Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 9 YATICHÄWI

¿Niyat akapachajj tukuspachäni?

¿Niyat akapachajj tukuspachäni?

1. ¿Kunas jutïrin pasani ukjja kunjamatsa yatsna?

JAN wali noticianak televisionan uñtasasa jan ukajj radion istʼasasa, inas akham jisktʼasirïsta: “¿Jan walinakajj jukʼampit jiljjattpachäni?” sasa. Jan walinakasa tʼaqesiñanakasa taqe cheqanwa uñjasi, ukatwa yaqhepajj akapachajj niyaw tukusjjani sasin sapjje. ¿Ukajj cheqäpachati? ¿Kunas jutïrin pasani uk yatsnati? Jïsa. Ukampis janiw jiwasajj kunas jutïrin pasani uk sisksnati, Jehová Diosakiw ukjja saspa. Jupajj Biblia toqew kunjamsa jutïrin jakasiñäni, aka oraqejj kunjamäjjanisa uk qhanañchistu (Isaías 46:10; Santiago 4:14).

2, 3. 1) ¿Kunsa Jesusan discipulonakapajj yatiñ munapjjäna? 2) ¿Jesusajj jupanakar kamsänsa?

2 Akapachan tukusiñapat Biblian parlki ukhajja, janiw aka oraqen chhaqtayasiñapat parlkiti, jan ukasti jan walinakan tukusiñapatwa parlaski. Jesusajja, Diosan Reinopaw aka oraqe apnaqani sasaw jaqenakar yatichäna (Lucas 4:43). Jesusan discipulonakapajja, Diosan Reinopajj kunapachas jutani uk yatiñwa munapjjäna, ukatwa Jesusar akham jisktʼapjjäna: “Sapjjetaya: ¿kunapachas ukanakajj phoqasini, jumajj kuttʼankäta uka tiemposa akapachajj niya tukusiñampïskani ukhasa kuna señalas utjani?” sasa (Mateo 24:3). Kuna urünisa uk janiw Jesusajj discipulonakapar siskänti, jan ukasti kunanakas akapachan tukusiñap jakʼajj pasani ukanakwa sum qhanañchäna. Jesusajj kuntï siskäna ukanakajj jichhürunakanwa phoqasiski (24 qhanañchäwi uñjjattʼäta).

 3 Aka yatichäwinjja, kunanakas akapachan tukusiñapajj wali jakʼankatap uñachtʼayistu uka toqetwa yatjjatañäni. Janïr uka toqet yatjjatkasajja, alajjpachan mä guerrajj utjkäna uka toqet yatjjatañaw wakisi, ukaw kunatsa jan walinakajj utji uk amuyañatak yanaptʼistani.

MÄ GUERRAW ALAJJPACHAN UTJÄNA

4, 5. 1) Jesusajj Reyit uttʼayatäkäna ukhajj ¿kunas alajjpachan pasäna? 2) Apocalipsis 12:12 qellqatarjamajj ¿kunas aka oraqen pasañapäna?

4 Jesusajj 1914 maranwa Reyit uttʼayatäna sasaw 8 yatichäwin yateqtanjja (Daniel 7:13, 14). Kunas alajjpachan pasäna ukjja, akham sasaw Apocalipsis librojj qhanañchi: “Alajjpachanjja mä guerraw sartarakïna: Miguelampi [mä arunjja, Jesusampi] angelanakapampejj dragonampiw [mä arunjja, Supayampiw] nuwasipjjäna, dragonampi angelanakapampisti jupanakampiw nuwasipjjarakïna” sasa. * Supayampi demonionakapampejj atipjataw uñjasipjjäna, aka oraqer jaqoqanitäpjjarakïnwa. ¡Angelanakajj walpun kusisipjjpachäna! Ukampis ¿kunas aka oraqen pasañapäna? Biblianjja, jaqenakajj kunayman jan walinakanwa uñjasipjjani sasaw qhanañchi. “Diablojj jukʼa tiemponikïtap yatisajja” wali coleratawa (Apocalipsis 12:7, 9, 12).

5 Diablojj kunayman jan walinak aka oraqen utjayi. Jupajj jan walinak lurañatakejj jukʼa tiemponikëjjatap yatisajja wali coleratawa. Jichhajja, Jesusan arunakaparjamajj kunanakas qhepa urunakan pasañapäna uka toqetwa yatjjatañäni.

QHEPA URUNAKA

6, 7. Guerranakasa manqʼat pistʼañanakasa, ¿kunjamsa Jesusan aruparjamajj jichhürunakan phoqasiski?

6 Guerranaka. Jesusasti sänwa: “Mä jachʼa markajj  yaqha jachʼa marka contraw sartani” sasa (Mateo 24:7). Nayra maranakat sipansa, jichha tiemponwa jukʼamp jaqenakajj guerran jiwapjje. Kunanakatï oraqpachan paski uk yatjjatir mä organizacionajja, 1914 marat aksarojj 100 millón jaqenakaw guerran jiwapjje sasaw qhanañchi. 1800 maranakat sipansa, 1900 marat 2000 marakamaw guerranakan jukʼamp jiwapjjäna. Uka guerranak utjatapatjja walja millón millón jaqenakaw llakita, tʼaqesita uñjasipjjäna.

7 Manqʼat pistʼañanaka. Jesusajj sänwa: ‘Manqʼat pistʼañanakaw utjani’ sasa (Mateo 24:7). Walja manqʼañanakas utjkchejja, waljaniw manqʼat pistʼata uñjasipjje. ¿Kunatsa ukhaman uñjasipjje? Waljaniw manqʼa alasiñatakejj jan qollqenïpkiti, janirakiw yapuchañatakis oraqenïpkiti. Walja jaqenakarakiw jukʼa qollqempik sapüru jakasipjje. Organización Mundial de la Salud institucionajja, walja millón millón wawanakaw manqʼatjam sapa marajj jiwapjje sasaw qhanañchi.

8, 9. 1) ¿Kunjamsa terremotonakajj Jesusan aruparjamajj phoqasiski? 2) ¿Usunakat kamsaraksnasa?

8 Terremotonaka. Jesusajj “jachʼa  terremotonakaw utjarakini” sasaw säna (Lucas 21:11). Sapa maraw jachʼa terremotonakajj utji. 1900 marat aksarojja, pä millonatsa jukʼampi jaqenakaw terremotonakan jiwapjje. Terremotonakajj utjaniti janicha uk yatiñatakejj kunayman aparatonakas utjkchejja, jaqenakajj jiwarasipkakiwa.

9 Usunaka. Jesusajja, ‘usunakaw’ utjani sasaw sarakïna (Lucas 21:11). Walja usunakatakiw doctoranakajj qolla jikjjatapjje, ukampis yaqhep usunakatakejj janiw qollajj utjkiti. Sapa marajja, walja jaqenakaw cáncer, tuberculosis ukhamarak yaqha ukham usunakamp jiwapjje. Doctoranakajj 30 jan wali usunakampiw utji sapjjarakiwa, uka usunakat yaqhepajja janiw qollanïkiti.

¿KUNJAMÄPJJANIS JAQENAKAJJ QHEPA URUNAKANJJA?

10. ¿Kunjamas 2 Timoteo 3:1-5 qellqatajj jichhürun phoqasiski?

10 Biblianjja 2 Timoteo 3:1-5 qellqatajja akham qhanañchi: “Yatiñamarakiwa, qhepa urunakanjja chʼama tukuña jan wali tiemponakaw utjani” sasa. Apóstol Pablojja,  jaqenakajj qhepa urunakan kunjamäpjjanisa ukwa qhanañchäna. Jaqenakajj akhamäpjjaniwa sänwa:

  • Jupanak pachpa munasirinaka.

  • Qollqe añcha munirinaka.

  • Awk taykaparus jan istʼirinaka.

  • Jaqe masipar jaytanukurinaka.

  • Familiapar jan munasirinaka.

  • Munañapampi apnaqayasirinaka.

  • Qhorunaka, nuwasirinaka.

  • Diosar munasiñat sipansa munañapak thaqerinaka.

  • Dios chuymäpkaspas ukham tukurinaka, janirak ukarjam sarnaqerinaka.

11. Salmo 92:7 qellqatarjamajja, ¿kunas jan walinak lurir jaqenakampejj pasani?

11 ¿Kawkjantï jakaskta uka cheqanjja jaqenakajj ukhamäpjjeti? Jaqenakajj oraqpachanwa ukhamäpjje. Diosajj niyaw uk askichani. Jupajj akham sistuwa: “Jucharar jaqenakajj qorjamas alintasipkpan, ñanqha [jan ukajj jan walinak] luririnakajj panqarasipkpansa, jupanakajj wiñayatak tukjatäpjjaniwa” sasa (Salmo 92:7).

 SUMA YATIYÄWINAKAW QHEPA URUNAKAN YATIYASI

12, 13. ¿Kunsa Jehová Diosajj aka qhepa urunakan yatichistu?

12 Qhepa urunakanjja, jan walinakasa tʼaqesiñanakasa waliw utjani sasaw Biblian qhanañchi. Ukatjja, kuna sumanakas pasani uksa qhanañcharakiwa.

“Reinon aka suma yatiyäwinakapajja aka oraqpachanwa yatiyasini” (Mateo 24:14).

13 Biblia sum amuyaña. Qhepa urunakanjja, kunatï cheqäki ukjja ‘khitinakatï yatiñanïpki uka jaqenakakiw amuyapjjani’ sasaw Daniel profetajj qellqäna (Daniel 12:9, 10). Diosaw markaparojj Biblia sum amuyapjjañapatakejj yanaptʼi. 1914 marat aksaruw ukham yanaptʼaski. Sañäni, kunatsa Diosan sutip yatiñajj wakiskirejja, kuna amtanis Diosajj aka oraqetakejja, kunatsa Jesusajj jaqenakar juchat kutsuyañatakejj jiwawayi, kunas jiwjjtan ukhajj pasi, jiwatanakampejj kunas jutïrin pasani, uka toqenakat sum amuytʼañatakiw yanaptʼistu. Maysa toqetjja, kunjamsa Diosan Reinopajj jan walinak chhaqtayani, kunjamatsa kusisita jakassna, kunjamsa Diosatakjam sarnaqksna ukanaksa yateqaraktanwa. Taqe ukanak yateqasajja, ¿kunsa Diosan servirinakapajj lurapjje? Yaqha profeciaw uk sum qhanañchistu (21, 25 qhanañchäwinak uñjjattʼäta).

14. ¿Kunjamsa Diosan Reinopat suma yatiyäwinakajj yatiyasiski, khitinakas yatiyasipki?

14 Suma yatiyäwinakajj oraqpachan yatiyasiski. Qhepa urunakat parlkasajja Jesusajj akham sarakïnwa: “Reinon aka suma yatiyäwinakapajja aka oraqpachanwa yatiyasini” sasa (Mateo 24:3, 14). Diosan Reinopat suma yatiyäwinakajja, 700 arunakatsa jukʼamp jila arunakatwa 230 jila markanakan yatiyasiski. Jehová Diosan Testigonakapajj oraqpachanwa kunas Diosan Reinopajja, kunsa uka Reinojj lurani uka toqenakat yatiyasipki, jupanakajj ‘kunayman kasta jaqenaka, kunayman aru parlirinakäpjjewa’ (Apocalipsis 7:9). Jan kun mayisakiw Bibliat  yatichapjje. Kunjamtï Jesusajj mä profecian siskänjja, walja jaqenakan uñisitpachasa, arknaqatpachasa janipuniw khitis jupanakar jarkʼkiti (Lucas 21:17).

¿KUNSA JUMAJJ LURÄTA?

15. 1) ¿Kunatsa qhepa urunakanwa jakasktanjja sissna? 2) ¿Kunas Diosar istʼiri jaqenakampejj pasani, kunas Diosar jan istʼiri jaqenakampejj pasarakini?

15 ¿Qhepa urunakanwa jakasktanjja sasmati? Biblian walja profecianakapaw phoqasiski. Suma yatiyäwinakajj janiw yatiyasjjaniti sasajja niyaw Jehová Diosajj sani, “ukjjaruw akapachan tukusiñapajj jutani” (Mateo 24:14). Bibliajj akapachan tukusiñapat parlki ukhajja, Armagedón guerratwa parlaski, ukanwa Diosajj taqe jan walinak chhaqtayani. Jehová Diosajj juparu, Yoqaparu jan istʼañ munirinakarojj Jesusampi wali chʼamani angelanakapampiw tʼunjani (2 Tesalonicenses 1:6-9). Supayasa, demonionakapasa janiw mayampis jaqenakar engañjjapjjaniti. Taqe khitinakatï Diosar istʼapkani, Reinopampi apnaqayasiñ munapkani ukanakajja, Jehová Diosan arsutanakap phoqasirwa uñjapjjani (Apocalipsis 20:1-3; 21:3-5).

16. Akapachan tukusiñapajj jakʼankjjatap amuyasajj ¿kunsa lurañama?

16 Supayan apnaqat akapachajj niyaw tukusjjani. Ukatwa akham jisktʼasiñasa: “¿Kun lurañajas wakisi?” sasa. Jehová Diosajja, Bibliat jukʼamp yatjjatasma ukwa muni, ukhamajj Bibliat jukʼamp yatjjatañatak chʼamachasim (Juan 17:3). Jehová Diosan Testigonakapajj sapa semanaw tantachasipjje, ukhamatwa Bibliat sum amuyapjjañapatakejj jaqenakar yanaptʼapjje. Uka tantachäwinakar jan faltasis sarañatak chʼamachasim (Hebreos 10:24, 25 liytʼañataki). Bibliat yateqkasajja inas jan walinak jaytañam wakisitap amuychïta, ukhamäni ukhajj ukanak jaytañatak chʼamachasim. Uka jan walinak jaytjjäta ukhajja, Jehová Diosaruw jukʼampi jakʼachasïta (Santiago 4:8).

17. ¿Kunjamsa akapachan tukusiñapajj walja jaqenakar katjani?

 17 Jan walinak lurir jaqenakajj tʼunjatäpkani uka urojja, “kunjamtï mä lunthatajj arum jutkejja”, ukhamarakiw jan suyata horasar purinini sasaw apóstol Pablojj säna (1 Tesalonicenses 5:2). Qhepa urunakan jakasipkatap amuyapkchisa, waljanejj janiw yäqapkiti. Jesusasti sänwa: “Kunjamäkäntï Noé chachan urunakapanjja, ukhamarakïniw jaqen Yoqapajj kuttʼankani uka tiempojja. Janïr Uma Juiciojj purinkäna uka urunakanjja, jaqenakajj manqʼañanakana umañanakana sarnaqasipkäna, chachanakas casarasisipkänwa, ukhamarakiw warminakas casarasipjjañapataki churatäsipkäna, Noé chachajj arcar mantjjäna uka urkama. Ukampis jupanakajj janiw yäqapkänti, kunapachatï Uma Juiciojj purinisin taqenir apasjjäna ukhakama. Jaqen Yoqapajj kuttʼanjjani uka tiempojj ukhamarakïniwa” sasa (Mateo 24:37-39).

18. ¿Kamsasas Jesusajj ewjjtʼistu?

18 Jesusajj akham ewjjtʼistu: “Janipun chuymanakamajj jiljas manqʼañanakampi, jiljas umañanakampi, jakañjjat llakisiñanakamp phoqantatäpanti” sasa. Akapachan tukusiñapajj “mä sipitar” uñtataw akatjamat jutani sarakïnwa. Ukatsti saskakïnwa: “Oraqpachan jakir taqe jaqenakjjaruw uka urojj jutani. Ukhamasti jumanakajj amuyasipjjapunim, Diosar taqe chuym mayisiñsa janirak jaytapjjamti, ukhamat taqe kunanakatï pasañapäki ukanakat escapapjjañamataki ukhamarak jaqen Yoqapan nayraqatapan saytʼatäpjjañamataki” sasa (Lucas 21:34-36). ¿Kunatsa Jesusan uka ewjjanakapar istʼañasa? Niyaw Supayan apnaqat akapachajj tʼunjatäni. Akapachajj tukuskani ukhajja, khitinakarutï Jehová Diosasa Jesusas suma jaqenakat uñjapki ukanakakiw salvasipjjani, machaq mundonsa wiñayatak jakasipjjarakini (Juan 3:16; 2 Pedro 3:13).

^ Párrafo 4 Jesucriston yaqha sutipajj Miguel satawa. Uka toqet jukʼamp yatiñatakejja 23 qhanañchäwi uñjjattʼäta.