Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 10 YATICHÄWI

Chacha warmi jakasiñajj Diosan regalopawa

Chacha warmi jakasiñajj Diosan regalopawa

“Kimsat kʼanat wiskhajj janiw mäki tʼaqaskaspati” (ECLESIASTÉS 4:12).

1, 2. 1) ¿Casarasirinakajj kunjam jakasiñsa munapjje? 2) ¿Kuna jisktʼanakarus aka yatichäwin qhanañchaskañäni?

CASARASIRI mä waynampit tawaqompit amuytʼañäni. Casarasipki uka urojj wali kusisitäpjjewa. Kunjamsa jutïrin jakasipjjani, kunanaksa lurapjjani ukanak amuytʼasajj wal kusisipjje. Walja maranak kusisita jakasiñwa munapjjaraki.

2 Waljaniw casarasipki ukhajj sum jakasiñ qalltapjje, ukampis qhepatjja jan waltʼayasiñanakaw utj-jje. Chacha warmi kusisit jaya tiempo jakasiñatakejja, Jehová Diosan yanaptʼapaw wakisi. Jichhajja, Bibliajj kunjamsa aka jisktʼanakar qhanañchi uk uñjañäni: ¿Kuna bendicionanakas chacha warmi jakasiñan utji? Jumatï casarasiñ amtaskstajja, ¿kunjamsa suma esposo jan ukajj suma esposa ajllisma? ¿Kunas suma esposöñatakisa, suma esposäñatakisa yanaptʼiristamjja? ¿Jiwañkam chacha warmi jakasiñatakejj kun lurañas wakisi? (Proverbios 3:5, 6 liytʼañataki).

¿CASARASIÑAJÄSPATI?

3. ¿Maynejj casarasisakit kusisit jakasispa? Uk qhanañchtʼma.

3 Casarasjjä ukhakiw kusisit jakasï sasaw yaqhepajj amuyapjje. Ukampis ukajj janiw cheqäkiti. Solteröñajj mä bendicionawa sasaw Jesusajj säna (Mateo  19:11, 12). Apóstol Pablojj solteröñat wali sum parlarakïna (1 Corintios 7:32-38). Ukhamasti casarasïtati janicha ukajj jumatäjjewa. Janiw amigonakamana, familiaranakamana casarasim satakisa, ni kunjamtï markaman lurapki ukar arkasakis casarasiñamäkiti.

4. ¿Chacha warmi jakañanjja kuna bendicionanakas utji?

4 Chacha warmi jakasiñajj Diosan mä suma regalopawa, bendicionanakas utjarakiwa sasaw Biblian sistu. Jehová Diosajj akham sasaw Adanat säna: “Janiw walïkiti jaqen sapakïñapajja. Nayajj jupatakejj mayni jupampi chika jakiri, ukhamaraki yanaptʼiri lurarapï” sasa (Génesis 2:18). Jehová Diosajj Adanan esposapäñapatakiw Eva warmirojj luräna, ukhamatwa nayrïri familiajj aka oraqen utj-jjäna. Mä chacha warmejj wawanakanïpjje ukhajja, casadösajj sumwa wawanakapar uywapjje. Ukampis janiw wawanïñatakikejj casarasipkiti (Salmo 127:3; Efesios 6:1-4).

5, 6. ¿Kunjamatsa chacha warmejj ‘kimsat kʼanata mä wiskhar’ uñtasitäspa?

5 Salomón reyejj akham sänwa: “Mayni sapat sipansa paniniw jukʼamp askejja, ukhamatwa jukʼamp luratas utjaraki. Maynitejj jupanakat liwischi ukajja, mayniwa wayti. ¡Ukampis llakisiñawa khititejj sapäkasina liwiski ukajja, janiw khiti waytiripas utjkaniti! [...] Kimsat kʼanat wiskhajj janiw mäki tʼaqaskaspati” sasa (Eclesiastés 4:9-12).

6 Chacha warmejj yanaptʼasipjje, chuymachtʼasipjje, jan walinakatsa jarkʼaqasipjje ukhajja, wali sum apasipjje. Munasiñajj sum jakasiñatakiw yanaptʼi, ukampis Diosar panip servipki ukhaw jukʼamp sum jakasipjje. Ukatjja ‘kimsat kʼanat mä wiskhar’  uñtasitäpjjarakiwa. Payat kʼanata wiskhat sipansa, kimsat kʼanatajj janiw facilak tʼaqaskiti. Ukhamarakiw Jehová Diosamp yanaptʼayasipki uka chacha warmejj jan facilak jaljtapkiti, jan ukasti sumaw jakasipjje.

7, 8. ¿Kunsa apóstol Pablojj casarasiñ toqet säna?

7 Mä chachampi mä warmimpi casarasipki ukhajja, jupanakajj chacha warmjamajj ikthapisipkaspawa (Proverbios 5:18). Ukampis maynejj uka laykuk casarasispa ukhajja, khitimpis casarasini uk janiw sum ajllkaspati. Ukatwa Biblianjja “qʼajjo wayna tiempsa qʼajjo tawaq tiempsa” pasjje, ukhakiw maynejj casarasispa sasin qhanañchi. Ukham sasinjja maynimpi ikthapiñ munañajj jan sintëjje uka tiempotwa parlaski (1 Corintios 7:36). Uka tiempojj pasjje ukhakiw maynejj sum amuytʼasispa, khitimpis casarasini uksa sum ajllirakispa (1 Corintios 7:9; Santiago 1:15).

8 Jumatï casarasiñ amtaskstajja, casadonakajj kuna jan walinakansa uñjasipjje ukanakat amuytʼasiñamawa. Apóstol Pablojja, casaratanakan “tʼaqesiñaw jañchipan utjani” sasaw säna (1 Corintios 7:28). Wali suma apasipki uka chacha warminakas jan walinakan uñjasipjjarakiwa. Ukhamajj casarasiñ munsta ukhajja, khitimpis casarasïta uk sum amuytʼasisaw ajlliñama.

¿KHITIMPIS CASARASIRISTJJA?

9, 10. Mä cristianojj Jehová Diosar jan servirimpi casarasispa ukhajja, ¿kunas pasaspa?

9 Khitimpis casarasïta uk ajlliñatakejja, Biblian aka yatichäwipaw yanaptʼätam, ukan akham siwa: “Jan creyentëpki ukanakampejj jan mä yukurojj chʼulla chʼulla yapintat uñjasipjjamti” sasa (2 Corintios 6:14).  Ukham sasinjja, yapu luririnakajj kunjamtï pä uywa yapintapki uka toqetwa parlaski. Yapuchirejj janipuniw asnompi torompi yapintkaspati. Ukham yapintaspa ukhajja, jan pachpa chʼamanïpjjatap laykojj paypach uywaw chʼam tukupjjaspa. Mä cristianotï Diosar jan serviri jaqempi casarasispa ukhajja, ukhamarakiw kunayman jan walinakan uñjasispa. Ukatwa mä cristianojj “Tatitun arkiripampikiw casarasiñapa” sasin Biblian ewjjtʼistu (1 Corintios 7:39).

10 Yaqhep cristianonakajj jan sapak qheparañ laykojja, Diosar jan servirimp casarasiñwa piensapjje. Ukampis Diosan ewjjtʼapar jan istʼasajja, kunayman llakinakana jan walinakana uñjasipjjaspa. Cristianonakatakejj Jehová Diosar serviñaw nayranki, ukarakiw kusisiyistu. Jumatï Diosar jan servirimpi casarasisma ukhajja, ¿kusisitat jakasisma? Janiwa. Ukatwa walja jilat kullakanakajj Diosar jan servirimpi casarasiñat sipansa sapakïsipki (Salmo 32:8 liytʼañataki).

11. ¿Kunjamsa mä suma esposo jan ukajj mä suma esposa ajllisma?

11 ¿Khitïskpansa Diosan serviripächejj jumatak suma esposöniwa jan ukajj suma esposäniwa sañti muntanjja? Janiwa. Jumatï casarasiñ munstajja khititï cheqpachapun gustktam, khitimpitï sum apaskta ukampiw casarasiñama. Khititï jumjam amtanïki, Jehová Diosar serviñ nayrar uchki ukampi casarasiñatakiw suytʼañama. Suma phoqeri amuyasiri esclavojj matrimoniot parlir suma ewjjtʼanakani qellqatanakwa churistu, ukanak liytʼañatakisa lupʼiñatakisa tiempwa apstʼasiñama (Salmo 119:105 liytʼañataki).

12. Bibliarjamajja Abrahanajj yoqapatakiw mä warmi thaqarapïna, ¿kunsa awk taykanakajj jupat yateqasipjjaspa?

 12 Yaqhep markanakanjja, awk taykanakaw wawanakapatakejj khitis suma esposöspa jan ukajj suma esposäspa uk sum amuyapjje sasaw sapjje, ukatwa jupanakajj ajllirapipjje. Uka matrimonionakajj “awk taykan irpthapit matrimonio” sasin uñtʼatawa. Uka costumbrejja, Bibliajj qellqaskäna uka tiemponakansa utjarakïnwa. Familiaman uka costumbre utjchi ukhajja, Biblian ewjjtʼanakapaw awk taykarojj wawapatak sum ajlliñatak yanaptʼaspa. Abrahán chachajja, Isaac yoqapatakiw mä warmi thaqarapïna.  Janiw wali qollqeni wali uñtʼata tawaq thaqarapkänti, jan ukasti Jehová Diosar munasir warmi ajllirapïna (Génesis 24:3, 67; 25 qhanañchäwi uñjjattʼäta).

¿KUNJAMSA CASADO VIDATAK WAKICHASIRISTJJA?

13-15. 1) ¿Kunjamsa mä chachajj suma esposöñatak wakichasispa? 2) ¿Kunjamsa mä warmejj suma esposäñatak wakichasispa?

13 Casarasiñ munstajja, nayraqatajj wakichtʼatätati janicha ukwa amuytʼasiñama. Inas wakichtʼatjam amuyassta. Jichhajja, kunjamsa casado vidatak wakichassna ukwa yatjjatañäni. Inas jan wakichtʼatäksta.

Biblian casadonakatak utjki uka yatichäwinak liytʼañatakisa, lupʼiñatakisa tiempwa apstʼasiñama.

14 Bibliarjamajja chachas warmis familianjja janiw pachpa luräwinïpkiti. Ukhamasti sapa mayniw luräwinakapan wakichasiñapa. Mä chachatï casarasiñ munchejja akham jisktʼasiñapawa: “¿Familia pʼeqtʼañatakejj wakichtʼatätti?” sasa. Chachaw esposapatakisa wawanakapatakisa utsa, issa, manqʼsa jikjjatañapa, kusisitäpjjañapatakis yanaptʼañapa, ukwa Jehová Diosajj muni. Ukatjja Diosar serviñatakiw jukʼamp yanaptʼañapa. Familiapar jan sum uñjiri chachajja, ‘Diosar jan confiyiri jaqet sipansa jukʼampiwa’ sasaw Biblian sistu (1 Timoteo 5:8). Mä chachatï casarasiñ munchejja kunjamsa Biblian aka yatichäwipar phoqaspa ukwa amuytʼasiñapa: “Anqan negociomäki ukjja tukuyam, pampan lurañanakamäki ukjja luram, ukatwa utama lurasismajja”. Ukhamasti kunjam esposöñamtï Jehová Diosajj munki ukatakiw janïr casaraskasajj chʼamachasiñama (Proverbios 24:27).

15 Mä warmitï casarasiñ munchejja, akham jisktʼasiñapawa: “¿Casarat warminakajj kuntï lurapjjañapäki uk phoqañatakejj wakichtʼatätti? ¿Wawa uywañatakis wakichtʼatätti?” sasa. Mä suma warmejj kunanaksa  esposoparu wawanakaparu sum uñjañatakejj lurañapa ukwa Biblian qhanañchi (Proverbios 31:10-31). Jichhürunakanjja, kunsa chachapasa warmipasa jupa layku luraspa ukakwa jaqenakajj piensapjje. Ukampisa jiwasajj kunsa chachas laykusa, jan ukajj warmis laykusa lursna uk amuytʼañaswa Jehová Diosajj muni.

16, 17. Casarasiñtï munstajja, ¿kuna toqenakatsa lupʼiñama?

16 Janïr casaraskasajja, Jehová Diosajj kunjam esposöñamsa jan ukajj esposäñamsa muni ukwa lupʼiñama. Chachajj familian pʼeqtʼiripäkchisa, janiw esposaparus wawanakaparus nuwañapäkiti, ni jiskʼachañapäkisa. Jan ukasti Jesusat yateqasisaw familiapar sum pʼeqtʼañapa, Jesusajj munasiñampipuniw arkirinakapar uñjirïna (Efesios 5:23). Warmisti kunjamsa esposoparus amtatanakaparus yanaptʼaspa ukwa lupʼiñapa (Romanos 7:2). ¿Chachajajj pantjasirïkchinisa jupar istʼasajj kusisitäskäti? sasaw jisktʼasiñaparaki. “Janiw” sischejja, inas sapakïskañapajj wakischispa.

17 Casadonakajja, kunjamatsa esposapasa jan ukajj esposopasa kusisitäspa ukatwa jukʼamp llakisipjjañapa (Filipenses 2:4 liytʼañataki). Apóstol Pablojj akham sänwa: “Kunjamtï sapa maynejj jupa pachpar munaskejja, ukhamarakiw sapa maynis warmipar munasiñapa. Casarat warmejj chachaparojj wali respetompiw uñjañaparaki” sasa (Efesios 5:21-33). Chachasa warmisa respetompi munasiñampi uñjatäñwa munapjje. Ukampis sum jakasiñatakejja, warmejj chachapar respetañapawa, chachasti warmiparojj munasiñaparakiwa.

18. Casarasiñatak uñtʼaskasajj ¿kuna toqetsa wal amuyasipjjañapa?

18 Mä chachampi mä warmimpejj casarasiñatak  uñtʼasisipki ukhajja jupanakatak wali kusiskañawa. Janïr casaraskasajja, cheqapunit jupamp jiwañkam jakasiñ muni ukwa sum amuytʼasipjjañapa. Casarasiñatak uñtʼasisipki uka tiemponjja, panip sum parltʼasiñwa yateqapjje. Kunjam chuymanïpjjesa uk yatiñatakiw chʼamachasipjjaraki. Jukʼamp uñtʼasjjasajj jukʼamp munasjjapjje, ukampis kunanaksa munasiñat lurapjje ukanakat amuyasipjjañapawa, ukhamat kuna qʼañu jucharus jan purtʼasiñataki. Cheqpach munasiñaw jañchin munañapampi jan apayasiñatakisa, jupanak  pura sum apasiñatakisa, Jehová Diosan amigopäskakiñatakisa yanaptʼani (1 Tesalonicenses 4:6).

Casarasiñatak uñtʼaskasaw purapat sum parltʼasiñ yateqapjje.

¿CHACHA WARMI SUM JAKASIÑATAKEJJ KUN LURAÑAS WAKISI?

19, 20. ¿Kunjamsa cristianonakajj matrimonior uñjapjje?

19 Walja libronakansa videonakansa, casarasisajj wali kusisitas jakasipkaspa ukham tukuyar uñachtʼayapjje. Ukampis jakañ vidan janiw ukhamäkiti, casarasiñajj qalltakïskiwa. Jehová Diosajj chacha warmi jakasiñajj wiñayatakïspa ukwa muni (Génesis 2:24).

20 Jichhürunakanjja casarasiñajj mä jukʼa tiempotakïkaspas ukhamwa uñjapjje. Casarasiñasa divorciasiñasa facilakiwa. Jan walinakan uñjasisajja jankʼakiw divorciasiñ amtapjje. Ukampis kimsat kʼanata wiskhat Biblian parlki uk amtañasawa. Ukham wiskhajj janiw jankʼak tʼaqaskaspati. Ukhamarakiw chacha warmejj Jehová Diosampi yanaptʼayasiñäni ukhajja, janiw facilak jaljtkañäniti. Jesusajj sänwa: “Kuntï Diosajj mä yukur mayachki ukjja, jan khiti jaqes jaljtaypanti” sasa (Mateo 19:6).

21. ¿Kunas chacha warmirojj munasisipkakiñapatak yanaptʼani?

21 Taqeniw kunsa sum lurañ yattanjja, taqenirakiw pantjasirïtanjja. Mayninakan pantjasitanakap uñchʼukiñajj facilakiwa, yamas chachasan jan ukajj warmisan pantjasitanakap uñchʼukiñajj facilakïspawa. Ukham lurasajj janiw kusisit jakasksnati. Ukampis jiwasatï chachasan jan ukajj warmisan suma luratanakap amuyañänejja kusisitäñäniwa. Chachasasa jan ukajj warmisasa pantjasirïkchisa, ¿suma luratanakap uñjañ puedsnati? Jïsa. Jehová Diosatwa yateqasiñasa, jupajj taqe luratanakassa uñjkchejja, kunanaktï  sum lurktan ukakwa uñji. Pantjasitanakas uñchʼukispa ukhajj ¿kunas pasaspa? Salmo qellqerejj akham sänwa: “Dios Tatay, jumatejj taqpach juchanak amjjäsiskakismajja, ¿khitirak nayraqataman saytʼaspasti?” sasa (Salmo 130:3). Casadonakajj Jehová Diosat yateqasisaw kunanaktï chachapasa jan ukajj warmipasa sum lurki uk uñjapjjañapa, perdonañatakis listokïpjjañapawa (Colosenses 3:13 liytʼañataki).

22, 23. ¿Kunsa casadonakajj Abrahanatsa Saratsa yateqasipjjaspa?

 22 Sapa maratjamaw chacha warmejj jukʼamp munasipjjaspa. Abrahanampit Sarampit parltʼañäni, jupanakajj walja maranak casaratäpjjänwa, wali kusisitaw jakasipjjarakïna. Kunapachatï Jehová Diosajj Abrahanar Ur markat sarjjañapatak mayïna ukhajja, Sarajj inas 60 jila maranëjjchïna. Jupatakejj suma utapa jaytasin carpanakan jakañajj chʼamakïpachänwa. Ukampis Sarajj Abrahanar wal respetäna, suma yanaptʼiri, suma amiga ukhamarakïnwa. Ukatwa kuntï Abrahanajj amtkäna ukarojj yanaptʼapunirïna (Génesis 18:12; 1 Pedro 3:6).

23 Ukampis mä chacha warmejj janiw taqe kunan mä pachpaki amuyapkiti. Mä kutejja, Abrahanampi Sarampejj janiw mä pachpak amuyapkänti. Ukatwa Jehová Diosajj Sarar istʼam sasin Abrahanar säna. Ukham istʼatapatjja mä jan waltʼäwiw askichasïna (Génesis 21:9-13). Chacha warmejj jan mä pachpak amuyapkäta ukhajj jan llakisipjjamti. Ukhaman uñjaskasasa, munasiñampi respetompi uñjasisipkakiñamawa ukaw jukʼampi wakiskirejja.

Chacha warmi sum jakasiñatakejj qalltatpachwa Bibliampi yanaptʼayasiñasa.

24. ¿Kunjamatsa chacha warmi jakañajj Diosar jachʼañchaspa?

24 Walja cristiano chacha warminakaw wali kusisit jakasipjje. Jumatï casarasiñ munstajja, khitimpis casarasïta uk wali amuyumpiw ajlliñama, ukarjamaw kusisitas llakitas jakasïta. Ukatwa sum ajlliñatakejj Jehová Diosar yanaptʼa mayiñama. Ukhamatwa suma esposo jan ukajj suma esposa ajllisïta, casarasiñatakis sum wakichtʼasïta, ukhamatarakwa munasiñampi mayachtʼat jakasipjjäta, Diosarus jachʼañchapjjarakïta.