Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

106 sarnaqäwi: Carcelat mistusipki

106 sarnaqäwi: Carcelat mistusipki

CARCEL punku katxasiski uka angelar uñtma. Jesusan apostolanakaparuw irpsuski. Kunatsa carcelankapxpachäna uk yatxatañäni.

Mä angelaw apostolanakarux carcelat mistuyaski

Jesusan arkirinakapar qullan ajayux churatäkäna ukatxa mä qhawqha urunakakiw saraqaskäna. Ukat akaw pasäna: mä jayp’ux Pedrompi Juanampiw Jerusalén Diosan utapar sarapxäna. Ukat uka uta punkunxa, wawatpach usuta mä such’u jaqiw mayjasiskäna. Sapüruw uka jaqirux apapxäna Diosan utapar mantirinakaru qullq mayjasiñataki. Pedrompiru Juanampiru uñjasaxa, mayirakikïnwa. ¿Jupanakax kamachapxänsa?

Sayt’asin uñkatapxäna. Pedrox akham sänwa: ‘Janiw qullqinïkti, ukampis utjkitu uk churäma. ¡Jesusan sutipar sayt’ma, sartarakim!’ sasa. Ukat Pedrox kupi amparapat waytäna, ukat ukaratpachaw sartäna, sayt’asinsti sarnaqañwa qalltäna. Uka milagro uñjasax wal muspharapxäna ukat wal kusisipxäna.

‘Jesusar jaktayki, uka Diosan ch’amapampiw uka milagro lurapxta’ sänwa Pedroxa. Juanampi yatiyasipkäna ukhasti judionakan yupaychäwip irpirinakaw wali colerata jutapxäna. Kunattix Pedrompi Juanampix Jesusax jaktxiw sasaw yatichapxäna. Ukhamasti katuntasinwa carcelar apantapxäna.

Qhipürusti judionakan yupaychäwip irpirinakaw mä jach’a tantachäwiru aywthapipxäna. Pedrompi Juanampiru ukat qullatäkan uka jaqimpiruw irptanipxäna. ‘¿Khitin ch’amapampis uk lurapxta?’ sasaw jiskt’apxäna.

Jesusar jaktayki uka Diosan ch’amapampiw lurapxta sänwa Pedroxa. Sacerdotenakax janiw kuns kamsirjamäpkänti, ‘uka milagrox janiw utjkänti’ sasax janiw sapkasapänti. Ukatwa, Jesusat jan juk’ampi parlapxañapataki iwxsusin khitxapxäna.

Walja urunakaw saraqxäna, apostolanakax Jesusat yatichasipkakïnwa usutanakarus qullasipkakïnwa. Uka milagronakatxa taqi chiqanwa yatisïna. Ukatwa apostolanakan qullapxañapataki walja jaqinakax Jerusalén jak’a markanakat usutanakapar apanipxäna. Ukanak uñjasaw judionakan yupaychäwip irpirinakax uñisiñat apostolanakarux katuntayapxäna. Ukampis akaw pasäna.

Diosan angelapax arumaw carcel jist’aräna, kunjamtï akan uñjaski ukhama. Ukat angelasti akham sänwa: ‘Diosan utapar sarapxma, purisinsti jaqinakar yatiyasipkakim’ sasa. Qhipärmanthi alwaxa, kunapachatï judionakan yupaychäwip irpirinakax apostolanakar irptanipxañapataki khitäna ukhaxa janiw carcelankxapxänti. Ukatxa Diosan utapanwa jikxatapxäna ukat Sanedrinan tantachasiñ utaparuw apapxäna.

‘Janipuniw Jesusxat yatichapxätati sarakis sapxayäsmaxa. Ukampis yatichäwinakamampiw Jerusalenxa phuqt’ayapxta’ sapxänwa judionakan yupaychäwip irpirinakaxa. Ukat apostolanakapax akham sapxänwa: ‘Diosar nayraqat apnaqirirjam ist’apxañajaw wakisi, jaqinakar sipansa’ sasa. Ukat yatiyir sarasipkakïnwa. ¡Aka sarnaqäwit wal yatiqsnaxa!

Hechos 3-5.



Jiskt’äwinaka

  • ¿Mä jayp’ux Pedrompi Juanampi Diosan utapar mantasipkäna ukhax kunas pasäna?
  • ¿Pedrox such’u jaqirux kamsänsa, ukat qullqit sipansa kuns Pedrox churäna?
  • ¿Kunatsa judionakan yupaychäwip irpirinakax colerasipxäna, ukat Pedrompiru Juanampirux kamachapxänsa?
  • Judionakan yupaychäwip irpirinakaruxa, ¿Pedrox kamsänsa, ukat apostolanakax kamsasa iwxsuyasipxäna?
  • ¿Kunatsa judionakan yupaychäwip irpirinakax uñisipxänxa, ukat kunapachatï pä kuti apostolanakar carcelar katuntapxäna ukhax kunas kamachäna?
  • Sanedrinax tantachasïna uka utar apapkäna ukhaxa, ¿apostolanakax kamsapxänsa?

Yaqha jiskt’äwinakampi

  • Liyt’añamawa Hechos 3:1-10.

    Janiw jichha tiempox milagronak lurksnati, ¿ukampis Hechos 3:6 jisk’a t’aqan Pedron arunakapax kunjamsa Diosan Apnaqäwip tuqit wali valorani yatiyäwi munañ yanapistu? (Juan 17:3; 2 Cor. 5:18-20; Fili. 3:8.)

  • Liyt’añamawa Hechos 4:1-31.

    Diosat yatiyir saräwin jan ist’añ munkistu ukhaxa, ¿kunjamatsa nayra tiempo cristianonakat yatiqassna? (Hech. 4:29, 31; Efe. 6:18-20; 1 Tes. 2:2.)

  • Liyt’añamawa Hechos 5:17-42.

    Yaqhip jaqinakaxa janis Jehová Diosan Qhanañchirinakapäpkchixa, ¿kunjamsa nayrapachas jichhapachas yatiyäwit sum amuyatapxa uñacht’ayapxi? (Hech. 5:34-39.)