykama tʼijuñatak amtawayktan ukanakarojja, Jehová Diosaw jichhasa jutïrinsa bendicistani (Sant. 1:12).