Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 78 YATICHÄWI

Wakichtʼat suma phoqeri mayordomo

Wakichtʼat suma phoqeri mayordomo

LUCAS 12:35-59

  • SUMA PHOQERI MAYORDOMOJJ WAKICHTʼATÄÑAPAWA

  • JESUSAJJ JAQENAKAROJJ TʼAQJTAYÄNWA

Jesusajj ‘jiskʼa tamat’ uñtʼatäpki ukanakakiw alajjpachankir Reinor sarapjjani sasaw qhanañchäna (Lucas 12:32). Ukampis uk katoqañatakejj chʼamachasipjjañapänwa. Uka Reinon apnaqañatakejj kunjam chuymampis suyapjjañapäna uka toqetwa Jesusajj parläna.

Kuttʼankani ukhajja, discipulonakapajj wakichtʼatäpjjañapänwa, ukatwa Jesusajj akham ewjjtʼäna: “Jumanakajj isthapitäpjjam, wakichtʼatäpjjarakim, michachuwanakamas naktatäpan. Kunjamtï esclavonakajj uywiripan kuttʼaniñap suyapkejja, ukhamarak jumanakajj suyapjjam. Kunapachatï uywirejj casarasïwit purinki, leqtʼasiniraki ukhajja, jankʼakiw esclavonakajj jistʼarapjje. ¡Kawkïr esclavonakarutï uywirejj purinisin uñnaqaskiri jikjjatani ukanakajj kusisipjjaniwa!” sasa (Lucas 12:35-37).

Discipulonakajj kunjam chuymampis suyapjjañapäna uk jankʼakiw amuyapjjäna. Esclavonakajja suma wakichtʼataw uywiripan kuttʼaniñap suyapjjañapäna. Jesusajj saskakïnwa: “[Uywiritï] chika arumaru, jan ukajj wallpa artʼaru purinini, esclavonakarus wakichtʼat suyaskir jikjjatani ukhajja, ¡jupanakajj kusisipjjaniwa!” sasa (Lucas 12:38).

Jesusajj janiw lurañanak sum phoqañjjatak parlkänti, jan ukasti wakichatäpjjañapatakiw ewjjäna. Jesusajj parlkäna uka uñachtʼäwinjja jupa pachpatwa parlarakïna. Akham sasaw discipulonakapar säna: “Ukhamarak jumanakajj wakichatäpjjapunim. Jan amuyapkta uka horasaruw jaqen Yoqapajj jutani” sasa (Lucas 12:40). Ukhamasti Jesusajj qhepatwa jutañapäna. Ukapachajj arkirinakapasa, jukʼampis ‘jiskʼa tamat’ uñtʼatäki uka discipulonakapasa suma wakichatäpjjañapänwa.

Pedrojj Jesusan arunakap sum amuytʼañ munäna, ukatwa akham jisktʼäna: “Tata, ¿uka uñachtʼäwimpejj nanakarut parlasipkista jan ukajj taqeniruch parlasktajja?” sasa. Pedror cheqak qhanañchañat sipansa, Jesusajj yaqha uñachtʼäwitwa akham sas parläna: “¿Khitis suma phoqeri, amuyasiri mayordomojja? Juparuw uywiripajj mayni servirinakapjjar uttʼayani, ukhamat jupanakar wakisitarjam manqʼa tiempopar churaskakiñapataki. ¡Kawkïr esclavorutï uywiripajj jutasin ukham luraskir jikjjatani ukajj kusispan! Cheqpachapuniw sapjjsma, jupajj taqe utjirinakapjjaruw uka esclavor uttʼayani” sasa (Lucas 12:41-44).

Nayrïr uñachtʼäwinjja “uywirejj” jaqen Yoqapänwa mä arunjja, Jesusänwa. Payïr uñachtʼäwinsti ‘suma phoqeri mayordomojj’ ‘jiskʼa tama’ taypin jakhutäpki uka discipulonakarakiwa, jupanakaw Reinon apnaqanipjjani (Lucas 12:32). Jesusajj uka jiskʼa tamankirinakat yaqhepajja, ‘servirinakaruw’ ‘manqʼa tiempopar churapjjani’ sañwa munaskäna. Kuntï Jesusajj Pedrompiru mayni discipulonakampir yatichaskäna, ukajja manqʼsa churkaspa ukhamänwa. Jupanakajj jaqen Yoqapan mayampi jutañapatwa amuyapjjäna, ukajj jutirïnwa pasañapäna. Uka tiemponjja mä grupow ‘servirinakaru’, mä arunjja Jesusan arkirinakaparojj manqʼsa churapkaspa ukham Diosat yatichañapäna.

Jesusajja, kunatsa discipulonakajj wali amuyumpi sarnaqapjjañapäna suma chuymanïpjjañapäna ukjja qhanañchaskakïnwa. Jupanakajja jayraw tukupjjaspäna, mayni discipulonak contraw saytʼapjjarakispäna. Ukatwa Jesusajj akham säna: “[Mä] esclavotï ‘uywirijajj janïraw jutkaniti’ sasin chuymapan amuyani, servir masinakaparus nuwañ qalltani, manqʼaskani, umaskani, machaskani ukhajja, uywiripaw jutani, kunürutï jan suyki ukhaw jutani, jupan jan yatit horasaru. Ukatjja wal jupar castigani, Diosat jitheqtir jaqenakamp chikarakiw uchani” sasa (Lucas 12:45, 46).

Jesusajj saskakïnwa: “Aka oraqerojj nina naktayiriw jutta” sasa. ¿Kunatsa ukham säna?  Jesusan yatichäwinakapajja jaqenakaruw chʼajjwayäna, kʼari yatichäwinaksa costumbrenaksa chhaqtayänwa. Uka causajj mayachtʼatapkäna uka jaqenakas tʼaqjtapjjänwa, ‘awkejj yoqap contraw saytʼäna, yoqasti awkip contraw saytʼarakïna; taykajj phuchap contraw saytʼäna, phuchasti taykap contraw saytʼarakïna; suegrajj yojjchʼap contraw saytʼäna, yojjchʼasti suegrap contraw saytʼarakïna’ (Lucas 12:49, 53).

Jesusajj discipulonakapar ukham ewjjtʼasajja, jaqenakaruw parlarakïna. Niya taqeniw Mesiasätap jan creyiñ munapkänti, ukatwa Jesusajj jupanakar säna: “Inti jalanta toqen qenayanak apthaptaskir uñjapkta ukhajja, ‘thayamp jallumpiw jutaski’ sasaw jankʼak sapjjtajja. Ukasti ukhamapuniw phoqasi. Aynach toqet thaytʼanir uñjapjjta ukhajja, ‘wali juntʼüniwa’ sasaw sapjjtajja, ukajj ukhamarakiw phoqasi. Kʼari chuyman jaqenaka, alajjpachas oraqes kunjamäskis ukanak uñchʼukiñ yatipjjtawa. Ukampis kunanakatï aka tiempon pasaski ukanakjja, ¿kunatsa jumanakajj jan amuyapkta?” sasa (Lucas 12:54-56). Jupanakajja Jesusajj Mesiasätap creyiñatakejj janiw wakichtʼatäpkänti.