Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

94 sarnaqäwi: Wawanakaruw munasïna

94 sarnaqäwi: Wawanakaruw munasïna

JESUSAX jisk’a yuqallar qhumantaski uk uñtma. Jupax wawanakar wal munasi. Uñch’ukisipki uka jaqinakax apostolanakapawa. ¿Jesusax kamspachas uk yattati?

Wali jaya saräwitwa Jesusampi apostolanakapampix kutt’anisipkäna. Thakinxa jiskhisisaw apostolanakapax jutapxäna. Ukatwa purinxasax Jesusax akham jiskt’äna: ‘¿Kuna tuqitsa thakin jiskhisipxta?’ sasa. Jesusax yatiskänwa kuna tuqitsa jiskhisisipkän ukxa. Ukampis apostolanakax arsupxanit janich uk yatiñatakiw jiskt’äna.

Jesusampi mä wawampi

Apostolanakax janiw kamsapkänsa, kunattix thakinxa khitis jilïrispax uka tuqitwa parlasipkäna. Yaqhipanakax mayninakat sipansa wali aytat jilïriñwa munapxäna. ¿Ukham amuyañax janiw walïkit sañatakixa Jesusax kamachänsa?

Mä wawaruw jawsäna, ukat nayraqataruw sayt’ayäna. Ukat akham sasaw arkirinakaparux säna: ‘Ak sum yatipxañamawa: Janitï wawanakjam tukupkätaxa, janiw Diosan apnaqäwipar mantapkätati. Khititï wawjam tukki ukaw Diosan apnaqäwipanxa jilïrixa’ sasa. ¿Kunatsa ukham sispachän uk yattati?

Jisk’a wawanakaxa janiw taqit sipan jilïriñ munapkiti, ni wali aytatäñsa munapkiti. Ukatwa apostolanakapax yatiqapxañapäna wawanakjam sarnaqaña, janiw jiskhisipxañapäkänti jilïriñatsa ni aytatäñatsa.

Jesusaxa yaqhürunakasa wawanakar munasitapxa uñacht’ayarakikïnwa. Mä qhawqha phaxsitxa, Jesusar uñjapxañapatakiw awk taykanakax wawanakapar irpanipxäna. Apostolanakapax janiw jak’achasiyañ munapkänti. Ukampis Jesusax akham sänwa: ‘Wawanakax jutasipkpan jan jark’xasipxamti, kunattix Diosan apnaqäwipax jupanakjam jaqinakankaniwa’ sasa. Ukatwa wawanakarux qhumantäna, ukat bendicirakïna. ¡Jesusax wawanakar wal munasïna uka tuqit yatiñax wali askiwa!, ¿janichä?

Mateo 18:1-4; 19:13-15; Marcos 9:33-37; 10:13-16.



Jiskt’äwinaka

  • Jaya saräwit kutt’anisipkäna ukhaxa, ¿kunatsa apostolanakax jiskhisipxäna?
  • ¿Kunatsa Jesusax mä wawar jawsasin apostolanakan nayraqatapar sayt’ayäna?
  • ¿Kuna tuqitsa apostolanakax wawanakjamäpxañapänxa?
  • Mä qhawqha phaxsi pasatatxa, ¿wawanakar munasitapxa kunjamsa Jesusax uñacht’ayäna?

Yaqha jiskt’äwinakampi

  • Liyt’añamawa Mateo 18:1-4.

    ¿Kunatsa Jesusax uñacht’äwinakampi yatichäna? (Mat. 13:34, 36; Mar. 4:33, 34.)

  • Liyt’añamawa Mateo 19:13-15.

    Diosan Apnaqäwipan bendicionanak katuqañ munasaxa, ¿kunanaksa wawanakat yatiqasiñasa? (Sal. 25:9; 138:6; 1 Cor. 14:20.)

  • Liyt’añamawa Marcos 9:33-37.

    ¿Taqit sipansa jilïriñ munañ tuqitxa Jesusax kamsasas arkirinakapar yatichäna? (Mar. 9:35; Mat. 20:25, 26; Gál. 6:3; Fili. 2:5-8.)

  • Liyt’añamawa Marcos 10:13-16.

    ¿Jesusarux khitinakasa jak’achasipxänxa, kunsa irpir chuymaninakax ukat yatiqasipxaspa? (Mar. 6:30-34; Fili. 2:1-4; 1 Tim. 4:12.)