Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 6 JISKTʼA

Jan walinak luram satajj ¿kamachiristsa?

Jan walinak luram satajj ¿kamachiristsa?

¿KUNATSA UK YATIÑAJJ WAKISI?

Kunarutï iyawskta ukarjam sarnaqäta ukhajja, jumaw kun lurañsa amtäta, janiw mayninakajj munañaparjam apnaqapkätamti.

¿KUNSA JUMAJJ LURASMA?

Albertot amuytʼañäni, pä amigopan jakʼachasinir uñjasajja, jupajj wal mayjtʼasi. Aka semanajja, pay kutiw cigarro fumayañ munapjjatayna. Jichhampejj kims kutëjjaniwa.

Maynïrejj akham siwa:

“¿Sapaki? Jan llakit sarnaqañamatak may churäma” sasa.

Ukat bolsillopat apsusaw Albertor mä cigarro churañ muni.

Albertosti, cigarro aptʼat uñjasajj jukʼampiw mayjtʼasi. Ukat akham sarakiwa:

“Janiw nayajj munkti, niy yatjjtawa...”

Ukhamaruw maynïr waynajj akham saraki: “¡Kamachtamsa! ¿Ajjsartati?” sasa.

“Janiwa, janiw ukäkiti” sasaw Albertojj ajjsartʼayasis saraki.

Jupajj Alberton kallachipar amparap loqjjattʼasaw suma arumpi akham saraki: “Jan ajjsaramti, mä cigarrokiwa” sasa.

Maynïr waynasti cigarro churañatakiw jakʼachasi, ukat akham sarakiwa: “Janiw khitis ak yatkaniti, jiwasakiw yatiñäni” sasa.

Jumatï ukhaman uñjasisma ukhajja, ¿kuns lurasma?

 NAYRAQAT SUM AMUYTʼASIM

¿Alberton masinakapajj sum amuytʼasisat ukham lurapjjpacha? ¿Janit yaqhan amtayatakejj taqe kuns lurapkpacha? Jupanakajj kuntï mayninakajj lurapki ukakwa lurapjje. Amigonakapamp suma uñjatäñ laykukiw apnaqayasipjje.

Jumatï ukhaman uñjasisma ukhajja, ¿jupanakjamat yaqhanakampi apnaqayasiñ munasma, jan ukajj ukar saykatañatakich chʼamachasisma?

  1. WAKICHTʼASIM

    Bibliajj akham siwa: “Chʼikhi jaqejj jan waltʼaña uñjasinjja jaltjjewa, ukampis jan amuytʼasir jaqejja mantaskakiwa, ukatsti ñanqha luräwinak jikjjati” sasa (Proverbios 22:3).

    Awisajja, kuna jan walinakansa uñjasisma ukajj qhana amuykayawa. Mä qawqha waynanakar cigarro fumaskir uñjasma ukhajja, ¿kunsa lurasma? Janïräkipanwa kamsätas uk wakichtʼasisma.

  2. AMUYTʼASIM

    Bibliajj akham siwa: ‘Qʼoma conciencianïpjjañamawa’ sasa (1 Pedro 3:16, NM).

    Akham jisktʼasim: “Mayninakjam taqe kuns lurirista ukhajja, ¿kunjamakis jikjjatasirista?” sasa. Yateqer masinakamajj mä qawqha tiempo askitjam uñjapjjeristamwa. Ukampis qhepatjja, ¿kunjamakis jikjjatasïta? ¿Masinakamampi sum uñjayasiñ laykukit jan walinak luräta? (Éxodo 23:2.)

  3. JUMAW AMTJJAÑAMA

    Bibliajj akham siwa: “Yatiñan jaqejj jan walirojja ajjsariwa” sasa (Proverbios 14:16).

    Taqeniruw mä amtar puriñajj waktʼistu, ukat ukham amtatasat kunjamanakansa uñjasiñäni uksa, amuyasiñasarakiwa. José, Job, Jesús jupanakajja, suma amtanakaruw puripjjäna sasaw Bibliajj qhanañchi, ukampis Caín, Esaú ukat Judas chachanakajj janiw suma amtar puripkänti sasaw qhanañcharaki. Jumasti, ¿kunsa lurarakïta?

Bibliajj akham siwa: “Khititejj jukʼa apnaqañanakan cheqapäki ukajj, walja apnaqañanjja cheqaparakïniwa” sasa (Lucas 16:10). Kunjamanakansa uñjasïta uk sum amuytʼasisin mä amtar purjjsta ukhajja, mayninakar uk yatiyañajj janiw chʼamäkaniti, ni inamayäkarakinisa.

Kuntï amtkta uk yatiyañatakejj janiw wal parlañamajj wakiskapuniti. Jan ukasti, jan pächasisaw ‘janiw’ sañama. Jan ukajj akhamwa sarakisma:

  • “Ukjja janiw nayajj lurkäti.”

  • “Janiw nayajj ukanak lurirïkti.”

  • “Yatjjaraktasä, janiw nayajj ukanak lurkiristti.”

Qhana arunakampi jankʼaki jaysañajj wali askiwa. Ukhamti luräta ukhajja, masinakamajj janiw jan walinak luram sisjjapjjätamti.

 NAYAT SAWKASIPJJASPA UKHAJJ ¿KUNSA LURIRISTJJA?

Jumatï masinakamar istʼäta ukhajja, munañaparjamaw jupanakajj apnaqapjjätam.

Inas masinakamajj akham jiskʼachapjjeristam: “¡Kamachtamsa! ¿Ajjsartati?” sasa. Uka arunakampiw yaqhep wayn tawaqonakajj mayninakar jiskʼachapjje. Ukham jiskʼachatajj ¿kamsasmasa? Akanakwa lurasma:

  • Suma arumpiw jaysasma. Inas akham sischisma: “Ukajj cheqäskapuniwa” sasa, ukat kunatsa ukham sista ukwa mä jukʼa qhanañchtʼarakisma.

  • Qhana arunakampiw jaysasma. Kunatsa ukanak jan lurkta uk qhanañchtʼasajja, akham sasmawa: “Jumjam amuytʼasir jaqejj janiw cigarro fumkaspati” sasa.

Jupanakatï sawkasisipkakïtam ukhajja, sarawayjjañamawa. Qheparaskakisma ukhajja, jukʼampiw jumat sawkasipjjaspa. Ukampis sarjjäta ukhajja, jupanakampi jan apnaqayasiñ munatamwa uñachtʼayäta.

Masinakamajj jan walinak lurayañ munapjjakipunïtamwa. Ukampis jumaw kunsa luräta uk amtjjañama, qhana arunakampiw uk sañama ukat ukarjamaw lurarakiñama (Josué 24:15).