Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

40 sarnaqäwi: Moisesaw qullu qarqar jawq’atati

40 sarnaqäwi: Moisesaw qullu qarqar jawq’atati

ISRAELITANAKAX wasarankasipkakïnwa. ¡10 mara, 20 mara, 30 mara, 39 maraw pasxäna! Ukampis Jehová Diosaw sum uñjaskäna. Maná manq’ayäna. Uruxa mä qinayampiw thak uñacht’ayäna, arumasti ninampirakiw qhant’ayäna. Isipas janiw thanthaskänti, kayunakapas janiw uskänti.

Egiptot mistunipkäna uka maratxa 40 maraw pasxäna, nayrïr phaxsinkxapxänwa. Ukat wasitampiw Cades sat wasarar kutt’anxapxäna. 12 uñaqirinak Canaán markar khitkäna uka maratxa 40 maraw pasxäna. Moisesan María kullakapax uka Cades wasaranwa jiwxäna. Ukat wasitampiw nayrjama jan walt’äwinakax utjxarakikïna.

Um jan utjipanxa akham sasaw Moisesar sapxäna: ‘Janis jakxasäna walipunisapänwa. ¿Kunatakis Egiptot irpsunipxista jan yapuchañjam axsarkañ wasararuxa? Akansti janiw higosa, ni uwas yapunakasa, ni granado quqanakasa utjkiti; ni umas umt’añatak utjkiti’ sasa.

Moisesaw qullu qarqar jawq’atataski

Ukat kunapachatï Moisesampi Aaronampix yupaychañ utaru Diosar mayisir sarapxäna ukhaxa, Jehová Diosax akham sänwa: ‘Markpachar jawsthapma. Ukat taqi jaqinak nayraqatanxa khä qullu qarqar parlma. Ukatxa umaw mistuni jupanakan ukhamarak uywanakapan umt’apxañapataki’ sasa.

Ukhamasti Moisesax taqiniruw jawsthapïna, ukat akham sänwa: ‘¡Ist’apxam Diosar jan iyawsir jaqinaka! ¿Aka qarqatti Aaronampi nayampix um apsurapipxäma?’ sasa. Uk sasinxa, qullu qarqaruw Moisesax pä kut jawq’atatäna, ukatxa wal umax chhixsunïna. Taqinitakiw umax utjäna uywanakapatakis ukhamaraki.

Ukampis Jehová Diosax Moisesampi Aaronampitakiw colerasïna. ¿Kunatsa? Kunattix Moisesampi Aaronampix nanakaw uma apsurapipxäma sapxänwa. Ukampis Jehová Diosaw umxa apsuskäna. Ukham jan chiqap parlatanakamatxa juchañchatäpxätaw sasaw Jehová Diosax säna. ‘Janiw jumanakax markajarux Canaán uraqir irpantapkätati’ sarakïnwa.

Cadesat israelitanakax mistxasinxa Hor sat qulluruw puripxäna. Ukanwa Aaronax jiwxäna. 123 maraniw jiwxäna. Israelitanakax wali llakitaw jikxatasipxäna, Aaronan jiwatapatxa phaxsiw jachapxäna. Aaronan Eleazar sat yuqapawa Israel markataki jilïr sacerdotjam utt’ayatäxarakïna.

Números 20:1-13, 22-29; Deuteronomio 29:5.



Jiskt’äwinaka

  • Wasarankasipkän ukhaxa, ¿kunjamsa Jehová Diosax israelitanakar sum uñjaskäna?
  • ¿Cades wasaran samarasin kamsasas israelitanakax parlapxäna?
  • ¿Jehová Diosax kunjamsa israelitanakarus uywanakaparus um churänxa?
  • ¿Luqkatasiski uka tataxa khitisa, ukat kunatsa luqkatasiski?
  • ¿Kunatsa Moisesampitak Aaronampitakix Jehová Diosax colerasïna, ukat juchapat kamsänsa?
  • ¿Hor sat qullun kunas pasäna, ukat khitis Israel markan jilïr sacerdotet utt’ayatäxäna?

Yaqha jiskt’äwinakampi

  • Liyt’añamawa Números 20:1-13, 22-29 ukat Deuteronomio 29:5.

    Jehová Diosax israelitanakaru wasaran sum uñjäna, ¿ukat kunsa yatiqsna? (Deu. 29:5; Mat. 6:31; Heb. 13:5; Sant. 1:17.)

    Kunapachatï Moisesampi Aaronampixa Israel marka nayraqatana Jehová Diosan sutipa jan jach’añchapkäna ukapachaxa, ¿kunjamsa Jehová Diosaxa uk uñjäna? (Núm. 20:12; 1 Cor. 10:12; Apo. 4:11.)

    ¿Kamsänsa Moisesaxa Jehová Diosampi chiqañchatäsaxa? ¿Ukat kunsa yatiqassna? (Núm. 12:3; 20:12, 27, 28; Deu. 32:4; Heb. 12:7-11.)