Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 2 JALJA

Chacha warmjam sum sarnaqapjjam

Chacha warmjam sum sarnaqapjjam

“Jaqejj janiw jaljtaykaspati kuntejj Diosajj mayachkis ukjja.” (Mateo 19:6)

‘Warmimarojj jan engañamti’ sasaw Jehová Diosajj qhanañchi (Malaquías 2:16). Jaqechatanakajj uka ewjjtʼarjam sarnaqañatakiw chʼamachasipjjañapa, janitï ukarjam sarnaqapkaspa ukhajja, janiw purapat confiyasiñajj utjkaspati. Cheqas purapat confiyasiñajj utjki ukhaw chacha warmejj jukʼamp munasipjje.

Chacha warmjam sum sarnaqañajj jichhürunakan chʼamakëjjewa. Ukhamajj ¿kunas sum jakasiñatak yanaptʼapjjeristam?

 1 CHACHAMAW JAN UKAJJ WARMIMAW NAYRANKAÑAPA

BIBLIAJJ KAMSISA: ‘Kunatï askïkis ukpun ajllipjjam’ (Filipenses 1:10). Chachamaw jan ukajj warmimaw jumatakejj taqe kunat sipansa nayrankañapa.

Juparuk munasisma ukat ‘kusisit’ jakasipjjasma ukwa Jehová Diosajj muni (Eclesiastés 9:9). Jupatwa llakisiñama ukat askip thaqhañama, sasaw Diosajj qhan ewjjtʼistu (1 Corintios 10:24). Chachamasa jan ukajj warmimasa, jupar wali askit uñjatama ukat yanaptʼap munatamwa amuyañapa.

KUNSA LURASMA:

  • Chachamampi jan ukajj warmimamp sum parltʼasiñatakiw tiempo apstʼasiñama

  • Paninëjjasajj janiw jumatak llakisiñamäkiti

 2 “CHUYMAM IMAM”

BIBLIAJJ KAMSISA: “Khititejj mä warmirojj munapayañataki uñtejja, niyaw chuymapanjja jupampi wachoqa juchjja lurjje” (Mateo 5:28). Maynitï qʼañu jan wali amuyunakat lupʼiskchi ukhajja, chachaparu jan ukajj warmipar engañkaspas ukhamawa.

Ukatwa Jehová Diosajj “chuymam imam” sasin ewjjtʼistu (Proverbios 4:23; Jeremías 17:9). Ukatakejja, kunanaks uñchʼuktan uk amuytʼasiñasawa (Mateo 5:29, 30). Job chachatwa yateqasiñasa, jupajj yaqha warminakar jan uñchʼukiñatakiw chuymapan amtäna (Job 31:1). Pornografía sat qʼañu luräwinakjja, janiw uñchʼukiñamäkiti. Ukatjja, janipuniw chuymaman yaqhar munañajj utjañapäkiti.

KUNSA LURASMA:

  • Chachamaru jan ukajj warmimar qawqsa munasta ukajj qhanäñapawa

  • Juparutï maynimp parlatamajj jan waltʼaykchi ukhajja, janiw jupamp parljjañamäkiti