Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

77 sarnaqäwi: Janipuniw alt’asipkänti

77 sarnaqäwi: Janipuniw alt’asipkänti

¿AKA kimsa waynitunakat amtasktati? Jïsa, Danielan wali munat masinakapawa, apnaqirin manq’ap jan manq’añ munapkän ukanakawa. Babilonionakax Sadrac, Mesac ukat Abednego sasaw sutichapxäna. Ukampis jichhax uñtma. ¿Kunatsa mayninakjam aka jach’a luratarux jan alt’asipkpacha? Uk yatxatañäni.

¿Jehová Diosan qillqata kamachinakapat amttati, Tunka Mandamientonaka satäkisa ukxa? Nayrïr kamachix akänwa: ‘Janiw nayat sipansa yaqha diosanakar yupaychätati’. Ch’amäkchisa uka kamachwa akan phuqasipki.

Babilonia apnaqiri Nabucodonosoraxa, taqi aytat jaqinakaruw jawsthapïna, jupan lurata diosapar alt’asipxañapataki. Ukat akham sasaw jaqinakarux säna: ‘Kunapachatï pututu, arpa, mayni tukañanakampi tukt’asir ist’apxäta ukhaxa, alt’asisin aka lurataruw yupaychapxäta. Khititï jan alt’askani jan yupaychkani ukasti mä pariptayat hornor jaquntatäniwa’ sasa.

Sadracampi, Mesacampi ukat Abednegompiw jan alt’asiñ munapkiti sasa Nabucodonosoraru yatiyapxäna ukhaxa, wal colerasïna. Ukat uka kimsa waynanakaruw irptayanïna. Nabucodonosorax mä kutimpiw alt’asipxam säna. Ukampis uka waynitunakax Jehová Diosaruw atinisipxäna: ‘Khitirutï nanakax yupaychapkta uka Diosaw qhispiyapxitani’ sapxänwa. ‘Janipuniw qurit lurata uka diosamarux alt’asipkiristi’ sasa.

Sadracamp Mesacamp ukat Abednegompi

Uk ist’asax Nabucodonosorax sint colerasïna. Mä hornow jak’an utjäna, ukat akham sänwa: ‘¡Uka horno paqallq kuti pariptayanipxam!’ sasa. Ukat wali ch’aman soldadonakapampiwa uka kimsa waynitur ñach’antayasin hornor jaquntayäna. Ukat hornox wali paripunïnwa ukatwa jaquntir ch’aman jaqinakax jiwarapxäna. Ukampis ¿uka hornor jaquntat kimsa waynitunakax kunjamasipkpachänsa?

Hornor uñantasax Nabucodonosorax wal sustjasïna. ‘¿Janit kimsaniruki jaquntktanxa?’ sasaw jiskt’äna.

‘Ukhamäskapuniwa’ sapxänwa yanapirinakapaxa.

‘Ninan pusi jaqinaka sarnaqaskir uñjta’ sänwa jupaxa. ‘Janiw ñach’antatäxapxiti, ukampis janiw ninax kunsa kamachkiti. Ukat pusirïki ukasti diosäkaspas ukhamarakiwa’ sasa. Nabucodonosorax horno punkur jak’achasisax akham sasaw art’äna: ‘¡Sadrac! ¡Mesac! ¡Abednego! ¡Alaxpach Diosar yupaychirinaka, mistunipxam!’ sasa.

Mistunipxäna ukhaxa, jan kun kamachataw mistunipxäna, uksti taqi jaqinakaw uñjapxäna. Ukat Nabucodonosorax akham sänwa: ‘¡Sadrac, Mesac, ukat Abednego satäpki uka jaqinakan Diosapax yupaychatäpan! Jupaw angelap khitani aka yupaychirinakapar qhispiyañapataki, jupanakasti janiw yaqha diosanakar yupaychapkiti, jan ukasti Diosaparukiw yupaychapxi ukata’ sasa.

Jehová Dios saparukiw yupaychañasaxa, ¿aka sarnaqäwix janit uka tuqit wali suma uñacht’aykistu?

Éxodo 20:3; Daniel 3:1-30.



Jiskt’äwinaka

  • ¿Babilonia apnaqiri Nabucodonosorax kamsänsa?
  • ¿Kunatsa Danielan wali munat masinakapax qurit lurat nayraqatapan jan alt’asipkäna?
  • Mä kutimpi Nabucodonosorax alt’asipxam säna ukhaxa, ¿kunjamsa kimsa waynitux Jehová Diosar atinisitap uñacht’ayapxäna?
  • ¿Nabucodonosorax yanapirinakaparuxa Sadracampiru Mesacampiru Abednegompirux kamachapxam sänsa?
  • ¿Kuns Nabucodonosorax hornon uñjäna?
  • ¿Kunats Nabucodonosorax Sadracan Mesacan Abednegon Diosap yupaychapxam sänxa, ukat kunsa uka waynitunakax yatichistu?

Yaqha jiskt’äwinakampi

  • Liyt’añamawa Daniel 3:1-30.

    Hebreo waynitunakjama yant’anakan uñjasisaxa, ¿kunsa jupanakat Diosar yupaychirinakjamax yatiqassna? (Dan. 3:17, 18; Mat. 10:28; Rom. 14:7, 8.)

    ¿Kunsa Jehová Diosax Nabucodonosorarux yatichäna? (Dan. 3:28, 29; 4:34, 35.)