Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

86 sarnaqäwi: Mä warawararuw arktapxi

86 sarnaqäwi: Mä warawararuw arktapxi
Astrología tuqit yatxatat jaqinaka

¿AKAN luqch’ukiski uka warawar uñjtati? Jerusalenat mistunipkän ukhaw uñstäna. Jupanakax Inti jalsu tuqit jutapxäna warawaranakat yatxatirinakäpxänwa. Aka jan uñt’at warawarax mä aski jaqiruw irpkatistani sapxänwa.

Jerusalenar aka jaqinakax puripkän ukhaxa, akham sasaw jiskt’apxäna: ‘¿Kawkinkis judionakan apnaqiripäkani uka wawaxa?’ sasa. “Judionaka” sutix israelitanakan yaqha sutipawa. ‘Inti jals tuqinwa warawarap nayraqata uñjapxta, ukat jichhax yupaychiriw jutapxta’ sapxänwa uka jaqinakaxa.

Jerusalén apnaqir Herodesax uk ist’asax wal colerasïna. Janiw munkänti jupa lanti yaqha apnaqirin utt’asiñapxa. Ukhamasti aytat sacerdotenakaruw jiskt’äna: ‘¿Kawkin yuriñapas apnaqirixa?’ sasa. Ukat jupanakax ‘Biblianxa Belén markanwa yurini siwa’ sapxänwa.

Ukhamasti Herodesax Inti jalsu tuqit jutir jaqinakaruw akham säna: ‘Uka wawar thaqtanipxma, jikxatapxäta ukhaxa yatiyanipxitätawa. Nayax yupaychir sarañ munaraktwa’ sasa. Ukampisa, ¡Herodesax wawar jiwayañwa munäna!

Ukhamasti warawarax jupanak nayraqatwa saräna Belenar puriñkama, ukat kawkjankkänti wawax uka chiqaruw sayt’äna. Kunapachatï uka jaqinakax utar mantanipkäna ukhax Mariampiru Jesús wawapampiruwa jikxatapxäna. Jesusar regalonak churapxäna. Ukat Herodesar yatiyir jan sarapxañapatakix Jehová Diosaw mä samkan arxayäna. Ukatwa yaqha thaknam markapar kutt’xapxäna.

Herodesaxa, uka jaqinakan sarxatapat ist’asaxa, wal colerasïna. Ukat Belenan pä maranit aynachar wawanak jiwthapiyanipxam sänwa. Ukampis Jehová Diosaw uka tuqit Joseyar mä samkan yatiyäna, ukat Joseyax Egiptoruw familiapampi sarxäna. Ukat kunapachatï Joseyax Herodesan jiwatapat yatïna ukhaxa Mariampi Jesusampi irpt’asitaw Nazaretar kutt’anxäna. Ukhamasti Jesusax Nazaretanwa jilsüna.

¿Khitiw uka jan uñt’at warawar k’ajtayän sasmasa? Amtañäni, warawarax Jerusalenaruw nayraqat uka jaqinak irpäna. Supayaw Diosan Wawapar jiwayañ munäna, ukat Herodesax jiwayapuniniw sasaw sispachäna. Ukhamax Supayaw uka warawar k’ajtaypachäna.

Mateo 2:1-23; Miqueas 5:2.



Jiskt’äwinaka

  • ¿Khitinakas aka jaqinakaxa, ukat kunatsa maynix k’ajtaniski uka warawarar luqt’aski?
  • ¿Herodesax kunatsa colerasïna, ukat kamachänsa?
  • ¿K’ajkir warawaraxa kawkirus uka jaqinakar irpäna, ukat kunatsa yaqha thaknam sarxapxänxa?
  • ¿Kamsänsa Herodesaxa, ukat kunatsa?
  • ¿Jehová Diosax Joseyar kamsänsa?
  • ¿Khitisa uka jan uñt’at warawara k’ajtayänxa, ukat kunatsa?

Yaqha jiskt’äwimpi

  • Liyt’añamawa Mateo 2:1-23.

    ¿Jesusax qhawqha maranïxansa ukat kawkinsa jakasiskäna warawarar arkirinakax jutapxäna ukhaxa? (Mat. 2:1, 11, 16.)