Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 13 YATICHÄWI

Diosan Reinopat yatiyirinakajj tribunalanakaruw sarapjje

Diosan Reinopat yatiyirinakajj tribunalanakaruw sarapjje

¿KUNSA YATEQAÑÄNI?

Kunjamtï Jesusajj siskänjja, arkirinakapajj marka apnaqerinakamp arknaqataw uñjasipjje

1, 2. 1) Jan yatiyasiñapatakejja, ¿kunsa kʼari yupaychäwi pʼeqtʼirinakajj lurapjjäna, ukat kunsa apostolonakajj lurapjjarakïna? 2) ¿Kunatsa apostolonakajj yatiyañ jan jaytapkäna?

KHÄ 33 maran apaskäna uka Pentecostés fiestajj ukhakiw tukuyaskäna ukat mä qawqha semananak nayrakiw Jerusalén markan utjkäna uka tamajj qalltaskäna. Ukhamajj ‘jichhaw jupanakar chhaqtayäjja’ sasaw Supayajj amuypachäna. Cheqas janïr uka tamajj sum uttʼayaskipanwa jupajj qʼal chhaqtayañ munäna. Ukatakisti, jankʼakiw kʼari yupaychäwi pʼeqtʼirinakarojj Diosan arunakap yatiyañ jarkʼapjjañapatak amtayäna. Ukampis apostolonakajj jan ajjsartʼasaw yatiyasipkakïna ukat walja chacha warminakaw ‘Tatitur iyawsapjjäna’ (Hech. 4:18, 33; 5:14).

‘Jupan sutip layku tʼaqhesiñasatakiw ajllisiwayistu’ sasaw apostolonakajj kusisipjjäna

2 Uk uñjasaw apostolonakan enemigonakapajj wal colertʼasis jupanakar carcelar jistʼantayapjjäna. Ukampis Jehová Diosan mä angelapaw uka arumajj cárcel punkunak jistʼaräna ukat qhepürojja, wali alwatwa apostolonakajj wasitat yatiyañ qalltapjjäna. Soldadonakajj mayampiw jupanakar katuntapjjäna ukat marka apnaqerinakan ukaruw apapjjarakïna. Marka apnaqerinakasti, akham sasaw apostolonakar juchañchapjjäna: ‘Janiw yatiyapjjätati sasin sapksma ukarojj janiw istʼawayapktati’ sasa. Ukat apostolonakajj jan ajjsartʼasaw akham sapjjarakïna: “Nanakanjja Diosar nayraqat istʼapjjañajjaw wakisi, jaqenakar sipansa” sasa. Uk istʼasaw marka apnaqerinakajj wal colertʼasisajj jupanakar jiwayañ amtapjjäna. Ukampis wali respetata Ley yatichiri Gamaliel sat chachajj akham sasaw marka apnaqerinakar säna: “Wal amuytʼasipjjam [...]. Jan aka jaqenakarojj kuns kamachapjjamti. Antutnukjjapjjam” sasa. Uk istʼasaw marka apnaqerinakajj apostolonakar khitanukjjapjjäna, ¡ukajj janiw cheqaw sañjamäkänti! ¿Kunsa apostolonakajj lurapjjpachäna? “Jupanakasti janipuniw sapürusa amuktʼapkänti Jesucristjjat yatichaña, parlañsa” sasaw Bibliajj qhanañchi (Hech. 5:17-21, 27-42; Pro. 21:1, 30).

3, 4. 1) ¿Kunjamanakatsa Supayajj Diosan markapar aynachtʼayañ munäna? 2) Aka yatichäwinsa ukat jutïr pä yatichäwinakansa, ¿kuna toqenakatsa yatjjataskañäni?

3 Cheqpachansa, 33 marat aksaruw cristiano tamankirinakajj autoridadanakan nayraqatapar apat uñjasiwayapjje  (Hech. 4:5-8; 16:20; 17:6, 7). Jichhürunakanjja, ukhamarakiw Supayajj Diosan arunakap yatiyañ jarkʼapjjañapatakejj enemigonakasar amtayi. Jupanakajj Diosan markap contrajj akham sasaw arsuwayapjje: ‘Jaqenakar jan waltʼayirinakäpjjewa, marka apnaqerinak contra parlirinakäpjjewa ukat jan permisoni aljirinakäpjjarakiwa’ sasa. Ukampis uka arunakan kʼarïtap uñachtʼayañatakejja, Diosan servirinakapajj wakiskäna ukhaw tribunalanakar sarawayapjje. ¿Kuna askinakas utjawayi? Kuntï tribunalanakan amtasiwayki ukajja, ¿kunjamsa jichhürunakan yanaptʼistu? Kuna juicionakas utjawayi ukat kunjamsa ukanakajj markan leyinakaparjam phoqasa suma yatiyäwinak yatiyasiñapatakejj yanaptʼawayi, ukwa jichhajj mä qawqhanak uñjaskañäni (Fili. 1:7).

4 Jan jarkʼat yatiyañatakejj kuna juicionaksa Diosan servirinakapajj atipjawayapjje ukwa aka yatichäwin yatjjataskañäni. Jutïr pä yatichäwinakanjja, akapachat jitheqtatäñataki ukat Diosan Reinopan utjki uka leyinakarjam sarnaqañatakejja, kuna juicionaksa cristianonakajj tribunalanakan atipjawayapjje ukwa yatjjataskarakiñäni.

¿Jaqenakar jan waltʼayirïpjjeti, jan ukajj Diosan Reinop arjjatirïpjjecha?

5. Khä 1930 maranak tukuyarojja, ¿kunatsa jilat kullakanakajj carcelar apat uñjasipjjäna, ukat Diosan markap sarayapkäna uka jilatanakajj kun lurañsa amtapjjäna?

5 Estados Unidos marka apnaqerinakajja, 1930 maranak tukuyaruw Jehová Diosan Qhanañchirinakaparojj Diosan arunakap yatiyapjjañapatak permisonaka munkir jan munkir apsuyañ munapjjäna. Ukampis tiempompejja, uka permisojj mayjtʼayasisapänwa, ukatwa jilat kullakanakajj ukanak jan apsupkänti. ‘Diosan Reinopat yatiyapjjañamawa sasin Jesusajj siskäna uka arunak phoqañasatakejja, janiw marka apnaqerinakajj jarkʼkistaspati’ sasaw jupanakajj amuyapjjäna (Mar. 13:10). Ukatwa walja jilat kullakanakajj carcelar apat uñjasipjjäna. Ukampis Diosan markap irpapkäna uka jilatanakajja, leyinakarjam uñjatäñatakiw tribunalanakar sarañ amtapjjäna. Marka apnaqerinakajj Diosar jan yupaychapjjañapataki jilat kullakanakar jarkʼapkäna ukajj janiw leyinakarjamäkänti, ukwa jilatanakajj uñachtʼayañ munapjjäna. Ukatwa 1938 maran jan armkañ mä juiciojj apasïna. ¿Kunas ukan paspachäna?

6, 7. Newton Cantwell sat jilatan familiaparojja, ¿kunas pasäna?

6 Khä 1938 maran abril phajjsit 26 urunak saraqkäna uka martes alwaw precursor especialjam servir mä familiajja, New Haven (Connecticut) sat markarojj uru jornäla yatiyañatak sarapjjäna. Awkejj Newton Cantwell satänwa ukat 60 maranïnwa, warmipajj Esther satänwa ukat yoqanakapajj Henry, Russell ukat Jesse satäpjjarakïnwa. Cheqansa, jupanakajj utar jan kuttʼañatak wakichtʼatäpjjänwa. Walja kutiw  policiamp katuntat uñjasipjjäna, ukhamajj ‘inas wasitat katuntapjjchistani’ sasaw sapjjäna. Ukhampachasa, Diosan Reinopat yatiyañ wal munasaw New Haven markar sarapjjäna. Pä autotwa uka markar puripjjäna. Newton jilatajj Bibliat apstʼat qellqatanaka ukat gramofononakwa autopat apäna. 22 marani Henry yoqapajj parlantenakan auto aparakïna. Mä qawqha horanakatjja, kunjamtï jupanakajj amuyapkäna ukhamapuniw policiajj purinisin jan yatiyjjapjjañapatak katuntjjäna.

7 Nayraqatjja, 18 marani Russell waynaruw katuntapjjäna. Ukatsti, Newton jilatampiru Esther esposapampiruw katuntapjjarakïna. 16 marani Jesse jilatasti, kunjamsa policiajj awk taykaparu ukat jilapar katuntapjjäna ukwa jayat uñjäna. Henry jilapajj yaqha cheqanwa yatiyaskäna, ukhamajj Jesse waynajj sapakiw ukan qheparäna. Ukhampachasa, gramofonop aptʼatajj yatiyaskakïnwa. Católica religionar sariri pä chachanakaruw Rutherford jilatan “Enemigonaka” siski uka arstʼäwip istʼayañatak jakʼachasïna, jupanakajj ‘iyaw’ sasaw istʼapjjäna, ukampis uk istʼasajj wal colertʼasipjjäna, Jesse waynarojj nuwjañ kunwa munapjjäna. Jesse waynajj jan kun kamsasaw sarjjäna. Ukampis mä qawqha horanakatjja, mä policiaw carcelar apañatak jupar katuntjjarakïna. Policianakajj janis Esther kullakar juchañchapkchïnjja, chachaparu  ukat yoqanakaparuw juchañchapjjäna. Ukhamarus uka urpachaw fianza pagas carcelat mistupjjäna.

8. ¿Kunatsa Tribunalankirinakajj Jesse Cantwell sat waynarojj ‘jaqenakar jan waltʼayir jaqewa’ sasin juchañchapjjäna?

8 Septiembre, 1938 maranwa, Newton Cantwell sat jilatan familiapajj New Haven markan utjkäna uka tribunalar sarapjjäna. Newton jilataru ukat pä yoqanakaparojj permiso jan apsusa jaqenakar qollqe mayipjjatapatwa juchañchapjjäna. Connecticut sat markan Jachʼa Tribunalajj utjkäna ukaruw jilatasa yoqanakapasa leyinakarjam uñjatäñatak sarapjjäna, ukhampachasa ‘jaqenakar jan waltʼayiri chʼajjwayir jaqewa’ sasaw Jesse waynarojj juchañchapjjäna. ¿Kunatsa? Rutherford jilatan grabacionap istʼapkäna uka católico chachanakaw Tribunalankirinakar akham sapjjäna: ‘Jupajj nanakampis chʼajjwañ munkaspa ukhamwa religionaj contra parlir grabación istʼasajj amuyasipjjayäta’ sasa. Diosan markap pʼeqtʼapkäna uka jilatanakajja, Estados Unidos markan Jachʼa Tribunalajj utjki ukaruw taqe ukanak yatiyapjjäna, ukanwa leyinak uñjiri jilïr autoridadanakajj jikjjatasipjje.

9, 10. 1) Estados Unidos markan Jachʼa Tribunalajj utjki ukankirinakajja, ¿kunsa Newton Cantwell sat jilatan familiapat arsupjjäna? 2) Jachʼa Tribunalan amtaskäna ukajja, ¿kunjamsa jichhürunakan yanaptʼistu?

9 Marzo 29, 1940 maranwa Jachʼa Tribunal sarayiri Charles Evans Hughes chachasa ukat kimsaqallqo magistradonakasa, Hayden Covington jilatar istʼapjjäna, jupajj Jehová Diosan Qhanañchirinakapan abogadopänwa. * Connecticut markankir abogadopajja, ‘Jehová Diosan Qhanañchirinakapajj jaqenakar jan waltʼayiri pitthapir jaqenakäpjjewa’ sasin qhanañchkäna ukhajja, juezanakat maynejj akham sasaw jupar jisktʼäna: “Janiw taqe jaqenakajj Jesusan yatichäwinakap askit uñjapkänti, ¿janich ukhamäki?” sasa. Ukat abogadojj akham sänwa: “Jïsa, ukat ukham yatiyatapat kunas Jesusar pasäna uk Bibliajj qhanañcharakiwa” sasa. Jan amuyasisaw uka abogadojj akham saskäna: ‘Jehová Diosan Qhanañchirinakapajj Jesusar uñtatäpjjewa ukat marka apnaqerinakajj Jesusan uñisirinakapar uñtatäpjjarakiwa’ sasa. Mayo 20, 1940 maranwa Tribunalankirinakajj Jehová Diosan Qhanañchirinakapan uka juicio atipjapjjatap yatiyapjjäna.

Hayden Covington (taypina ukat nayraqatana), Glen How (chʼeqa) sat jilatanakaw yaqha jilat kullakanakampejj mä juicio atipjasajj tribunalat mistunisipki

10 Kuntï uka Jachʼa Tribunalan amtaskäna ukajja, ¿jilat kullakanakar yanaptʼpachänti? Diosar libre taqe cheqan yupaychapjjañapatakiw kuntï amtaskäna ukajj jilat kullakanakar yanaptʼäna. Jiskʼa jan ukajj jachʼa markanakan autoridadanakajj janiw Diosar libre yupaychasiñap jarkʼapkasapänti. Ukat Jachʼa Tribunalankirinakajj akham sasaw Jesse waynat sapjjarakïna: ‘Kuntï jupajj lurki ukajja, janiw markankirinakar jan waltʼayirïtap uñachtʼaykiti’ sasa. Kuntï Tribunalankirinakajj amtapkäna ukajj akwa qhan uñachtʼayäna: Jehová Diosan Qhanañchirinakapajj janiw jaqenakar jan waltʼayiri jaqenakäpkiti. Uka juicio atipjañaw Diosan servirinakaparojj jichhürunakkam yanaptʼaski. Leyinakat yatjjattʼata  mä jilatajj akham siwa: “Diosar libre yupaychañajja, kunjamsa jutïrin jakasiñäni uk markankirinakasar jan ajjsaras yatiyañatakiw yanaptʼistu” sasa.

¿Marka apnaqerinak contra parlirinakäpjjeti, jan ukajj cheqa yatichäwinak yatiyirinakäpjjecha?

El odio ardiente sat tratado

11. ¿Kun lurañsa Canadá markankir jilat kullakanakajj amtapjjäna, ukat kunatsa?

11 Khä 1940 maranakanjja, Canadá markan jakasiri jilat kullakanakajj wali tʼaqhesiyata ukat arknaqataw uñjasipjjäna. Ukatwa uka markankir jilat kullakanakajja, marka apnaqerinakan Diosar libre yupaychasiñap jan munapjjatap taqe jaqenakar yatiyañ amtapjjäna, ukatakiw 1946 maran pusi janani mä tratado lakirapjjäna. Ukajj El odio ardiente de Quebec a Dios, Cristo y la libertad es la vergüenza de todo Canadá satänwa, 16 urunakaw uk lakirapjjäna. Tatakuranakan amtayatajj kuna jan walinaksa Quebec markankir jilat kullakanakarojj lurasïna, kunjamsa policianakasa ukat jan wali jaqenakas tʼaqhesiyapjjäna ukwa uka tratadojj sum qhanañchäna. Ukat akham sarakïnwa: “Sapüruw Jehová Diosan Qhanañchirinakapajj policianakan ina chʼusat katuntat uñjasipjje. Ukat Gran Montreal uksa toqensa, 800 jila juicionakaw leyinakarjam uñjasiñapäski” sasa.

12. 1) Tratado liytʼasajja, ¿kunsa yaqhep jaqenakajj lurapjjäna? 2) ¿Kun lurirïpjjewa sasas jilat kullakanakar juchañchapjjäna? (Qhanañchäwip uñjjattʼäta.)

12 Uka tratado liytʼasajja, Quebec markankiri Maurice Duplessis sat jilïr ministrosa ukat Católica Iglesiankiri Villeneuve sat tatakurasa, Jehová Diosan Qhanañchirinakapar jan waltʼayañwa amtapjjäna. Ukat leyinakarjam uñjasiñapäkäna uka juicionakajja, jankʼakiw kimsaqallq patakat waranqa sojjta patakar jiljjattäna. Mä precursora kullakajj akham siwa: “Policiajj walja kutiw katuntapjjetäna” sasa. Jilat kullakanakar tratado lakirir katjapkäna ukhajja, “marka apnaqer contra parlir qellqatanak lakirirïpjjewa” sasaw jupanakar juchañchapjjäna. *

13. 1) ‘Marka apnaqerinak contra parlir jaqenakäpjjewa’ sasajja, ¿khitinakarus juchañchasïna? 2) Quebec markan utjki uka tribunalanjja, ¿kuna amtarus purisïna?

13 ‘Marka apnaqerinak contra parlir jaqenakäpjjewa’ sasaw Aimé Boucher jilataru, 18 marani Gisèle ukat 11 marani Lucille sat phuchanakaparojj 1947 maran juchañchasïna. ¿Kunatsa? Jupanakajj utap jakʼanwa El odio ardiente sat tratado lakirapjjäna, ukampis ‘jaqenakar jan waltʼayirinakäpjjewa’ sasajja, janiw khitis siskasapänti. Jilatajj suma chuymanïnwa ukat yapumpiw Quebec markan aynach toqen jakasïna. Awisajj caballomp qatatit mä jiskʼa carrotwa markar sarirïna. Uka jilatan familiapajj kunayman tʼaqhesiyata ukat arknaqataw uñjasipjjäna. Jehová Diosan Qhanañchirinakapar uñisiri mä juezajja, janiw Aimé jilatan familiapar istʼañ munkänti. Antisasa, ‘uka tratadojj uñisiñanaka ukat chʼajjwañanak utjañapatakiw chʼamañchi ukat Aimé jilatan familiapajj juchañchatäñapawa’ sasin fiscalajj siskäna ukaruw istʼäna. Cheqas uka juezajj akham saskänwa: ‘Cheq  parlañajj juchawa’ sasa. ‘Marka apnaqerinak contra parlir qellqatanak lakirirïpjjewa’ sasaw Aimé jilataru ukat Gisèle phuchaparojj juchañchasïna. Lucille jiskʼa phuchapasa, pä uruw jupanakamp chikajj carcelan qheparäna. Ukhaman uñjasisajja, Canadá markan Jachʼa Tribunalajj utjki ukar sarañwa jupanakajj amtapjjäna, ukanwa leyinak uñjiri jilïr autoridadanakajj jikjjatasipjje. Ukat uka Tribunalankirinakajj uka juicio apañwa amtapjjäna.

14. Arknaqat uñjasipkäna uka tiemponjja, ¿kunsa Quebec markankir jilat kullakanakajj lurapjjäna?

14 Quebec markankir jilat kullakanakajj wali arknaqata ukat tʼaqhesiyatas uñjasipkchïnjja, jan ajjsarasaw suma yatiyäwinak yatiyasipkakïna. Ukham yatiyañajj janiw inamayäkänti. 1946 maranwa tratado lakirañ qalltapjjäna ukat 1950 marakamajja, Jehová Diosan Qhanañchirinakapajj kimsa patakata waranqaniruw Quebec markan jiljjattäna. *

15, 16. 1) Canadá markan Jachʼa Tribunalajj utjki ukankirinakajja, ¿kunsa Aimé jilatan familiapat arsupjjäna? 2) Kuntï Tribunalan amtasiwayki ukajja, ¿kunjamsa jilat kullakanakarusa ukat yaqha markankirinakarus yanaptʼäna?

15 Canadá markan Jachʼa Tribunalajj utjki ukan Aimé Boucher sat jilatar juiciojj apaskäna ukjja, llätunka juezanakaw leyinakarjam uñjapjjäna. Uka juiciojj junio, 1950 maranwa apasïna, ukat diciembre phajjsit 18 urunak saraqkäna ukhaw uka Tribunalankirinakajj Jehová Diosan Qhanañchirinakapan uka juicio atipjapjjatap yatiyapjjäna. Jehová Diosan Qhanañchirinakapan Glen How sat abogadopajj akham sänwa: ‘Nanakajj janiw marka apnaqerinak contra saytʼasipjjañapatak jaqenakar chʼamañchapkti. Tribunalankirinakas ukwa amuyapjjaraki’ sasa. Cheqansa, “tratadojj janiw uk lurapjjañapatak jaqenakar chʼamañchkänti, jan ukasti, kuntï jilat kullakanakajj amuyapkäna uk jan ajjsaras arsupjjañapatakiw yanaptʼäna”. Glen jilatajj akham saskakïnwa: “Kunjamsa Jehová Diosajj uka juicio atipjañatak yanaptʼawayapjjetu uk naya pachpaw uñjawayta” sasa. *

16 Tribunalan kunatï amtasiwayki ukajja, Diosan Reinopatakejj mä atipjäwïnwa. ‘Marka apnaqerinak contraw parlapjje’ sasin Quebec markan Jehová Diosan Qhanañchirinakapar juchañchaskäna uka 122 juicionak apañajj janiw wakisjjänti. Ukatjja, kunatï marka apnaqerinakat llakisiykäna uk jan ajjsarasaw Canadá markankirinakasa ukat Comunidad Británica de Naciones ukankirinakas arsupjjasapäna. Quebec markankir gobiernosa ukat ukan utjkäna uka iglesianakasa, janiw Jehová Diosan Qhanañchirinakapar arknaqjjapjjänti. *

¿Aljirinakäpjjeti, jan ukajj Diosan Reinopat yatiyirïpjjecha?

17. ¿Kunjamsa yaqhep marka apnaqerinakajj jan yatiyapjjañapatak Diosan servirinakapar jarkʼañ munapjje?

17 Nayrïr cristianonakat yateqasisajja, Jehová Diosan servirinakapajja “janiw Diosan arunakapjja mä alakip lurañar uñtata churap[kiti]” (2 Corintios 2:17 liytʼañataki). Ukhampachasa, marka apnaqerinakat yaqhepajja, ‘aljañ toqet  leyinakajj’ utjki ukarjamaw jan yatiyapjjañapatak Jehová Diosan servirinakaparu jarkʼapjje. Jichhajja, Jehová Diosan Qhanañchirinakapajj aljirinakäpjjeti, jan ukajj Diosan Reinopat yatiyirinakäpjjecha uka toqet pä juicionak apaskäna ukwa uñjaskañäni.

18, 19. Dinamarca sat marka apnaqerinakajja, ¿kunsa jan yatiyasiñapatak lurapjjäna?

18 Dinamarca. Octubre 1, 1932 maranwa mä leyejj uka markan apsusïna, ukarjamajja, janiw maynejj permiso jan apsusajj qellqatanak aljañapäkänti. Cheqansa, jilat kullakanakajj janiw uka permiso apsupkänti. Qhepürojja, phesqa jilat kullakanakaw Roskilde cheqan yatiyasipkäna, ukajj Copenhague sat markat 30 kilometronak inti jalantar sarañankiwa. Yatiyañ tukuyjjapjjäna ukhaw jupanakat maynin chhaqatätap amuyasipjjäna. August Lehmann sat jilatarojja, qellqatanak aljañatak permiso jan apsutapatwa policianakajj katuntapjjäna.

19 Diciembre 19, 1932 maranwa August Lehmann jilatajj uka markankir tribunalar saräna. Jupajj akham sänwa: ‘Cheqas Bibliat apstʼat qellqatanak churañatakiw jaqenakar visitir sartjja, ukampis janiw ukanak aljirïkti’ sasa. Tribunalankirinakajj akham sapjjarakïnwa: “August chachajj cheqwa parlaski [...]. Cheqas jupa pachpaw trabajisajj qollq jikjjatasispa. Ukat qellqatanak jaytasajj janiw jupan askipatak qollqe jikjjatawaykiti, ni uka amtampis uk lurkänti. Antisas ukanak lurañatakiw qollqep irsusiwayi” sasa. Ukat Jehová Diosan Qhanañchirinakapan uka juicio atipjapjjatapwa tribunalankirinakajj yatiyapjjäna. Kuntï August chachajj lurki ukajj “janiw aljañäkiti” sasaw jupanakajj sapjjarakïna. Ukampis Diosan markapar uñisipkäna ukanakajj janipuniw uka markan yatiyasiñap munapkänti (Sal. 94:20). Ukatwa uka markankir fiscalajj Dinamarca markan Jachʼa Tribunalajj utjki ukar saräna. ¿Kunsa jilat kullakanakajj lurapjjpachäna?

20. Dinamarca sat markan Jachʼa Tribunalajj utjki ukankirinakajja, ¿kuna amtarus puripjjäna, ukat kunsa jilat kullakanakajj lurapjjäna?

20 Jachʼa Tribunalan uka juiciojj apaskäna uka semananjja, Dinamarca markankir jilat kullakanakajj jukʼampiw yatiyapjjäna. 1933 marana, octubre phajjsit 3 urunak saraqkäna uka martes uruw Jachʼa Tribunalankirinakajj kuntï amtapkäna uk akham yatiyapjjäna: ‘August Lehmann chachajj janiw leyinak pʼakintkiti sasaw nayrïr tribunalankirinakajj sawayapjje, nanakajj jupanakjamarakiw amuyapjjta’ sasa. Ukhamasti, Jehová Diosan Qhanañchirinakapajj jan khitins jarkʼataw Diosan arunakap yatiyjjapjjasapäna. Cheqansa, Jehová Diosaw uka juicio atipjañatak jilat kullakanakar yanaptʼäna, ukatwa jupanakajj Diosar yuspärañatakejj jukʼamp yatiyañatak chʼamachasipjjäna. Uka marat aksaruw Dinamarca markankir jilat kullakanakajj Diosan arunakap gobiernonakan jan jarkʼat yatiyasipki.

Dinamarca sat markankir jan ajjsarir jilat kullakanaka (1930 marana)

21, 22. Estados Unidos markan Jachʼa Tribunalajj utjki ukankirinakajja, ¿kunsa Murdock jilatat arsupjjäna?

 21 Estados Unidos. 1940 marana, febrero phajjsit 25 urunak saraqkäna uka domingo uruw Robert Murdock (yoqa) sat precursor jilatasa ukat yaqha paqallqo jilat kullakanakasa, Pittsburgh (Pensilvania) marka jakʼan Jeannette sat cheqan yatiyasipkäna, ukhaw policianakajj jupanakar katuntapjjäna. Qellqatanak lakirañataki permiso jan apsupjjatapatwa jupanakarojj juchañchasïna. Jilatanakajj Estados Unidos markan Jachʼa Tribunalajj utjki ukaruw uk yatiyapjjäna, ukat ukankirinakajj uka juicio apañwa amtapjjarakïna.

22 Mayo 3, 1943 maranwa Jachʼa Tribunalankirinakajj Jehová Diosan Qhanañchirinakapan uka juicio atipjapjjatap yatiyapjjäna. Jupanakatakejj religionat parliri qellqatanak lakirañataki permiso apsuñasa ukat uk apsuñatak qollq pagañasa, janiw markan utjki uka leyinakarjamäkänti. Ukat uka markan qellqatanak lakirañataki permiso apsuñatak mä leyejj utjkäna uksa chhaqtayapjjarakïnwa, ¿kunatsa? “Uka leyejj qellqatanak toqe, jan ukajj yaqha ukhamanak toqe yatiyäwinak jan yatiyasiñapataki ukat Diosar libre jan yupaychapjjañapatakiw jaqenakar jarkʼäna.” William Orville Douglas sat magistradojja, kuntï juezanakat waljanejj amuyapkäna uk akham sasaw qhanañchäna: Jehová Diosan Qhanañchirinakapajj “janiw religionat parlir qellqatanakak lakirapkiti, ni aleq yatiyirinakakïpkisa, jan ukasti, Diosat yatisaw qellqatanak jaqenakar jaytapjje [...]. Kuntï jupanakajj Diosar yupaychañatak lurapki ukajja [...], kunjamtï iglesianakan yatiyañasa ukat yupaychañas suma uñjatäki ukham uñjatäñaparakiwa” sasa.

23. Kuna juicionakatï 1943 maran atipjasiwayki ukanakajja, ¿kunjamsa yanaptʼawayistu?

23 Kuntï Jachʼa Tribunalan amtaskäna ukajja, Diosan markapatakejj mä jachʼa atipjäwïnwa. Jiwasajj Diosan servirinakapäpjjtanwa, janiw aleq aljirinakakïpktanti, ukaw uka juicio atipjasajj qhan uñachtʼayasiwayi. 13 juicionak utjäna ukanakatjja, 12 juicionakwa Jehová Diosan Qhanañchirinakapajj uka pachpa urojj 1943 maran uka Jachʼa Tribunalan atipjapjjäna. Murdock jilatar juicio apapkäna ukasa, uka taypinkarakïnwa. Utat uta jan ukajj yaqha cheqanakan Diosan Reinopat jan yatiyañasatakejja, wasitatwa enemigonakasajj jarkʼañ munapjjestäna, ukampis kuna juicionakatï nayrajj atipjasiwayki ukanakaw aka qhepa maranakan utjawayki uka juicionak atipjañatak yanaptʼawayistu.

“Diosar nayraqat istʼapjjañajjaw wakisi, jaqenakar sipansa”

24. Jan yatiyañasatak marka apnaqerinakajj jarkʼañ munapkistu ukhajja, ¿kunsa lurtanjja?

24 Marka apnaqerinakajj Diosan Reinopat yatiyañasatak jan jarkʼapjjestu ukhajja, wal jupanakar yuspärtanjja. Ukampis jupanakan jarkʼat uñjastan ukhajja, yaqha toqenakat yatiyaskakiñatakiw chʼamachastanjja. Ukat apostolonakat  yateqasisaw akham sistanjja: “Diosar nayraqat istʼapjjañajjaw wakisi, jaqenakar sipansa” sasa (Hech. 5:29; Mat. 28:19, 20). Ukatjja, yatiyaskakiñatakiw tribunalanakar sararaktanjja. Uka toqetwa jichhajj pä juicionak uñjañäni.

25, 26. ¿Kunatsa Nicaragua markan Jachʼa Tribunalajj utjki ukan mä juiciojj apasïna, ukat kunsa Tribunalankirinakajj amtapjjäna?

25 Nicaragua. Noviembre 19, 1952 maranwa misionerjam irnaqtʼiri ukat sucursal sarayiri Donovan Munsterman sat jilatajja, Managua markar Departamento de Inmigración ukar saräna. Ukan pʼeqtʼiri Arnoldo García sat capitanaw uka jilatar jawsayasajj akham säna: Jehová Diosan Qhanañchirinakapajja, janipuniw Nicaragua markan “kunanakarutï iyawsapki ukanak yatiyapjjañapäkiti, ni ukhamanak lurapjjañapatakis jaqenakar chʼamañchapjjañapäkiti” sasa. ‘¿Kunatsa?’ sasin jilatajj jisktʼkäna ukhajja, capitanajj akham sänwa: ‘Jehová Diosan Qhanañchirinakapajj janiw Ministerio de Gobierno y Religiones ukankirinakan permiso churatäpkiti ukat comunista jaqenakäpjjewa sasin juchañchatäpjjarakiwa’ sasa. ¿Khitinakas ukham sapjjpachäna? Católico tatakuranakaw ukham sapjjäna.

Nicaragua markan jarkʼat uñjasipkäna uka tiempon jakir jilat kullakanaka

26 Donovan sat jilatajja, jankʼakiw Ministerio de Gobierno y Religiones ukankirinakaru ukat uka marka apnaqer Anastasio Somoza García sat chachar leyinakarjam uñjatäñatak mayïna. Ukampis janiw jupanakajj istʼapkänti. Ukatwa jilat kullakanakajj Tantachasiñ Utan tantachasiñat sipansa, jiskʼa gruponakan tantachasiñ amtapjjäna. Ukat janis  callenakan yatiyjjapjjchïnjja, yaqha toqenakatwa Diosan Reinopat yatiyasipkakïna. Ukatjja, Nicaragua markan utjki uka Jachʼa Tribunalaruw mä carta apayapjjarakïna (recurso de amparo). Uka cartanjja, jupanakar jarkʼkäna uka ley chhaqtayasiñapwa mayipjjäna. Kunjam arknaqatas uñjasipjjäna ukat Tribunalar apayapkäna uka cartajj kamsänsa ukwa periodiconakajj yatiyapjjäna. Ukat Jachʼa Tribunalankirinakajj uka juicio apañwa amtapjjarakïna. Junio 19, 1953 maranwa Tribunalankirinakajj kuna amtarutï taqpachanejj puripkäna uk akham sasin yatiyapjjäna: ‘Jehová Diosan Qhanañchirinakapaw aka juicio atipjawayapjje’ sasa. ‘Jilat kullakanakar jarkʼki uka leyejj kuntï maynejj amuyki uk jan arsuñapataki ukat kunarutï iyawski uk jan yatiyañapatakiw jarkʼki’ sasaw Tribunalankirinakajj sapjjarakïna. Ukat Nicaragua marka apnaqerinakasa ukat Jehová Diosan Qhanañchirinakapasa, wasitat sum apasiñataki mä amtar puripjjañapwa Tribunalankirinakajj mayipjjarakïna.

27. Kuntï Tribunalankirinakajj amtapkäna ukajja, ¿kunatsa Nicaragua markankirinakatakejj muspharkañänjja, ukat kunjamsa jilat kullakanakajj uka atipjäw uñjapjjäna?

27 Kunjamsa Jachʼa Tribunalankirinakajj Jehová Diosan Qhanañchirinakapar arjjatapjjäna uk uñjañajja, Nicaragua markankirinakatakejj wali muspharkañänwa. Uka marakamajja, tatakuranakajj wali munañanïpjjänwa, ukatwa Tribunalankirinakajj jupanakamp sum apasiñ munapjjäna. Marka apnaqerinakasa wali munañanïpjjarakïnwa, ukhamajj awisakiw Tribunalankirinakajj jupanak contra arsupjjerïna. Ukanak uñjasaw jilat kullakanakajj jan pächasis akham sapjjäna: ‘Reyisan arjjatatap layku ukat yatiyaskakitas laykuw atipjtanjja’ sasa (Hech. 1:8).

28, 29. Khä 1980 maranakanjja, ¿kunas Zaire markan pasäna?

28 Zaire (jichhajj República Democrática del Congo satäjjewa). 1980 maranakanjja, niya 35.000 jilat kullakanakaw  uka markan utjäna. Ukatwa Diosan Reinopat jukʼamp yatiyasiñapatakejj sucursalan jukʼamp utanakajj lurasiskäna. Diciembre 1985 maranjja, Kinsasa markan utjki uka estadionanwa walja markanakat mä jachʼa tantachäwejj apasïna. 32.000 jilat kullakanakaw kunayman markanakat ukan tantachasipjjäna. Ukampis uka qhepatjja, jilat kullakanakajj mä jan waltʼäwinwa uñjasipjjäna. ¿Kunas paspachäna?

29 Zaire markan misionerjam irnaqtʼiri Marcel Filteau sat jilataw kunas pasäna uk akham qhanañchistu: “Marzo 12, 1986 maranwa uka markan Diosan arunakap yatiyasiñapatak pʼeqtʼapki uka jilatanakajj mä carta katoqapjjäna. Ukanjja, ‘Jehová Diosan Qhanañchirinakapajj janiw Zaire markan leyinakaparjam qellqatäpkiti’ sasaw qhanañchasïna”. Marka apnaqeri Mobutu Sese Seko sat chachaw uka carta firmtʼatayna. Quebec (Canadá) markankiri Marcel Filteau sat jilatajja, Duplessis sat chachajj apnaqkäna uka tiemponwa tʼaqhesiyata ukat arknaqat uñjasirakïna.

30. ¿Kuna amtarus Sucursal Sarayirinakajj puripjjañapäna, ukat kun lurañsa qhepat amtapjjäna?

30 Qhepürojja, akham sasaw markpachan istʼaskäna uka radiojj yatiyäna: “[Zaire] markanjja, janipuniw Jehová Diosan Qhanañchirinakapat istʼjjañäniti” sasa. Ukspachaw jaqenakajj jilat kullakanakar tʼaqhesiyaña ukat arknaqañ qalltapjjäna. Tantachasiñ Utanakajj tʼunthapitänwa. Jilat kullakanakasti, nuwjata, lunthatata, katuntata ukat carcelar jistʼantataw uñjasipjjäna. Jehová Diosan Qhanañchirinakapan wawanakapas carcelar llawintataw uñjasipjjarakïna. Octubre 12, 1988 maranwa marka apnaqerinakajj kunanakatï sucursalan utjkäna ukanak katuntasipjjäna ukat soldadonakaw (Guardia Civil) sucursal oraq katuntasipjjarakïna. Yatiyañatak pʼeqtʼapkäna uka jilatanakajja, marka apnaqeri Mobutu sat chacharuw leyinakarjam uñjatäñatak mayipjjäna, ukampis jupajj janiw kamskänti. Ukhaman uñjasisajja, Sucursal Sarayirinakajj Jachʼa Tribunalarut sarapjjani jan ukajj suytʼapjjanicha ukwa amtapjjañapäna. Uka tiemponjja, misionerjam irnaqtʼiri Timothy Holmes sat jilataw Sucursal Sarayirinakat pʼeqtʼiripjam irnaqtʼaskäna, jupajj akham siwa: “Jehová Diosaruw yatiñsa ukat yanaptʼapsa mayisipjjayäta” sasa. Diosar mayisisa ukat uka toqet sum parlakiptʼasajja, Sucursal Sarayirinakajj akwa amtapjjäna: ‘Janiw añchhitajj mä juicio qalltañajj wakiskaspati’ sasa. Jupanakajj jilat kullakanakar sum uñjañataki ukat Diosan arunakap yatiyasiskakiñapatakiw jukʼamp chʼamachasipjjäna.

“Jehová Diosajj taqe kun mayjtʼayañatakejj chʼamaniwa, ukwa [...] juiciojj apaskäna ukhajj amuyapjjta”

31, 32. Zaire markan Jachʼa Tribunalajj utjki ukankirinakajja, ¿kuns amtapjjäna, ukat kunjamsa ukajj jilat kullakanakar yanaptʼäna?

31 Walja maranakaw pasjjäna ukat Jehová Diosan Qhanañchirinakaparojj janiw sint tʼaqhesiyjjapjjänti, jaqenakar arjjatkäna uka leyinakas respetasjjarakïnwa. Ukatwa Sucursal Sarayirinakajj wasitat libre yatiyañatakejj Zaire markan  utjki uka Jachʼa Tribunalar sarañ amtapjjäna. Jachʼa Tribunalankirinakajj uka juicio uñjañwa amtapjjarakïna, ukajj janiw cheqaw sañjamäkänti. Jehová Diosan Qhanañchirinakapajj niya paqallq maraw arknaqat uñjasipjjäna. Ukampis enero 8, 1993 maranwa Jachʼa Tribunalankirinakajj kuntï marka apnaqerinakajj jilat kullakanak contra lurapkäna ukajj jan leyinakarjamätap yatiyapjjäna, ukat jupanakar jarkʼkäna uka leyis chhaqtayasjjarakïnwa. Juezanakajj jakäwip niya aptʼasisaw kuntï marka apnaqerejj amtkäna uk chhaqtayapjjäna. ¡Ukajj wali muspharkañapunïnwa! Holmes jilatajj akham siwa: “Jehová Diosajj taqe kun mayjtʼayañatakejj chʼamaniwa, ukwa uka juiciojj apaskäna ukhajj amuyapjjta” sasa (Dan. 2:21). Tribunalan atipjaskäna uka juiciojj Diosar jukʼamp confiyapjjañapatakiw jilat kullakanakar yanaptʼäna. Kunapachasa ukat kunsa lurapjjañapäna ukjja, Jesucristo Reyiw jupanakar sum amuytʼayaskäna.

República Democrática del Congo sat markan jakasir jilat kullakanakajja, Jehová Diosar libre yupaychasajj wali kusisitäpjjewa

32 Jilat kullakanakar jarkʼkäna uka leyejj chhaqtayasjjäna ukhajja, machaq utanak sucursalan lurayañatakisa, Bibliat apstʼat qellqatanak yaqha markat puriyañatakisa ukat misioneronakan puripjjañapataki papelanak lurañatakisa, sucursalankirinakajj janiw jarkʼatäjjapjjänti. * Kunjamsa Jehová Diosajj Jupar sum yupaychasipkakiñapatak markapar jarkʼaqawayi, uk uñjasaw Diosan servirinakapajj wal kusisipjje (Isa. 52:10).

“Tatituw yanaptʼirejjajja”

33. Tribunalanakan juicionak atipjasiwayki ukanakajja, ¿kunsa uñachtʼayistu?

33 Tribunalanakan juicionakajj atipjasiwayki ukanakaw kunjamsa Jesusajj arunakap phoqawayi uk uñachtʼayistu, jupajj akham sänwa: “Nayaw jumanakarojj yatiñ kankañan  phoqtʼat arunaksa, churapjjäma, ukarusti janirakiw khiti uñisirinakamasa kamsañatakis chʼamanïpkaniti” sasa (Lucas 21:12-15 liytʼañataki). Awisajja, Gamaliel chachjam jaqenakampiw Jehová Diosajj markapar arjjatawayi. Jan ukajj kunatï cheqapäki uk arjjatapjjañapatakiw jan ajjsariri juezanakaru ukat abogadonakar chʼamañchawayi. Kunanaktï enemigonakasajj jiwas contra lurawayapki ukanakjja, janis kunäkaspa ukhamwa Diosajj tukuyawayi (Isaías 54:17 liytʼañataki). Cheqansa, ¡Diosan arunakap yatiyasiñapatakejj janipuniw kunas jarkʼkaspati!

34. Jachʼa Tribunalanakan juicionakajj atipjasiwayki ukanakajja, ¿kunatsa wali muspharkañajja, ukat kunsa ukajj uñachtʼayistu? (“ Jachʼa tribunalankirinakajj Diosan Reinopat yatiyasiñapatakiw yanaptʼapjje” siski uka recuadro uñjjattʼäta.)

34 Jachʼa Tribunalanakan juicionak atipjasiwayki ukanakajja, ¿kunatsa wali muspharkañajja? Ak amuytʼañäni: Jehová Diosan Qhanañchirinakapajj janiw wali uñtʼata ukat munañan jaqenakäpktanti. Janirakiw marka apnaqerinakarus chhijllktanti ni politiconakan campañanakaparus sarktanti, ni jupanakamp suma uñjatäñsa thaqktanti. Maysa toqetjja, tribunalanakar apatäpkäna uka jilat kullakanakajj ‘jan suma yatichat jaqenakjam’ uñjatäpjjänwa (Hech. 4:13). Ukhamasti, ‘Tribunalankirinakajj religionanak pʼeqtʼirinak contra ukat marka apnaqerinak contra saytʼasisajja, janiw Diosan servirinakapar arjjatapkaspati’ sasaw jaqenakajj amuyapjjaspa. Ukampis walja kutiw Tribunalankirinakajj arjjatawayapjjestu. ¿Kunsa ukajj uñachtʼayistu? ‘Diosan nayraqatapanktanwa, Cristonkir jaqenakjamaraki’ (2 Cor. 2:17). Ukatwa apóstol Pabljamajj akham sistanjja: “Tatituw yanaptʼirejjajja; janiw kuntejj jaqejj lurkitaspa ukjj ajjsarkäti” sasa (Heb. 13:6).

^ tʼaqa 9 Estados Unidos markan Jachʼa Tribunalajj utjki ukanwa Hayden Covington sat jilatajj Jehová Diosan Qhanañchirinakapar 43 juicionakan arjjatawayi. Cantwell contra el estado de Connecticut juiciojj apaskäna ukhaw jupajj jilat kullakanakar arjjatañ qalltawayi. Uka jilatajj 1978 maranwa jiwjjäna. Dorothy warmipajj jiwañkamaw Diosat jan jitheqtas precursorjam irnaqtʼawayi, jupajj 2015 marana 92 maranïkasaw jiwawayjje.

^ tʼaqa 12 1606 leyejj utjkäna ukarjamaw ukham juchañchapjjäna. ‘Maynitï arunakapampi, cheqäskpasa janisa, uñisiñanaka ukat chʼajjwañanak utjaychi ukhajja, juchañchatäñapawa’ sasaw uka leyejj säna.

^ tʼaqa 14 Khä 1950 maranjja, 164 jilat kullakanakaw Quebec markan Diosatak sapür irnaqtʼapjjäna. Jupanakat 63 jilat kullakanakajj misioneröpjjänwa, kunayman tʼaqhesiyata ukat arknaqat uñjasipjjañap yatipkchïnsa, taqe chuymaw uka markar sarañatak ‘iyaw’ sapjjäna.

^ tʼaqa 15 Glen How jilatajj jan ajjsartʼir abogadönwa, jupajj 1943 marata 2003 marakamaw Jehová Diosan Qhanañchirinakaparojj Canadá markana ukat yaqha markanakan walja juicionakan arjjatawayi.

^ tʼaqa 16 Uka toqet jukʼamp yatjjatañatakejja, “La batalla no es de ustedes, sino de Dios” siski uka yatichäwi ¡Despertad! abril 22, 2000, 18 janata 24 janakam uñjjattʼäta.

^ tʼaqa 32 Tiempompejja, soldadonakajj sucursal oraqet mistjjapjjänwa, ukampis yaqha cheqanwa sucursalajj machaqat lurasjjäna.