Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

57 sarnaqäwi: Diosax Davitaruw ajlli

57 sarnaqäwi: Diosax Davitaruw ajlli
Davitax mä uwijaruw qhispiyaski

¿AKAN kunas kamachaski? Uka waynitux mä uwij qall osot aparaski. Uka osox manq’antañatakiw uwij qall achuskäna. Ukampis waynitux arktasin osot aparäna. Ukat kunapachatï osox sartaskakïn ukhaxa, ¡uka waynitux jiwayänwa! Ukat yaqha urux uwij leonat apararakïna. Jan axsart’iripunipachänwa. ¿Khitïpachas aka waynitux uk yattati?

David satawa. Jupax Belenan jakasïna. Achachilapax Obed satänwa, Obetan awk taykapaxa Booz, Rut satarakïnsä, ¿uk amttati? Davitan tatapax Isaí satänwa. Tatapan uwijanakap Davitax awatirïna. Saular apnaqirit ajllipkän ukat 10 mar pasatatwa Davitax utjxäna.

Ukatxa Jehová Diosax Samuelurux akham sänwa: ‘Aceite apt’at Belenaru Isaí tatan utapar sarma, nayasti mayni wawaparuw apnaqirïñapataki ajllistxa’ sasa. Ukat Isaí tatan Eliab jilïr yuqapar uñjasaxa, ‘akapunïpachaw’ sasaw Samuelux chuymapan säna. Ukampis Jehová Diosax akham sänwa: ‘Jan uñnaqapaksa, jach’a jaqïtapaksa uñjamti. Janiw jupar apnaqirïñapatak ajllkti’ sasa.

Ukhamasti Isaí tatax Abinadab irpkatäna. Ukampis Samueluxa: ‘Janirakikiw akäkit Jehová Diosan ajllitapaxa’ sänwa. Ukat Isaí tatax Sama sat yuqap irptanïna. ‘Jehová Diosax janiw juparus ajllkarakikiti’ sänwa. Isaí tatax paqallqu wawanakapwa Samuelur irpkatäna, ukampis Jehová Diosax janiw maynirus ajllkänti. ‘¿Janit juk’ampi yuqanakamax utjxi?’ sasaw Samuelux jiskt’äna.

‘Sullkaw utjaski. Jupax uwij awatiski’ sänwa Isaí tataxa. Davitar irptanipkäna ukhaxa, suma uñnaqt’anïtap Samuelux uñjäna. Ukat Jehová Diosax ‘akapï apnaqiritak ajllitaxa. Aceitempi p’iqipat warxatam’ sänwa. Iyaw sasaw Samuelux warxatäna. Ukatxa Davitax Israel apnaqxäna.

1 Samuel 17:34, 35; 16:1-13.



Jiskt’äwinaka

  • ¿Kamsatas aka waynituxa, kunjamatsa jan axsarirïtap yattanxa?
  • ¿Kawkinsa Davitax jakasïna, kamsatänsa papitupaxa ukat kamsatarakis achachilapaxa?
  • ¿Kunatsa Jehová Diosaxa Isaí utap saram sasa Samuelurux Belenar khitänxa?
  • ¿Paqallqu wawanakapa Isaí tatax Samueluru irpkatxäna ukhaxa kunas kamachäna?
  • ¿Jehová Diosaxa kamsänsa Samueluruxa kunapachatï Davitaru irptanipkäna ukhaxa?

Yaqha jiskt’äwinakampi

  • Liyt’añamawa 1 Samuel 17:34, 35.

    Davitax janiw axsarirïkänti Jehová Diosarupuniw atinisirïna ¿ukxa kunjamsa aka sarnaqäwix uñacht’ayi? (1 Sam. 17:37.)

  • Liyt’añamawa 1 Samuel 16:1-14.

    Janiw khitirus yaqhachañasäti, janirakiw uñnaqat ajlliñasäkiti, ¿ukxa kunjamsa 1 Samuel 16:7 jisk’a t’aqankki uka arunakax sum qhanañchistu? (Hech. 10:34, 35; 1 Tim. 2:4.)

    Kunapachatï Jehová Diosaxa qullan ajayupa mä jaqita apaqki ukhaxa jan wali ajayuw mä arunxa jan wali amtaw uka jaqir manti, ¿kunjamsa Saulan sarnaqäwipax uk uñacht’ayistu? (1 Sam. 16:14; Mat. 12:43-45; Gál. 5:16.)