Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 12 yatichäwi

¿Kunjamsa Diosar jak’achassna?

¿Kunjamsa Diosar jak’achassna?

1. ¿Diosajj taqe oracionanakti istʼpacha?

Diosajj taqe jaqenakaruw oración toqe jupar jakʼachasipjjañapatak jawstʼaski (Salmo 65:2). Ukampis Diosajj janiw taqe mayisïwinak istʼkiti. Amuytʼañataki, kunapachatï mä chachajj warmipar jan munasiñampi uñjki ukhajja, oracionanakapajj ‘jarkʼatäspawa’ sasaw Bibliajj yatichi (1 Pedro 3:7, MT). Ukat kunapachatï israelitanakajj sapa kuti jan walinak lurapjjäna ukhajja, Diosajj janiw oracionanakap istʼañ munjjänti. Ukampis jan wali luratanakapat taqe chuyma arrepentisipki ukanakarojj istʼiwa. Isaías 1:15 ukat 55:7 liytʼäta.

2. ¿Kunjamäñapas oracionanakasajja?

Oracionampiw Jehová Diosar yupaycharaksna, ukhamajj Jupa saparukiw oracionan mayisiñasa (Mateo 4:10; 6:9). Ukat niyakejjay taqenis pantjasirïstanjja, Jesusan sutipjjaruw mayisiñasa, jupaw juchanakas layku jiwawayi (Juan 14:6). Jehová Diosajj janiw pʼeqer yatsuta, jan ukajj qellqat oracionanak lurañas munkiti, jan ukasti chuymatpach mayisipki ukaw Jupatakejj wali askejja. Mateo 6:7 ukat Filipenses 4:6, 7 liytʼäta.

Taqe kun Luriri Jehová Diosajja, chuyma manqhat mayisipki uka oracionanaksa istʼiwa (1 Samuel 1:12, 13). Ukat taqe horasan Jupar mayisiñaswa munaraki, alwat sartkasina, manqʼasiñ horasaru, ikintañataki ukat jan waltʼäwinakansa mayisiñasapuniwa. Salmo 55:22 ukat Mateo 15:36 liytʼäta.

3. ¿Kunjamsa tantachäwinakajj yanaptʼistu?

Jichhürunakanjja, Diosar jan iyawsiri jaqenakamp chikaw jaktanjja ukat aka Oraqejj mä suma paraisöjjaniwa sasin  Diosajj siskäna uka arunakatsa sawkasipjjewa, ukanakaw Diosar jakʼachasiñat jayarstʼayistaspa (2 Timoteo 3:1, 4; 2 Pedro 3:3, 13). Ukatwa mayni jilat kullakanakampi chʼamañchtʼasiñataki tantachasiñajj wali askejja. Jupanakas ukhamarakiw chʼamañchtʼatäñ wal munapjje. Hebreos 10:24, 25 liytʼäta.

Diosar munasipki uka jilat kullakanakamp tantachasisaw Jehová Diosar jukʼamp jakʼachassna. Ukat Jehová Diosan Qhanañchirinakapan tantachäwinakapanwa, kunjamsa mayni jilat kullakanakajj Diosar iyawsapjje uk uñjsna ukat yateqasiraksna. Romanos 1:11, 12 liytʼäta.

4. ¿Kunjamsa Diosar jakʼachasisma?

Kuntï Jehová Diosat Biblian yateqawaykta uka toqenakat lupʼisaw jukʼamp Jupar jakʼachasïta. Luratanakapata, ewjjtʼanakapata ukat kuntï Diosajj arsuwayki ukanakat lupʼiñamawa. Ukatsti, Diosajj qhawqha munasirisa ukat yatiñanisa uk sum amuytʼañatakejja, oracionamp ukat lupʼiñampiw yanaptʼätam. Josué 1:8 ukat Salmo 1:1-3 liytʼäta.

Jehová Diosar atinisita ukhakiw jupar jakʼachasita. Amuytʼañataki, Diosar atinisiñajj mä jiskʼa alir uñtatawa, uka alin jilsuñapatakejj umamp warjjattʼañaw wakisi, ukhamarakiw Diosar jukʼamp atinisiñatakejja, sapa kutiw kunatsa Diosar yupaychasktan uka toqet lupʼiñasajja. Mateo 4:4 ukat Hebreos 11:1, 6 liytʼäta.

5. Diosar jakʼachasisajja, ¿kuna askinaksa jikjjatsna?

Jupar taqe chuyma munasiñ uñachtʼayapki, ukanakatwa Jehová Diosajj wal llakisi. Cheqansa, jan waltʼäwinakaw Diosar yupaychäwisan aynachtʼayistaspa ukat janirakiw wiñay jakañsa suyjjsnati, uka jan waltʼäwinakatwa Diosajj jarkʼaqestaspa (Salmo 91:1, 2, 7-10). Ukat kunanakas kusisita ukat kʼumara jakasiñatakejj jan waltʼayistaspa ukanakatsa Diosajj jarkʼaqestuwa, ukat kunjamsa sum jakassna uksa yaticharakistuwa. Salmo 73:27, 28 ukat Santiago 4:4, 8 liytʼäta.