Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 1 YATICHÄWI

Diosar uñtʼañäni

Diosar uñtʼañäni

1, 2. ¿Kuna toqenakatsa jaqenakajj jisktʼasipjje?

WAWANAKAJJ jisktʼasipjjapuniwa. Jisktʼanakapar qhanañchktan ukhasa, “¿kunatsa?” sasaw jisktʼasipjje. Sumpach qhanañchktan ukhasa jisktʼasisipkakiwa.

2 Wawanakasa jilïrinakasa taqeniw jisktʼasiñ yattanjja. “¿Kunsa manqʼañäni?, ¿kunsa isisiñäni?, ¿kunsa alasiñäni?” sasaw jisktʼastanjja. Awisajj jakäwisata, jan ukajj kunas jutïrin pasani uka toqetwa jisktʼasiraktanjja. Uka toqenakat jan khitis sumpach qhanañchañ puedkistu ukhajja, ukhamarukiw jaytjjtanjja.

3. ¿Kunatsa yaqhep jaqenakajj jan jisktʼasjjapjje?

3 ¿Bibliajj jisktʼanakasar qhanañchaspati? Yaqhepajj akham sapjjewa: “Jïsa, qhanañchaspawa, ukampis Biblia amuyañajj wali chʼamawa” sasa. Yaqhepasti tata curanaka, profesoranaka jan ukajj pastoranakakiw amuyapjjaspa sapjjarakiwa. Yaqhepasti jan jiskʼachayasiñ laykojj jisktʼasiñjja ajjsarayasipjjarakiwa. ¿Jumajj kamsasmasa?

4, 5. 1) ¿Kuna toqetsa jumajj jisktʼasirïta? 2) ¿Kunatsa uka jisktʼanakaman qhanañchäwip thaqaskakiñama?

4 Inas aka jisktʼanakat yatiñ munchisma: “¿Kuna amtampis Diosajj luristu? ¿Kawkinkapjjes jiwatanakajja? ¿Kunjamas Diosajja?”. Jachʼa Yatichiri Jesusajj akham sänwa: “Mayisipkakim, churatäpjjätawa; thaqasipkakim, jikjjatapjjätawa; leqtʼasipkakim, llawiratäpjjätawa” sasa (Mateo 7:7). Ukhamajj uka jisktʼanakan qhanañchäwip jikjjatañatak chʼamachasiskakim.

 5 Uka jisktʼanakan qhanañchäwipajj Bibliankiwa (Proverbios 2:1-5). Uka qhanañchäwinak amuytʼañajj janiw chʼamäkiti. Kuntï yateqkäta ukajj kusisit jakasiñatakiw yanaptʼätam, kunjamsa jutïrin sum jakasiñäni uksa yateqarakïtawa. Jichhajja mä jisktʼar qhanañchañäni, uka toqet waljaniw may may amuyapjje.

¿DIOSAJJ JAN SINTTʼASIRÏPACHATI?

6. ¿Kunatsa yaqhepajj janis Diosajj jiwasat llakiskaspa ukham amuyapjje?

6 Diosajj janis jiwasat llakiskaspa ukhamwa waljanejj amuyapjje. “Diosatï jiwasat llakisispajja, sumwa jakassna” sasaw sapjje. Jichhürunakanjja guerranaka, uñisisiñanaka, llakisiñanaka ukanakakiw utjaski. Usuntañasa, tʼaqesiñasa, jiwañasa taqe cheqanwa utji. Ukatwa yaqhepajj akham jisktʼasipjje: “Diosatï munaschistojja, ¿kunatsa jan walinak jan chhaqtaykpacha?” sasa.

7. 1) ¿Kunjamsa religión pʼeqtʼirinakajj Diosar juchañchapjje? 2) ¿Jan walinakat Diosar juchañchañajj walikïskiti?

7 Religión pʼeqtʼirinakajja, Diosajj janis sinttʼasirïkaspa ukhamwa jaqenakar yatichapjje. Maynejj mä jan waltʼäwin uñjasi ukhajja, Diosan munañapawa, jupaw ukhamäñap munäna sasaw sapjje. Jaqenakar ukham sasajj Diosaruw juchañchapjje. Ukampis Biblianjja, janipuniw Diosajj khitirus tʼaqesiykaspati sasaw qhanañchi. Santiago 1:13 qellqatanjja siwa: “Jan waltʼäwin uñjasisajja, jan khitisa ‘Diosaw nayarojj yantʼitu’ sasajj sispanti. Diosajj janiw jan walinakampejj yantʼatäkaspati, janirakiw jupajj ni khitirus yantʼkiti” sasa. Ukhamasti Diosajj janis jan walinak pasañap jarkʼkchejja, janipuniw  khitirus jan walinakampi yantʼkiti, ni tʼaqesiykisa (Job 34:10-12 liytʼañataki). Uk sum amuytʼañatakejj mä uñachtʼäwit parltʼañäni.

8, 9. ¿Kunatsa jan walinakan uñjasisajj Diosar jan juchañchañasäki? Uk mä uñachtʼäwimpi qhanañchtʼam.

8 Amuytʼañatakejja mä waynat parltʼañäni, jupajj awk taykapampiw jakasi. Awkipajj jupar wal munasi, suma amtanakar puriñapatakis yaticharakiwa. Ukampis waynajj awkip contraw saytʼasjje, utat sarjjasinjja jan walinakwa luri, kunayman jan waltʼäwinakaruw puriraki. ¿Yoqapar jan jarkʼatapatsa, yoqapan jan walir purtʼasitapatsa awkiw juchani sasmati? Janiwa (Lucas 15:11-13). Uka waynjamarakiw walja jaqenakajj Jehová Dios contra saytʼasisin jan walinak lurapjje. Ukham lurapjje ukhajja janiw Jehová Diosajj jupanakar jarkʼkiti, kunjamtï awkejj yoqapar uñachtʼäwin jan jarkʼki ukhama.

9 ¿Kunatsa Diosajj jan walinak jan chhaqtaykpacha? Uka toqet Bibliajj kamsisa ukjja, 11 yatichäwinwa yatjjataskañäni. Diosajj wal munasistu, janipuniw jan walinakan uñjasisajj Jupar juchañchañasäkiti. Jupakiw jan walinak chhaqtayani (Isaías 33:2).

10. ¿Kunatsa Diosakiw jan walinak askichaspa sasin sissna?

10 Diosajj qollanawa jan ukajj santowa (Isaías 6:3). Taqe luratanakapajj qʼomawa, cheqapawa, sumarakiwa, ukatwa Jupar taqe chuyma confiysna. Jaqenakajj janiw ukhamäpkiti, awisajj jan walinak lurapjje. Mä suma gobiernos janiw jaqenakan jan wali luratanakap chhaqtaykaspati. Diosakiw taqe chʼamanejja, jupakiw kuna jan walinaktï jaqenakajj lurapki ukanak askichaspa. Cheqas jupaw jan walinakjja wiñayatak qʼal chhaqtayani (Salmo 37:9-11 liytʼañataki).

 TʼAQESTAN UKHAJJA ¿DIOSAJJ JIWASAT LLAKISPACHATI?

11. Diosajj tʼaqesir uñjistu ukhajja, ¿kunjamas jikjjatasi?

11 Akapachan jan walinak uñjasasa, jiwasar tʼaqesir uñjistu ukhasa, ¿kunjamakis Diosajj jikjjataspacha? Diosajj kunatï cheqapäki ukar muniri Diosawa sasaw Bibliajj qhanañchi (Salmo 37:28, NM). Diosajj kunanatï akapachan pasaski ukanak uñjaskiwa, ukatwa jaqenakar tʼaqesir uñjasajj wal llakisi. Aka oraqen jan walinakampi phoqantatätap uñjasajja, Diosajj ‘wal chuym usuyasïna’ sasaw Bibliajj qhanañcharaki (Génesis 6:5, 6). Diosajj pachpakïskiwa (Malaquías 3:6). Bibliajja, kunatï jumanakar pasapktam ukanakat Diosajj wal llakisi sasaw sistu (1 Pedro 5:7 liytʼañataki).

Jehová Diosaw taqe kunsa luri sasaw Bibliajj qhanañchi.

12, 13. 1) ¿Kunatsa jaqe masisar munastanjja, jupanakatsa llakisiraktanjja? 2) Akapachan jan walinak uñjasajj ¿kunjamas jikjjatastanjja? 3) ¿Kunatsa Diosaw jan walinaksa tʼaqesiñanaksa chhaqtayani sissna?

12 Diosajj jupar uñtasitwa lurawayistu sasaw Bibliajj qhanañchi (Génesis 1:26). Mä arunjja, Jupjam chuymani lurtʼatätanwa. Kunapachatï mayninakaru ina chʼusat tʼaqesir uñjtan ukhajja, chuym wal usuyastanjja, Jehová Diosajj jiwasat sipansa jukʼampiw chuymap usuyasi. ¿Kunatsa ukham sistanjja?

13 “Diosajj munasiñawa” sasaw Bibliajj qhanañchi (1 Juan 4:8). Jupajj taqe kunsa munasiñatwa luri. Diosajj wali munasiriwa, ukatwa jiwasajj munasirirakïtanjja. May amuytʼañäni, jumatï jan walinaka, tʼaqesiñanaka chhaqtayañatak chʼamanïsmajja, ¿janit taqe uka jan walinak chhaqtaykasma? Jaqenakar munasitam laykojj chhaqtayasmawa. ¿Diosat kamsaraksnasa? Jupajj wali chʼamaniwa, jiwasar munasitap laykojja, jan walinaksa tʼaqesiñanaksa chhaqtayaspawa. Ukhamajj kuntï 4, 5 paginanakan uñjaniwayktan uka  bendicionanak katoqañäniwa, janiw uka toqet pächasiñasäkiti. Uka bendicionanak katoqañatakejj Diosaruw jukʼampi uñtʼañasa.

DIOSAJJ JUPAR UÑTʼASMA UKWA MUNI

Maynin amigopäñatakejja, nayraqatajj sutiswa yatiytanjja. Diosajj Biblianwa sutip yatiyistu.

14. ¿Diosajj kamsatasa, kunatsa Diosan sutip aytasiñasa?

14 ¿Kunsa maynin amigopäñatakejj nayraqat lurtanjja? Sutiswa yatiytanjja. ¿Diosajj sutinirakïpachati? Walja religionanakanjja, Tatitu jan ukajj Dios satawa sasaw yatichapjje, ukampis ukanakajj janiw sutipäkiti, alcalde jan ukajj presidente sisksnas ukhamakiwa. Diosajj Biblianwa sutip yatiyistu, Jupajj Jehová satawa. Traducción del Nuevo Mundo sat Biblianjja, Salmo 83:18 qellqatan akham siwa: “Jaqenakan yatipjjañapataki, jumajj Jehová sutinïtama, juma sapakiw oraqpachjjaru taqe Munañanïtajja” sasa. Nayra qellqatanakanjja, walja kutiw Biblia qellqerinakajj Jehová Diosan sutip aytasipjjäna. Jehová Diosajj sutip yatsna, sutipat oración mayissna, sutip aytassna ukwa muni. Diosajj amigopäñaswa munaraki, ukatwa sutip yatiyistu.

15. ¿Kunsa Jehová sutejj sañ muni?

15 Diosan Jehová sutipjamajj janiw yaqha sutejj utjkiti. Sutipajja, taqe arsutanakapsa  amtanakapsa phoqapuniniwa sañ muni. Janiw khitis juparojj jarkʼkaspati. Ukhamajj Jehová Diosakiw uka sutinïspa. *

16, 17. 1) ¿Kunatsa Jehová Diosajj Taqe Chʼamani Diosajja? 2) ¿Kunatsa wiñay Reyejja? 3) ¿Kunatsa taqe kun Luriri Diosajja?

16 Kunjamtï liytʼaniwayktanjja, Salmo 83:18 qellqatanjja siwa: “Juma sapakiw oraqpachjjaru taqe  Munañanïtajja” sasa. Apocalipsis 15:3 qellqatajj sarakiwa: “Taqe Chʼamani Jehová Dios, juman luratanakamajj wali jachʼanakawa, wali musparkañarakiwa. Wiñay Rey, juman thakinakamajj cheqapawa, confiykañarakiwa” sasa. “Taqe Chʼamani” siski uka arunakajja, Jehová Diosat sipansa jukʼamp chʼamanejj janiw yaqhajj utjkiti sañwa muni. “Wiñay Rey” siski uka arunakasti, Jehová Dios sapaki wiñay jakirïtapa sañwa munaraki. Salmo 90:2 qellqatajj Jupat akham siwa: “Wiñayatpacha, wiñayatakiw jumajj Diosätajja” sasa. ¡Ukanak yatiñajj wali musparkañawa!

17 Jehová Dios sapakiw taqe kun Luriri Diosajja. Apocalipsis 4:11 qellqatan akham siwa: “Nanakan Jehová Diosaja, jumaw jachʼañchäwi, honra katoqañatakisa, chʼamanïñatakisa derechonïtajja. Jumaw taqe kunsa lurtajja, juman munañamatwa taqe kunas utji,  munañamat luratarakiwa” sasa. Angelanakasa, warawaranakasa, frutanakasa, chawllanakasa, Jupan luratawa. ¡Taqe kunas Jehová Diosan luratawa!

¿DIOSAN AMIGOPÄÑ MUNASMATI?

18. 1) ¿Kunatsa yaqhepajj Diosan amigopäñ ajjsarayasipjje? 2) ¿Kamsis Bibliajj uka toqetjja?

18 Jehová Diosajj kunja musparkañasa uk yatisajja, waljaniw ajjsarayasipjje, akham sapjjarakiwa: “Diosajj wali chʼamaniwa, janiw jakʼachasksnati, wali jayankiwa, janiw nayat llakiskpachati” sasa. Jehová Diosajj janiw ukham amuyañas munkiti. Jupajj jiwasar jakʼachasiñ wal muni, Bibliajj akham siwa: “Jupajj janiw sapa mayni jiwasanakat jayankkiti” sasa (Hechos 17:27). Diosajj jupar jakʼachasisma ukwa muni, ‘jupasti jumar jakʼachasirakiniwa’ (Santiago 4:8).

19. 1) ¿Kunsa Diosan amigopäñatakejj lurañama? 2) ¿Jehová Diosajj kunjam Diosasa, ukanakat kawkïris chuymamar purtʼtamjja?

19 Diosan amigopäñ munsta ukhajj ¿kunsa lurañama? Jesusajj sänwa: “Khitinakatï wiñay jakañ katoqapkani ukanakajja juma sapa cheqpach Diosar uñtʼasipkakiñapawa jumajj khitankta uka Jesucristorus ukhamarakiw uñtʼasipkakiñapa” sasa (Juan 17:3). Ukhamajj Jehová Diosampiru Jesucristompiru uñtʼañatakejj Bibliat yatjjataskakim, ukhamatwa jutïrin wiñay jakañ katoqasma. Jichhakamajja, “Diosajj munasiñawa” sasaw yateqtanjja (1 Juan 4:16). Ukampis Diosat yatjjatañajj jukʼampiw utjaski. Bibliarjamajja, Jehová Diosajj ‘khuyapayasiriwa, jan jankʼak colerasiriwa, wali munasiriwa, cheqarakiwa’ (Éxodo 34:6). ‘Suma Diosawa, juch pampachirirakiwa’ (Salmo 86:5). Paciencianiwa, jan jaytjasirirakiwa (2 Pedro 3:9; Apocalipsis 15:4). Jumatï Biblia liyiskakïta ukhajja, jukʼampiw Jehová Diosar uñtʼäta.

20-22. 1) Diosar janis uñjkstanjja, ¿kunjamatsa jupar jakʼachassna? 2) Bibliat jan yateqjjamti sapjjätam ukhajja, ¿kunsa luräta?

 20 Diosarojj janiw uñjksnati, ukhamajj ¿kunjamarak Jupar jakʼachassna? (Juan 1:18; 4:24; 1 Timoteo 1:17). Biblia liyisaw Jehová Diosar jukʼamp uñtʼsna, ukhamatwa Jupar jakʼachassna (Salmo 27:4; Romanos 1:20). Jehová Diosar jukʼat jukʼat sum uñtʼjjasajja, jupar wal munasïta, ukatsti jukʼampiw jupar jakʼachasirakïta.

Mä awkejj wawapar wal munasi, Jehová Diosajj ukat sipansa jukʼampiw munasistu.

21 Jehová Diosajj Awkisawa uksa amuyarakïtawa (Mateo 6:9). Jupaw jakañ churistu, ukatwa kusisit jakasiñas muni. Cheqas mä munasir awkejj ukwa wawanakapatakejj muni (Hechos 17:28). Biblianjja Jehová Diosan amigopäsmawa sasaw yatichi (Santiago 2:23). Taqe kun Luriri Jehová Diosajja, jupan amigopäsma ukwa muni, ukajj wali kusiskañawa.

22 Inas yaqhepanakajj Bibliat jan yateqjjamti sasin sapjjchïtam. Yaqha religionaruw sarjjani sasaw llakisipjjaspa. Ukhamäkchinisa, Bibliat yatjjataskakim, Jehová Diosat sipansa yaqha suma amigojj janiw utjkiti.

23, 24. 1) ¿Kunatsa jisktʼasiñamajj wakisi? 2) ¿Kuna toqetsa jutïr yatichäwin yatjjataskañäni?

23 Qalltanjja Bibliat yatjjatkasajj inas yaqhep cheqanak jan sum amuykchïtati. Ukhamäni ukhajja, jan ajjsarasaw jisktʼasiñama, jan ukajj yanaptʼa mayiñama. Jesusajj mä jiskʼa wawjam humildëpjjañamawa sasaw säna (Mateo 18:2-4). Wawanakajj wal jisktʼasiñ yatipjje. Jumajj ukhamarak jisktʼanakaman qhanañchäwip thaqasma ukwa Diosajj muni. Kuntï yateqkta ukajj cheqati janicha uk yatiñatakejja, wali amuyumpiw Bibliat yatjjatañama (Hechos 17:11 liytʼañataki).

24 Bibliat yatjjatasakiw Jehová Diosar uñtʼsna. Jutïr yatichäwinjja, kunatsa Bibliajj jan yaqha libronakjamäki ukwa yatjjatañäni.

^ Párrafo 15 Jehová sutejj inas Bibliaman jan uñstkchiti, jan ukajj inas kamsañsa uka sutejj muni, kunjamsa arsusispa uk yatiñ munsta. Ukhamächi ukhajja, 1 qhanañchäwi uñjjattʼäta.