Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

JUK’AMPI YATXATAÑATAKI

Santa Cena: Diosar jach’añchir amtäwi

Santa Cena: Diosar jach’añchir amtäwi

CRISTIANONAKAXA Jesucriston jiwäwipa amtapxäta satäpxiwa, ukasti “Santa Cena” satarakiwa (1 Corintios 11:20). Uk amtañaxa, ¿kunatsa wali wakisirixa? ¿Kunapachasa amtasiñapa? Ukatxa, ¿kunjam amtasiñapasa?

33 j.p. maranwa judionakax Pascua amtasipkäna, uka arumaw Jesucristox uka cena utt’ayatayna. Pascua fiestxa maran mä kutikwa amtapxirïna, nisán (judionakan calendariopa) phaxsita 14 urunak saraqataru. Judionakaxa uka uru tantiyañatakixa suyapxirïnwa panqarir phaxsinakana kunapachatï urumpi arumampixa chik chikaru jaljaski uka uru. Uka uru jak’ankiri wawa phaxsitwa, nisán phaxsix jakhusiñ qalltäna. Pascua uruxa 14 urunak nisán phaxsita saraqataruw wakt’irïna, Inti jalantxaru.

Uka arumawa, Jesusax apostolanakapampi Pascua amtapxatayna. Judas Iscariote chacharu khitanukxasawa Jesusax Santa Cena utt’ayäna. Judionakan Pascuap lantiwa uka cenax uñstayatäxäna, ukatwa maran mä kuti amtasiñapäna.

Kunanakas lurasitayna, uka tuqitxa Mateow akham sasa qillqatayna: “Jesusax t’ant’a irtasinwa yuspagaräna. Pachjasinsti discipulonakaparurakiw churäna: ‘Manq’apxam; akax nayan janchixawa’ sasa. Ukxarusti mä copa astaraki. Diosar yuspagarasinsti jupanakaruw churaraki, akham sasa: ‘Jumanakasti taqini aka copat umt’apxarakim. Akasti nayan wilaxarakiwa. Ukasti [machaq] arust’äwiwa, kawkïritix wartatäkani walja jaqinakar juchanakapata qhispiyañataki’” sasa (Mateo 26:26-28).

Chiqapuniw Jesusax t’ant’xa jañchiparu tukuyän ukat vinsa wilaptayäna sasaw yaqhipanakax sapxi. Ukampisa, Jesusan jañchipax janiw kuna kamacht’atäkänsa kunapachatix t’ant’a churkän ukhaxa. Ukhamasti, ¿chiqapuniw apostolanakax Jesusan jañchipsa wilapsa manq’apxän sisnati? Janiwa, ukax jaqir manq’antañamp sasispawa, ukax wali jach’a juchawa, Diosan kamachipa p’akintañawa (Génesis 9:3, 4; Levítico 17:10). Lucas 22:20 jisk’a t’aqansti Jesusax sänwa: “Aka copax machaq arust’äwiwa wilax tuqi, akasti jumanakan askimatakiw wartasi” sasa. ¿Chiqapuniti uka copax ‘machaq arust’äwiru’ tuküna? Janiwa, mä arust’äwixa mä amtäwiwa, janiw uñjksnati.

T’ant’ampi vinompi

Ukhamax t’ant’as vinosa ak amuyañatakiwa: t’ant’axa Criston jan juchani jañchip sañ muni. Jesusax Pascuat jilt’ir jan levaduran t’ant’a irtäna (Éxodo 12:8). Biblianxa levadurax juchampi, jan wali luräwinakampi sasiwa. Ukhamax Jesusax jan juchan cuerpopwa luqtäna, ukwa t’ant’ax sañ munäna (Mateo 16:11, 12; 1 Corintios 5:6, 7; 1 Pedro 2: 22; 1 Juan 2: 1, 2).

Vinosti Jesusan wilap sañ muni, ukampiw machaq arust’äwixa utt’ayasïna. Jesusaxa “jaqinakar juchanakapata qhispiyañataki[wa]” wilaj wartasïxa sasaw satayna. Ukhamïpanwa, yaqhip jaqinakaxa Jehová Diosan nayraqatapanxa q’umäpxi, ukhamaraki Diosampis machaq arust’äwirux mantapxi (Hebreos 9:14; 10:16, 17). Uka arust’äwi utjatapatwa 144.000 jaqinakaxa alaxpacharu sarapxi. Ukanxa apnaqirinakäpxaniwa ukat sacerdotenakjam luqtirïpxarakiniwa, taqi jaqinakan askipataki (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Khitinakas Criston jiwatapat sapa mara amtaski uka tantachäwinxa t’ant’a manq’apxaspa ukat vinsa umt’apxaspaxa? Kunjamtï yatiqktanxa, khitinakatix machaq arust’äwir mantapki, mä arunxa, alaxpacharu sarapkani ukanakakiw t’ant’a manq’apxaspa ukat vinsa umt’apxaspa. Diosan qullan ajayupaw alaxpachan apnaqirinakjam ajllitätapxa jupanakaru sum qhanañchi (Romanos 8:16). Uka jaqinakaxa Jesusamp chika Apnaqañatakiwa mä arust’äwiru mantapxi (Lucas 22:29).

Ukhamasti, ¿khitinakatix kusipach Uraqin jakasipkani ukanakax kuns lurapxi? Kunjamtï, Jesusax siskänxa, Santa Cenaruw sarapxi, janis vino umapkchisa t’ant’a manq’apkchisa ukar sarasax respetwa uñacht’ayapxi. Jehová Diosan Qhanañchirinakapax sapa maraw Santa Cena amtapxi, inti jalantxaru, uka jayp’utwa nisán phaxsin 14 urupax qallti. Uraqpachanxa mä qhawqhanikiw alaxpachar saririnakaxa, ukampisa uka amtäwix wali wakisiriw Jesusan taqi arkirinakapatakixa. Jehová Diosampi Jesucristompixa walpunwa munasipxistu, uka tuqita lup’iñ urasawa ukapachaxa (Juan 3:16).

← Juk’ampi yatxatañataki