Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 4 JISKTʼA

¿Kunsa pantjasisajj luriristjja?

¿Kunsa pantjasisajj luriristjja?

¿KUNATSA UK YATIÑAJJ WAKISI?

Jumatï pantjasitanakam arsusïta ukhajja, taqe kun phoqeri ukhamarak confiykañ jaqëtamwa mayninakajj amuyapjjani.

¿KUNSA JUMAJJ LURASMA?

Antonio waynitut amuytʼañäni, jupajj amigonakapampi pelot anatkasaw vecinopan auto ventanap tʼunsutayna.

Jumatï Antonio waynitüsma ukhajja, ¿kuns lurasma?

NAYRAQAT SUM AMUYTʼASIM

AKANAKWA LURASMA:

  1. Jan uñjayasiñatakejj tʼijtjjasmawa.

  2. Yaqharuw juchañchasma.

  3. Kunatï paski uk vecinomar yatiyasajja, ‘pagjjämaw’ sasmawa.

Inas jan uñjayasiñatak tʼijtjjañ munchisma. Ukampis arsuñamaw jukʼamp askïspajja.

 ¿KUNATSA PANTJASITAM ARSUÑAMAJJ WAKISI?

  1. Ukham lurañajj wali askiwa.

    Bibliajj akham siwa: ‘Taqe kunans sum sarnaqapjjañäni’ sasa (Hebreos 13:18).

  2. Jumatï pantjasitam yatiyäta ukhajja, perdonapjjeristamwa.

    Bibliajj akham siwa: “Khititejj juchap imantaskani ukajja, janiw nayrar sarkaniti, ukampis khititejj juchap arsusisina jaytanukjjani, ukasti perdonatäjjaniwa” sasa (Proverbios 28:13).

  3. Jukʼampisa, Jehová Diosaruw kusisiyäta.

    Bibliajj akham siwa: “Jumarojj qʼoma chuymaw kusisiytamjja” sasa (Salmo 51:6).

Karina tawaqot parltʼañäni, jupajj auto jan sum apnaqatapat ‘multa pagañamaw’ sapkatayna ukjja, janiw awkipar yatiykänti. Ukampis qhepatjja, ukajj yatisjjänwa. Jupajj akham siwa: “Auto jan sum apnaqatajat multa pagañamaw sapkitäna ukjja, niya mä mara qhepat tatajajj yatjjänwa. Jan walirupuniw purtʼasta” sasa (jupajj 20 maraniwa).

¿Kunsa ukajj yatichistu? Karinajj akham siwa: “Pantjasitanakas imtʼañ munañajja, jukʼamp jan waliruw puriyistaspa. Ukham luratasatjja, qhepatakwa wal amtassna” sasa.

PANTJASITANAKAMATJJA, YATEQASMAWA

Bibliajj akham siwa: “Taqeniw walja pantjasïwinak lurtan” sasa (Santiago 3:2). Kunjamtï uñjktanjja, pantjasitanakas yatiyasajj altʼat chuymanïtaswa ukat amuytʼasir jaqëtaswa uñachtʼaysna.

Pantjasitanakamat yateqañamawa. Vera sat mä tawaqetajj akham siwa: “Pantjasitanakajajj jan mayamp uka pachpa lurañatakiw yanaptʼitu. Jukʼamp suma jaqëñatakis yanaptʼarakituwa. Mayanjja, janiw wasitat uka pachpa lurjjäti” sasa. Akhamanakan uñjasisma ukhajj ¿kunsa lurasma?

Awkimat bicicleta maytʼasis pirtjayarapisma ukhajja, ¿kunsa lurasma?

  • Janiw yatiykiristti, inas jan amuyaskchiniti.

  • Kunatï paski ukjja, taqpach yatiyirista.

  • Kuntï lurkta ukjja, yatiyiristwa, ukampis yaqharuw juchañchirista.

Jan estudiatam layku examenan aplazasisma ukhajja, ¿kunsa lurasma?

  • ‘Examenajj wali chʼamänwa’ sasaw sirista.

  • ‘Nayan jan sum wakichtʼasitajatwa ukhaman uñjasta’ siristwa.

  • ‘Yatichirejj naya contrawa’ sasaw sirista.

Nayra pantjasitanakasat lupʼiskakiñajja, espejot qhepäjj uñtasas auto apnaqksna ukhamäspawa.

 Jichhajj akham amuytʼañäni, awkimasa yatichirimasa pantjasitanakam jankʼak yatiyatamatjja, ¿kunsa jumat amuyapjjaspa? Pantjasitanakam jan arskasma ukhajja, ¿kunsa amuyapjjarakispa? Jumatï jupanakäsma ukhajja, ¿kunsa amuyasma?

Kunansa pasïr marajj pantjasta uka toqet mä rat amuytʼasim, ukat aka jisktʼanakar qhanañchtʼam:

¿Kunansa pantjasta? ¿Kunsa lurayäta?

  • Imtʼañwa munayäta.

  • Yaqharuw juchañchtjja.

  • Jankʼakiw yatiyta.

Pantjasitam jan yatiyksta ukhajja, ¿kunjamakis jikjjatasiyäta?

  • Khusakiw jikjjatasiyäta, munañajaruw lurta.

  • Janiw sum jikjjataskayätti. Kunatï cheqäki uk arsuñajänwa.

¿Kun lurañamas jukʼamp askïspäna?

¿Kunsa pantjasitamat yateqta?

¿JUMAJJ KAMSASMASA?

¿Kunatsa awisajj pantjasitanakas yatiyañajj chʼamäspa?

Pantjasitanakam sapa kuti imtʼasma ukhajja, ¿kunsa mayninakajj jumat amuyapjjani?

Pantjasitanakam yatiyasma ukhajja, ¿kunsa amuyapjjarakini? (Lucas 16:10.)