Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 9 yatichäwi

¿Kunjamsa familianakajj kusisit jakasipjjaspa?

¿Kunjamsa familianakajj kusisit jakasipjjaspa?

1. ¿Kunatsa leyinakarjam casarasip­jjañapa?

Jehová Diosajj kusisit Diosawa, Jupaw suma yatiyäwinak churistu. Ukat familianakajj kusisitäpjjaspa, ukwa munaraki (1 Timoteo 1:11, NM). Jupaw matrimonio uttʼayi. Mä chacha warmin casarasipjjañapajj wali askiwa, ukhamatwa awk taykajj wawanakamp kusisita jakasipjjaspa ukat munasiñas utjarakispa. Ukatwa cristianonakajj leyinakarjam casarasiñatak qellqayasipjjañapa. Lucas 2:1, 4, 5 liytʼäta.

Jaqechasitanakajja, chacha warmjam jan jaljtasa sum sarnaqasipjjaspa ukat purapat respetasipjjaspa ukwa Jehová Diosajj muni (Hebreos 13:4). Jupajj divorciasiñarojj uñisiwa (Malaquías 2:16). Ukampis kunapachatï chachasa, jan ukajj warmisa wachoq juchar purtʼasi ukhakiw maynejj divorciasispa, ukat yaqhamp casarasjjaspa. Mateo 19:3-6, 9 liytʼäta.

2. ¿Kunjamsa chacha warmejj uñjasipjjañapa?

Jaqechatäkasin purapat yanaptʼasipjjañapatakiw Jehová Diosajj chacha warmir lurawayi (Génesis 2:18). Familianjja chachaw pʼeqtʼirejja, ukhamajj jupaw kunatï familian jakasiñatak wakiski uk churañapa ukat Diosatsa yatichañaparaki. Ukat warmipar munasitap laykojj jakäwipsa aptʼasirjamäñapawa. Panpachaniw munasipjjañapa ukat respetasipjjañapa. Ukat niyakejjay pantjasir jaqëpjjchejja, kusisit jakasiñatakejj perdonasirïpjjañapawa. Efesios 4:31, 32; 5:22-25, 33, ukat 1 Pedro 3:7 liytʼäta.

3. ¿Jan waltʼayasiñajj utjani ukhajj jaljtapjjañapati?

Mä chacha warmitï jan waltʼayasipjjani ukhajja, panpachaniw munasiñamp uñjasiñatakejj chʼamachasipjjañapa  (1 Corintios 13:4, 5). Ukat kunapachatï jan waltʼäwinakajj utji ukhajja, janiw jaljtapjjañapaw sasin Bibliajj yatichkiti. 1 Corintios 7:10-13 liytʼäta.

4. ¿Kunsa Diosajj wawanakatak muni?

Wawanakajj kusisit jakasipjjaspa ukwa Jehová Diosajj muni. Ukatwa kunjamsa wayn tawaqökasin kusisit jakasipjjaspa uk yatichi. Ukat yatiñanïñsa, experiencianïñsa awk taykapat yateqasipjjaspa ukwa munaraki (Colosenses 3:20). Ukatsti, Juparu ukat Jesusar servisajj kunja kusisitas jikjjatasipjjaspa uk amuyapjjañapsa munarakiwa. Eclesiastés 11:9–12:1; Mateo 19:13-15; 21:15, 16 liytʼäta.

5. Awk taykajj wawanakapan kusisit jakasip­jjañapatakejja, ¿kunjamsa yana­ptʼapjjaspa?

Awk taykaw manqʼañatsa, isitsa ukat kawkhansa jakasipjjaspa ukanak wawanakapar churañatak wal chʼamachasipjjañapa (1 Timoteo 5:8). Janiw ukakïkiti, Diosar munañsa ukat Jupat yateqasiñsa yatichapjjañaparakiwa (Efesios 6:4). Kunapachatï awk taykajj Diosar wal munasipjjatap uñachtʼayapjje ukhajja, wawanakajj yateqasipjjarakispawa. Cheqansa, Diosan Aruparjam wawanakar uywañajj wali askiwa, ukhamatwa jupanakajj suma amtanïpjjaspa. Deuteronomio 6:4-7 ukat Proverbios 22:6 liytʼäta.

Wawanakajj suma luratanakapat chʼamañchtʼatäña, ukat “walik ukham lurtajja” sayasiñ wal munapjje. Ukhamarusa, awisajj ewjjtʼañasa, cheqañchañasa wakisirakiwa, ukhamatwa jupanakajj jan waltʼayir lurañanakat jitheqtapjjaspa (Proverbios 22:15). Ukampis cheqañchasajj janipuniw awk taykanakajj wawanakapampi sinti qhorüpjjañapäkiti. Colosenses 3:21 liytʼäta.

Jehová Diosan Qhanañchirinakapajja, awk taykanakaru ukat wawanakar yanaptʼañatakejj walja yanaptʼanakwa apsuwayapjje, uka qellqatanakajj Bibliat apstʼatkamakiwa. Salmo 19:7, 11 liytʼäta.