Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

55 sarnaqäwi: Mä wawaw Diosar yupaychi

55 sarnaqäwi: Mä wawaw Diosar yupaychi

AKA yuqall wawax suma uñnaqt’anirakisä. Samuel satawa. Samuelur luqxataski uka tataxa Israelankir jilïr sacerdotewa, Elí satawa. Uka wawaru irpkatasipki ukanakaxa Elcana tatapampi Ana mamapampiwa.

Samuelax Elí jilïr sacerdotempiw jikisiski

Samuelux niya phisqa maranikïskiwa. Jehová Diosar yupaychañ utanwa Elimpi ukat mayni sacerdotenakampi jakasini. ¿Kunatsa Elcanampi Anampixa uka wawa irpanipxpacha Jehová Diosar uka utana luqtañapatakixa? Uk yatxatañäni.

Nayrasti Anax wal llakisïna jan wawanïsaxa, wawanïñ wal munäna. Ukat mä uruxa, yupaychañ utaruw saräna, ukat akham sasaw mayt’asïna: ‘¡Ay, Jehová Diosa tata, nayat amtasitaya! Mä wawa churitätaxa, nayasti uka wawa jumar luqtañapatakiw churäma’ sasa.

Jehová Diosaxa ist’ataynawa Anan mayisïwipxa, mä qhawqha tiempotxa Anasti Samuel wawanïxänwa. Anax wal wawapar munasïna, jisk’atpach Jehová Diosat yatichäna. ‘Aka wawax jilsxani ukhaxa Jehová Diosar churxañatakiw irpxä’ sasaw Anaxa chachaparu satayna.

Ukwa Anampi Elcanampixa aka uñkatasin lurasipki. Awk taykapaxa wali sum Samueluru yatichapxatayna, ukatwa Jehová Diosan utaparux yupaychiri wali kusisita saränxa. Sapa maraw tatapas mamapas uka utaru sarapxirïna Diosar yupaychañataki ukhamaraki wawapar tumpt’añataki. Sapa marawa Anaxa Samuelutaki jan amparani machaq isi aparapirïna.

Walja maranakawa Jehová Diosar luqtxäna. Ukat Jehová Diosansa jaqinakansa wali munatänwa. Ukampisa Ofni ukat Finees sata Elí jilïr sacerdoten pä yuqanakapaxa jan wali jaqinakänwa. Jan walinakwa lurapxäna, Diosatsa jaqinakarux jithiqtayapxänwa. Elixa sacerdotïñatxa apaqxañapänwa, ukampisa janiw apaqkänti.

Samuelux jan walinak paskipansa Jehová Diosaru yupaychañ utan luqtaskakïnwa, janiw jithiqtkänti. Walja tiempowa jaqinakampi Jehová Diosax jan parlxänti, kunattix juk’anikiwa Diosar munasipxäna. Samueluxa mä juk’ampi jiltxi ukhaxa akaw pasäna:

Samueluxa tabernáculo sat yupaychañ utan ikiskäna ukhaw mä arux sartayäna. Jupax ‘¡akankasktwa!’ sasaw sarthapisin Elí ukaru jank’aki saräna, ‘akax juttwa, ¿jawsistati?’ sasa.

‘Janiw nayax jawsksmati, ikiñamar sarxam’ sasaw Elix sarakïna. Ukhamasti iyaw sasaw Samuelux ikintxäna.

Wasitampwa ‘¡Samuel!’ siri ist’äna, ukat Elí ukaruw sararakikïna: ‘Akax juttwa. ¿Jawsistati?’ sasa. Ukat Elixa ‘janiw nayax jawsksmati, wawa. Ikiñamar sarxam’ sarakikïnwa. Ukhamasti iyaw sasaw Samuelux ikintxarakïna.

‘¡Samuel!’ siri ist’arakikïnwa, ukampix kimsa kutïxänwa. Samuelux sartasin Elí ukarurakikiw saräna. ‘Akax juttwa. ¿Kunatakis jawsista? Jichhax jumapunïpachätaw’ sasa. Elix Jehová Diosätap amuyt’asïna. Ukatwa Samuelur akham säna: ‘Jichhax ikiñamar sarxma, mayampi jawsanïtamxa akham säta: “Parlaskakim Jehová Dios tata, ist’asksmawa” sasa’.

Mayampi Jehová Diosax jawsanïn ukhaxa ukham säna. Ukat Jehová Diosaxa Elimpi yuqanakapampiruw castigäxa sasaw Samuelur yatiyäna. Mä qhawqha urutxa Ofnimpi Fineempixa filisteonakampi nuwasiriw sarapxäna, ukanwa jiwxapxäna, uk yatisasti Elix jaqusisin kunk q’iwsusïna, ukhamaw jiwxäna. Ukham Jehová Diosan arunakapaxa phuqasïna.

Samuelux jilsxasinxa Israel markan qhip qhip taripiripäxänwa, janiw ukat yaqhax utjxänti. Chuymanïxän ukhaxa, israelitanakax akham sapxänwa: ‘Mä apnaqir churapxita marka apnaqañapataki’ sasa. Ukat Samuelux janiw munkänti, kunattix Jehová Diosaw jupanakan apnaqiripänxa. Ukampis Jehová Diosax markar ist’am sänwa.

1 Samuel 1:1-28; 2:11-36; 4:16-18; 8:4-9.



Jiskt’äwinaka

  • ¿Aka wawaxa kun satasa, ukat mayninakax kun satäpxisa?
  • ¿Diosar yupaychañ utar sarasaxa kunsa Anax Diosaru mayïna, ukat Jehová Diosax ist’änti?
  • ¿Qhawqha maranïnsa Samueluxa kunapachatï Diosar yupaychañ utaru apapkän ukhaxa, ukat kunsa mamitapaxa sapa mara lurarapïna?
  • ¿Kamsatäpxänsa Elí tatan yuqanakapaxa, ukat kunjam jaqinakäpxänsa?
  • ¿Kunjamsa Jehová Diosaxa Samueluru jawsäna, ukat kunsa yatiyäna?
  • ¿Kuna lurañanïxansa Samueluxa jach’a jaqixäna ukhaxa, ukat chuymanïxäna ukhaxa kunas kamachäna?

Yaqha jiskt’äwinakampi

  • Liyt’añamawa 1 Samuel 1:1-28.

    ¿Kunsa Elcana tatatxa yatiqasipxaspa familia p’iqt’irinakaxa Diosar yupaychañ tuqitxa? (1 Sam. 1:3, 21; Mat. 6:33; Fili. 1:10.)

    ¿Anax jan walinakan uñjasisax kamachänsa, ukat kunsa yatiqassna? (1 Sam. 1:10, 11; Sal. 55:22; Rom. 12:12.)

  • Liyt’añamawa 1 Samuel 2:11-36.

    ¿Kunjamsa Elí tataxa Jehová Diosar jach’añchañat sipansa yuqanakaparuki jach’añchänxa, ukat kunsa yatiqsna? (1 Sam. 2:22-24, 27, 29; Deu. 21:18-21; Mat. 10:36, 37.)

  • Liyt’añamawa 1 Samuel 4:16-18.

    ¿Kuna wali llakkañ yatiyäwsa Elí tatar yatiyapxäna, ukat uk ist’asax kunarus purt’asitayna?

  • Liyt’añamawa 1 Samuel 8:4-9.

    ¿Kunjamatsa israelitanakax Jehová Diosaru chuym ust’ayapxäna, ukat kunjamsa taqi chuyma Diosan Apnaqäwiparu jichhürunakan yanapt’sna? (1 Sam. 8:5, 7; Juan 17:16; Sant. 4:4.)