Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

39 sarnaqäwi: Aaronan thujrupaw panqari

39 sarnaqäwi: Aaronan thujrupaw panqari

UÑTAM aka thujrux panqaraskiwa, wali suma puqut almendra achunakaniwa. Aaronan thujrupawa. ¡Mä arumakiw panqarsutayna achuqarakitayna! ¿Kunatsa? Uk yatxatañäni.

Moisesax Aaronaruw panqaranakan thujru churaski

Israelitanakax walja maranakaw wasaran sarnaqxapxäna. Yaqhipaxa, janiw Moisesax p’iqt’añapäkiti, ni Aarón jilapas jilïr sacerdoteñapäkiti sasaw sapxäna. Maynïrix Coré satänwa, Datán, Abiram sat tatanakasa ukat 250 p’iqt’irinakasa ukham amuyapxarakïna. Moisesar sart’asinxa akham sapxänwa: ‘¿Kunatsa jumax mayninakxar mä jilïrïkasmas ukham tukta?’ sasa.

Moisesasti Corempi arkirinakapampirux akham sänwa: ‘Qharüru alwasti nina sank’a apnaqañ aptasipxäta ukat incienso uchapxäta. Yupaychañ utar jutapxäta, ukanwa khitirus Diosax ajllini ukxa uñjañäni’ sasa.

Qhipürusti Corempi arkirinakapampixa yupaychañ utaruw sarapxäna. Ukat waljaniw jupanakamp chik sayt’asiñatak sarapxarakïna. Jehová Diosax wal colerasïna. Ukäñkamasti Moisesax akham sänwa: ‘Jithiqtapxam aka juchan jan wali jaqinakan carpanakapatxa. Janirak kunanakapsa llamkt’apxamti’ sasa. Jaqinakax iyaw sasaw Coré, Datán, Abiram sat tatanakan carpanakapatxa jithiqtapxäna.

Ukat Moisesax akham sänwa: ‘Jehová Diosax khitirutï ajllkani ukxa jichhaw yatipxäta. Aka jan wali jaqinakarux uraqiw ansatatasin manq’antani’ sasa.

Moisesax parlañ tukuyäna ukapachaw uraqix ansatatäna. Ukat Coré, Datán, Abiram sat tatanakan carpanakapasa ukat uka carpankkäna ukanakasa uraq manqharuw jalantäna ukat uraqix jist’antasxänwa. Uraq manqhar jalantaskirinakan wararitap ist’asaxa jaqinakax akham sasaw wararipxäna: ‘¡T’ijtxapxañäni! ¡Jiwasar manq’antarakistaspawa!’ sasa.

Ukat Corempi 250 arkirinakapampixa yupaychañ uta nayräxapankasipkänwa. Ukatwa Jehová Diosax nin apayanïna, ukat phichantäna. Ukat Jehová Diosax Aaronan Eleazar yupaqaruw akham säna, jiwatanakan nina sank’a apnaqañanakap aptanma, ukat ukanak umatatayasin altarar muyuntayañatak luram sasa. Aaronampi yuqanakapampikiw sacerdotepxaspa uk israelitanakar amtayañatakiw altararux ukampi muyuntayäna.

Aaronampi yuqanakapampikiwa sacerdotepxaspa ukwa Jehová Diosax sum qhanañchañ munäna. Ukatwa Moisesar akham säna: ‘Sapaqat tribun jilïrinakapax thujrunakap apanpan sama. Leví tributxa, Aaronaw thujrup apaniñapa. Ukat Diosampi arust’äwir mantat arka uñkatasiruw thujrunakap uchäta. Khitixay sacerdotjam ajllitächi ukan thujrupaw panqarani’ sasa.

Qhipärmanthiw Moisesax uñanti, ¡Aaronan thujrupaw panqaratayna, almendras puquratayna! Ukhamaxa, ¿kunatsa Jehová Diosax Aaronan thujrup panqarayäna?

Números 16:1-49; 17:1-11; 26:10.



Jiskt’äwinaka

  • ¿Khitinakas Moisés contra Aarón contra sayt’apxäna, kamsapxänsa Moisesaruxa?
  • ¿Moisesax Corempi 250 arkirinakapampirux kamsänsa?
  • ¿Moisesax kamsis israelitanakaruxa, ukat parlañ tukuyxäna ukhax kamachänsa?
  • ¿Corempiru 250 arkirinakapampiruxa kunas pasäna?
  • ¿Aaronan Eleazar yuqapax phichantat jaqinakan nina sank’a apnaqañanakapampix kuns luräna, kunatsa?
  • ¿Kunatsa Jehová Diosax Aaronan thujrup panqarayänxa? (Dibuj uñxatma.)

Yaqha jiskt’äwinakampi

  • Liyt’añamawa Números 16:1-49.

    ¿Corempi arkirinakapampix kamachapxänsa, ukat kunatsa uka luratanakapax Jehová Dios contras sayt’asipkaspa ukhamänxa? (Núm. 16:9, 10, 18; Lev. 10:1, 2; Pro. 11:2.)

    ¿Corempi 250 ‘jilïr jaqinakampixa’ kuna jan wali amuyunipxänsa? (Núm. 16:1-3; Pro. 15:33; Isa. 49:7.)

  • Liyt’añamawa Números 17:1-11 ukat 26:10.

    ¿Aaronan thujrupax panqarasin kuns uñacht’ayäna, kunatsa Jehová Diosax arkaruw thujru imapxäta sänxa? (Núm. 17:5, 8, 10.)

    ¿Aaronan thujrup imapkäna ukatxa kuna yatichäwsa apsuraksna? (Núm. 17:10; Hech. 20:28; Fili. 2:14; Heb. 13:17.)