Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 55 YATICHÄWI

Jesusan arunakap istʼasajj colertʼasipjjänwa

Jesusan arunakap istʼasajj colertʼasipjjänwa

JUAN 6:48-71

  • JESUSAN WILAP UMAÑA, JAÑCHIP MANQʼAÑA

  • WALJANIW LANKTʼASIPJJÄNA, JANIRAKIW JESUSAR ARKJJAPJJÄNTI

Capernaumankir sinagoganjja, Jesusajj alajjpachat jutir cheqpach tʼantʼatwa yatichäna. Kuntï Galilea Qota inti jalsu toqet jutapkäna uka jaqenakar siskäna ukat sipansa, jukʼampiw jichhajj uka tʼantʼat parläna. Jutapkäna uka jaqenakajj kunjamsa Jesusajj mä qhawqha tʼantʼampit chawllampit milagro luräna ukjja sum uñjapjjäna.

Jesusajj akham sasaw yatichäna: “Jumanakan nayra awkinakamajj maná sat manqʼwa wasaran manqʼapjjäna, ukhampachas jupanakajj jiwapjjänwa” sasa. Ukatjja sarakïnwa: “Alajjpachat saraqanki uka jakkir tʼantʼajj nayätwa, khititï uka tʼantʼat manqʼki ukajja, wiñayatakiw jakani. Cheqas uka tʼantʼajj jañchijawa, akapachankir jaqenakan jakaña katoqapjjañapatakiw churäjja” sasa (Juan 6:48-51).

Pascua fiestan 30 maranjja, Jesusajja ‘Diosajj akapachar wal munatap laykuw Yoqapar mä Salvirjam churäna’ sasaw Nicodemor säna. Ukampis jichhajj jañchij manqʼañaw wakisi sasaw yatichäna, mä arunjja jupajj sacrificiot loqtasiñapäkäna ukaruw confiyapjjañapäna. Ukhamatakwa wiñay jakañ katoqapjjaspäna.

Ukampis jaqenakajj akham sasaw Jesusat parlapjjäna: “¿Kunjamarak aka jaqejj jañchip manqʼañatak churistaspasti?” sasa (Juan 6:52). Jesusajj janiw cheqpach jañchit parlkänti, jan ukasti uñachtʼäwinakampiw parlaskäna. Ukatwa uk amuyapjjañapatakejj jukʼamp qhanañchaskakïna.

Jupajj sänwa: “Janitï jaqen Yoqapan jañchipat manqʼapkäta, ni wilapsa umapkäta ukhajja, janiw wiñay jakañ katoqapkätati. Antisas khititejj jañchijat manqʼki, wilajsa umkaraki ukaw wiñay jakañ katoqani [...]. Jañchijajj cheqpach manqʼawa, wilajas cheqpach umañarakiwa. Khititejj jañchijat manqʼki, wilajsa umkaraki ukajja, nayampejj mayakiwa” sasa (Juan 6:53-56).

¡Uk istʼasajj walpun judionakajj colerasipjjpachäna! Jesusajj jaqe jañchi manqʼañatsa jan ukajj wila umañatsa parlkaspa ukhamwa amuyapjjpachäna, ukajj Diosan Leyiparjamajj wali jachʼa juchänwa (Génesis 9:4; Levítico 17:10, 11). Jesusajj janiw uka toqet parlkänti. Jan ukasti, maynitejj wiñay jakañ katoqañ munchi ukhajja, jupan cuerpop sacrificiot loqtasitaparusa wilap wartasitaparusa confiyañapänwa, uka toqetwa parlaskäna. Ukampis discipulonakapat waljanejj janiw uk amuyapkänti. Ukatwa akham sapjjäna: “Arunakapajj janiw iyawsañjamäkiti, ¿khitirak ukanak istʼanisti?” sasa (Juan 6:60).

Discipulonakapan jan sum amuyapjjatap yatisajj Jesusajj sänwa: “¿Ukakit jumanakar lanktʼayapjjtamjja? Jaqen Yoqapar kawkittï jutki ukar makataskir uñjapjjasma ukhajja, ¿kamachapjjarakismasti? [...] Nayajj parlapksma ukanakajj espíritu santorjamawa, jakañwa churaraki. Ukampirus jumanakat yaqhepajj janiw creyipktati” sasa. Uk istʼasajj walja discipulonakaw sarjjapjjäna (Juan 6:61-64).

Jesusajj 12 apostolonakaparuw jisktʼarakïna: “¿Janit jumanakajj sarjjañ munapkarakta?” sasa. Pedrosti sänwa: “Tata, ¿khitin ukarurak sarapjjästi? Jumaw wiñay jakañar apiri arunakanïtajja. Ukhamarus nanakajj creyipjjtwa, Diosan Santo Serviripätamsa yatipjjaraktwa” sasa (Juan 6:67-69). Pedrosa mayni apostolonakasa janis Jesusan yatichäwip sum amuyapkchïnjja janiw Jesusar jaytanukupkänti.

 Pedror istʼasajja Jesusajj kusisïnwa, akham sarakïnwa: “Nayaw tunka payanirojj ajllipjjsma, ukhamarus jumanak taypinjja mä kʼarintiriw utji” sasa (Juan 6:70). Jesusajj Judas Iscariotetwa parlaskäna. Ukapachaw Judasan jan wali thakir saraskatap amuypachäna.

Pedrosa mayni apostolonakasa taqe chuymaw Jesusarojj arkapjjäna, taqe chuymarakiw Jehová Diosan arunakap yatiyiris Jesusamp chikajj sarapjjäna, uk yatisajj wal Jesusajj kusisïna.