Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

88 sarnaqäwi: Juanax Jesusaruw bautisi

88 sarnaqäwi: Juanax Jesusaruw bautisi

UÑTAM mä palomaw khä jaqir sarxataski. Uka jaqix Jesusawa. Niya 30 maranïxiwa. Ukat jupampi chikäski uka jaqix Juan satawa. Jupa tuqitxa mä juk’a yatiqxtanwa. ¿Mariax Elisabetar tumpt’ir sarkäna ukhax Elisabetan purakapankaskir wawax kusisiñat unxtäna uk amttati? Uka wawax Juanänwa. Ukampis ¿Juanampi Jesusampix kuns lurasipki?

Jesusan bautismopa

Juanax Jordán jawir umaruw Jesusar chhaqantayaskäna. Ukhamaw bautisasiñaxa. Umar chhaqantayasin waysusa. Ukhamwa Juanax jaqinakaru bautisäna; ukatwa Bautisir Juan sataxa. Ukampis ¿kunatsa Jesusar bautispachäna?

Kunattix Jesusaw bautisit säna, ukatwa bautisäna. Arrepentisitap uñacht’ayañ munir jaqinakaruw Juanax bautisäna. Ukampis ¿Jesusax juchanïnti? Jesusax janiw juchanïkänti, alaxpachat jutiri, Diosan Wawapächïnxaya. Ukhamasti janiw arrepentisitapat bautisayaskänti, ukhamasti kunatsa bautisayaspachäna uk yatxatañäni.

Juanampi bautisayasiri janïr jutkasaxa, Jesusax carpinterünwa. Mä carpinteroxa lawata k’ulluta mesanak sillanaka qunuñanak luririwa. Marian chachapaw carpinterünxa, jupaw Jesusarux ukham lurañ yatichäna. Ukampis Diosax janiw Wawaparux khitankänti carpinterüñapatakixa. Diosax mä amtampiw khitanïna, ukhamasti kunti lurañapäkäna uka tiempox purinxänwa. Ukatwa, Jesusax Juanarux bautisit sänxa, ukhamata Awkipan munañapa lurañatak jutatapa uñacht’ayañataki. ¿Ukax Diosatak askïnti?

Jïsa, kunapachatï Jesusax umat mistunkäna ukhaxa, mä aruw alaxpachat akham sir ist’asïna: ‘Akaw Wawajaxa, kawkiritix chuymaj kusisiyki ukaxa’ sasa. Ukatxa, alaxpachaw jist’artäna ukatwa aka palomax Jesusxar sarxatäna. Ukampis janiw chiqa palomäkänti, jan ukasti Diosan qullan ajayupänwa.

Bautisatäxasinxa Jesusax kunayman tuqit lup’iñapänwa, ukhamasti 40 uruw wasarar saräna. Ukat Supayaw jupan ukar saräna. Diosan kamachinakap pak’intayañ laykuxa kimsa kutiw Supayax Jesusar yant’äna. Ukampis Jesusax janiw juchar purkänti.

Ukatxa Jesusax wasarat kutt’xasaxa, mä qhawqha jaqinakampiw uñt’asïna, jupanakaw nayrïr arkirinakapjama uñt’atäpxixa. Yaqhipanakax akham satäpxiwa: Andrés, Pedro (Simón satarakïnwa), Felipe ukat Natanael (Bartolomé satarakïnwa). Jesusampi arkirinakapampixa Galilea tuqiruw sarapxäna. Natanaelan Caná markaparuw puripxäna, ukat uka markanxa mä casarasïwiw utjäna, ukanwa nayrïr milagrop Jesusax luräna. ¿Kuna milagrsa lurpachäna uk yattati? Umwa vinoptayäna.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.



Jiskt’äwinaka

  • ¿Aka jaqinakax khitinakasa?
  • ¿Kunjamas bautisasiñaxa?
  • ¿Juanax khitinakarus bautisirïna?
  • ¿Kunatsa Jesusax Juanar bautisit sänxa?
  • ¿Jesusan bautisasitapax askïna ukxa kunjamsa Diosax uñacht’ayäna?
  • Kunapachatï Jesusax 40 uru wasarankkäna ukhaxa, ¿kunas jupar pasäna?
  • ¿Jesusan nayrïr arkirinakapan sutinakapax kawkïrinakasa, nayraqat kuna milagrsa luräna?

Yaqha jiskt’äwinakampi

  • Liyt’añamawa Mateo 3:13-17.

    ¿Jesusat yatiqasisaxa kunjamsa Jesusan arkirinakapax bautisasipxañapa? (Sal. 40:7, 8; Mat. 28:19, 20; Luc. 3:21, 22.)

  • Liyt’añamawa Mateo 4:1-11.

    Jesusax qillqatanak apnaqañ sum yatïna, ¿ukax kunatsa jiwasanakaru juk’ampi Bibliat yatxatañasatakix ch’amañchistu? (Mat. 4:5-7; 2 Ped. 3:17, 18; 1 Juan 4:1.)

  • Liyt’añamawa Juan 1:29-51.

    ¿Bautisir Juanax khiti tuqirus arkirinakaparux uñtayäna, ukat kunsa jiwasanakax yatiqaraksna? (Juan 1:29, 35, 36; 3:30; Mat. 23:10.)

  • Liyt’añamawa Juan 2:1-12.

    Jehová Diosax janiw suma luratanakapat jark’kistuti, ¿ukxa kunjamsa Jesusax nayrïr milagro lurasax uñacht’ayistu? (Juan 2:9, 10; Sal. 84:11; Sant. 1:17.)