Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 5 yatichäwi

¿Kunas Diosan amtapajj aka Oraqetakejja?

¿Kunas Diosan amtapajj aka Oraqetakejja?

1. ¿Kunatakis Diosajj aka Oraq luräna?

Aka Oraqjja, jaqenakan jakasipjjañapatakiw Jehová Diosajj lurawayi. Adanamp Evampir lurkäna ukhajja, janiw alajjpachan jakapjjañapatak lurkänti, kunattejj angelanakatakiw alajjpach luräna (Job 38:4, 7). Diosajj Adanarojj mä suma jardinaruw uskutayna, ukajj Edén satänwa (Génesis 2:15-17). Ukat jupasa, wawanakapasa wiñayatakiw aka Oraqen jakasipjjasapäna. Salmo 37:29 ukat 115:16 liytʼäta.

Edén jardinajj janiw Oraqpachankänti, jan ukasti mä cheqankakïnwa. Ukat Adanamp Evampejj walja wawanïpjjañapänwa, ukhamatwa aka Oraqer mirantasin jukʼat jukʼat mä suma paraisor tukuyapjjasapäna (Génesis 1:28). Cheqas aka Oraqejj jaqenakan utjasiñapatakiwa, ukhamajj janiw kunakipansa tʼunjatäkaniti. Salmo 104:5 liytʼäta.

2. ¿Kunatsa aka Oraqejj jan mä paraisojje?

Adanamp Evampiw Diosar jan istʼapkataynati, ukatwa Edén jardinat jaqonukut uñjasipjjäna. Ukhamatwa paraíso oraq aptʼawayapjje, ukat janirakiw khitis uk askichirjamäkänti. Kunjamtï Biblian siskejja, ‘aka Oraqejj ñanqha jaqenakar katuyatawa’ (Job 9:24). Génesis 3:23, 24 liytʼäta.

Ukhamajj ¿kuntï Jehová Diosajj jaqenakatak amtkäna ukanak armasjjpachati? ¡Janiwa! Jupajj taqe chʼamaniwa ukat janirakiw inamay amtirikïkiti (Isaías 45:18). Ukat jutirinjja, kunjamtï Diosajj qalltan jaqenakatak amtkäna ukhamäjjaniwa. Salmo 37:11, 34 liytʼäta.

3. ¿Kunjamatsa aka Oraqejj mä paraisor tukuyasini?

Diosan Reinopan reyipjamajja, Jesusajj aka Oraq mä paraisoruw tukuyani. Angelanakamp chikasti, Armagedón sat chʼajjwäwinwa Diosan taqe uñisirinakapar tʼunjani. Supayajj  waranqa maranak jistʼantatäniwa. Ukat Diosan loqtirinakaparojj uka tʼunjäwit qhespiyaniwa, kunattejj Jesusaw jupanakar irpani ukat jarkʼaqarakini, qhepatsti wiñayaw paraison jakjjapjjarakini. Apocalipsis 20:1-3 ukat 21:3, 4 liytʼäta.

4. ¿Kunapachas tʼaqhesiñanakajj tukusjjani?

¿Kunapachas Diosajj jan waltʼäwinak tukjani? Jan waltʼäwinakan tukusiñap jakʼanjjatap yatiñatakejja, kunanakas pasañapäna ukwa Jesusajj sum qhanañchäna. Ukhamajj kunanakatï jichhürunakan jaqenakar jan waltʼayaski ukanakaw ‘akapachan tukusiñap’ jakʼanjjatap uñachtʼayistu. Mateo 24:3, 7-14, 21, 22 liytʼäta.

Jesusajj waranq maranak alajjpachat aka Oraqjjar apnaqankani ukhajja, kunanakatï tʼaqhesiñanak utjayki ukanakwa chhaqtayjjani (Isaías 9:6, 7; 11:9). Ukhamajj Jesusaw reyjam apnaqjjani, ukampis jilïr sacerdoterakïniwa ukhamatwa Diosar munasirinakan juchanakap qʼomachjjarakini. Ukhamajj Jesús toqew Jehová Diosajj usunaksa, chuymankipstañsa ukat jiwañsa chhaqtayani. Isaías 25:8 ukat 33:24 liytʼäta.

5. ¿Khitinakas paraison jakapjjani?

Jehová Diosan Qhanañchirinakapan Tantachasiñ Utanakapanwa, Diosar wal munasiri ukat Jupan munañapat yateqañ muniri jaqenakar uñtʼäta

Diosar istʼir jaqenakaw paraison jakapjjani (1 Juan 2:17). Jesusajj aski chuyman jaqenakar thaqhanipjjam, ukhamatwa Diosat yateqasin qhespipjjarakini sasaw arkirinakapar säna. Jichhürunakanjja, Jehová Diosajj millón millón jaqenakaruw paraison jakapjjañapatak wakichaski (Sofonías 2:3). Jehová Diosan Qhanañchirinakapan Tantachasiñ Utanakapanwa kunjamsa chacha warmejj sum apasipjjaspa, wawanakaparus sum uywapjjaspa ukat Biblian suma yatiyäwinakapsa sum katoqapjjaspa ukanak yateqapjje. Miqueas 4:1-4 liytʼäta.