Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

48 sarnaqäwi: Ch’ikhi gabaonitanaka

48 sarnaqäwi: Ch’ikhi gabaonitanaka

ISRAEL markampi nuwasiñatakiw Canaanankir markanakax wal wakichasipxäna. Atipapxañäniw sapxänwa. Ukampis Gabaón markankirinakax atipapxistaniw kunattix Diosaw israelitanakarux yanapi, Diosampis nuwasksna ukhamäspawa sasaw sapxäna. Ukhamaxa, ¿gabaonitanakax kamachapxänsa uk yattati?

Wali jayansa jakassna ukham sarañäni sasaw amtapxäna. Ukhamasti thantha isinakampi thantha wiskhunakampi uchantasisaw sarapxäna. Asnonakapar thantha costalanak khumxatawayapxäna, qurwantat t’ant’anak apxarusiwayapxäna. Ukat Josué tatax utjaskäna ukaru purisax akham sapxänwa: ‘Nanakax wali jayat jutapxta. Jehová Diosaman jach’a ch’amanïtap yatipxtwa. Kuntï Egipton jumanak layku lurkatayna uksa yatipxaraktwa. Ukatwa nanakan jilïrinakajax sapxitu: “Sarapxma, thakitak manq’a apasipxam ukat akham sapxätawa: ‘Nanakasti jumanakan yanapirinakamäxapxäwa, jichhasti sumankañaruya mantañani jan nuwasiñataki’ sasa”. Jumanakax uñjapxam jutkäwinwa isinakajas thantsusxi, t’ant’as qurwantxi’ sasa.

Josué tatampi mayni p’iqt’irinakampixa chiqäpachaw sasaw sapxäna. Ukatwa, janiw nuwaskañäniti sas amtawayapxäna. Ukampis gabaonitanakax jak’an jakasipkäna, ukxa kimsürut amuyasipxäna.

‘¿Kunatsa wali jayat jutapxta sapxista?’ sasaw Josué tatax jiskt’äna.

Gabaonitanakax akham sapxänwa: ‘Nanakasti yatipxtwa kuntix jumanakan Diosamax Canaán uraq katuqapxäta sawaykatayna ukxa. Jiwayapxistaniw sasaw sapxta ukatwa jutapxtxa’ sasa. Ukampis israelitanakax arsutaparjamaw phuqapxäna, janiw gabaonitanakar jiwarayapkänti. Jan ukasti, yanapirinakaparuw tukuyapxäna.

Jerusalén apnaqirixa wal colerasïna uk yatisaxa. Ukatwa yaqha pusi apnaqirinakar akham säna: ‘Gabaón markampi nuwasiñ yanapt’apxita’ sasa. Ukat phisqanpachaw Gabaón contra sayt’apxäna. ¿Gabaonitanakax walikti lurasipkpachäna Israel markampi sumar mantasaxa? Uk yatxataskakiñäni.

Josué 9:1-27; 10:1-5.

Josué tatampi gabaonitanakampi


Jiskt’äwinaka

  • Gabaonitanakaxa janiw Canaanankir markanakjamäpkänti, ¿kunatsa ukham sistanxa?
  • Kunjamtï akan uñjaskixa, ¿kunsa gabaonitanakax lurapxäna, ukat kunatsa?
  • ¿Josué tatampi ukat mayni p’iqt’irinakampisa kamsapxisa gabaonitanakaruxa, ukat kunsa yatxatapxi kimsa urutxa?
  • Gabaonitanakax israelitanakampi sumaruw mantapxäna, ¿uk yatisaxa Canaanankir yaqha apnaqirinakax kamachapxänsa?

Yaqha jiskt’äwinakampi

  • Liyt’añamawa Josué 9:1-27.

    Canaán markanakxa “taqpach t’unjapxäta” sasaw Jehová Diosaxa Israel markar satayna, ukampis ¿kuna tuqitsa suma Diosätapxa uñacht’ayäna gabaonitanakar jan jiwarayasaxa? (Jos. 9:22, 24; Mat. 9:13; Hech. 10:34, 35; 2 Ped. 3:9.)

    Josué tatax arupar phuqasaxa janiw gabaonitanakar jiwaraykänti, ¿ukat kunjamsa cristianonakax yatiqasipxaspa? (Jos. 9:18, 19; Mat. 5:37; Efe. 4:25.)

  • Liyt’añamawa Josué 10:1-5.

    ¿Jach’a tama sata cristianonakaxa kunjamsa gabaonitanakjama sarnaqapxaraki, ukat kuna jan walinakarus uñkatasipxi? (Jos. 10:4; Zac. 8:23; Mat. 25:35-40; Apo. 12:17.)