Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

51 sarnaqäwi: Rut warmimpi Noemí warmimpi

51 sarnaqäwi: Rut warmimpi Noemí warmimpi

BIBLIANXA Rut sata mä librow utji. Taripirinakax Israelan utjkäna uka tiempon mä familiat parli. Rut tawaquxa Moab markankirïnwa; janiw Diosan markapankirïkänti. Ukampis Rutaxa Jehová Diosat yatiqasaxa wal Diosar munasïna. Noemí warmiw Jehová Diosar uñt’ayäna, Noemixa chuymanïxänwa.

Noemix israelitänwa. Chachapampi pä yuqapampiwa, Israelan manq’at pist’añax utjäna ukhaxa Moab markaru sarxapxäna. Mä uruxa, chachapaw jiwxäna. Ukatxa yuqanakapax Moab markankir tawaqunakampiw casarasipxäna, Rut, Orfa satäpxänwa. Tunka mara pasatasti paypach yuqanakapaw jiwxapxäna. ¡Wali llakiskañänwa! ¿Kamachakpachänsa Noemixa?

Noemixa markapar kutt’xañwa amtäna. Rutampi Orfampixa janiwa Noemita saraqañ munapkänti, ukat jupamp chikaw mistunxapxäna. Ukat jay jutkasaxa Noemix akham sänwa: ‘Kawkittï jutapktaxa ukar kutt’xapxam taykanakaman ukaru’ sasa.

Noemix jamp’att’asaw sarxapxam sänxa. Ukat jupanakax wal jachaqt’asipxäna, Noemir munasitanakap layku. Ukat akham sapxänwa: ‘¡Janiwa! Nanakax jumamp chikaw markamar sarapxä’ sasa. Ukat Noemix akham saskakïnwa: ‘Munat wawanaka, kutt’xapxañamawa. Khänwa sum jakasipxäta’ sasa. Ukhamasti Orfaxa kutt’awayxänwa. Ukampis Rutax janiw kutt’känti.

Noemisti Rutarux akham saskakïnwa: ‘Orfax sarxiwa. Jupamp chik kutt’xma’ sasa. Ukat Rutasti: ‘¡Jan jumat jithiqtayistati! Jumamp chik saraskañäni. Kawkjarutï sarkäta ukaruw saräxa, kawkintï jakkäta ukan jakarakïxa. Markamas markajäniw ukat Diosamas Diosajarakïniwa. Kawkjantï jiwätaxa ukanwa jiwarakïxa, ukanwa imantxapxitanixa’ sasa. Ukham sataxa, Noemix janiw juk’ampi kutt’ayañaru tirxänti.

Ukat panippachaw Israel markar purxapxäna. Ukan utjasxapxäna. Rutasti jank’akiw yapunakan irnaqir saräna, cebada yawiñ horasänwa. Booz sat mä chachaw yapujat cebada thaqhasiskam säna. ¿Khitïnsa Booz tatan mamapaxa, uk yattati? Jericó markankir Rahab warmïnwa.

Rutaruw mä urux Booz tatax akham säna: ‘Nayax yattwa kunanaktï Noemí layku lurktax ukanaka. Awkimsa taykamsa, ukhamarak uraqimsa aka jan uñt’at markan nanakamp jakañatakiw apanukuntaxa. ¡Jehová Diosaw bendecïtamxa!’ sasa.

Rutasti ukxaruxa sarakïnwa: ‘Tata, jumax wali suma jaqipunïtawa, munasiñ arumpiw parlistaxa’ sasa. Booz tataxa wal munasïna Rutaruxa, ukat mä qhawqhatxa casarasxapxänwa. ¡Noemix wal kusisïna! Ukat kunapachatï Booz tatampi Rutampixa mä wawanipkäna ukhaxa juk’amp Noemixa kusisïna, uka wawaxa Obed satänwa. Obetax Davitan achachilapänwa; Davitatxa jutïrinakanwa juk’amp yatiqaskañäni.

Rut warmimpi Noemí warmimpi

Rut 1-4.



Jiskt’äwinaka

  • ¿Kunatsa Noemí mamaxa Moab markar sarxatayna?
  • ¿Rutampi Orfampix khitinakasa?
  • ¿Kunapachatï Noemí mamax kutt’xapxam siskäna ukhax kamsapxänsa Rutampi Orfampixa?
  • ¿Khitïnsa Booz tataxa, ukat kunjamsa Rutampiru Noemimpiru yanapt’äna?
  • ¿Booz tatampin Rut mamampin wawapaxa kamsatänsa, ukat kunatsa uk amtañasaxa?

Yaqha jiskt’äwinakampi

  • Liyt’añamawa Rut 1:1-17.

    ¿Kuna suma arunaksa Rutax Noemí mamar säna? (Rut 1:16, 17.)

    Rutax Noemí mamat janiw saraqañ munkänti, ¿ jichhürunakanxa “yaqha uwijanaka” sata cristianonakaxa alaxpachar sariri jilatanakatxa kamachapxarakisa? (Juan 10:16; Zac. 8:23.)

  • Liyt’añamawa Rut 2:1-23.

    ¿Kuna tuqinakatsa jichhürunakan tawaqunakaxa Rutat yatiqasipxarakispa? (Rut 2:17, 18; Pro. 23:22; 31:15.)

  • Liyt’añamawa Rut 3:5-13.

    Rutaxa mä waynampi casarasiñat sipansa Booz chachampiwa casarasitayna, ¿uka tuqita kamsänsa Booz chachaxa?

    Rutaxa taqi chuyma munasirïnwa, ¿ukat kunsa yatiqassna? (Rut 3:10; 1 Cor. 13:4, 5.)

  • Liyt’añamawa Rut 4:7-17.

    ¿Kunsa cristian jilatanakaxa Booz tatat yatiqasipxaspa? (Rut 4:9, 10; 1 Tim. 3:1, 12, 13; 5:8.)