Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 ¿KUNJAMSA JAN WALINAKAJJ ASKICHASINI?

Diosan Reinopaw sum jakasiñ apanini

Diosan Reinopaw sum jakasiñ apanini

Padrenuestro oracionan mayktan uka Reinojja, niyaw sumankaña ukat mayachtʼata jakasiñ apanini. Kunjamtï Salmo 72:7 qellqatan siskejja, “sumankañasti” jilarkiriw aka oraqen utjani. Ukampis ¿kunapachas Diosan Reinopajj apnaqañ qalltjjani? ¿Kunjamsa apnaqani? ¿Kunjamsa uka gobiernon yanaptʼap katoqasma?

¿KUNAPACHAS APNAQJJANI?

Diosan Reinopajj niya apnaqañ qalltañampëjjani ukhajja, kuna señalanakas utjani ukwa Bibliajj qhanañchi. Ukanakat yaqhepajj akanakawa: oraqpachan guerranaka, manqʼat pistʼañanaka, usunaka, terremotonaka, jan wali luräwinakan jiljjattatapa (Mateo 24:3, 7, 12; Lucas 21:11; Apocalipsis 6:2-8).

Yaqha profeciajj akham sarakiwa: “Qhepa urunakanjja chʼama tukuña jan wali tiemponakaw utjani. Jaqenakajj akhamäpjjaniwa: jupanak pachpa munasirinaka, qollqe añcha munirinaka, [...] awkiparus taykaparus jan istʼirinaka, jan yuspärasirinaka, jaqe masipar jaytanukurinaka, jan munasirinaka, jan kuna acuerdorus mantañ munirinaka, kʼarintirinaka, munañapampi apnaqayasirinaka, qhorunaka, kunatï walïki uk uñisirinaka, [...] jachʼañchasirinaka, Diosar munasiñat sipansa pachpa munañapak thaqerinaka” sasa (2 Timoteo 3:1-4). Ukham jaqenakajj utjapunïnwa, ukampis jichhajj jukʼampëjjewa.

Uka profecianakajja, 1914 marat aksaruw phoqasiñ qalltawayi. Historia toqet yatjjatirinakasa, politiconakasa, qellqerinakasa, ‘uka marat aksaruw aka mundojj mayjtʼawayi’ sasaw sapjje. Amuytʼañataki, danés aru parlir Peter Munch chachajj akhamwa qellqäna: “1914 maran jachʼa guerrajj utjawayki ukat aksaruw jakäwejj qʼal mayjtʼawayi. Nayrar sartkasajja, [...] jan walinaka, uñisisiñanaka, ajjsarayasiñanakakiw oraqpachan utjawayjje” sasa.

Ukampis suma yatiyäwinakaw utjaraki. Jan walinakajj tukusjjani uka qhepatjja suman jakasiñaw utj-jjani. Qhanañchktan ukanakajja, Diosan Reinopajj niyaw aka oraqpachar apnaqjjani ukwa amuytʼayistu. Uka toqet Jesusajj akham sänwa: “Reinon aka suma yatiyäwinakapajja aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mateo 24:14).

Uka suma yatiyäwinakatwa Jehová Diosan Testigonakapajj jaqenakaru yatiyapjjta. Yatiyañataki. Jehová Diosan Reinopat Yatiyaski sat wali uñtʼata revistajja, 338 ukha arunakanwa utjapjjetu. Uka revistanjja, kunanaksa Diosan Reinopajj aka oraqetakisa taqe jaqenakatakis lurani, ukanakatwa parli.

¿KUNJAMSA AKA ORAQJJAR APNAQJJANI?

Uka jisktʼar qhanañchañatakejja, kunanakas pasani uk pusi toqet uñjañäni:

  1. Diosan Reinopanjja, janiw mä políticos apnaqkaniti.

  2. Aka oraqpachankir politiconakajj janiw gobiernop jaytañ munapkaniti, inamayaw Diosan Reinop contra saytʼapjjani (Salmo 2:2-9).

  3. Niyakejjay uka gobiernonakajj gobiernop jan jaytañ munapkchinejja, Diosan Reinopaw jupanakar tukjani (Daniel 2:44; Apocalipsis 19:17-21). Mundpachan uka jan waltʼäwi utjkani ukajj Armagedón sasin uñtʼatawa (Apocalipsis 16:14, 16).

  4. Diosan Reinopampi apnaqatäñ munirinakajja, Armagedón jachʼa guerrat salvasipjjaniwa, sumankañanwa machaq mundon jakasipjjarakini. Biblianjja, ‘walja jaqenaka’ sasaw jupanakat qhanañchi, ukhamajj walja millón jaqenakaw ukan utjpachäni (Apocalipsis 7:9, 10, 13, 14).

 ¿KUNJAMSA UKA GOBIERNON YANAPTʼAP KATOQASMA?

Diosan Reinopampi apnaqatäñatakejja, Diosaruw nayraqat uñtʼañasa. Mä kutejja, Jesusajj Diosar mayiskasajj akham sänwa: “Khitinakatï wiñay jakañ katoqapkani ukanakajja juma sapa cheqpach Diosar uñtʼasipkakiñapawa jumajj khitankta uka Jesucristorus ukhamarakiw uñtʼasipkakiñapa” sasa (Juan 17:3).

Diosar uñtʼañajja, walja toqenakanwa yanaptʼistu. Ukanakat pay uñjañäni. Maya, Diosar jukʼamp confiyañatakiw yanaptʼistu. Diosat sum yatjjatasin confiyatasajja, ‘Diosan Reinopajj utjaskapuniwa, niyaw apnaqjjani’ sasin taqe chuyma confiyañatakiw yanaptʼistu (Hebreos 11:1). Paya, Diosarusa jaqe masisarus jukʼamp munasiñatakiw yanaptʼistu. Diosar munasiñajja, Jupar taqe chuyma istʼañatakiw yanaptʼistu. Jaqe masisar munañasti, Jesusan ewjjtʼapar istʼañatakiw yanaptʼarakistu. Jupajj akham sänwa: “Kunjamtï jaqenakampi uñjatäñ munapktajja, ukhamaraki jumanakajj jupanakar uñjapjjam” sasa (Lucas 6:31).

Diosajj mä munasir awkjamajj kusisit jakasiñaswa muni. Bibliajj ukham jakasiñarojj ‘cheqpach jakaña’ sasaw saraki (1 Timoteo 6:19). Jichha tiempon janiw ukham jakasktanti. Walja jaqenakajja, sapüruw jan walinakan uñjasipjje. ‘Cheqpach jakasiñajj’ kunjamänisa uk amuyañatakejja, Diosan Reinopajj kuna musparkañanaksa Jupan apnaqatäpkani ukanakatakejj lurani, uk mä qhawqha uñjañäni.

Diosan Reinopanjja, janiw ajjsarayasis jakasjjañäniti, manqʼañas taqenitakiw utjani.