Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 2 yatichäwi

¿Khitis Diosajja?

¿Khitis Diosajja?

1. ¿Kunatsa Diosar yupaychañasa?

Diosaw taqe kuns ina chʼusat lurawayi. Jupajj utjapunitaynawa ukat wiñayatakirakiw utjani (Salmo 90:2). Ukat Biblian suma yatiyäwinakas Jupatwa jutaraki (1 Timoteo 1:11). Jupaw jakañ churawayistu, ukhamajj Juparukiw serviñasa ukat yupaychañasaraki. Apocalipsis 4:11 liytʼäta.

2. ¿Kunjamas Diosajja?

Diosajj wali chʼamani mä ajayuwa, ukhamajj janipuniw khiti jaqes Jupar uñjkaspati, janiw jiwasjam jañchini ukat chʼakhani jaqëkiti (Juan 1:18; 4:24). Ukampis kunjam chuymanis Jupajja, uk luratanakap toqew yatsna. Sañäni: panqaranakasa ukat mojjsa achunakasa wali suma lurtʼatawa, ukanakaw chʼikhi amuyunïtapa ukat munasirïtap uñachtʼayistu. Ukat alajjpachasa, wali chʼamanïtapwa uñachtʼayarakistu. Romanos 1:20 liytʼäta.

Yaqha toqetjja, Biblia liytʼasarakiw Diosar sum uñtʼsna, ukanwa kunjamsa jaqenakar uñji kunanakas Jupar kusisiyi ukat chuyms ustʼayaraki ukanak yatjjatsna, ukat jan waltʼäwinak utjipansa, kunjams Jupajj amuyi ukas qhanañcharakiwa. Salmo 103:7-10 liytʼäta.

3. ¿Diosajj sutinïpachati?

Jesusajj akham sänwa: “Alajjpachankir nanakan Awkejja, sutimajj jachʼañchatäpan” sasa (Mateo 6:9). Cheqansa, Diosajj kunaymanit aytasitawa, ukampis Jupajj mä sutinikiwa. Sapa arurjamaw uka sutejj mayj mayj arsusi. Aymara arunjja, Jehová sasaw arsusi, ukat awisajj “Yavé” sasarakiw arsusi. Bibliajj akham siwa: “Jaqenakan yatipjjañapataki, jumajj “Jehová” sutinïtama, juma sapakiw oraqpachjjaru taqe Munañanïtajja” sasa (Salmo 83:18, NM).

 Yaqha Biblianakanjja, Diosan sutip lantejj “Dios” jan ukajj “Tatitu” sasakiw uskupjje. Ukampis Biblia qellqaskäna ukhajja, mä 7.000 kutiw Diosan sutipajj uñstäna. Ukat jaqenakar yatichkasinjja, ukhamarakiw Jesusajj Diosan sutip aytirïna. Juan 17:26 liytʼäta.

Aka munasir awkjamarakiw Jehová Diosajj jiwasanakat wal llakisi

4. ¿Diosajj jiwasanakat llakispachati?

Jehová Diosatï munaschistojja, ¿kunatsa tʼaqhesiñanak jan tukjpacha? Diosajj yantʼañatakiw ukham luri sasaw walja jaqenakajj sapjje. Ukampis ukajj janiw cheqäkiti. Santiago 1:13 liytʼäta.

Diosajj janiw munkir jan munkir thakipan sarnaqaykistuti, ukajj sapa maynitäjjewa. Ukampis jiwasatï jupar serviñ ajllsna ukhajja, wali askiniwa (Josué 24:15). Walja jaqenakaw jakäwipamp jan walinak lurapjje, ukatwa tʼaqhesiñanakas utjaraki. Uk uñjasaw Jehová Diosajj wal chuym ustʼayasi. Génesis 6:5, 6 liytʼäta.

Niyakejay Jehová Diosajj wal munaschistojja ukat sum jakasiñas munarakchejja, niyaw jan walinaksa, tʼaqhesiñanaksa chhaqtayani. Ukampis kunatsa tʼaqhesiñanak jan tukjpacha ukjja, 8 yatichäwin sum qhanañchasiskani. 2 Pedro 2:9 ukat 3:7, 13 liytʼäta.

5. ¿Kunjamsa Diosar jakʼachassna?

Jehová Diosajj wal sapa maynit llakisi, ukat oración toqe Jupar jakʼachassna ukwa munaraki (Salmo 65:2; 145:18). Perdonañatakis jankʼakirakiwa. Munañap janis sum phoqchiñanejja, kunjamsa phoqhañatak chʼamachasisktan uk Jupajj sum yati. Ukhamajj pantjasir jaqëkstansa, Jupan amigopasnawa. Salmo 103:12-14 ukat Santiago 4:8 liytʼäta.

Cheqansa, Jehová Diosaw jakäw churistojja, ukhamajj Juparukiw taqe chuymasamp munasiñasa (Marcos 12:30). Ukat qhawqsa Jupar munastan uk uñachtʼayañatakejja, Jupat yateqañasa ukat kamachinakap sum phoqhañasaraki. Taqe ukanak lurasinwa Diosampejj sum apasirakiñäni. 1 Timoteo 2:4 ukat 1 Juan 5:3 liytʼäta.