Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

103 sarnaqäwi: Jist’antat uta manqhana

103 sarnaqäwi: Jist’antat uta manqhana

PEDROMPI Juanampix Jesusan sepulturapat mistunxapxäna ukhaxa, Mariax sapakiw qhiparäna. Ukatwa jachäna. ¡Ukat sepulturar uñantasinwa pä angelanak uñjäna! Jupanakasti akham sasaw jiskt’apxäna: ‘¿Kunats jachaskta?’ sasa.

‘Jesusan amayap apasxapxatayna, janiw yatkti kawkir apapxatapsa’ sasaw Mariax säna. Ukat qhip uñtasax mä jaq uñjäna. Uka jaqix akham sasaw jiskt’äna: ‘¿Khitirus thaqta?’ sasa.

Huerto uñjirïpachacha, jupach Jesusan amayap apaspacha sasaw chuymapan Mariax säna. Ukatwa akham säna: ‘Jumatï apsta ukax yatiyita kawkirus apta’ sasa. Ukampis uka jaqix Jesusänwa. Jesusax yaqha cuerponïnwa ukatwa Mariax jan uñt’känti. Ukampis kunapachatï Jesusax sutipat Mariar jawskäna ukhaw Jesusätapxa amuyäna. Ukat arkir masinakapar yatiyiriw jupax t’ijüna: ‘¡Jesusaruw uñjta!’ sasa.

Ukat uka uruw pä arkirinakapax Emaús sat markar sarasipkäna, ukat mä jaqiw jupanakampi chikt’äna. Jesusan jiwatapat wali llakitäsipkänwa. Ukampis sarasipkäna ukhaw uka jaqix Bibliat sum qhanañchäna ukat chuymsa qhanartayänwa. Ukat manq’añatak samart’apxäna ukhaw uka pä arkirinakapax uka jaqin Jesusätapxa amuyapxäna. Jesusax chhaqtxänwa, jupanakasti Jerusalenaruw kutt’anipxäna apostolanakar yatiyiri.

Ukäñkamasti, Pedrorurakiw Jesusax uñstäna. Mayni apostolanakax uka tuqit ist’asax wal kusisipxäna. Ukat uka pä arkirinakapax Jerusalenaruw purintanipxarakïna ukat apostolanakampiwa parlapxäna. Jesusaruw thakin uñjapxta sasa. Uk yatiyasipkäna ukhaxa, ¿kunas pasän uk yattati?

Akan uñxatma. Punkunakas jist’antataskchïnsa Jesusax uka utanwa uñstäna. ¡Wali kusiskañapunïnwa arkirinakapatakixa! ¡Wali k’uchiskañ urupunïpachänwa! ¿Qhawqha kutis Jesusax uñstäna uk jakt’asmati? ¿Phisqa kutiti?

Arkirinakaparuw Jesusax uñsti

Jesusar uñjapkän ukhax Tomás sat apostolax janiw ukankkänti. Ukatwa, Jesusan arkirinakapax Tomasir akham sapxäna: ‘¡Jesusaruw uñjapxta!’ sasa. Ukampis Tomasix uñjä ukhaw chiqaw säxa sänwa. Kimsaqallq uruw saraqxäna, ukhaw wasitampi Jesusan arkirinakapax jist’antat uta manqhankasipkäna, Tomasix ukankaskarakïnwa. Akatjamatwa, ukan Jesusax uñstarakïna. Tomasix ukhaw chiqaw sisxänxa.

Juan 20:11-29; Lucas 24:13-43.



Jiskt’äwinaka

  • ¿Kunatsa huerto uñjirïpachaw sasax Mariax sänxa, ukat kunjamatsa Jesusätap amuyänxa?
  • ¿Emaús markar saraskir Jesusan pä arkirinakaparux kunas pasäna?
  • ¿Kunapachatï pä arkirinakapax ‘Jesusaruw uñjapxta’ sas apostolanakar yatiyasipkäna ukhax kunas pasäna?
  • ¿Qhawqha kutis Jesusax arkirinakapar uñstäna?
  • ¿Tomasix ‘Jesusaruw uñjapxta’ siri ist’asax kamsänsa, ukat kimsaqallq uru saraqxäna ukhax kunas pasarakïna?

Yaqha jiskt’äwinakampi

  • Liyt’añamawa Juan 20:11-29.

    Juan 20:23 jisk’a t’aqan qillqatäki uka arunakampixa, ¿jaqix jaqi masipan juchap pampachaspaw sañti Jesusax munäna? Qhanañcht’ma (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2).

  • Liyt’añamawa Lucas 24:13-43.

    ¿Biblian yatichäwinakapa sum yatiqañatakixa kunjamsa chuymanakas wakichsnaxa? (Luc. 24:32, 33; Esd. 7:10; Mat. 5:3; Hech. 16:14; Heb. 5:11-14.)