Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

101 sarnaqäwi: Jesusaruw jiwayapxi

101 sarnaqäwi: Jesusaruw jiwayapxi

¡AKAN kamachasipkisa! Jesusaruw jiwayasipki. Mä lawaruw warkkatapxatayna. Amparampit kayumpit clavonakampi ch’akkatapxatayna. ¿Kunatsa ukham lurapxpachäna?

Jesusax jiwañampïskiwa

Kunattix mä qhawqhaniw uñisipxäna. ¿Khitinakas uñisipxän uk yattati? Maynïrix Supay Satanás ñanqha angelawa. Jupaw Adanampi Evampirux Jehová Diosar jan jaysaykänti. Juparakiw Jesusan uñisirinakapampix akham Jesusar lurayäna.

Janïr aka lawar ch’akkatkasaxa, Jesusarux wal t’aqhisiyapxäna. ¿Getsemaní huertat apapkäna uk amttati? ¿Uka uñisirinakax khitinakänsa? Jïsa, judionakan yupaychäwip irpirinakänwa. Ukat kamachapxänsa uk uñjañäni.

Kunapachatï Jesusar judionakan yupaychäwip irpirinakax katuntapkäna ukhaxa, apostolanakapax t’ijtxapxänwa. Axsarañatwa Jesusarux sapapaki uñisirinakapampi jaytjawayapxäna. Ukampis Pedrompi Juanampix janiw jay sarapkänti. Qhipapwa arkapxäna Jesusarux kamachapxanis uk uñjañataki.

Sacerdotenakax chuyman Anasan utaparuw Jesusarux apapxäna, kunattix nayrax jilïr sacerdotïnwa. Ukampis uka jaqinakax janiw jay ukankapkänti. Caifasan utaparuw Jesusar apapxarakïna, kunattix Caifasaw jilïr sacerdotïnxa. Ukanxa judionakan yupaychäwip walja irpirinakaw ukankapxäna.

Jesusarux kunjamsa juchañchapxani uka tuqitwa Caifasan utapan parlakipapxäna. Jesús tuqit k’arinak parlapxañapatakiw mä qhawqhan irptanipxäna. Ukat yupaychäw irpirinakax akham sapxänwa: ‘Jesusarux jiwayañäspawa’ sasa. Ukatxa Jesusaruw ajanut thuskatapxäna, nuwjapxäna.

Ukäñkamasti, Pedrox anqankaskänwa. Wal uka arumax thayt’äna, ukatwa jaqinakax nin phichasipxäna. Ukan junt’urasisipkäna ukhaxa, mä uywat tawaquw Pedror uñkatasax akham säna: ‘Aka jaqix Jesusamp chikarakikïnwa’ sasa.

‘¡Janiw nayax jupampi chikäkayätti!’ sänwa Pedroxa.

Jumax Jesusampi chikaskayätawa sasax kimsa kutiw sapxäna. Ukampis Pedrox janiw sänwa, kimsa kuti ukham sisxäna ukhawa Jesusax kutjtanisin uñtanïna. Pedrox wal chuymap ust’ayasïna ukham k’arisitapatxa, ukat sarxasin wal jachäna.

Viernesax Inti jalsunxän ukhaxa, sacerdotenakax Sanedrinan jach’a tantachasiñ utaparuw Jesusar apapxäna. Ukanwa amtapxän kamachapxanis ukxa. Ukat Judea tuqinkir markanak uñjiri Poncio Pilato gobernadoraruw irpkatapxarakïna.

Pilator akham sapxänwa: ‘Aka jaqix jan wali jaqiwa, jiwañapaw’ sasa. Pilatox Jesusar jiskt’asax akham sänwa uka jaqinakaruxa: ‘Nätakix janiw juchanjamäkiti’ sasa. Ukat Galilea tuqinkir markanak uñjiri Herodes Antipas gobernadoraruw Jesusar apxaruyäna, jupasti Jerusalenankänwa. Jupaxa, Jesusax janiw juchanïkiti sarakikïnwa, ukat Pilatoruw kutt’ayxäna.

Pilatox Jesusar khitxañ munäna. Ukampis uñisirinakapax Barrabás sat lunthatar khitxañapwa mayipxäna. Niya chikürüxänwa, ukhaw Pilatox Jesusarux irpsunïna, ukat akham sänwa: ‘¡Akax apnaqirimaxa! ¡Uñtanipxam!’ sasa. Ukampis aytat sacerdotenakaxa akham sasaw art’apxäna: ‘¡Jiwayma! ¡Jiwayam!’ sasa. Ukhamasti Barrabás lunthataruw khitxapxäna, ukampis Jesusarux jiwayañatakiw apapxäna.

Viernes jayp’thapiw mä lawaru warkkatxapxäna. Ukatxa, Jesusan ch’iqäxaparusa kupïxaparusa pä lunthatwa warkkatapxarakïna, ukampis janiw dibujon ukax uñjaskiti. Jesusax janïr jiwkän ukhaxa mä lunthatax akham sänwa: ‘Taqi markanak apnaqkäta ukhax nayat amtasitätawa’ sasa. Ukat Jesusax akham sänwa: ‘Jumax nayamp chikaw Kusipachankäta’ sasa.

¡Wali askiw uka arsüwipaxa!, ¿janichä? ¿Jesusax kuna kusipachatsa parlaskäna, uk yattati? ¿Qalltan Diosax lurkäna uka kusipachax kawkinkänsa? Jïsa, aka Uraqinkänwa. Ukat Jesusax alaxpachat apnaqanxani ukhaxa, aka Uraqinkir machaq Kusipachan jakañapatakiw jaktayani. ¿Wali askipunïniw ukax janichä?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.



Jiskt’äwinaka

  • ¿Khitis Jesusar jiwayapxañapatakix wiytäna?
  • Kunapachatï judionakan yupaychäwip irpirinakax Jesusar apasipkäna ukhaxa, ¿apostolanakapax kamachapxänsa?
  • ¿Caifas jilïr sacerdoten utapan kamachapxänsa?
  • ¿Kunatsa Pedrox mistusin wal jachänxa?
  • Wasitampi Pilaton ukaru kutt’ayapkäna ukhaxa, ¿aytat sacerdotenakax kamsasas art’apxäna?
  • ¿Viernes jayp’thapix Jesusar kamachapxänsa, ukat jupamp chika ch’akkatat lunthatarux Jesusax kamsänsa?
  • Jesusax parlkäna uka kusipachaxa, ¿kawkinkanisa?

Yaqha jiskt’äwinakampi

  • Liyt’añamawa Mateo 26:57-75.

    Judionakan jilïrinakapaxa ñanqha chuymaninakäpxänwa, ¿ukxa kunjamsa uñacht’ayapxäna? (Mat. 26:59, 67, 68.)

  • Liyt’añamawa Mateo 27:1-50.

    ¿Judasan arrepentisitapax janiw chuymatpachäkänti sasax kunatsa sapxsna? (Mat. 27:3, 4; Mar. 3:29; 14:21; 2 Cor. 7:10, 11.)

  • Liyt’añamawa Lucas 22:54-71.

    Jesusax aljantatäkana katuntatäkana uka arumaxa jan Jesusar uñt’iriw Pedrox tuküna, ¿ukat kunsa yatiqaraksna? (Luc. 22:60-62; Mat. 26:31-35; 1 Cor. 10:12.)

  • Liyt’añamawa Lucas 23:1-49.

    ¿Jesusax jan walinak lurkatasa kamachänsa, kunsa ukat yatiqasiraksna? (Luc. 23:33, 34; Rom. 12:17-19; 1 Ped. 2:23.)

  • Liyt’añamawa Juan 18:12-40.

    Pedrox jaqir axsarañampix atipjayaschïnsa qhipatxa suma apostoläxänwa, ¿kunsa ukax uñacht’ayistaspa? (Juan 18:25-27; 1 Cor. 4:2; 1 Ped. 3:14, 15; 5:8, 9.)

  • Liyt’añamawa Juan 19:1-30.

    ¿Jesusax manq’añ tuqitsa isisiñ tuqitsa kuns amuyäna? (Juan 2:1, 2, 9, 10; 19:23, 24; Mat. 6:31, 32; 8:20.)

    ¿Jesusan qhip qhipa arunakapax kunatsa Jehová Diosan jach’a kankañapa tuqit sayt’asisin atipatap uñacht’ayi? (Juan 16:33; 19:30; 2 Ped. 3:14; 1 Juan 5:4.)