Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

JUK’AMPI YATXATAÑATAKI

¿Diciembre phaxsinti Jesusax yurpachäna?

¿Diciembre phaxsinti Jesusax yurpachäna?

KUNAPACHASA Jesusax yuritayna uka tuqitxa janiw Bibliax sum qhanañchkiti. Ukampisa diciembre phaxsina janiw yurkataynati sañatakixa, Bibliaw sum amuyt’ayistu.

Jesusax yurkäna uka Belén markanxa, ¿kunjam tiemposa diciembre phaxsixa? Judionakan calendariopanxa kislev sat phaxsiw utji, jiwasanakatakixa noviembre ukat diciembre phaxsinakaspawa, ukapachasti wali thayawa ukhamaraki jallusa wal purinti uksa tuqinakanxa. Ukatsti tebet phaxsiw utjaraki, ukasti jiwasanakatakix diciembre ukat enero phaxsinakarakïspawa, ukapachasti sinti thayapuniwa ukat awisax patanakanxa qhunuw qhununti uksa tuqinakanxa. Bibliax kamsis uk uñjañäni.

Kislev phaxsixa wali thayänwa ukhamaraki jallus walrak purintäna sasaw Biblia qillqiri Esdrasax qhanañchi. “Llätunka [kislev] phaxsita pä tunka urunaka saraqataru[xa]” Jerusalén markaruw waljani tantachasipxatayna ukat jupanakasti wali ‘khathatt’apxäna jallun purintatap layku’. Ukatxa, uka jaqinakax uka tiempotxa akham sapxänwa siw Esdrasaxa: “Ukhamarus jallux puriskarakiwa; ukhamarus janirakiwa callerux qhiparapkiristti” sasa (Esdras 10:9, 13; Jeremías 36:22). Ukhamasti, amuyatatxa diciembre phaxsi jak’achasinxipanxa, awatirinakaxa uwijanakap anthapisxapxpachänwa, arumanakaxa jan anqankapxañapataki.

Awatirinakaw uwijanakap awatisipki

Jesusax yurkatayna ukapachaxa, uwij awatirinakaxa pampanwa arumanakax uwijanakap uñjasipkäna

Ukampisa, Jesusax yurkatayna uka arumaxa uwij awatirinakax pampanakanwa uwijanakap uñjasipkäna siw Bibliaxa. Ukhamawa, qillqiri Lucasax sarakiwa: “Belén jak’ansti awatirinakaw utjäna, jupanakasti pampan arumax ovejanakap uñjasipkäna” sasa (Lucas 2:8-12). Janiw urukix awatipkänti, jan ukasti pampan jakasipxirïna. Uwijanakapax pampankänwa arumanakaxa. Diciembre phaxsix wali thayächïnxaya ukhamaraki jallus walxay purintarakchïnxa, ¿ukhamasti arumanakax diciembre phaxsinxa pampankapxaspänti awatirinakaxa? Janiwa. Ukatwa, kunapachatï Jesusax yuritayna ukapachax janiw diciembre phaxsïnkkänti, yurïwipax kunjam tiemponkänsa ukwa ukax sum qhanañchi.*

Diosan Arupaxa qhanwa sixa Jesusax kuna urusa jiwatayna uka tuqitxa, ukampisa yuriw urupatxa janiw sum qhanañchkiti. Ukasti Salomón reyin arunakapwa amtayistu: “Naciña uruta sipansa, jiwaña uruwa juk’amp askixa” (Eclesiastés 7:1). Kunatsa Biblianxa Jesusan yurïw urupat jan qillqatäki, ukampisa sarnaqäwipampita jiwäwipampita walja qillqatanakaw utjaraki, ukwa uka qillqatax qhanañchistu.


*  Juk’ampi yatxatañatakixa, Razonamiento a partir de las Escrituras sat qillqatwa uñxatarakisma, 111 janat 114 janakama, ukasti Jehová Diosan Qhanañchirinakapan español aruta qillqatawa.

← Juk’ampi yatxatañataki