Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 10 YATICHÄWI

Jesusan familiapajj Jerusalenaruw saräna

Jesusan familiapajj Jerusalenaruw saräna

LUCAS 2:40-52

  • JESUSAJJ TUNKA PAYANI MARANÏSAW YATICHIRINAKAR JISKTʼÄNA

  • JESUSAJJ JEHOVÁ DIOSAR ‘AWKIJA’ SASAW SÄNA

Joseampi familiapampitakejja, Jerusalenar Pascua fiesta amtir sarañ tiempojj purinjjänwa. Jupanakajj familiaranakapampi amigonakapampiw sapa mara Jerusalenar sarapjjerïna. Diosajj Israel markar churkäna uka Leyirjamaw uk phoqapjjerïna (Deuteronomio 16:16). Nazaretat Jerusalenkamajj niya 120 kilometronakänwa. Jupanakatakejja Jerusalenar sarañajj wali kusiskañänwa, jan tiemponiw sarañatakejj wakichasipjjerïna. Jesusajj 12 maranëjjänwa, uka uru puriniñap wal suyaskäna, jupatakejja templor kuttʼañajj wali kusiskañapunïnwa.

Jesusatakisa familiapatakisa, Pascuajja janiw mä urukïkänti. Pascua uru pasatatjja Jan Levadurani Tʼantʼa Manqʼañ Fiestaw paqallqo urunakajj apasirakïna (Marcos 14:1). Uka fiestajj Pascuat uñtʼatarakïnwa. Ukhamasti Nazaretat Jerusalenar sarapjjerïna ukhajja, Jerusalén markanwa qamarapjjerïna. Utaparojj niya pä semanatwa kuttʼjjapjjerïna. Ukampis uka maranjja, pä seman jilatwa utapar kuttʼasipkäna, ¿kunatsa? Jesusajj Jerusalenanwa quedasïna, uksti Jerusalenat sarjjapjjäna ukhakiw awk taykapajj amuyapjjäna.

Joseampi Mariampejja, Jesusajj jupanakamp chik sarapkäna uka familiaranakampi jan ukajj amigonakampi chikäskpachawa sasaw amuyapjjäna. Ukampis arumajj samartʼañatak saytʼapjjäna ukhajja, janiw Jesusarojj jikipkänti, ukhakiw uñtʼatanakap taypin jupar thaqañ qalltapjjäna. Jan katjasajja, Jerusalenaruw Joseampi Mariampejj thaqtañatak kuttʼapjjäna.

Pä uru jornal thaqasajj janiw Jesusar jikipkänti, jan ukasti kimsa urutwa templon jikipjjäna. Jesusajj judionakan yatichirinakap taypin qontʼataw istʼaskäna, jisktʼaskarakïna. Yatichirinakasti amuytʼasirïtapat wal musparapjjäna.

Mamapajj akham sasaw Jesusar säna: “Wawa, ¿kunatsa ukham lurapjjesta? Tatamamp nayampejj wali llakitaw thaqapjjsma” sasa (Lucas 2:48).

Kawkinkaskänsa uk jan yatipjjatapatjja akham sasaw Jesusajj säna: “¿Kunatsa thaqapjjesta? Nayajj Awkijan utapankañajawa, ¿janit uk yatipkta?” sasa (Lucas 2:49).

Jesusajj awk taykapamp chikäjjasajj Nazaret markaruw sarjjäna, awk taykapar istʼasapuniw sarnaqarakïna. Jesusasti jiltaskakïnwa, yatiñapas ukhamarakiw jiljjattaskäna. Waynitüskchïnsa, Dios nayraqatansa jaqenak nayraqatansa wali munatänwa. Jesusajj wawatpachaw wali yateqaskay sarnaqäna, jupatakejj Diosar serviñaw nayrankäna, awk taykaparus respetarakïnwa.