Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 10 YATICHÄWI

¿Kunsa Bibliajj angelanakat yatichi?

¿Kunsa Bibliajj angelanakat yatichi?

1. ¿Kunatsa angelanakat yatiñajj wakisi?

JEHOVÁ DIOSAJJ familiapar uñtʼsna ukwa muni. Angelanakajj Diosan familiap taypinkapjjewa, ukatwa angelanakarojj ‘Diosan wawanakapa’ sasin Bibliajj yatichi (Génesis 6:2). ¿Kunsa angelanakajj lurapjje? ¿Kunjamsa jaqenakarojj nayra tiempon yanaptʼapjjäna? ¿Jiwasar yanaptʼistaspati? (8 qhanañchäwi uñjjattʼäta).

2. 1) ¿Khitis angelanakar luräna? 2) ¿Qhawqha angelanakas utji?

2 ¿Khitis angelanakar luräna? Colosenses 1:16 qellqatarjamajja, Jehová Diosajj Jesusaruw nayraqat luräna, ukjjarusti “kunatï alajjpachansa oraqensa utjki” ukanakwa lurarakïna, ukhaw angelanakas luratäpjjarakïna. ¿Qhawqha angelanakarus Diosajj lurpachäna? Bibliajja waranqa waranqa angelanakaw utji sasaw qhanañchi (Salmo 103:20; Apocalipsis 5:11).

3. ¿Kunsa Job 38:4-7 qellqatajj angelanakat yatichistu?

3 Aka oraq janïr lurkasajja, angelanakaruw Jehová Diosajj lurarakïna sasaw Bibliajj yatichi. Diosajj aka oraqe lurkäna ukhajja, ¿kunjamas angelanakajj jikjjatasipjjäna? Job librojja, angelanakajj wal kusisipjjäna sasaw sistu. Jupanakajj mä familiakiw Jehová Diosar mayachtʼat servipjjäna (Job 38:4-7).

ANGELANAKAJJ DIOSAN SERVIRINAKAPARUW YANAPTʼAPJJE

4. Angelanakajj jaqenakat llakisipjjatapjja, ¿kunjamatsa yattanjja?

4 Angelanakajj nayratpachaw jaqenakar yanaptʼapjjäna, Jehová Diosan aka oraqetaki amtap phoqasiñapatakisa,  jaqenakataki amtap phoqasiñapatakisa yanaptʼapjjarakïnwa (Proverbios 8:30, 31; 1 Pedro 1:11, 12). Adanampi Evampejj Dios contra saytʼasipkäna ukhajja, angelanakajj wal llakisipjjpachäna. Jichhürunakanjja ukhamarakiw Diosar jan istʼiri jaqenakar uñjasajj wal llakisipjjarakpacha. Ukampis maynejj taqe chuyma arrepentisisin Diosar kuttʼjje ukhajja, angelanakajj kusisipjjewa (Lucas 15:10). Jupanakajj Diosan servirinakapat wal llakisipjje, ukatwa Jehová Diosajj aka oraqenkir servirinakaparojj angelanakapampi  yanaptʼi (Hebreos 1:7, 14). Angelanakajj kunjamsa jaqenakar yanaptʼapjjäna uk jichhajj uñjañäni.

“Nayan Diosajjajj angelapwa khitani, juparakiw leonanakan lakapsa jistʼanti” (Daniel 6:22).

5. ¿Kunjamsa angelanakajj Diosan servirinakapar yanaptʼapjjäna?

5 Sodoma, Gomorra markanakajj tʼunjaskäna ukhajja, Jehová Diosajj pä angelanakaparuw Lot chachampiru familiapampiru salvapjjañapatakejj khitanïna (Génesis 19:15, 16). Walja maranak qhepatjja, Daniel profetajja leonanakatak utjkäna uka jachʼa pʼiyar jaqontataw uñjasïna. Ukampis leonanakajj janiw kunsa kamachapkänti, ‘Diosaw angelap khitanis leonanakan lakap jistʼantäna’ (Daniel 6:22). Apóstol Pedrojj carcelan jistʼantat uñjaskäna ukhajja, jupar irpsuñapatakejj mä angelapwa Diosajj khitanirakïna (Hechos 12:6-11). Jesusajj aka oraqenkkäna ukhajja, ukhamarakiw angelanakajj jupar yanaptʼapjjäna. Bautisaskäna uka qhepatjja, “angelanakaw jupar yanaptʼapjjäna” (Marcos 1:13). Janïr jiwayatäkäna ukhasa mä angelaw Jesusar “wal chʼamañchtʼarakïna” (Lucas 22:43).

6. 1) Angelanakajj Diosan servirinakapar yanaptʼapjjatap ¿kunjamatsa yattanjja? 2) ¿Kawkïr jisktʼanakatsa yatjjataskañäni?

6 Jichhürunakanjja, angelanakajj janiw jaqenakar uñstjjapjjeti. Ukampis Diosajj angelanakap toqejj servirinakapar yanaptʼaskakiwa. Bibliajj siwa: “Tatitun angelapaw iyawsirinakarojj uñjaski, [...] imaskaraki” sasa (Salmo 34:7). Wali chʼamani enemigonakasaw utji, jupanakajj jan walinakwa lurañ munistu. ¿Khitinakäpjjes jupanakajja? ¿Kunjamatsa utjapjje? ¿Kunjamsa jan waltʼayañ munapjjestu? Uka jisktʼanakar qhanañchañatakejja, Diosajj Adanampi Evampir janïr lurkäna ukhajj kunas pasäna uk yatjjatañäni.

JAN UÑJKAÑA ENEMIGONAKA

7. ¿Jaqenakan kun lurapjjañapsa Supayajj nayratpach munäna?

7 Mä angelajj jaqenakampi adorayasiñ jan ukajj yupaychayasiñ munasajja, Dios contraw saytʼasïna ukwa  3 yatichäwin yateqtanjja. Biblianjja uka angelarojj Diablo Supaya sasaw uñtʼasi (Apocalipsis 12:9). Jupajj Dios contra jaqenakajj saytʼasipjjaspa uk muni. Eva warmirojj engañjänwa, ukhat aksaruw waljanir engañjaski. Ukhamäkchisa Abel, Enoc, Noé chachanakasa, yaqhanakas janipuniw Jehová Diosat jitheqtapkänti (Hebreos 11:4, 5, 7).

8. 1) ¿Kunjamatsa yaqhep angelanakajj demonionakaru tukupjjäna? 2) ¿Kunsa demonionakajj Uma Juiciot qhespiñatakejj lurapjjäna?

8 Noé chachan tiempopanjja, yaqhep angelanakajj Dios contra saytʼasisajj jaqenakar tukusaw aka oraqer jutapjjäna. ¿Kunatsa? Biblianjja uka angelanakajj warminak munasaw saraqanipjjäna sasaw qhanañchi (Génesis 6:2 liytʼañataki). Ukham amtapjjatapajj janipuniw walïkänti (Judas 6). Uka tiempon jakir jaqenakajja, jan wali angelanakjamarakiw jan wali luririnaka, nuwasirinaka tukupjjäna. Ukatwa Jehová Diosajj uka jaqenakarojj Uma Juicio apayanis jiwarayañ amtäna, ukampis jupat jan jitheqtir servirinakaparojj salvänwa (Génesis 7:17, 23). Uma Juiciot qhespiyasiñatakejja, uka angelanakajj alajjpacharuw kuttʼapjjäna. Biblianjja uka jan wali angelanakarojj ‘demonionaka’ sasinwa uñtʼasi. Jupanakajj Supay toqetwa saytʼasipjjäna, ukhamatwa Supayajj jupanakan pʼeqtʼiripar tuküna (Mateo 9:34).

9. 1) Demonionakajj alajjpachar kuttʼapkäna ukhajja, ¿kunas pasäna? 2) ¿Kuna toqetsa yatjjataskañäni?

9 Jehová Diosajja, jupa contra saytʼasipjjatap laykojj janiw demonionakarojj familiap taypir katoqjjänti (2 Pedro 2:4). Jupanakajja janiw jichhajj jaqer tukjjapjjaspati, ukampis aka ‘oraqen jakirinakar engañjasipkakiwa’ (Apocalipsis 12:9; 1 Juan 5:19). Demonionakajj kunjamsa jaqenakar engañjapjje uk jichhajj yatjjatañäni (2 Corintios 2:11 liytʼañataki).

 ¿KUNJAMSA DEMONIONAKAJJ JAQER ENGAÑJI?

10. ¿Kunjamsa demonionakajj jaqenakar engañjapjje?

10 Demonionakajj kunaymanit jaqenakar engañjapjje. Yaqhepajj jupanak pachpaw demonionakamp parlapjje, jan ukajj yatirinaka, layqanaka, chʼamakaninak toqew parlapjjaraki. Ukaruw espiritismo sasin uñtʼasi. Bibliajj janipun demonionakamp parlapjjamti sasaw ewjjtʼistu (Gálatas 5:19-21). ¿Kunatsa ukanakat amuyasiñasa? Kunjamtï mä jaqejj animalanak katuñatakejj trampanak wakichkejja, ukhamarakiw demonionakajj jaqenakar engañjañatakisa munañaparjam apnaqañatakis trampanak wakichapjje, ukatwa amuyasiñasa (26 qhanañchäwi uñjjattʼäta).

11. 1) ¿Kunsa yatirinakajj lurapjje? 2) ¿Kunatsa ukanak jan lurañasäki?

11 Demonionakajj yatirinak toqew jaqenakar engañjapjje, jupanakajj demonionakan chʼamapampiw jutïr urunakatsa, kunatï jan uñtʼatäki ukanakatsa yatipjje. Akanak lurasaw jutïrit yatipjje: wara waranak uñchʼukisa, cartanak uñasa, bola de cristal uñasa, amparanak uñasa, coca uñasa, samkanakar creyisa. Yaqhep jaqenakajja, ukanakajj janis kuna jan walïkaspa ukham amuyapjje, ukampis janiw ukhamäkiti, jan waltʼayistaspawa. Biblianjja demonionakampi yatirinakampejj juntukiw trabajapjje sasaw sistu. Hechos 16:16-18 qellqatanjja, “yatiri mä demonion” mantat tawaqotwa parli, uka tawaqojj “kunatï jutïrin paskani” ukanakwa demonion yanaptʼapampejj yatïna. Qhepatjja apóstol Pablojj demoniorojj uka tawaqot alissünwa, ukatjja tawaqojj janiw jutïrit kunsa yatjjänti.

12. 1) ¿Kunatsa jiwatanakampi parlañajj jan walïki? 2) ¿Kunatsa Diosan servirinakapajj jan wali costumbrenak jan lurapjjañapäki?

12 Jiwatanakajj yaqha cheqanwa jakasipki, jupanakampejj parlsnawa, jan walinaksa lurapjjestaspawa sasaw demonionakajj jaqenakar engañjapjje. Amuytʼañataki, mä munat familiapan jiwipansa, jan ukajj mä amigopa jiwipansa inas maynejj mä chʼamakaniru jisktʼasir sarañ  munchispa. Uka chʼamakanejja, jiwatampejj parlsnawa sasaw saspa. Jiwatatsa musparkañanak parlaspa, jan ukajj jiwatajj kunjamtï parlasirïkäna ukhamwa parlarakispa (1 Samuel 28:3-19). Jiwatanakar imañatakejj walja costumbrenakaw utji. ¿Kunatsa jaqenakajj uka costumbrenak lurapjje? Jiwatanakajj yaqha cheqansa jakasipkaspa ukhamwa amuyapjje. Ukatwa mara jiwatap misayapjje, ofrendanak churapjje, chʼiyärat isisipjje, jan ukajj yaqha ukham costumbrenak lurapjje. Cristianonakajj uka costumbrenak jan lurapki ukhajja, familiaranakapasa markapankir jaqenakasa jan walitwa uñjapjje, sawkasipjjewa, janiw jupanakamp parlañsa munjjapjjeti. Ukampis jiwatanakajj janiw yaqha cheqan jakapkiti, janirakiw jupanakampejj parlksnati, ni kuna jan walsa lurapkistaspati, cristianonakajj uk sum yatipjje (Salmo 115:17). Ukhamasti jumajj janipuniw jiwatanakampejja, jan ukajj demonionakampejj parlañamäkiti ni jan wali costumbrenaksa lurañamäkiti, ukanakat amuyasiñamawa (Deuteronomio 18:10, 11 liytʼañataki; Isaías 8:19).

13. ¿Kunjamas demonionakar ajjsarapkäna uka jaqenakajj jakasjjapjje?

13 Demonionakajj kunaymanitwa jaqenakar engañjapjje, janiw ukakïkiti wal ajjsarayapjjaraki. Supayampi demonionakapampejj ‘jukʼa tiemponikïpjjatap yatisipjjewa’. Diosajj niyaw jupanakar aka oraqet chhaqtayjjani, ukatwa jukʼamp jan walinaksa, tʼaqesiñanaksa utjayapjje (Apocalipsis 12:12, 17). Diosar jan uñtʼasajja, nayrajj waljaniw demonionakar ajjsaras jakapjjäna, ukampis jichhajj janiw ajjsarjjapjjeti. ¿Kunatsa?

DEMONIONAK CONTRA SAYTʼASIPJJAÑÄNI

14. Nayrïr cristianonakat yateqasisajja, ¿kunsa demonionak contra saytʼañatakejj lurañasa?

14 Biblianjja demonionak contra saytʼasipjjam, jupanakat jitheqtapjjarakim sasaw sistu. Éfeso markankir yaqhep  jaqenakat parltʼañäni, jupanakajj Diosar janïr uñtʼkasajj demonionakampiw parlapjjerïna. ¿Kunjamsa jupanakajj demonionakat jitheqtapjjäna? Biblianjja siwa: “Khitinakatï magianak lurirïpkäna ukanakatjja, waljaniw libronakap mayar apthapisajj taqe jaqenak nayraqatan phichantapjjäna” sasa (Hechos 19:19). Jupanakajj cristianöñwa munapjjäna, ukatwa magia toqet parlir libronakap qʼal phichantapjjäna. Jichhürunakanjja ukham lurañaw wakisiraki. Khitinakatï Jehová Diosar serviñ munapki ukanakajja, taqe kunanakatï magiampi demonionakampi mayachatäki ukanak apanukupjjañapawa. Ukanakajj libronaka, revistanaka, horoscoponaka, peliculanaka, musicanaka, anatañanaka, cuadronaka, ukanakäspawa. Ukanakajj janis kuna jan walsa lurkistaspa ukhamäspawa, ukampis janiw ukhamäkiti. Maysa toqetjja, kunanaktï jaqenakajj jan walinakat jarkʼaqasiñatak apnaqapki ukanaksa apanukupjjañaparakiwa (1 Corintios 10:21).

15. ¿Kunsa Supay contra demonionakap contra saytʼasiñatak lurañasa?

15 Efesonkirinakajj magia libronakap phichantapkchïnsa, akham sasaw Pablojj mä qhawqha maranak qhepat jupanakar säna: ‘Alajjpachankir demonionakampejj nuwasiskakiñasawa’ sasa (Efesios 6:12). Libronakap qʼalsa phichantapkchïnjja, demonionakajj jupanakar jan walinak lurañ munasipkakïnwa. Ukhamajj ¿kunanakampsa lurapjjañapäna? Pablojj saskakïnwa: “Diosar confiyapjjatamajj mä jachʼa escudor uñtasitäpan, ukampiw Supayan aqkir flechanakap jiwarayapjjäta” sasa (Efesios 6:16). Kunjamtï mä soldadorojj escudojj guerran jarkʼaqkejja, ukhamarakiw Diosar confiyañajj jarkʼaqestaspa. Ukhamasti Jehová Diosaw jarkʼaqetani sasin confiyañäni, ukhamatwa Supay contra demonionakap contra saytʼasiñäni (Mateo 17:20).

16. ¿Kunas Jehová Diosar confiyañatakejj yanaptʼistaspa?

16 ¿Kunas Jehová Diosar confiyañatakejj yanaptʼistaspa?  Sapüruw Biblia liyiñasa, Jehová Diosaw jarkʼaqetani sasaw confiyañasaraki. Jiwasatï Jehová Diosar taqe chuyma confiyañäni ukhajja, Supayasa demonionakapasa janiw kuna jan walinaksa lurapkistaniti (1 Juan 5:5).

17. ¿Kunas demonionakat jarkʼaqarakistaspa?

17 ¿Kunsa efesonkir cristianonakajj lurapjjañaparakïna? Jupanakajja demonionakampi parlir jaqenak taypin jakapjjäna. Ukatwa Pablojj uka cristianonakar akham säna: “Taqe horasansa, Diosarojj [...] mayisisipkakim” sasa (Efesios 6:18). Uka cristianonakajj taqe horasanwa Diosarojj yanap mayisipjjañapäna. Jiwasajj jupanakjamarakiw demonionakampi layqasiñanakampi phoqantat pachan jaktanjja. Ukatwa jarkʼaqatäñatakejj Jehová Diosar sutip aytasin mayisiñasa (Proverbios 18:10 liytʼañataki). Jehová Diosarutï Supayat jarkʼaqeta sasin mayisiskakiñäni ukhajja, jupajj istʼistaniwa (Salmo 145:19; Mateo 6:13).

18, 19. 1) ¿Kunjamsa Supayarusa demonionakaparus atipjsna? 2) ¿Kuna jisktʼarus jutïr yatichäwin qhanañchaskañäni?

18 Taqe kunanakatï demonionakampi mayachtʼatäki ukanakjja qʼalwa apanukuñasa. Jehová Diosaw jarkʼaqetani sasaw confiyañasaraki. Ukhamatwa Supay contrasa demonionakap contrasa saytʼasiñäni. Janiw Supayarusa demonionakaparus ajjsarañasäkiti (Santiago 4:7, 8 liytʼañataki). Jehová Diosajj demonionakat sipansa jukʼamp chʼamaniwa. Jupajj Noé chachan tiempopanjja demonionakarojj castigänwa, jutïrinsti jupanakarojj chhaqtayjjaniwa (Judas 6). Amtapuniñäni, janiw sapäktanti, Diosajj angelanakapampiw jarkʼaqestu (2 Reyes 6:15-17). Diosan yanaptʼapampejj Supayarusa demonionakaparus atipjañäniwa (1 Pedro 5:6, 7; 2 Pedro 2:9).

19 Supayasa demonionakapasa, kunayman tʼaqesiñanak utjayapjje. ¿Kunatsa Diosajj jupanakar jan tukjkpacha? Jutïr yatichäwinwa uka toqet yatjjatañäni.