Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 60 YATICHÄWI

Cristojj kʼajkiriw tuküna

Cristojj kʼajkiriw tuküna

MATEO 16:28-17:13 MARCOS 9:1-13 LUCAS 9:27-36

  • JESUSARUW KʼAJKIR UÑJAPJJÄNA

  • APOSTOLONAKAJJ DIOSAN ARUP ISTʼAPJJÄNA

Jesusajj Cesarea de Filipo toqenwa yatichaskäna, uka markajj Hermón qollutjja 25 kilometronak sarañankänwa. Jesusajj uka markanwa mä suma yatiyäwi apostolonakar yatiyäna, akham sasa: “Qhanakwa sapjjsma, jaqen Yoqaparu Reinopan jutir uñjañkamajja, akan saytʼatäsipki ukanakat mä qhawqhanejj janiw jiwapkaniti” sasa (Mateo 16:28).

Jesusan discipulonakapajj janiw uka arunak amuyapkänti. Mä semana qhepatjja, Jesusajj Pedro, Santiago, Juan uka kimsa apostolonakampiw mä qollur saräna. Jupanakarojj wal ikejj purïna, ukhamajj inas arum sarapjjchïna. Jesusajj oración luraskäna ukhaw apostolonakajj mä visión uñjapjjäna, Jesusan ajanupajj kʼajkiriw tuküna, isipas wali llijkir janqʼoruw tukurakïna.

Jesusajj “Moisesampi Eliasampiw” parlaskäna. Kunjamsa Jesusajj Jerusalenan akapachat sarjjañapäna uka toqetwa parlañ qalltapjjäna (Lucas 9:30, 31). Cheqansa Jesusan jiwañapata jaktañapatwa parlasipkäna, discipulonakaparojj uka nayrakiw uka toqet Jesusajj parlarakïna (Mateo 16:21). Kuna toqettï Jesusajj uka pä jaqempi parlkäna ukajja, janiw kuntï Pedrojj Jesusar ewjjkäna ukarjamäkänti. Jesusajj jan sinttʼasis jiwayatäñapänwa, janiw khitis ukjja jarkʼkaspänti.

Kimsa apostolonakajja ik apjtayasisajj wali musparataw uñchʼukisipkäna, istʼasipkarakïna. Ukajj mä visionakïnwa, ukampis cheqäkaspas ukhamänwa, ukatwa Pedrojj akham säna: “Rabí, nanakatakejj akankañajj wali sumapuniwa. Nanakajj kimsa carpanakwa saytʼayapjjerista, mayajj jumataki, mayajj Moisesataki, mayasti Eliasatakiraki” sasa (Marcos 9:5). Inas Pedrojj uka visión jukʼamp tiempo uñjañ munasa ukham lurañ munchïna.

Pedrojj parlaskäna ukhajja, mä kʼajkir qenayaw qhanjjatäna, ukatsti mä aruw istʼasirakïna, akham sasa: “Jupajj Wawajawa, wali munatawa, nayajj wal jupat kusista. Jupar istʼapjjam” sasa. Diosan arup istʼasajj apostolonakajj ajjsarañat altʼasipjjänwa. Ukampis Jesusajj jupanakar sänwa: “Sartapjjam. Jan ajjsarapjjamti” sasa (Mateo 17:5-7). Sartapjjäna ukhajja, Jesusakiw ukankjjäna. Visionajj ukaruw tukuyjjäna. Uröjjäna ukhajja, qollutwa saraqanjjapjjäna. Jesusajj sarakïnwa: “Kuntï uñjapkta ukjja, janipuniw khitirus yatiyapjjätati, jaqen Yoqapajj jiwatanak taypit jaktayatäkani ukapachkama” sasa (Mateo 17:9).

Visionan Eliasar uñjasajj apostolonakajj akham sasaw Jesusar jisktʼapjjäna: “¿Kunatarak escribanakajj Eliasaw nayraqat jutañapa sasin sapjjesti?” sasa. Jesusasti sarakïnwa: “Eliasajj jutjjewa. Ukhamarus jupanakajj janiw jupätap amuyapkänti” sasa (Mateo 17:10-12). Jesusajj Bautisir Juanatwa parlaskäna. Kunjamtï Eliasajj Eliseotak thak wakichkänjja, ukhamarakiw Juanajj Cristotak thak wakichäna.

Jesusarusa apostolonakaparusa visión uñjañajj ¡wal chʼamañchpachäna! Jupanakajj “jaqen Yoqaparu Reinopan jutir” uñjapjjäna, kunjamtï Jesusajj siskäna ukhama (Mateo 16:28). Fariseonakajja, Jesusajj Diosan ajllit Reyipjam mä señal taypi uñachtʼayasispa ukwa munapjjäna, Jesusasti janiw kuna señalsa jupanakar uñjaykänti. Ukampis discipulonakapajj qollunkasipkäna ukhajja, Cristojj “kunja jachʼäkitejj” ukwa uñjapjjäna, Jesusan kʼajkiri tukutapwa uñjapjjäna, ukhamatwa Reino toqet parlir profecianak phoqasir amuyapjjäna. Ukatwa Pedrojj qhepat akham säna: “Jiwasanakajj profecía arunakarojj jukʼampiw confiytanjja” sasa (2 Pedro 1:16-19).