Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 73 YATICHÄWI

Mä samaritanojj jaqe masiparuw yanaptʼäna

Mä samaritanojj jaqe masiparuw yanaptʼäna

LUCAS 10:25-37

  • ¿KUNJAMATSA WIÑAY JAKAÑ KATOQSNA?

  • JAQE MASIPAR KHUYAPTʼAYIRI SAMARITANO

Jerusalén jakʼankaskäna ukhajja, walja judionakaw Jesusar jakʼachasipjjäna. Yaqhepajj jupat yateqañ munapjjäna, yaqhepasti yantʼañ munapjjarakïna. Jupanak taypitjja, Leyit sum yatiri mä jaqew Jesusar akham jisktʼäna: “Yatichiri, ¿wiñay jakañ katoqañatakejj kun lurañajas wakisi?” sasa (Lucas 10:25).

Uka jaqejj janiw yatiñ munasajj ukham jisktʼkänti, jan ukasti Jesusajj judionakar chuyma ustʼayaspa uk munasaw ukham jisktʼpachäna. Jesusajj uk sum amuyäna. Uka jaqejja wiñay jakañ katoqañatakejj kun lurañapas wakisi uk yatjjänwa. Ukatwa Jesusajj wali amuyumpi jisktʼasajja, kuna amtampis uka jaqejj jisktʼaskäna uk qhanstayäna.

Jesusajj sänwa: “¿Kunatï Leyin qellqatäki ukajj kamsisa? ¿Jumajj kunjamsa uk amuyta?” sasa. Uka jaqejj Diosan Leyip sum yatïna, ukatwa Leyirjam arsüna. Jupajj Deuteronomio 6:5; Levítico 19:18 qellqatanak aytasaw akham säna: “‘Jehová Diosamar taqe chuymamampi, taqe almamampi, taqe chʼamamampi, taqe amuyumampi munasiñamawa’, ‘jaqe masimarojj juma kikparjam munasiñamarakiwa’” sasa (Lucas 10:26, 27). Uka jaqejj jupa pachpaw jisktʼapar qhanañchasïna.

Jesusajj uka jaqerojj akham sänwa: “Cheqaparuw arstajja, jumajj uk luraskakim, wiñay jakañ katoqätawa” sasa. Janiw parlañajj ukaruk tukuykänti, uka jaqejj janiw jisktʼapar qhanañchasiñapak munkänti. Jan ukasti ‘cheqap jaqëtapa’, amuyunakapas cheqätapa, mayninakarojj kunjamsa uñjäna ukajj walïtapwa uñachtʼayañ munäna. Ukatwa jupajj säna: “¿Khitipunis cheqpach jaqe masijajja?” sasa (Lucas 10:28, 29). Uka jisktʼar qhanañchañajj facilakïkchisa, uka toqet amuytʼañajj wali wakiskiriwa.

Judionakajja, costumbrenakaparjam sarnaqapkäna ukanakarukiw ‘jaqe masi’ sapjjerïna. Levítico 19:18 qellqatajj niya ukarjamaw amuytʼayarakïna. ‘Mä judío jaqetakejj yaqha kasta jaqemp chikachasiñajj’ janiw walïkiti sasin inas amuyapjjarakchïna (Hechos 10:28). Ukhamajj uka jaqesa Jesusan yaqhep discipulonakapasa, judionakar khuyaptʼayasajja cheqap jaqëpkaspas ukham amuyasipjjpachäna. Inas jan judiöki ukanakarojj jan khuyaptʼayapkchïnti, jan jaqe masiparjam uñjapjjatap layku.

Jan chuym ustʼayasajja, ¿kunjamsa Jesusajj uka jaqena mayni judionakana amuyunakap cheqañchäna? Jesusajj sänwa: “Mä jaqew Jerusalén markat Jericó markar saraqaskäna. Lunthatanakaw jupar jaljjatasin qʼal lluchʼsupjjäna, nuwjapjjarakïnwa, niya jiwirjam jaytjasaw sarjjapjjäna. Ukatjja mä sacerdotew uka thaknam saraqaskarakïna, uka jaqer uñjasajj maysnamwa jupajj muytʼjjäna. Ukhamarakiw mä levitajj uka cheqnam jutäna. Uka jaqer uñjasajja, maysnamwa jupas muytʼarakïna. Mä samaritanow uka thaknam saraskarakïna. Uka cheqar purisasti, uka jaqer uñjasajj walpun jupat sinttʼasïna” sasa (Lucas 10:30-33).

Walja sacerdotenakampi templon yanapapkäna uka levitanakampiw Jericó markan jakapjjäna, Leyit yatiri jaqejj uk sum yatpachäna. Jupanakajj templotjja 23 kilometronakwa markapar puriñkamajj saraqapjjerïna. Uka thakejj ajjsarkañänwa, walja lunthatanakaw utjarakïna. Ukhamajj mä judior jan walinkatap uñjasajja, mä sacerdotesa jan ukajj mä levitasa yanaptʼañapänwa. Ukampis janiw yanaptʼapkänti sänwa Jesusajja. Antisas uñisipkäna uka mä samaritanow yanaptʼäna (Juan 8:48).

¿Kunjamsa yanaptʼäna? Jesusajj saskakïnwa: “Jupar jakʼachasisajj aceitempi vinompi  heridanakap qolltʼäna, chʼoqtʼarakïna. Ukatjja khumuñ uywapar apjjatasaw mä alojasiñ utar apäna, ukanwa uñjarakïna. Qhepürusti pä denario qollqenak apsusisaw alojasiñ uta uñjirirojj churäna, sarakïnwa: ‘Juparojj uñjtʼarapitaya, jukʼampi gastojj utjani ukhajja, kuttʼanï ukhaw churjjäma’ sasa” (Lucas 10:34, 35).

Ukham yatichasajja, Jachʼa Yatichiri Jesusajj akham sasaw uka jaqerojj amuytʼayäna: “Uka kimsanitjja ¿kawkïris lunthatanakampi jaljjatayaski uka jaqerojj jaqe masiparjam uñjäna?” sasa. Inas uka jaqejj “samaritanowa” sañ phenqʼaschïna, Jupajj akham sakïnwa: “Khititejj jupar khuyapayasiñampi uñjki ukawa” sasa. Jesusajj kunjamsa jaqe masisar uñjañasa uk sum qhanañchäna, ukatwa akham sarakïna: “Ukhamajj sarjjam, jumajj uka pachpa lurarakim” sasa (Lucas 10:36, 37).

¡Wali sumpun Jesusajj yatichäna! Jesusatï ‘jan judiöki ukanakajj jaqe masisarakiwa’ sasin cheqaki saspäna ukhajja, ¿Leyit yatiri jaqesa mayni judionakasa creyipjjaspänti? Inas jan creyipkchispänti. Jesusajja, “¿khitipunis cheqpach jaqe masijajja?” sasin jisktʼatajja, jupanakan amuytʼkañ mä sarnaqäwimpiw yatichäna. Ukhamatwa khitis jaqe masipajj uk sum amuyjjapjjäna. Ukhamajj mayninakan cheqpach jaqe masipätas uñachtʼayañatakejja, Bibliajj ewjjtʼkistu ukarjamaw jupanakar munasiñasa khuyaptʼayañasaraki.