Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 62 YATICHÄWI

Jesusajj humilde chuymanïñwa yatichäna

Jesusajj humilde chuymanïñwa yatichäna

MATEO 17:22-18:5 MARCOS 9:30-37 LUCAS 9:43-48

  • JESUSAJJ JIWAÑAPATWA MAYAMP PARLÄNA

  • CHAWLLA LAKAT APSUTA QOLLQEMPIW IMPUESTO PAGÄNA

  • ¿KHITIS DIOSAN REINOPAN JUKʼAMP JILÏREJJA?

Cesarea de Filipo markan Jesusajj kʼajkir tukkäna ukhamarak demonion mantata mä waynitur qollkäna uka qhepatjja, Jesusajj discipulonakapampikiw Capernaúm markar saräna. Kawki cheqnamsa saräna uk ‘janiw khitin yatiñapsa munkänti’ (Marcos 9:30). Ukhamatwa discipulonakaparojj jupan jiwañapjjat parläna, ukhamaraki Diosan arunakap yatiyasipkakiñapatak wakichäna. Jesusajj akham sänwa: “Jaqen Yoqapajj jaqenakan amparapar apjjaruyataw uñjasini, ukatjja jiwayapjjarakiniwa, ukampis kimsïr urunwa jupajj jaktayatäni” sasa (Mateo 17:22, 23).

Jesusan jiwañapatjja discipulonakajj yatipjjänwa, nayraw jupanakar uka toqet parljjäna, ukapachan Pedrojj janiw uk creyiñ munkänti (Mateo 16:21, 22). Ukhamarusa kimsa apostolonakajj Jesusar kʼajkir tukur uñjapjjäna ukhajja, ‘Jesusan sarjjañapat’ parlirwa istʼapjjäna (Lucas 9:31). Kunjamsa Jesusan arunakapajj phoqasini uk janis sum amuyapkchïnjja, arkirinakapajj uka arunak istʼasajj “wal llakisipjjäna” (Mateo 17:23). Ukampis Jesusan jiwañapat jisktʼañ ajjsarayasipjjänwa.

Ukatjja Capernaumaruw puripjjäna, uka markanwa Jesusajj jilpach yatichirïna, apostolonakas uka markatäpjjarakïnwa. Ukanjja templotak impuesto cobririnakaw Pedror jakʼachasipjjäna. Jupanakajj janiw impuesto pagkiti sasin inas Jesusar juchañchañ munapjjchïna, ukatwa Pedror akham jisktʼapjjpachäna: “¿Yatichirimajj [templotak] pä dracma qollqe impuestot paguiti?” sasa (Mateo 17:24).

Pedrojj “jïsa, paguiwa” sasaw säna. Kunatï paskäna ukjja Jesusajj yatiskänwa, ukatwa utankjjasin akham sasin jisktʼäna: “Simón, ¿jumajj kamsasmasa? ¿Khitinakas reyinakarojj impuestonak pagapjje, wawanakapati jan ukajj yaqhanakacha?” sasa. “Yaqhanakaw pagapjje” sasaw jupajj säna. Uk satasti Jesusajj sarakïnwa: “Ukhamajj reyin wawanakapajj janiw impuestonak pagapjjañapäkiti” sasa (Mateo 17:25, 26).

Jesusan Awkipajj taqe kunjjar munañäni Reyiwa, juparuw templon adorapjjarakïna. Ukhamajj Jesusajj Diosan Yoqapjamajj janiw templotak impuestonak pagañapäkänti. Ukampis Jesusajj sänwa: “Jupanakar jan lanktʼayañatakejj qotar saram, chawlla katuñ anzuelo umar jaqontäta, ukatjja nayrïr chawlla katusajj lakap ansatatayäta, ukanwa mä qollqe jikjjatäta, uka qollqwa nayampit jumampit churanjjäta” sasa, uka qollqejj pusi dracmar mistutänwa (Mateo 17:27).

Discipulonakapajj Jesusan ukaruw jutapjjäna, Reinon khitis jilïrïnejja uk yatiñwa munapjjäna. Uka pachpa discipulonakapaw jiwañapat Jesusar jisktʼañ ajjsarayasipjjäna, jichhajj jan ajjsartʼasaw kunas jupanakampejj pasani uk jisktʼañatakejj jakʼachasipjjäna. Jesusajj amuyunakap yatiskänwa. Capernaúm markar jutasipkäna ukhaw uka toqet jiskhisis jutapjjäna. Ukatwa Jesusajj jisktʼäna: “¿Kunjjatsa jumanakajj thakin jiskhisipjjta?” sasa (Marcos 9:33). Amukïpjjänwa, khitis jupanakat jilïrejj uka toqetwa thakin jiskhisipjjäna, ukatwa phenqʼasipjjäna. Ukhamaruw apostolonakajj akham sasin Jesusar jisktʼapjjäna: “¿Khitis alajjpachankir Reinon jilïrïnejja?” sasa (Mateo 18:1).

Discipulonakapajj kimsa maraw Jesusan yatichäwinakap istʼapjjäna, luratanakapsa uñjapjjarakïnwa, ¿kunatsa khitis jilïrïnejj sasin jiskhisipjjpachäna? Cheqansa jupanakajj pantjasirinakapjjänwa.  Uka tiemponjja religión pʼeqtʼirinakajj jilïrïñsa aytatäñsa wal munapjjerïna, ukatwa discipulonakajj ukham amuyapjjarakpachäna. Ukhamarusa, Pedrorojj uka nayrakiw Jesusajj “Reinon llavenakap churäma” sasajj säna, inas uk yatisajj jilïrïkaspas ukham amuyaschïna. Santiagompi Juanampejj Jesusan kʼajkir tukutapwa uñjapjjäna, inas uk uñjasajj jilïrïpkaspas ukham amuyasipjjarakchïna.

Ukhamajja Jesusajj discipulonakapan amuyunakap cheqañchañatakiw mä wawar jawsäna, jupanak taypir saytʼayasasti sarakïnwa: “Qhanakwa sapjjsma, jumanakatejj ukhamäsipkakïta, janirak wawanakjam tukupkäta ukhajja, janiw kunjamatsa alajjpachankir Reinorojj mantapkätati. Antisas khititejj aka wawar uñtat jiskʼar tukkani, ukaw alajjpachankir Reinon jilïrïnejja. Khititejj aka wawanakat mayniru nayan sutij-jjar katoqki ukajja, nayaruw katoqarakitu” sasa (Mateo 18:3-5).

Jesusajj wali sum yatichäna, janiw discipulonakapatakejj coleraskänti, janirakiw envidiasirïpjjtawa, jumanakatakiw taqe kunsa munapjjtajja sasinsa siskänti. Jan ukasti mä wawat parlasaw yatichäna. Wawanakajj janiw jilïrïñsa, ni wali aytatäñsa munapkiti. Discipulonakaparojja wawanakjam chuymanïpjjañapatakiw Jesusajj yatichäna. Tukuyañatakejj akham sarakïnwa: “Khititejj taqe jumanak taypin jiskʼar tukusin sarnaqki ukaw jilïrejja” sasa (Lucas 9:48).