Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

108 sarnaqäwi: Damasco thakina

108 sarnaqäwi: Damasco thakina

¿KHITIS uraqin jaqusiski uk yattati? Saulo satawa. Jupaw Estebanar qalamp k’upjiri jaqinakan isinakapxa uñjaskäna. ¡Wal k’ajtaski uk uñtma! ¿Kunas kamachaski?

Estebanan jiwatapatxa, Saulox Jesusan arkirinakapar jan wali lurañatakiw thaqhir saräna. Utanakar mantasinxa Jesusan arkirinakapar qatatsusinwa carcelar katuntayäna. Ukatxa Jesusan walja arkirinakapaw yaqha markanakar sarxapxäna, ukatsti uka markanakanwa “suma yatiyäwinak” yatiyapxäna. Ukampis Saulox uka markanakaruw Jesusan arkirinakapar thaqhiri saräna. Akanxa Damascoruw saraskäna, ukat thakinxa akham muspharkañaw pasäna:

Akatjamat mä jach’a qhanax Saulorux alaxpachat qhanxatäna. Jupax uraqiruw jaqnuqtäna, kunjamtï akan uñjasiski ukhama. Ukat mä aruw akham säna: ‘¡Saulo, Saulo! ¿Kunatsa arknaqista?’ sasa. Saulompi chikaskäna uka jaqinakax jach’a qhanxa uñjapxänwa ukat uka arxa ist’apxarakïnwa ukampis janiw kun sañs muni ukxa amuyapkänti.

Mä jach’a qhanax Sauloruw juykhuptayi

‘¿Khitïtas Tata?’ sänwa Sauloxa.

‘Khitirutï arknaqkta uka pachpa Jesusätwa’ sänwa uka aruxa. ¿Kunatsa ukham säna? Kunattixa, jan walinak Jesusan arkirinakapar Saulox lurkäna ukhaxa, Jesusarus uk lurkaspa ukhamänwa.

Ukat Saulox akham sasaw jiskt’äna: ‘¿Tata, jichhax kun lurañajsa munta?’ sasa.

‘Sartam ukat Damascor mantma. Ukanwa kunatix lurañamäki uk yatisïta’ sänwa Jesusaxa. Kunapachatï Saulox sayt’äna ukhaxa janiw kuns uñjkänti. ¡Juykhuptänwa! Ukatwa, jupampi chikaskäna uka jaqinakax Damascor irpapxäna.

Ukat Jesusax Damascon mä arkiriparuw akham säna: ‘Sartam Ananías, Chiqapa satäkis uka caller sarma. Judasan utapan Saulo sat jaqiruw thaqtäta. Yanapirijatakiw ajllista’ sasa.

Iyaw sasaw Ananiasax saräna. Kunapachatï Saulor uñjäna ukhaxa, luqxatasaw akham säna: ‘Jesús Tataw khitanitu wasitat uñjxañamataki, qullan ajayun phuqt’atäñamataki’ sasa. Ukaratpacharakiw Saulon nayranakapatxa sillp’inakjama willirtxäna, ukat wasitatwa uñjxäna.

Yaqha markanakar yatiyir sarañatakix Saulox wal yanapt’äna. Apóstol Pablot uñt’atäxarakïnwa, jupatxa juk’amp yatxataskañäni. Ukampis Pedrox Diosan aruparjam kuns luratayna uk nayraqat yatxatañäni.

Hechos 8:1-4; 9:1-20; 22:6-16; 26:8-20.



Jiskt’äwinaka

  • ¿Estebanar jiwayapkäna uka qhipatxa Saulox kamachänsa?
  • Damascor saraskän ukhaxa, ¿kuna muspharkañas pasäna?
  • ¿Jesusax Saulorux kamsänsa?
  • ¿Jesusax Ananiasarux kamsänsa, ukat kunjamatsa Saulox wasitampi uñjxarakïna?
  • ¿Saulox kuna sutimpi uñt’atäxänsa, ukat kunatsa wal yanapt’äna?

Yaqha jiskt’äwinakampi

  • Liyt’añamawa Hechos 8:1-4.

    Cristiano tamax qalltaskän ukhaxa, ¿kunjamsa arknaqäwix jiltayäna, jichhapachax kunjamsa niya ukham jilxattaskaraki? (Hech. 8:4; Isa. 54:17.)

  • Liyt’añamawa Hechos 9:1-20.

    ¿Jesusax Saulorux kuna kimsa luräwitakis khitänxa? (Hech. 9:15; 13:5; 26:1; 27:24; Rom. 11:13.)

  • Liyt’añamawa Hechos 22:6-16.

    ¿Kunjamsa Ananiasat yatiqassna, ukat kunatsa wali wakisirixa? (Hech. 22:12; 1 Tim. 3:7; 1 Ped. 1:14-16; 2:12.)

  • Liyt’añamawa Hechos 26:8-20.

    ¿Yaqhip jilatanakan warmipasa jan ukax kullakanakan chachapasa janiw Diosar iyawsapkiti, ¿kunatsa Saulon cristianor tukutapax mä ch’amañchäwispaxa? (Hech. 26:11; 1 Tim. 1:14-16; 2 Tim. 4:2; 1 Ped. 3:1-3.)