Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Oraqpachan Jilïr Irpirinakan qellqanitapa

Oraqpachan Jilïr Irpirinakan qellqanitapa

Diosan Reinopat yatiyiri munat jilat kullaka:

KHÄ 1914 maran octubre phajjsit 2 uru saraqkäna uka viernes alwajj kunas pasäna uk amtañäni. Brooklyn (Nueva York) markan Betel utajj utjki ukansa irnaqtʼkasma ukham amuytʼasim. Jumajj juntʼüm umtʼasiñatakiw uka alwajj kawkhantï sapa alwajj qontʼasirïkta uka cheqan Charles Russell jilatan puriniñap suyasktajja. Ukhamaruw Russell jilatajj comedorar mantani ukat mä rat saytʼasajja, “taqenitakis aski alwakïpan” sasin betelitanakar kusisit chuymamp arunti. Cheqas sapüruw jupajj ukham aruntasirïna. Kawkhantï sapa alwajj qontʼasirïki uka cheqar janïr qontʼaskasajja, ampar tʼajjllirtʼasajj akham sasaw yatiyi: “Markanakar churaskäna uka tiempojj tukusjjewa; reyinakan apnaqañ urunakapas tukusjjarakiwa” sasa. ¡Walja tiempow uk suyawaytajja! Ukatwa mayni betelitanakjam kusisit jikjjatasisajj wal tʼajjllirtʼaraktajja.

 Uka urut jichhakamajj walja maranakaw pasawayjje. ¿Kunsa Diosan Reinopajj uka tiempot jichhakam lurawayi? Jehová Diosajj Reinop toqew servirinakapar qʼomachawayi ukat wakichtʼawayi. Amtañäni, 1914 maranjja mä qawqha waranqa jilat kullakanakakiw utjäna, jichhajj niya 8 millón jilat kullakanakaw utj-jje. Diosajj markapar sum wakichtʼawayki ukajja, ¿kunjamsa jumar yanaptʼawaytam?

Jilat kullakanakar walja kutiw akham sir istʼtanjja: “Jehová Diosan alajjpachankir carropajj jan saytʼasaw jankʼak saraski” sasa. Ukham sasajj janiw pantjasipkiti. Cheqas kunjamtï aka libron uñjkañänejja, 1914 maratwa Diosan alajjpachankir carropajja, mä arunjja, Jehová Diosan markapajj jankʼak jan saytʼas sarantaski. Diosan Reinopat yatiyirinakajja, kunayman toqetwa suma yatiyäwinak aka Oraqpachan yatiyawayapjje. Ukanakat mä qawqhajj akanakawa, periodiconakampi, peliculanakampi, yatiyañatak tarjetanakampi, gramofononakampi, radiompi ukat jachʼa cartelanakampi. Jichhürunakansa, Internet toqew yatiyasipkaraki.

Jehová Diosajja, 670 jila arunakaru Bibliat apstʼat qellqatanak apsuñataki ukat ukanak jaqenakar qollqe jan mayisin churañatakiw yanaptʼaskistu. Maysa toqetjja, pisin jakasipki ukat jila qollqenïpki uka markanakanwa walja jilat kullakanakajj Tantachasiñ Utanaka ukat sucursalanak lurañan yanaptʼasipki. Ukat wali munasiri yaqhep jilat kullakanakajja, jankʼakiw jan waltʼäwin uñjasipki uka cristianonakar yanaptʼir sarapjje, ukhamatwa ‘llakisiñan mä jiljam chuymachtʼasirïpjjatap’ uñachtʼayapjje (Pro. 17:17).

Awisajj tatakuranaka ukat yaqha ukham jan wali jaqenakaw ‘leyin sutipjjarojj’ jan walinak lurañ munapjjestäna. Ukampis amtanakapajj janiw phoqasiwaykiti, antisas ‘qhespiyasiñ yatiyäwinak jukʼamp’ yatiyasiñapatakiw yanaptʼawayi. Ukanak yatisajj jukʼampiw Jehová Diosar confiyastanjja (Sal. 94:20; Fili. 1:12).

Jesucristor nanakjam serviri ‘utankirinaka’, jumanakamp chika Diosatak irnaqtʼañajj wali askipuniwa. Wal munasipjjsma, uk janipun armapjjamti. Aka libro liytʼañajja, kuntï jumanakajj Jehová Diosat katoqawayapkta uk wali askit uñjapjjañamataki yanaptʼapjjeristam, ukwa Diosar taqe chuymanakajamp oracionan mayipjjta (Mat. 24:45, MT).

Wali munasiñampiw aruntanipjjsma,

Jehová Diosan Qhanañchirinakapan Oraqpachan Jilïr Irpirinakapa