Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 24 YATICHÄWI

Janiw kunas ‘Diosan munasiñapat apaqkistaspati’

Janiw kunas ‘Diosan munasiñapat apaqkistaspati’

1. ¿Kunjamsa jaqenakajj amuyasipjje, ukat jilat kullakanakas awisajj kunjamsa amuyapjjaraki?

KUNJAMTÏ Juan 3:16 qellqatajj siskejja, Jehová Diosajj jaqenakar wal munasi. Ukampis ¿sapa maynirut munaspachïstu? Yaqhepajj akham amuyapjje: “Janiw kunapachas Diosajj nayar munaskitaspati” sasa. Awisajj cristian jilat kullakanakasasa ukhamaw amuyasipjjaraki. Mä llaktʼat jaqejj akham sasaw säna: “Janiw Diosajj nayat amtaskpachïtuti” sasa. ¿Jumajj ukham sirïtati?

2, 3. ¿Janis Diosajj munaskistaspa, janis kunatakis walïksna ukham amuyañas khitis muni, ukat kunas yanaptʼistaspa?

2 Janis Diosajj munaskistaspa, janis Diosatakejj kuna valoranïksna ukham amuyañaswa Supayajj muni. Cheqansa, Supayajj jachʼa jachʼa tukupjjañapatakiw jaqenakar chʼamañchi (2 Corintios 11:3). Ukampis yaqheparojj jupapachpa aynachtʼañapatakiw chʼam apaqaraki (Juan 7:47-49; 8:13, 44). Aka qhepa urunakanjja, Supayajj jukʼampi uka toqet jaqenakar aynachtʼayi. Walja familianakanjja janiw munasiñajj utj-jjeti. Ukat yaqheparojj jan sinttʼasiri, qhoru, ñanqha jaqenakarakiw tʼaqhesiyapjje (2 Timoteo 3:1-5). Ukham walja maranak tʼaqhesiyata, jañchipatsa jiskʼachata ukat uñisita sarnaqerinakajja, janis kunatakis walïpkaspa, janis munatäpkaspa ukhamwa amuyasipjje.

3 Jumatejj ukham jikjjatassta ukhajja, jan llakisimti. Awisajj jiwasakiw ukham amuyastanjja. Ukampis amtañäni, jan wali amuyunak “cheqachañataki[sa]” “kunanakatejj chʼamanïki ukanakar tukjañataki[sa]” Bibliaw yanaptʼistani (2 Timoteo 3:16; 2 Corintios 10:4). Diosan Arupajj akham sistuwa: “Chuymasatejj kunatsa juchañchchistojja, Diosajj jukʼamp jachʼawa chuymasat sipansa, jupasti taqe kunwa yatiraki” sasa  (1 Juan 3:20). Jïsa, Jehová Diosajj qhawqsa munasistu uk chuymasan sum amuyañasawa. Uk jichhajj pusi toqet Bibliarjam sum amuytʼañäni.

Jehová Diosajj sapa mayniruw munasistu

4, 5. Jehová Diosajj qhawqsa munasistu ukjja, ¿kunjamsa Jesusajj jamachʼinakat parlasajj amuytʼayäna?

4 Diosajj kunjamsa sapa mayniru uñjistu uka toqet nayraqat parltʼañäni. Jesusajj akham sänwa: “¿Janit pä [gorrión sat] jamachʼis jukʼa qollqer aljaskejja? Ukampis janiw maynisa aka oraqerojj liweqtkiti jan Diosan munañapatjja. Ukampis jumanakatjja taqe ñikʼutanakamasa mayat mayat suma jaktʼatawa. Ukhamasti jan ajjsarapjjamti, jumanakajj uka jiskʼa jamachʼinakat sipanjja wali jila alanïpjjtawa” sasa (Mateo 10:29-31). Uka arunak istʼasajj kunjamakis Jesusan istʼirinakapajj jikjjatasipjjpachäna uk amuytʼañäni.

“Jumanakajj walja jiskʼa jamachʼinakat sipansa jukʼampi alanïpjjtawa”

5 “¿Kunatakis gorrión sat jiskʼa jamachʼinakjja maynejj alaspa?” sasin inas jisktʼaschisma. Nayra tiempojj manqʼañatakiw uka jiskʼa jamachʼinak wali iraqtʼatar aljapjjerïna, pä jamachʼejj mä moneda qollqerukiw qhatunakan aljasirïna. Qhepatjja, ‘pä moneda qollqerojj phesqa jamachʼiw aljasi’ sasaw Jesusajj sarakïna. Pä moneda qollqerojj pusikis aljasiñapächïnjja, mayampiw yaptʼapjjerïna, janis valoranïkaspa ukhamwa jaqenakajj uñjapjjerïna. Ukampis “Diosasti ukanakatjja janiw maynits [ni yapäki ukatsa] armtʼaskiti” sasaw Jesusajj sarakïna (Lucas 12:6, 7). Kunsa Jesusajj yatichañ munäna ukjja qhan amuyjjtanjja. Niyakejjay Diosajj mä sapa jiskʼa jamachʼirus wali valoranit uñjchejja, ¿kunjamsa jaqerojj uñjpachïstu? Wali valoranit uñjistu ukat sum uñtʼarakistu. Kunjamtï Jesusajj siskänjja, ñikʼutanakasas mayat maya jakhutawa.

6. ¿Cheqapunit ñikʼutanakasajj jakhutäpacha?

6 ¿Cheqapunit ñikʼutanakasajj jakhutäpacha? Jesusan arsutapajj janis cheqäkaspa ukham yaqhepajj amuyapjje. Ukampis ak amtañäni, niyakejjay Jehová Diosajj jiwatanakar jaktaychinejja, ¿janit sapa maynir wali sum uñtʼkpacha? Cheqas  Jehová Diosajj wal munasistu ukat sum uñtʼarakistu. Sañäni, amuyunakassa, sarnaqatanakassa ukat kunatsa ukham jaqëtan uksa sum yatistu. * Mä jaqejj niya 100.000 ukha ñikʼutaniwa. Ukhamajj niyakejjay Jehová Diosajj sum uñtʼchistojja, jupatakejj ñikʼut jakhuñas janiw kuna chʼamäkpachati.

¿Kunanaksa Jehová Diosajj wali askit uñji?

7, 8. 1) ¿Kunjam chuymaninakas Jehová Diosar kusisiyi? 2) ¿Kuna luräwinakasarus Jehová Diosajj wali askit uñji?

7 Kunjam chuymanïñatakisa ukat kunanak lurañatakis chʼamachastan ukanakjja Jehová Diosajj wali askit uñji sasaw Bibliajj qhanañchistu. David reyejj akham sasaw Salomón sat yoqapar säna: “Tatitusti taqe chuymanakjja sumwa uñji, ukhamarak yatiraki kuna amtäwinaksa, lupʼïwinaksa” sasa (1 Crónicas 28:9). Aka ñanqha pachanjja, kunapachatï millón millón jaqenak taypit sumankaña, cheqaparjam sarnaqaña ukat cheqa arunak yateqaña muniri jaqenak jikjjati ukhajja, walpun Jehová Diosajj kusispacha. Ukatjja, maynejj jupar taqe chuyma munasi, wal uñtʼañ muni ukat yaqhanakarus yatiyañ munaraki ukhajja, wal kusisirakpacha. Jupjjat qhanañchirinakarojj wali sum amti, ukat “mä libroruw” qellqasi ‘kawkïri jaqenakatï Diosaru ajjsarapki, ukhamaraki jupatsa jan armasipkaraki’ ukanakatjja sasaw Bibliajj sarakistu (Malaquías 3:16). Cheqas ukham jaqenakajj jupan wali munatäpjjewa.

8 ¿Kuna luratanakassa Jehová Diosajj wali valoranit uñjpacha? Jesusat yateqasiñataki chʼamachastan ukat jaqenakar  jupjam yatiyir sartan ukaruw Diosajj wali askit uñji (1 Pedro 2:21). Machaka Testamento sat Biblianjja Romanos 10:15 qellqatajj akham siwa: “¡Kunja sumasa sumankaña suma arunaka yatiyirinakan kayunakapajja” sasa. ¿Cheqpach kayunakatti parlpacha? Janiwa. Khitinakatï suma yatiyäwinak yatiyañataki sarapki uka servirinakatwa parlaski. Ukhamasti, chʼamachasitanakapajj Dios nayraqatanjja wali suma uñjatawa (Mateo 24:14; 28:19, 20).

9, 10. 1) Jehová Diosajj jan walinakan aguantatasjja wali askitwa uñji sasajja, ¿kunatsa sistanjja? 2) ¿Kunjamsa jan jitheqtir servirinakapar Diosajj uñji?

9 Jan waltʼäwinakan aguantatasjja Jehová Diosajj wali askitwa uñjaraki (Mateo 24:13). Amtañäni, Supayajj Diosat jitheqtayañwa munistu. Ukhamajj kuna yantʼansa Jehová Diosar taqe chuyma yupaychaskakiñäni ukhajja, Supayan kʼarïtap uñachtʼayañapatakiw Diosar yanaptʼañäni (Proverbios 27:11). Cheqasa, aguantañajj chʼamakiwa. Kunayman jan waltʼäwinakaw sapürojj utji, awisajj usuntañasa, qollqet pistʼañasa jan ukajj kuna llakis utjakipuniwa. Awisajj kuna amtanakas jan phoqaski ukhajj chʼam apaqarakistu (Proverbios  13:12). Ukampis uka jan waltʼäwinakar sapüru saykattan ukhajja, Diosajj wali askit uñji. Ukatwa David reyejj ‘lipʼich wayaqar’ jachanakaj apthapirapita sasin Diosar mayisïna, ukat akham sarakïnwa: “¿Janit ukanakast qellqataman qhanäkisti?” sasa (Salmo 56:8NM). Ukhamasti, jupat jan jitheqtañ layku tʼaqhestan jachtan ukanakjja janiw Diosajj armaskiti, wali valoranitwa uñji.

Yantʼanakan aguantatas Jehová Diosajj sum uñjaski, janiw armaskaniti

10 Ukampis yaqhepajj jupanakpachaw juchañchasipjje, janis Jehová Diosajj askit uñjkaspa ukhamwa amuyasipjje. Inas wali llaktʼatajj akham sapjjchispa: “Nayat sipansa suma jilat kullakanakaw utji, janiw nayajj jupanakjamäkti, janiw Dios nayraqatan askïkpachätti” sasa. Ukampis Diosajj janiw mayninakamp igualaykistuti, janirakiw qhorükisa. Kunjamatï jikjjatastan uk sum amuyi (Gálatas 6:4). Chuymassa wali sum uñakipi, ukat kunatï askïki ukwa jikjjataraki, jiwasan jan yäqañjamäkchi ukhasa wali askitwa uñji.

Diosajj kunatï askïki uk ajlli

11. ¿Kunjamsa Jehová Diosajj Abías sat waynar uñjäna, ukat kunsa ukajj Diosat yatichistu?

11 Kunapachatï Jehová Diosajj kunatï askïki uk thaqki ukhajja, wali amuyumpiw thaqsu, mä susuñampis apskaspa ukhama. Amuytʼañataki, kunapachatï Jehová Diosajj jupa contra saytʼiri Jeroboam reyin familiapar tukjañ amtkäna ukhajja, Abías sat yoqap ‘sapanakwa mä jukʼa aski’ Diosajj jikjjatäna. Ukatwa akham sarakïna: “Jeroboam familiapatjja jupa sapakiwa sepulturaru imtʼatäni” sasa (1 Reyes 14:1, 10-13). Cheqansa, Jehová Diosajj mä susuñampjamaw Abías sat waynan chuymap sussüna, ukhamatwa ‘mä jukʼa aski jupatakjam’ jikjjatäna. Uka mä ‘jukʼa askjja’ Bibliaruw qellqayawayäna ukat Abiasatsa khuyaptʼayasiwayarakïnwa.

12, 13. 1) ¿Kunjamsa Jehová Diosajj Josafat reyir uñjäna, ukat ukajj kunsa jiwasar yatichistu? 2) ¿Kunjamsa Jehová Diosajj mä suma Awkjamajj luratanakas uñji?

12 Jichhajj Josafat reyit parltʼarakiñäni. Kunapachatï uka  reyejj jan walinak luräna ukhajja, Diosan mä profetapajj akham sänwa: ‘Jehová Diosajj jumatakejj wali coleratawa’ sasa. Ukham arunak istʼasajj walsa sustjaskchïnjja, profetajj akham saskakïnwa: “Ukampis yaqha suma luratanakamawa jumanjja utji” sasa (2 Crónicas 19:1-3). Cheqasa, Jehová Diosajj wali coleratäkchïnsa, Josafatan suma luratanakapatjja janiw armaskänti. Ukampis jaqejj janiw ukhamäktanti, may khitis colerayistu ukhajja, suma luratanakap qʼal armastanjja. Ukat jiwaspachas jan wal lurtan ukhasa, ukhamarakiw juchañchastan ukat chuymas ustʼataw jikjjatastanjja, janis kuna aski luratasas utjkaspa ukhamwa amuyastanjja. Ukampis amtañäni, jiwasatï juchanakasat taqe chuym arrepentisiñäni ukat jan jukʼamp uka juch lurjjañatak chʼamachasiñäni ukhajja, Jehová Diosajj perdonistaniwa.

13 Kunjamtï mä qori pallirejj susuñamp chʼallanak apanukkejja, ukhamarakiw Jehová Diosajj chuymas uñakipasajj jan walinak apanuku, ukat kunatï askïki ukanakwa qorïkaspa ukham wali askit uñjaraki. Jichhajj mä wawan dibujonakapat parltʼarakiñäni, yaqhep awk taykanakajj  wawanakapan dibujonakapjja wali munat imasipjje, wawanakapajj tiempompejj armasjjapjje ukhasa imasisipkakiwa. Ukampis Jehová Diosajj jupanakat sipansa jukʼamp munasir suma Awkiwa. Ukhamajj jiwasatï jupat jan jitheqtkañäni ukhajja, janipuniw luratanakasjja armaskaniti. “Diosasti askiwa, janiw armaskaniti kuntejj lurapkta” ukanakjja sasaw Bibliajj sistu (Hebreos 6:10).

14, 15. 1) Juchanïkstansa, ¿kunatsa Diosajj wali askit uñjistu? Mä uñachtʼäwimp qhanañchtʼma. 2) ¿Chuymasan askinak jikjjatasajj Jehová Diosajj kamachanisa, ukat kunjamsa taqe chuym yupaychirinakaparojj uñji?

14 Juchanakas thaqañat sipansa, aski luratanakaswa Jehová Diosajj thaqhe, ukat kunanaksa lursna uksa sum amuyi. Kunjamtï yatktanjja, yaqhepajj wali munatwa nayra jachʼa dibujonaksa imasipjje. Ukat askichtʼañajj wakisi ukhajja, jankʼakiw askichapjje. Mä kutejja, Leonardo da Vinci sat wali uñtʼat jaqen mä dibujopwa Londres markan National Gallery siski ukan jaqenakar uñachtʼayañataki uskupjjatayna. Uka dibujojj niya phesqa patak maranëjjänwa, ukat alapajj 30 millón dólar qollqënwa. Ukampis mä akatjamat uka dibujorojj mä jaqejj escopetampi illaptʼatayna jan ukajj qʼajjchintatayna. ¿Uka dibuj kamachapjjpachänsa? ¿“Janiw walëjjeti” sasat jaqtjjapjjpachäna? Janiwa. Cheqansa, janiw khitis jaqtañ munkänti, jan ukasti jankʼakiw askichañ qalltapjjäna. Uka cuadrojja jupanakan wali munatänwa. Jichhajj amuytʼañäni. Niyakejjay lapizampi lurat uka dibujos jaqenakatakejj wali munatächejja, ¿janit Diosajj jiwasar munaskpachïstu? Jïsa, juchamp qʼañuchatas uñjasiwaykstanjja, Diosajj wali askitwa uñjistu (Salmo 72:12-14). Ukhamarakiw jupar munasirinakarojj wasitampi askichjjani, ukhamatwa jan kuna juchani jakasjjañäni (Hechos 3:21NM; Romanos 8:20-22NM).

15 Kuna askinakatï chuymasan utjkistu ukanakjja inas jiwasajj jan sum amuyaskstan, ukampis Jehová Diosajj sum uñtʼistu. Ukhamasti, jupar yupaychaskakiñäni ukhajja, jupaw  uka askinak qhanstayani jan juchani jaqer tukuñaskama. Supayan apnaqata aka ñanqha pachanjja, inas kunayman toqet tʼaqhesiyata uñjasiwaystan, ukampis Jehová Diosajj taqe chuym servirinakaparojj wal munasistu ukat wali askitwa uñjarakistu (Hageo 2:7NM).

Diosan munasiñapajj luratanakapan uñjasi

16. 1) ¿Kunjamsa Jehová Diosajj munasiñap uñachtʼayistu? 2) ¿Kunatsa Diosajj sapa mayniruw munasistu sistanjja?

16 Jehová Diosajj qhawqsa munasistu ukjja kunayman toqetwa uñachtʼayistu. Janis Diosajj munaskistaspa, janis Diosatakejj valoranïksna ukham amuyañaswa Supayajj muni, ukampis Jehová Diosajj munat Yoqapar khitanisaw kunjsa munasistu ukjja uñachtʼayawayistu. Ukhamajj kunapachatï lawar chʼakkatas Jesusar jiwayapjjäna ukhajja, qhawqsa Jehová Diosas Jesucristos jiwasar munasiñat tʼaqhesipjjpachäna ukjja janipuniw armañasäkiti. Awisajja, yaqhepajj janis Jesusajj jupa layku jiwkaspa ukhamwa amuyapjje. Ukampis apóstol Pablot amtañäni, jupajj janïr cristianökasajj Criston arkirinakaparojj walsa tʼaqhesiykchïnjja, jupajj akham sänwa: “Nayar munasinwa jakañapa naya layku aptʼasiwayi” sasa (Gálatas 1:13; 2:20).

17. ¿Kunjamatsa Jehová Diosajj Jesusarus juparus jawskatasistu?

17 Jesusan jiwatapjjaru bendición katoqañasatakiw Jehová Diosajj sapa maynir yanaptʼarakistu. Jesusajj akham sänwa: “Janiw khitis nayaru jutkaspati, janitejj khitankitu uka Awkejj apankaspa ukajja” sasa (Juan 6:44). Ukhamasti, sapa mayniruw Jesusan arkiripäñatakisa ukat wiñay jakaña churañatakis jawsistu. ¿Kunjamatsa? Yatiyirinakapar khitanisaw yanaptʼistu. Ukatjja, juchan jaqëkstansa, qollan ajayupampiw amuytʼañasatakisa ukat yateqatarjam sarnaqañatakis yanaptʼayarakistu. Ukat kunjamtï nayra Israel markar siskänjja, ukhamarakiw sapa maynir akham sistu: “Wiñay munasiñampiw nayajj munsma, ukatarakwa khuyapayasiñampi [‘jawskatasisajj’, NM] jichhakam uñjasksma” sasa (Jeremías 31:3).

18, 19. 1) Jupar jakʼachasiñasatakejja, ¿kunjamsa Diosajj munasiñap uñachtʼayistu, ukat jupa pachpa istʼasajj kunsa uñachtʼayarakistu? 2) Llakitätan ukhajja, ¿kunjamasa Diosajj jikjjatasi, ukat Bibliajj kamsistusa?

 18 Jehová Diosajj jupamp parlasiñasatakejj oración toq jakʼachasipjjeta sasaw sarakistu. Ukat “jan inaktʼas orapjjam” sasaw Bibliajj amtayarakistu (1 Tesalonicenses 5:17). Jupajj mayisitanakas istʼapuniwa, ukatwa Biblianjja Diosarojj “mayisitanakar istʼirïtawa” sasejja (Salmo 65:2). Jupa kikpaw istʼistu, janiw khitirusa, ni Yoqaparus istʼañapatakejj jaytkiti. Jïsa, alajjpach akapacha Luriri Diosaw jan ajjsaras oración toqe jakʼachtʼasipjjeta sistojja. Wali munasiñampi sinttʼasiñampiw istʼarakistu.

19 Kunapachatï kuna llakis chuymasan utjki ukhajja, Jehová Diosajj llakisirakiwa. Uk amuytʼañatakejja, Israel markan llakita uñjasipkäna ukhajj kunjamas jikjjatasïna uk Isaías 63:9 qellqatan liytʼañäni, Traducción del Nuevo Mundo sat Biblian akham siwa: ‘Wali llakitäpjjäna ukapachajja, jupajj wal llakisirakïna’ sasa. Ukhamajj janiw kunja llakitäpjjänsa ukak uñjkänti, jan ukasti wal sinttʼasïna. Kunjamas jikjjatasïna ukajj aka arunakanwa amuyasiraki, Diosajj akham sänwa: “Khititejj llamktʼi markajjarojja, ukajj nayan nayrajjaruw llamktʼaski” sasa (Zacarías 2:8). * ¿Janit nayrat loqantatajj wal usuyasksna? Jïsa, kunapachatï chuym usuyastan ukhajja, Jehová Diosajj ukhamarakiw chuym usuyasi.

20. Romanos 12:3 qellqatarjamajja, ¿kuna toqetsa amuyasiñasa?

20 Niyakejjay Diosajj munasiñap kunayman toqet uñachtʼaychistojja, janiw mä amuytʼasir cristianojj jachʼa jachʼas ni wali walis tukuñapäkiti. Apóstol Pablojj akham sasaw qellqäna:  “Diosajj munasiñapampi mä suma ewjja nayar churatap laykuw taqeniru sapjjsma: jan maynis jupa kipkatjja lupʼpati kuntejj lupʼiñäki ukat jukʼampjja. Ukampis sapa mayniw cheqaparu lupʼiñapa jupan Diosar iyawsañapa utjatapatjama” sasa (Romanos 12:3). Ukhamasti, wali amuyumpi Diosan munasiñapan jakasipjjañäni. Ukat amtarakiñäni, janiw Diosan jiwasar munasiñapajj wakiskapuniti, ni jupan munatäñatakis askïkaraktanti (Lucas 17:10).

21. ¿Kuna kʼarinakarus jan yäqañasäki, ukat kunsa amtañasapuni?

21 Supayan kʼarinakap contra saytʼañatakejj chʼamachasiskakiñäni. Diosajj sapa maynirus wal munasistu ukat wali askitwa uñjarakistu. Ukhamajj ¿kuna jan walinaktï jakäwiman pasawaykta ukanak janit jumajj atipjkasma? ¿Janit Diosajj aski luratanakam uñjkpacha? ¿Jachʼa juchanaksa janit Diosajj Yoqapan wilapjjar perdonkiristamjja? Ukhamajj jan Supayan uka kʼarinakapamp aynachtʼayasimti. Cheqansa, sapa mayniw apóstol Pablon arunakap amtañasajja, jupajj akham sänwa: “Ukhamajj jichhajj yattwa, janiwa kunas Diosan munasiñapatjja apaqkistaspati, janiw jiwañasa, ni jakañasa, ni angelanakasa, ni alajjpach chʼamanakasa, ni jichhasa, ni jutkani ukasa, ni patankki ukasa, ni manqhankki ukasa, ni kuna yaqha yänakasa Diosan munañapatjja apaqkistaspati, uka munasiñsti Cristo Jesús Tatitus toqwa uñachtʼayistu” sasa (Romanos 8:38, 39).

^ tʼaqa 6 Kunapachatï jiwatat jaktañ toqet Bibliajj parlki ukhajja, janiw Jehová Diosajj armaskaspati, jan ukasti amtapuniw sasaw parlaraki. Job chachajj akham sasaw Jehová Diosar säna: “¡Nayat amtasiñamatakejja mä uru [jaktayañatak] amtasirakisma!” sasa (Job 14:13). Jesusajj akham sarakïnwa: “Horasajj purininiwa taqe jiwatanakasti [...] jaktapjjaniwa” sasa. “Taqe jiwatanakasti” sasin jaqokipatäki uka cheqajja, “amtatäpki uka jiwatanaka” sañwa griego arun muni (Juan 5:28, 29). Cheqansa, Jehová Diosajj khitinakarutï jaktaykani uka jiwatanakatjja taqe kunwa sum amtasi.

^ tʼaqa 19 Yaqhep Biblianakanjja, “nayan nayrajjaruw llamktʼaski” sas Diosajj siskäna ukjja Israel markan nayraparuwa jan ukajj jupanakpachpaw llamktʼasipjje sasaw jaqokipapjje, ¿kunatsa? Qollan Qellqatanak copiaqerinakajja, “janiw Diosar ukham sañajj walïkaspati” sasaw yaqha toqer uñtayapjjatayna. Ukampis ukham maysar uñtayasajja, Jehová Diosajj kunja sinttʼasirisa ukwa chhaqtayapjje.