Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

36 sarnaqäwi: Qurit lurat vaca qallu

36 sarnaqäwi: Qurit lurat vaca qallu

¡JAN samti! ¿Jichhax aka jaqinakax kamachasipkisa? ¡Vaca qalluruw yupaychasipki! ¿Kunatsa?

Moisesax qullut jan jank’aki saraqanxipanxa, israelitanakax akham sapxänwa: ‘Moisesarux kunapunix pasxchi, janiw yatktanti. Aka uraqit mistxañataki mä dios lursusipxañäni’ sasa.

Moisesax kamachinak qillqat qalanak jaqt’aski

‘Walikiwa. Quri aretenakam churapxita’ sasaw Moisesan Aarón jilapax säna. Iyaw sasaw Aaronarux churapxäna. Quri umatatayasinsti mä vaca qall lursüna. Ukat markax akham sänwa: ‘¡Akaw Egiptot apsuri Diosasaxa!’ sasa. Ukat jach’a fiest lurapxäna, ukat vaca qalluruw yupaychapxäna.

Jehová Diosax uk luraskir uñjasax wal colerasïna. Ukatwa Moisesarux akham säna: ‘Jank’aki saraqma. Egiptot irpsunit markax jan walinakwa luraski. Kamachinakaj armasaw mä vaca qallu nayraqatan alt’asipxi’ sasa.

Jaqinakax qurit lurat mä vaca qalluruw yupaychasipki

Moisesax jank’akiw qullut saraqanïna. Jak’achasisasti, ak uñjäna. ¡Vaca qall nayraqatanwa jaqinakax warurt’asipkäna thuqt’asipkäna! Moisesax walpun colert’asïna, ukatwa kamachinak qillqat qalanak jaqt’asin jisk’a jisk’a t’unjäna. Ukatxa lurat vaca qall katusinxa ninampiw phichkatäna, ukatsti laq’jam ñut’jäna.

Sinti jan walpunwa uka markax luräna. Ukatwa, Moisesax mä qhawqhanirux espada apxarusipxam sänxa. ‘Vaca qallur yupaychir jan wali jaqinakax jiwapxañapawa’ sasa. ¡Ukat 3.000 jaqinakaruw jiwarayapxäna! Jehová Dios mayarukiw yupaychañasa janiw yaqha diosanakaruxa, ¿aka sarnaqäwix janit uk uñacht’aykistu?

Éxodo 32:1-35.



Jiskt’äwinaka

  • ¿Kunsa aka jaqinakax lurasipki, ukat kunatsa?
  • ¿Jehová Diosax kunatsa colerasïna, ukham lurasipkir uñjasax kamachänsa Moisesaxa?
  • ¿Mä qhawqha jaqinakarux kamsänsa Moisesaxa?
  • ¿Kuns aka sarnaqäwix yatichistu?

Yaqha jiskt’äwinakampi

  • Liyt’añamawa Éxodo 32:1-35.

    Chiqa yupaychäwimpi k’ari yupaychäwimpxa janiw kittañasäkiti, ¿kunjamsa aka sarnaqäwix Jehová Diosan amuyup uñacht’ayistu? (Éxo. 32:4-6, 10; 1 Cor. 10:7, 11.)

    ¿Music ist’añ munasasa, thuqt’añ munasasa, cristianonakax kuna tuqinakatsa amuyasipxañapa? (Éxo. 32:18, 19; Efe. 5:15, 16; 1 Juan 2:15-17.)

    ¿Levin familiapax chiqap tuqit sayt’asisaxa kunsa jiwasanakar yatichistu? (Éxo. 32:25-28; Sal. 18:25.)