Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 12 YATICHÄWI

‘Sumankañ utjayir Diosar’ sum servipjjañapatakiw yanaptʼasi

‘Sumankañ utjayir Diosar’ sum servipjjañapatakiw yanaptʼasi

¿KUNSA YATEQAÑÄNI?

Jukʼat jukʼatwa Jehová Diosajj markap sum irpapjjañapatakejj servirinakapar yanaptʼawayi

1, 2. ¿Kuna mayjtʼäwis Yatiyañataki enero, 1895 maran mistkäna uka revistan utjäna, ukat yaqhep jilatanakajj kamsapjjänsa?

ENERO phajjsin 1895 maran mistkäna uka Yatiyañataki revista uñjjatasajja, Diosar taqe chuyma serviri John Bohnet sat jilatajj wal kusisïna. ¿Kunatsa ukham kusispachäna? Uka revistan nayrïr janapajj janiw nayrjamäjjänti. Ukanjja, wali oladanakani qotan kunjamsa lusani mä torrejj chʼamak aruman qhantäna ukaw mä dibujon uñjasïna. ‘Revistajj machaq isinïkaspas ukhamäjjewa’ sasaw uka pachpa revistajj qhanañchäna.

2 Ukham suma lurtʼat uñjasajja, Bohnet jilatajj Russell jilataruw mä carta akham sasin apayäna: “Revistan machaq isipajj suma lurtʼatapuniwa, uk uñjasajj wal kusista” sasa. Ukat John Brown sat jilatajj uka revistat akham sarakïnwa: “Uka torren cimientonakapajj wali chʼollqhewa. Thayas ukat jachʼa oladanakas utjkchejja, uka torrejj sayaskakiwa. Uk uñjañajj wali muspharkañawa” sasa. Jilat kullakanakajj janiw uka mayjtʼäwik uka maran uñjapkänti, noviembre phajjsinjja, yaqha mayjtʼäwiw Diosan markapan utjarakïna. Jachʼa thayanakaru ukat oladanakaru uñtat jan waltʼäwinakaw uka tiempon utjäna.

3, 4. Yatiyañataki noviembre 15, 1895 maran mistkäna uka revistajja, ¿taman kuna jan waltʼäw utjatapatsa parläna, ukat kunas yatiyasirakïna?

3 Yatiyañataki noviembre 15, 1895 maran mistkäna uka revistanjja, kuna jan waltʼäwis jachʼa oladanakar uñtatajj tamanakan utjäna ukaw sum qhanañchasïna. Khitis tama sarayañapa uka toqetwa jilatanakajj niya sapa kut chʼajjwapjjäna. Ukham jan chʼajjwañatakejj kun lurañas wakisïna ukwa revistajj akham amuytʼayäna: ‘Diosan markapajj mä barcomp sasiwa. Ukat Diosan markap sayapki ukanakajja, jachʼa oladanakar uñtata jan waltʼäwinakar saykatañatakejj janiw Diosan markapar yanaptʼawayapkiti’ sasa. Ukhamajj ¿kun lurañas wakisïna?

4 ‘Jan waltʼäwinakatï qotan utjaspa ukhajja, barconkirinakajj punkunaka ventananak jistʼantañatakejj wakichtʼatäpjjeti janicha ukat kunatï qhespiyasiñatak wakiski  ukanakajj boten utjaskiti janicha uk sumwa barco apnaqerejj uñjañapa. Diosan markap sarayapki ukanakajja, ukhamarakiw jan waltʼäwinakar saykatapjjañapatakejj tamankirinakar sum wakichtʼapjjañapa’ sasaw revistajj säna. Ukatakisti, kuna mayjtʼäw utjañapas wakisïna ukwa akham sasin yatiyarakïna: “Jankʼakiw [tamankirinakajj] irpir chuymaninak [jan ukajj ancianonaka] tam uñjapjjañapatak ajllipjjañapa” sasa (Hech. 20:28).

5. 1) ¿Kunjamsa irpir chuymaninakar uttʼayañajj Diosan servirinakapar yanaptʼawayi? 2) ¿Kuna jisktʼanakatsa yatjjataskañäni?

5 Irpir chuymaninakar uttʼayañajja, ¿kunjamsa Diosan servirinakapar yanaptʼawayi? Nayrïr Jachʼa Chʼajjwäwi tiempon jilat kullakanakan jan aynachtʼapjjañapataki ukat tamanakan suma uttʼatäñapatakiw yanaptʼawayi. Tiempompejja, yaqha mayjtʼäwinakaw Diosan markapan utjawayaraki, ukaw Jehová Diosar jukʼamp sum servipjjañapatak jilat kullakanakar wakichtʼawayi. ¿Ukajj kuna profeciarjamas phoqasiwayi? ¿Diosan markapan kuna mayjtʼäwinaksa uñjawayta? Ukat ¿kunjamsa ukajj yanaptʼawaytam?

“Sumankañampiw apnaqayäma”

6, 7. 1) ¿Isaías 60:17 tʼaqan utjki uka arunakajj kamsañsa muni? 2) ‘Apnaqayämawa’ ukat ukaw “irparakïtam” siski uka arunakajja, ¿kunsa uñachtʼayistu?

6 Kunjamtï 9 yatichäwin uñjaniwayktanjja, Jehová Diosajj waljanir tukuyasaw markapar bendecini sasaw Isaías profetajj mä profecian arsüna (Isa. 60:22). Ukat Jehová Diosajj akham sarakïnwa: “Bronce lantsti qori churäma, hierro lantsti, qollqe churarakïma, lawa lantsti, bronce churäma, qala lantsti, hierro churarakïma. Sumankañampiw apnaqayäma, kunatejj cheqapäki ukaw irparakïtam” sasa (Isa. 60:17). ¿Uka profeciajj kamsañsa muni? ¿Kunjamsa jichhürunakan phoqasiski?

Janiw kunatï jan walïki uka lantejj kunatï sumäki ukajj utjañapäkänti, jan ukasti, kunatï sumäki uka lantejj jukʼamp sumäkis ukaw utjañapäna

7 Kunatï utjki uka lantejj yaqhaw utjani sasaw Isaías profetajj qhanañchäna. Ukampis janiw kunatï jan walïki uka lantejj kunatï sumäki ukajj utjañapäkänti, jan ukasti, kunatï sumäki uka lantejj jukʼamp sumäkis ukaw utjañapäna. Amuytʼañataki, bronce lanti qori churañajj jukʼamp sumawa, hierrotsa, lawatsa ukat qalatsa ukhamarakiw sasispa. ¿Kunsa Jehová Diosajj uka uñachtʼäwimp amuytʼayañ munäna? Kunjamsa markapajj jukʼat jukʼat sumaptani ukwa Jupajj qhanañchañ munäna. Ukampis ¿kuna toqensa markapajj sumaptañapäna? ‘Apnaqayämawa’ ukat ukaw “irparakïtam” sasinjja, markapar uñjañasa ukat sarayañasa kunjamsa jukʼat jukʼat sumaptañapäna uka toqetwa Jehová Diosajj parlaskäna.

8. 1) Isaías profetan arsutaparjamajja, ¿khitis tamar nayrar sartañapatak yanaptʼaski? 2) ¿Kunjamsa uka mayjtʼäwinakajj yanaptʼistu? (“ Altʼat chuymampiw cheqañchayasïna” siski uka recuadro uñjjattʼäta.)

8 ¿Khitis Diosan markapar nayrar sartañapatak yanaptʼaskpacha? Jehová Diosajj akham siwa: “Qori churäma [...], qollqe churarakïma [...], sumankañampiw apnaqayäma” sasa.  Ukhamajj taman nayrar sartatapajj janiw jaqenakan yanaptʼapampïkiti, jan ukasti, Jehová Diosaw nayrar sartañapatak yanaptʼaski. Ukat Jesusajj Reyjam uttʼayatäjjäna ukhatjja, jupa toqew Jehová Diosajj ukanak luraskaraki. ¿Kunjamsa ukajj yanaptʼistu? “Sumankañampi” ukat “kunatejj cheqapäki” ukanakaw utjani sasaw Isaías profetajj säna. Kunapachatï Jehová Diosan ewjjtʼanakap istʼtan ukat ukarjam sarnaqtan ukhajja, sumankañaw taman utji. Ukat kunatï cheqapäki ukarjam sarnaqañ munañaw Jehová Diosar serviñatak chʼamañchtʼarakistu. Kunjamtï apóstol Pablojj siskänjja, Jehová Diosajj “sumankañ Diosa[wa]” (Fili. 4:9).

9. Yäpar taqe kuns lurañataki ukat mayachtʼat sarnaqañatakejja, ¿kunas yanaptʼistani, ukat kunatsa?

9 Pablojj akham sasaw Jehová Diosat sarakïna: ‘Jupajj janiw jan yäpar apnaqer Diosäkiti, jan ukasti, sumankayir Diosawa’ sasa (1 Cor. 14:33, NM). Pablojj ‘jan yäpar apnaqañata’ ukat sumankañatwa parläna. ¿Kunatsa? Taqe kunwa yäpar sum apnaqasksna, ukampis janiw ukajj sumankañ apankapunispati. Amuytʼañataki, guerrar sarir soldadonakajj yäpar suma ordentʼataw sarantapjje, ukampis ukham sarasajj janiw sumankañ utjayapkiti, jan ukasti, chʼajjwañ utjañapatakiw sarantapjje. Ukhamajj ak amtañasawa: taqe kunas yäpar suma uttʼayatäskaspawa, ukampis janitï sumankañ  utjkaspa ukhajja, tiempompejj aynachtʼañaw utjani. Maysa toqetjja, Diosajj utjayki uka sumankañajj taqe kunsa yäpar sum lurañatakiw yanaptʼistu, ukajj janiw tukuskaspati. ‘Sumankañ Diosaw’ markapar irpaski ukat qʼomachaskaraki, uk yatisajj wal Jupar yuspärtanjja (Rom. 15:33). Cheqas Diosajj utjayki uka sumankañaw yäpar taqe kuns lurañataki ukat mayachtʼat sarnaqasipjjañapatakejj taqe tamanakar yanaptʼaski (Sal. 29:11).

10. 1) Nayra maranakanjja, ¿kuna mayjtʼäwinakas Diosan markapan utjawayi? (“ Tama sarayañ toqet mayjtʼäwinaka” siski uka recuadro uñjjattʼäta.) 2) ¿Kuna jisktʼanakatsa yatjjataskañäni?

10 Nayra maranakanjja, kuna mayjtʼäwinakas Diosan markapan utjawayi ukaw “ Tama sarayañ toqet mayjtʼäwinaka” siski uka recuadron jukʼamp qhanañchasi, taqe ukanakajj yäparuw lurasiwayi ukat jilat kullakanakaruw yanaptʼawayaraki. Ukampis aka qhepa maranakanjja, ¿kunjamsa Jehová Diosajj Reyip toqejj “bronce” lantejj “qori” utjayawayi? Tama sarayañ toqet mayjtʼäwinak utjawayki ukanakajja, ¿kunjamsa sumankañ utjañapataki ukat mayachtʼatäpjjañapatakejj tamanakar yanaptʼawayi? ¿Kunjamsa ‘sumankañ utjayir Diosar’ serviñajj jumar yanaptʼtam?

¿Kunjamsa Cristojj tamar pʼeqtʼi?

11. Bibliat sum yatjjatasajja, ¿kunsa Oraqpachan Jilïr Irpirinakajj amuyapjjäna, ukat kun lurañsa amtapjjäna?

11 Khä 1964 marata 1971 marakamajja, Oraqpachan Jilïr Irpirinakan pʼeqtʼataw mä qawqha jilatanakajj Biblian  yatichäwinakap jukʼamp sum yatjjatañatak tantachasipjjäna. Kunayman toqenakatwa yatjjatapjjäna, sañäni, nayrïr patak maranakan cristian tamanakajj kunjam uttʼayatäpjjänsa, khitinakas irpapjjäna ukanakwa yatjjatapjjäna. * Nayrïr patak maranakanjja, janiw mä irpir chuyman jilatak tam saraykänti, jan ukasti, tamankir taqpach irpir chuymaninakaw sarayapjjäna (Fili. 1:1, NM; 1 Timoteo 4:14 liytʼañataki). Cheqansa, Oraqpachan Jilïr Irpirinakarojj Jesucristo Reyiw Diosan markap sum uñjapjjañapatak amuytʼayaskäna. Ukat uka jilatanakajj jupamp yanaptʼayasiñwa amtapjjarakïna. Ukatwa irpir chuymaninakaru Biblian mayitanakaparjam uttʼayasiñapatakejj kunatï lurañ wakiskäna ukanak lurapjjäna. 1970 maranakanjja, ¿kuna mayjtʼäwinakas utjpachäna?

12. 1) Oraqpachan Jilïr Irpirinak taypinjja, ¿kuna mayjtʼäwinakas utjawayi? 2) Oraqpachan Jilïr Irpirinakajja, ¿kunjam uttʼayatäpjjesa? (“ Oraqpachan Jilïr Irpirinakajj Diosan Reinop laykuw wal irnaqtʼapjje” siski uka recuadro uñjjattʼäta.)

12 Khä 1970 marakamajja, paqallq jilatanakaw Oraqpachan Jilïr Irpirinakjam servisipkäna, jupanakaw Watch Tower Bible and Tract Society of Pennsylvania sat corporación pʼeqtʼapjjarakïna. Ukampis 1971 maranjja, 11 jilatanakaw Oraqpachan Jilïr Irpirinakjam irnaqjjapjjäna, ukat jupanakajj janiw Watch Tower Bible and Tract Society of Pennsylvania satäkis ukan pʼeqtʼirinakapjam uñtʼatäjjapjjänti. Ukat jupanakkamas mä kikpakwa uñjasipjjäna, janiw khitis mayninakat sipansa jukʼamp jilankkaspas ukham amuyaskänti ukat uka marat aksaruw khitis jupanakar pʼeqtʼañapäna ukajj may maynir sapa marajj waktʼäna.

13. 1) Khä 1932 marata 1972 marakamajja, ¿khitis tam sarayäna? 2) ¿Kunsa Oraqpachan Jilïr Irpirinakajj 1972 maran lurapjjäna?

13 Khä 1932 marata 1972 marakamajja, mä jilatakiw tam sarayäna. 1936 marakamajja, uka jilatajj director de servicio sasin uñtʼatänwa. Qhepatjja, aka sutinakampiw  uka jilatarojj uñtʼasjjarakïna: siervo de compañía, siervo de congregación ukat superintendente de congregación. Uka jilatajj taqe chuymaw Diosan tamap uñjäna. Ukampis jupar yanaptʼañatak uttʼayatäpkäna uka jilatanakar jan jisktʼasakiw kuns amtirïna. Ukatwa taman mä qawqha mayjtʼäwinak utjañapatakejj Oraqpachan Jilïr Irpirinakajja, jilat kullakanakar 1972 maran wakichañ qalltapjjäna, ¿kuna mayjtʼäwinakas utjpachäna?

14. 1) Octubre 1, 1972 maranjja, ¿kuna mayjtʼäwis tamanakan utjawayi? 2) Irpir chuymaninakar sarayki uka jilatajja, ¿kunjamsa Filipenses 2:3 qellqatarjam sarnaqatap uñachtʼayi?

14 Uka tiemponjja, mä jilatakiw tam sarayäna, ukampis ukhat aksarojja, Biblian mayitanakap phoqapkäna uka jilatanakaruw irpir chuymanjam uttʼayasjjäna. Taqe uka jilatanakaw tam uñjapjjañapäna. Octubre 1, 1972 maratwa ukarjam phoqañ qalltawayapjje. Jichhürunakanjja, irpir chuymaninakar sarayki uka jilatajj janiw mayni irpir chuymaninakat sipansa jilankkaspas ukham amuyaskiti, jan ukasti, ‘jukʼamp jiskʼäkaspas’ ukhamwa amuyasi (Luc. 9:48). Ukham altʼat chuyman jilatanakajja, jilat kullakanakatakejj mä bendicionawa (Fili. 2:3).

Yatiñampiw Reyejj arkirinakapar yanaptʼañatakejj awatirinaka tiempopar churawayi

15. 1) Tamanakan utjki uka irpir chuymaninakan taqpachani irnaqtʼapjjatapajja, ¿kunjamsa jupanakarusa ukat tamarus yanaptʼawayi? 2) Yatiñampiw Reyejj arkirinakapar yanaptʼawayi sasajja, ¿kunatsa sissna?

15 Tamanakan utjki uka irpir chuymaninakan taqpachani irnaqtʼapjjatapajja, ¿kunjamsa jupanakarusa ukat tamarus yanaptʼawayi? Kimsa toqet uk uñjañäni. Maya: taman kuna lurañanïsipkpasa, Jesusajj tamar pʼeqtʼaskatap jan armapjjañapatakiw yanaptʼawayi, ukaw jukʼamp wakiskirejja (Efe. 5:23). Paya: kunjamtï Proverbios 15:22 qellqatajj siskejja, “walja amuytʼayirinakampiw sumar mistsuñajj utji”. Diosar servisipkakiñapatakiw irpir chuymaninakajj jilat kullakanakar yanaptʼapjjañapa. Cheqansa, kunapachatï irpir chuymaninakajj jupanakkam sum parltʼasipjje ukat kuntï mayninakajj sapki uk istʼapjje ukhajja,  jankʼakiw Biblian yatichäwinakaparjam mä amtar puripjje (Pro. 27:17). Ukat Jehová Diosaw kuntï jupanakajj amtapki uk sum mistuñapatak yanaptʼaraki. Kimsa: urut urutjamaw Jehová Diosan markap uñjiri jilatanakajj munasi, ukat ukham irnaqtʼir jilatanakajj urut urutjamaw utjaraki, ukhamajj Diosan tamapajj janiw jan awatirinakan uñjaskiti (Isa. 60:3-5). Ak amuytʼañäni, 1971 maranjja, 27.000 jila tamanakaw Oraqpachan utjäna, ukampis 2013 maratakejja, 113.000 jila tamanakaw utj-jjäna. Cheqas yatiñampiw Reyejj arkirinakapar yanaptʼañatakejj awatirinaka, jan ukajj irpir chuymaninaka tiempopar churawayi (Miq. 5:5).

“Ovejanakarojj mä suma yatichäwi uñachtʼayasa”

16. 1) ¿Kun lurañas irpir chuymaninakar waktʼi? 2) ‘Uwijanakajar awatim’ sasin Jesusajj siskäna uka arunakajj kamsañsa muni ukjja, ¿kunjamsa revistanakajj qhanañchäna?

16 ‘Diosar servisipkakiñapataki jilat kullakanakar yanaptʼañajj jiwasaruw waktʼistu’ sasaw irpir chuymaninakajj nayratpach amuyapjjäna (Gálatas 6:10 liytʼañataki). 1908 maran mistkäna uka Yatiyañataki revistajja, ‘uwijanakaj awatim’ sasin Jesusajj siskäna uka arunakajj kamsañsa muni ukwa sum qhanañchäna (Juan 21:15-17). Uka revistanjja akham sasaw irpir chuymaninakar ewjjtʼasïna: “‘Uwijanakajar awatim’ sasaw Utanejj arsuwayi, uk phoqañaw jiwasatakejj taqe kunat sipansa nayrankañapa. Tatitur arkapki ukanakar sum uñjañsa ukat manqʼa churañsa wali askitwa uñjañasa” sasa. 1925 maran mistkäna uka Yatiyañataki revistajja, tamar uñjañajj kunja wakiskirisa uk akham sasaw irpir chuymaninakar wasitat amtayäna: “Iglesiajj Diosankiwa [...], ukat Jupaw jilat kullakanakar uñjapki ukanakarojj cuenta mayini” sasa.

17. Diosan tamap sum uñjapjjañapatakejja, ¿kuna yanaptʼanaksa irpir chuymaninakajj katoqawayapjje?

17 Tamanak jukʼamp sum uñjapjjañapatakejja, ¿kunjamsa Jehová Diosajj markap toqejj irpir chuymaninakar yanaptʼawayi? ‘Hierro’ lanti ‘qollqsa’ churkaspa ukhamwa Diosajj jupanakar sum wakichtʼawayi. 1959 maratwa Irpir Chuymaninakataki ukat Yanapirinakapatak Escuelajj apasiñ qalltawayi. Uka escuelanjja, “Kunjamsa sapa maynir sum uñjsna” sat pʼeqeñchäwini mä arstʼäwiw utjäna. Ukanjja, “tamankirinakat sapa maynir utanakapar visittʼapjjañapatakiw” uka irpir chuymaninakar chʼamañchtʼasïna. Visittʼir sarasin jilat kullakanakar chʼamañchtʼañatakejj kunsa irpir chuymaninakajj lurapjjaspa uka toqetwa walja ewjjtʼanak churasïna. 1966 maranjja, Irpir Chuymaninakataki ukat Yanapirinakapatak Escuelajj mayjtʼayasïnwa. Ukansti, “Tamankapki uka jilat kullakanakar visittʼir sarañajj wali wakiskiriwa” sat pʼeqeñchäwini mä arstʼäwiw utjarakïna. ¿Kunas uka arstʼäwin sum qhanañchasïna? Tama uñjapki ukanakajja, “Diosan uwijanakaparojj munasiñampiw  uñjapjjañapa, yatiyiris sarapjjañapa ukat familiapatsa janiw armasipjjañapäkiti” sasaw qhanañchasïna. Aka qhepa maranakanjja, jukʼamp escuelanakaw irpir chuymaninakatak apasiwayi. Cheqansa, Jehová Diosan markapaw irpir chuymaninakar sum wakichtʼawayi. Ukatwa jichhürunakan waranq waranqa wakichtʼat irpir chuymaninakajj tamanakar wal yanaptʼasipki.

Irpir Chuymaninakataki ukat Yanapirinakapatak Escuela (Filipinas markana, 1966 marana)

18. 1) ¿Kun lurapjjañapatakis Jehová Diosajj irpir chuymaninakar uttʼayawayi? 2) Taqe chuyma irnaqtʼir irpir chuymaninakarojja, ¿kunatsa Jehová Diosasa ukat Jesusasa wal munasipjje?

18 Aka qhepa jan wali urunakan markap sum irpapjjañapatakiw Jehová Diosajj Jesucristo toqejj irpir chuymaninakar uttʼayawayi (Efe. 4:11, 12; 2 Tim. 3:1). Irpir chuymaninakajj aka ewjjtʼarjamaw sarnaqapjje: “Tatitun ovejanakapsti sum awatipjjam [...]. Taqe munasiñampi [...] taqe chuyma ukjja lurapjjam [...], ovejanakarojj mä suma yatichäwi uñachtʼayasa” sasa. Ukatwa Jehová Diosasa ukat Jesusasa, taqe chuyma irnaqtʼir irpir chuymaninakarojj wal munasipjje (1 Ped. 5:2, 3). Irpir chuymaninakajja, kunayman toqetwa mayninakan yateqaskañ sarnaqapjje, taman sumankaña ukat kusisiñ utjañapatakisa yanaptʼapjjarakiwa. Ukwa jichhajj pä toqet uñjañäni.

¿Kunjamsa irpir chuymaninakajj Diosan tamap uñjapjje?

19. ¿Kunjamsa jiwasamp yatiyir mistupki uka irpir chuymaninakar uñjtan?

19 Nayraqatjja, irpir chuymaninakajja jilat kullakanakampiw yatiyir sarapjje. Jesusan Lucas sat arkiripajj akham sasaw Jesusat qellqäna: “Jachʼa markanakana, ukhamarak jiskʼa markanakanwa sarnaqäna Diosan arunakap yatichasa, ukhamarak Diosan reinopat parlasa. Tunka payan discipulonakaparakiw jupamp chika [sarapjjäna]” sasa (Luc. 8:1). Kunjamtï Jesusajj apostolonakapamp yatiyir sarkänjja, yateqaskay irpir chuymaninakajj ukhamarakiw jilat kullakanakamp yatiyir sarañatak chʼamachasipjje. Ukham lurasaw jupanakajj Diosar kusisit servipjjañapatakejj tamankirinakar yanaptʼapjje. ¿Kunsa jilat kullakanakajj ukham irnaqtʼir irpir chuymaninakat amuyapjje? Niya 90 marani Jeannine sat kullakajj akham siwa: “Irpir chuymanimp yatiyir mistusaw jupamp sum parltʼasta ukat jukʼamp uñtʼaraktjja” sasa. 30 jila marani Steven sat jilatajj akham sarakiwa: “Kunapachatï mä irpir chuymanejj nayamp utat uta yatiyir mistu ukhajja, nayar yanaptʼañ munatapwa amuyta. Cheqansa, jupan yanaptʼap katoqañajj wal kusisiyitu” sasa.

Uwij awatiriw ‘chhaqat uwij jikjjatañkam thaqher sarirïna’, irpir chuymaninakajj ukhamarakiw Diosar yupaychañan aynachtʼatäpki ukanakarojj thaqher sarapjje ukat yanaptʼapjjaraki

20, 21. Jesusajj mä uñachtʼäwipan uwij awatirit parlkäna ukatjja, ¿kunsa irpir chuymaninakajj yateqasipjjaspa? Mä uñachtʼäwimp uk qhanañchtʼam. (“ Sapa semana visittʼañaw yanaptʼi” siski uka recuadro uñjjattʼäta.)

20 Payïr toqetjja, tamat jitheqtatäpki ukanakar yanaptʼapjjañapatakiw Jehová Diosajj markap toqejj irpir chuymaninakar wakichtʼi (Heb. 12:12). ¿Kunatsa jupanakajj Jehová Diosar yupaychañan aynachtʼatäpki ukanakar yanaptʼapjjañapa, ukat kunjamsa uk lurapjjañapa? Jesusajj  mä awatirita ukat chhaqat uwijat parlkäna uka uñachtʼäwit amuytʼañäni (Lucas 15:4-7 liytʼañataki). Kunapachatï mä uwijapan chhaqatap amuyasïna ukhajja, jankʼakiw uwij awatirejj uka uwijap thaqher saräna, ukakis jupan utjkaspa ukhama. ¿Kunsa irpir chuymaninakajj uka awatirit yateqasipjjaspa? Kunjamtï chhaqat uwijajj awatiritak wali askïkejja, ukhamarakwa irpir chuymaninakajj Diosan markapat jitheqtatäpki ukanakarojj wali askit uñjapjje. Diosar yupaychañan aynachtʼatäpki ukanakarojja, chhaqat uwijanakarjamaw uñjapjje, janiw jiwatäpkaspasa, mä arunjja, janis jupanakar yanaptʼañjamäjjaspa ukham uñjapkiti. Maysa toqetsti, uwij awatiriw ‘chhaqat uwij jikjjatañkam thaqher saräna’, irpir chuymaninakampejj ukhamarakiwa, jupanakaw Diosar yupaychañan aynachtʼatäpki ukanakarojj thaqher sarapjje ukat yanaptʼapjjaraki.

21 Jesusan uñachtʼäwiparjamajja, ¿kunsa awatirejj uwij jikjjatasajj luräna? Awatirejja wali munasiñampiw uwij ichtäna ukat “kallachipjjaru” apjjatasaw tamar wasitat kuttʼayjjäna. Irpir chuymaninakajj ukhamarakwa lurapjje, kunapachatï Diosar yupaychañan aynachtʼatäpki ukanakar munasiñampi ukat taqe chuym parlapjje ukhajja, tamar kuttʼapjjañapatakiw jupanakar yanaptʼapjje ukat chʼamañchtʼapjjaraki. África cheqan jakasir Victor jilatat amuytʼañäni, jupajj janiw tantachäwinakar sarjjänti. Uka jilatajj akham siwa: “Kimsaqallqo maranakaw tamat jitheqtatäyäta, ukampis uka tiemponjja irpir chuymaninakajj nayar yanaptʼañatakejj chʼamachasisipkakïnwa” sasa. ¿Kunas tamar kuttʼañapatak yanaptʼpachäna? Jupajj akham siwa: “Mä urojja, John sat mä irpir chuymaniw visittʼitäna, jupampiw precursoranakatak escuelajj utjki ukar sarayäta. Jupajj uka escuelan fotonak apsuyasipkayäta ukwa uñachtʼayitäna. Jehová Diosar servisajj kunja kusisitas jikjjatasiyäta, ukwa fotonak uñjjattʼasajj amtasiyäta” sasa. John jilatajj visittʼkäna uka qhepatwa Victor jilatajj tamar kuttʼjjäna, jichhajj precursorjamaw wasitat irnaqtʼaski. Cheqansa, tamar sum uñjapki uka irpir chuymaninakajj kusisitäpjjañapatakiw taqe jilat kullakanakar yanaptʼapjje (2 Cor. 1:24). *

Mayachtʼatäñatakiw jilat kullakanakar yanaptʼasi

22. Sumankañasa ukat kunatï cheqapäki ukarjam sarnaqañasa, ¿kunjamsa mayachtʼatäñatakejj Diosan markapar yanaptʼi? (“ Wal muspharapjjayäta” siski uka recuadro uñjjattʼäta.)

22 Kunjamtï uñjaniwayktanjja, sumankaña ukat kunatï cheqapäki ukajj urut urutjamaw markajan jukʼamp utjani sasaw Jehová Diosajj mä profecian arsüna (Isa. 60:17). Ukanakaw Diosan markaparojj mayachtʼi. ¿Kunjamanakatsa?  Kunatï cheqapäki uka toqet parlkasajj Bibliajj akham siwa: “[Jehová] Tatitu Diosasti mä sapakiwa” sasa (Deu. 6:4). Diosan yatichäwinakapajj taqpach tamanakansa, taqpach markanakansa mayakiwa. Kunatï askïki ukat jan askïki uka toqet parlir yatichäwinakapajj mayakiwa. Ukatjja, taqe tamanakaw uka yatichäwinakarjam sarnaqapjjañapa (1 Cor. 14:33). Cheqansa, Diosan yatichäwinakaparjam sarnaqasakiw tamanakajj nayrar sarantapjjaspa. Sumankañ toqetjja, ¿kunsa Reyejj amuypacha? Tamanakan sumankañajj utjaspa ukwa jupajj muni, ukatjja, ‘sumankayirinak’ utjañapwa Reyejj munaraki (Mat. 5:9). Ukhamasti, “kunanakatejj sumankaña apanki ukanak thaqaskakiñäni”. Awisajj jiwaskam jan waltʼayasiñanakaw utjaspa, ukhaman uñjasisajj jiwasaw uka jan waltʼäw askichañatak chʼamachasiñasa (Rom. 14:19). Ukhamatwa taman sumankaña ukat mayachtʼat sarnaqasiñ utjañapatak yanaptʼañäni (Isa. 60:18).

23. ¿Kunatsa Jehová Diosan servirinakapajj jichhürunakan kusisitätan?

23 ‘Tama sarayir jilatanakaw utjani’ sasaw Yatiyañataki noviembre, 1895 maran mistkäna uka revistan yatiyasïna. Diosan markap sarayapkäna uka jilatanakajja, tamanak sarayir jilatanakar uttʼayañajj ‘yupaychañan mayachtʼatäpjjañapataki’ Diosan markapar yanaptʼaspa ukwa suyapjjäna ukat oracionan mayipjjarakïna. Kunanakas nayra maranakan pasawayi uk yatjjatasaw Jehová Diosar wal yuspärtanjja, kunanaktï Jupajj markap sum uñjasiñapatak Jesucristo toqejj jukʼat jukʼat lurawayki ukajja, mä sapa yupaychäwin mayachtʼatäñasatakiw yanaptʼawayistu (Sal. 99:4). Ukatwa Jehová Diosan servirinakapajj wal kusistanjja, taqenis mä amtampikiw sarnaqtanjja ukat mayachtʼataw “sumankañ [utjayir] Diosar” serviraktanjja (2 Cor. 12:18; Sofonías 3:9 liytʼañataki).

^ tʼaqa 11 Kuntï yatjjatawayapki ukanakajja, Ayuda para entender la Biblia sat libronwa qhanañchasïna.

^ tʼaqa 21Irpir chuymaninakajj kusisipjjañasatakiw yanaptʼistu” siski uka yatichäwi uñjjattʼäta, ukajj Yatiyañataki enero 15, 2013 revistanwa 27 janata 31 janakam jikjjatasi.