Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

56 sarnaqäwi: Israel mark nayrïr apnaqiri

56 sarnaqäwi: Israel mark nayrïr apnaqiri
Samuelux Saularuw apnaqirit utt’ayaski

SAMUEL tatar uñtam khä jaqin p’iqiparuw aceitempi warxataski. Ukhamwa nayrax lurapxirïna mä jaqiru apnaqirjam ajlliñatakixa. Jehová Diosax Saular aceitempi p’iqit warxatam sänwa Samueluruxa. Wali suma aceitïnwa.

Saulax janiw sum apnaqkiristi sasaw amuyasïna. Ukat akham Samuelur säna: ‘Nayax Benjamín tribunkirikïtwa, ukax Israel markan taqi tribunakat sipansa sinti jisk’akiwa. ¿Kunatarak apnaqätaw sistasti?’ sasa. Janiw jach’a jach’a tukuñ munkänti ni aytatäñs munkänti ukatwa Jehová Diosax Saular munasïna. Ukatwa apnaqirïñapatak ajllïna.

Ukampis Saulax janiw pisinkirïkänsa jisk’a jaqïkänsa. Familiapax qamirïnwa, jupas suma uñtan jach’a jaqïnwa. ¡Israelitanakarux niya kimsa chhiy jilakipänxa! Saulax wali t’ijurïnwa, wali ch’aman jaqïnwa. Saular apnaqirïñapatak Jehová Diosax ajllïna ukhaxa jaqinakax wal kusisipxäna. Taqiniw apnaqiriru ‘¡Jallälla!’ sapxäna.

Israelitanakar uñisirinakaxa wakichrantasisipkakïnwa. Saular apnaqirjam utt’ayxapkäna uka qhipatxa, amonitanakaw jupanak contra jutapxäna. Ukampis Saulax walja soldadonak tantachthapisax amonitanakar atipjänwa. Saúl apnaqipanxa markpachaw wal kusisipxäna.

Walja maranakaw pasxäna, Saulampixa israelitanakax walja nuwasïwinakan atipapxäna. Ukat Saulax Jonatán sat jan axsart’ir yuqanïnwa. Jonatanax walja nuwasïwinak atipañwa yanapt’äna. Ukampis filisteonakax israelitanakar uñisisipkakïnwa. Mä uruxa, waranq waranqa filisteonakaw Israel contra jutapxäna.

Ukat Samuelux suyitätaw sasaw Saular säna, nayaw jutasin Jehová Diosarux mä ofrenda luqtä sasa. Ukampis Samuelux janiw jank’as purinkänti. Filisteonakax chhukt’anipxaspaw sasaw Saulax axsarayasïna, ukatwa, jupapachpa ofrenda luqtañxa nayrt’äna. Kunapachatï Samuelux purinxäna ukhaxa, janiw jumax ist’asirïktati sasaw Saular Samuelux säna. ‘Israel marka apnaqañapatakixa Jehová Diosax yaqha chacha ajllini’ sasa.

Ukatxa wasitampiw Saulax jan ist’askänti. Ukat Samuelux akham sänwa: ‘Jehová Diosatakix jupar ist’añaw lik’i uwijanak luqtañat sipansa askixa. Kunjamtï arunakapar jan ist’ktaxa, jupax reyïñatxa apaqätamwa’ sasa.

Aka sarnaqäwitxa suma yatichäw yatiqsnaxa. Wali wakisiripuniw Jehová Diosar sapüru ist’añaxa. Ukat suma jaqix mayjt’aspawa, kunjamtï Saulax suma jaqïkasin jan wali jaqiptän ukhama. ¡Jiwasax janipun ukhamañäniti!, ¿janichä?

1 Samuel 9 jaljat 11 jaljakama; 13:5-14; 14:47-52; 15:1-35; 2 Samuel 1:23.



Jiskt’äwinaka

  • ¿Kunsa Samueluxa luraski, ukat kunatsa?
  • ¿Kunatsa Saulax Jehová Diosatak askïnxa, ukat kunjam jaqïnsa?
  • ¿Saulan yuqapaxa kamsatänsa, ukat kunsa luräna?
  • ¿Kunatsa Saulax Samuelur jan suyt’as Diosar ofrenda luqtänxa?
  • ¿Aka sarnaqäwit kunsa yatiqtanxa?

Yaqha jiskt’äwinakampi

  • Liyt’añamawa 1 Samuel 9:15-21 ukat 10:17-27.

    Saular jisk’achapxäna ukhaxa, ¿kunjamsa suma chuymanïtapaxa Saular yanapt’äna? (1 Sam. 9:21; 10:21, 22, 27; Pro. 17:27.)

  • Liyt’añamawa 1 Samuel 13:5-14.

    ¿Kuna juchsa Saulaxa Guilgal chiqan lurataynaxa? (1 Sam. 10:8; 13:8, 9, 13.)

  • Liyt’añamawa 1 Samuel 15:1-35.

    Agag sat amalekitanakan apnaqiripampi nuwasir sarkäna ukhaxa, ¿kuna jach’a juchsa Saulaxa luratayna? (1 Sam. 15:2, 3, 8, 9, 22.)

    ¿Kunjamsa Saulax juchap jan uñt’asiñ munkänxa, ukat juchapat yaqhanakar tumpantänxa? (1 Sam. 15:24.)

    Kunapachatï iwxt’anak katuqañäni ukhaxa, ¿kuna arunak amtañasasa? (1 Sam. 15:19-21; Sal. 141:5; Pro. 9:8, 9; 11:2.)