Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jesusaw thakisa, cheqasa, jakañasa

Jesusaw thakisa, cheqasa, jakañasa

Taqeniw suma yatiyäwinak istʼañ muntanjja. Cheqansa suma yatiyäwinakaw jumatakisa familiamatakis utji.

Uka suma yatiyäwinakajj Biblian qellqatawa, taqe kun Luriri Jehová Diosawa nayra maranakan Biblia qellqayäna. Aka libronjja, Bibliankir pusi libronakatwa qhanañchaski, taqenitak suma yatiyäwinakaniwa. Uka libronakajja kawkïr jaqenakampitï Jehová Diosajj qellqaykäna ukanakan sutinakapwa aparaki: Mateo, Marcos, Lucas, Juan.

Waljaniw uka pusi libronakarojj Evangelionaka sasin uñtʼapjjaraki. Evangelio arojj suma yatiyäwinaka sañ muni, cheqansa uka libronakanwa Jesusat suma yatiyäwinakajj qellqata. Jesús taypiw Jehová Diosajj jaqenakar salvañ amtäna, Jesusasti Diosan Reinopan Reyit uttʼayatäsaw taqe khitinakatï jupar confiyapki ukanakar wiñayatak bendisini (Marcos 10:17, 30; 13:13).

¿KUNATSA PUSI EVANGELIONAKAJJ UTJI?

Kuntï Jesusajj lurkäna yatichkäna ukanakjja, kunatsa Diosajj pusi libronakar qellqaypachäna sasin inas jisktʼasirakstan.

Jesusajj kunanaktï yatichkäna lurkarakïna ukanak pusi libronakan qellqayasajja yanaptʼistuwa. Amuytʼañataki, wali uñtʼat mä yatichiri jakʼan pusi chachanakas saytʼatäpkaspa ukham sañäni, nayraqatan saytʼatäki uka chachajja impuesto cobririwa. Kupëjjankki uka chachasti qollirirakiwa. Chʼeqankki uka chachasti chawlla katuriwa, yatichirin munat amigoparakiwa. Yatichirin qhepäjjapankki uka chachasti mayni chachanakat sipansa waynakiwa. Uka chachanakajja cheq parlirinakäpjjewa, yatichirir ukham walja toqenakat istʼasajj may maya amuyunïpjjaraki. Yatichirejj kunsa luräna kunsa yatichäna uk sapa maynin qellqatanakap liytʼasajj Jesusat jukʼampiw yatjjatsna. Uka pusi chachanakan qellqatanakapat yatjjatasajja, sapa maynejj yatichirit kunsa amuyapjjäna  kunampsa istʼapjjäna ukanakwa amuysna. Ukhamatwa kunsa yatichirejj luräna kunsa yatichäna uk jukʼamp yatjjatsna. Ukhamarakiw Jachʼa Yatichiri Jesusajj kunsa luräna kunsa yatichäna ukanak pusi chachanakan qellqatanakapat yatjjatasajj jupat jukʼamp sum yatjjatsna.

Uka uñachtʼäwit amuytʼaskakiñäni. Impuesto cobrirejja, kawkïr yatichäwisa jan ukajj luräwisa judionakar yanaptʼkaspa uk qellqañwa amti. Qolliristi kunjamsa usutanakajj qollatapjjäna, uk qellqañwa amtarakispa. Maysa toqetjja impuesto cobrirejj kuntï qollirejj jan qellqkäna ukanakatwa qellqatapan qhanañchi. Yatichirin amigopasti, yatichirejj kunjam chuymanïnsa ukwa qellqañ amtaraki, jupajj mayninakat sipansa jukʼa arunakampikiw qellqaspa. Sapa maynis amuyuparjam qellqapkchïnjja, uka pusi chachanakan qellqatanakapajj mä toqetak parlatap amuysnawa. Ukhamarakiw pusi chachanakan Jesusat qellqapjjatapajja, kuntï lurkäna kuntï yatichkäna, uk sumpach amuytʼañatak yanaptʼistu.

Jaqenakajja, “Mateon qellqat Evangelio”, “Juan chachan qellqat Evangelio” sasaw uka libronakar uñtʼapjjaraki. Ukajj walikïskiwa, uka pusi libronakanwa ‘Diosan Jesucristo Yoqapjjat suma yatiyäwinakajj’ utji (Marcos 1:1). Ukampisa mä evangeliokiw utji, ukanakajj Mateo, Marcos, Lucas, Juan uka libronakawa.

Bibliat yatjjatirinakajja, waljaniw Mateo, Marcos, Lucas, Juan libronakajj pachpakit parli janicha uk yatjjatawayapjje. Uka yatjjatirinakat maynïrejj siriankir Taciano chachawa, jupajj uka pusi libronakat yatjjatawayäna ukhajja, mä toqetak parlapjjatapa Diosan amuytʼayatätap amuyänwa. Niya 170 maranakanjja, Diatessaron sat libropan Jesusajj kunsa lurawayäna kunjamsa yatichäna taqe ukanak qellqäna.

Uka qellqatat sipansa, Jesusaw thakisa, cheqasa, jakañasa sat aka libronjja, Jesusajj kunanaksa luräna kunjamsa yatichäna taqe ukanakwa jukʼamp sum qhanañchi. Jichhürunakanjja kunjamsa profecianakajj phoqasiski, Jesusajj parlkäna uka uñachtʼäwinakajj kamsañsa muni uk sumwa amuyjjtanjja. Ukanakaw Jesusajj kunanaksa luräna, kunsa yatichäna, kunapachas ukanak luräna jan ukajj yatichäna uk amuyañatakejj yanaptʼistu. Ukhamarusa arqueología toqet yatjjatirinakajja, kuntï qellqerinakajj Jesusat qellqapkäna uk sum amuytʼañatakiw yanaptʼistu. Cheqansa janiw khitis Jesusan luratanakapajj kunjamäpunïnsa kunapachas luräna uk qhanañchkaspati. Ukampis aka libronjja, taqe ukanakajj niya ukarjamaw sum qhanañchi.

JESUSAW THAKISA, CHEQASA, JAKAÑASA

Aka libro liytʼasajja, kunsa yatichistu uk amuytʼañatakiw chʼamachasiñasa. Kuntï Jesusajj Tomás apostolor säna uka arunak amtapjjañäni, jupajj sänwa: “Nayätwa thakisa, cheqasa, jakañasa. Naya taypikiw Awkin ukar puriñajj utji” sasa (Juan 14:6).

Aka librojja, Jesusajj cheqpachapuni ‘thakïskatap’ amuyañatakiw yanaptʼistani. Cheqansa Jesús taypikiw Jehová Diosajj oracionanakas istʼaspa, janiw ukakïkiti, Jehová Diosampi sumankthapiñatakisa jupaw yanaptʼarakistu (Juan 16:23; Romanos 5:8). Jesusan jiwatapatwa Jehová Diosampejj sum apasiraksna.

Jesusaw ‘cheqajja’. Jesusajj Diosan cheqa yatichäwinakapwa yatichäna, ukarjamaw sarnaqarakïna. Walja profecianakajja, “Jesús taypiw phoqasiwayi” (2 Corintios 1:20; Juan 1:14). Ukaw kunjamsa Jesusajj Diosan amtap phoqasiñapatak yanaptʼi uk amuyañatak yanaptʼistu (Apocalipsis 19:10).

Jesusajj ‘jakañawa’. Jupaw perfecto jakañap jiwas layku aptʼasiwayi, ukhamatwa ‘cheqpach jakaña’ mä arunjja ‘wiñay jakaña’ katoqsna (1 Timoteo 6:12, 19; Efesios 1:7; 1 Juan 1:7). Ukatjja waranq waranqa jaqenakar paraison wiñayatak jakasipjjañapatak jaktayasaw “jakañätap” uñachtʼayani (Juan 5:28, 29).

Kunjamsa Jesusajj Diosan amtap phoqasiñapatakejj yanaptʼi uk amuyasajja, wali askitwa uñjañasa. Jesusajj ‘thakïtapa, cheqätapa, jakañätapa’ yatjjatañajj wal chʼamañchistani.