Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

112 sarnaqäwi: Mä islaruw mistupxi

112 sarnaqäwi: Mä islaruw mistupxi

¡UÑTAM uka jach’a botex umaruw jalantaski! ¡Allitattaskiwa! ¿Jach’a botet umar saraqxapxatayna uka jaqinak uñjtati? Yaqhipanakax quta lakaruw makatanisipki. ¿Pablox ukankarakiti? Kunas pasatayna uk yatxatañäni.

Pablox jaqinakampiw mä islar mistusipki

Amtañäni, pä maraw Pablox Cesarea carcelankäna. Ukatxa Pablompi ukat ukham yaqha katuntatanakampwa Roma markar jach’a botet apasipkäna. Niya Creta isla jak’anxäna ukhaxa, mä jach’a thayaw sartäna. Janiw uka jach’a boterux chiqapar apañjamäxänti. Janiw Intis uñasxänti, arumas janiw warawaranakas uñasxänti. Walja urunakaw pasxäna, ukat uka botenkirinakaxa jiwarxañäniw sapxänwa.

Ukat Pablow sayt’asin akham säna: ‘Janiw khitis jiwkaniti; barco mayakiw chhaqxäni. Arumax Diosan angelapaw nayar akham yatiyir jutatayna: “¡Pablo, jan axsaramti! Jumax Romankir Cesaran nayraqatapar puriñamawa. Ukat Diosaw jumamp chik saraskirinakarux qhispiyaskani” ’ sasa.

¡Jach’a thaya qalltkäna uka urut pä semanaw pasxäna, ukat chika arumaw amuyapxäna qutax jan sinti manqhäxatapa! Ukat ch’amakan jan kuna qarqar muqintañapatakixa, anclanak jaquntapxäna bote sayt’ayañataki. Ukat qhantatix mä isla uñjapxäna. Ukat mä juk’ampwa quta lakar bote apt’anipxäna.

Ukat quta lakar jak’achasinipkäna ukhaxa, jach’a botex ch’allaruw purïna. Ukatxa umaw thayampi sartasin jach’a boter t’unantxäna. Ukat soldadonakan p’iqt’iripaxa akham sänwa: ‘Khitinakatix uman tuyuñ yatipki ukanakax islar mistxapxma, mayninakax umar thuquntasin tablanakxat mistxapxarakim’ sasa. Ukhamwa lurapxäna, ukat jach’a botenxa 276 jaqinakaw utjäna, taqiniw quta lakar mistxapxäna, kunjamtï angelax siskatayna ukhama.

Uka islax Malta satänwa. Uka islankirinakax suma jaqinakäpxänwa, ukatwa jach’a botet saraqirinakarux yanapt’apxäna. Ukat suma pachäxäna ukhawa, yaqha jach’a botet Pablorux Roma markar apxapxäna.

Hechos 27:1-44; 28:1-14.



Jiskt’äwinaka

  • Creta isla jak’a sarasipkäna ukhaxa, ¿kunas kamachäna Pablox saraskän uka jach’a botempixa?
  • ¿Pablox kamsänsa jupamp chika jach’a boten saraskirinakaruxa?
  • ¿Kunatsa jach’a botex q’al t’unjasïna?
  • ¿Soldadonakan p’iqt’iripax kamsänsa, ukat qhawqhanis islar mistsunxapxäna?
  • ¿Kun satäns puripxäna uka islaxa, ukat suma pachäxän ukhaxa Pablorux kamachapxänsa?

Yaqha jiskt’äwinakampi

  • Liyt’añamawa Hechos 27:1-44.

    Pablon Roma markar saräwipaxa, ¿kunatsa Biblian qillqatäki ukar juk’ampi iyawsañ yanapistu? (Hech. 27:16-19, 27-32; Luc. 1:3; 2 Tim. 3:16, 17.)

  • Liyt’añamawa Hechos 28:1-14.

    Malta islan utjasirinakax janis Diosar uñt’apkchïnxa apóstol Pablorusa jupamp chika jach’a boten saririnakarusa ‘wali sum katuqapxäna’, ¿ukat kuns cristianonakax yatiqasipxsna, ukat kunjamsa uk uñacht’aysna? (Hech. 28:1, 2; Heb. 13:1, 2; 1 Ped. 4:9.)