Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

23 sarnaqäwi: Faraonan samkanakapa

23 sarnaqäwi: Faraonan samkanakapa

PÄ MARAW pasxäna, Joseyax carcelankaskakïnwa. Faraonan vino askatiripax janiw jupat amtaskänti. Ukat mä arumaxa, Faraonaw pä mayja samkanak samkasïna, ukat kamsañrak munpacha sasaw jiskt’asïna. ¿Faraonax aka manqhan ikiski uk uñjtati? Qhiparmanthisti yatirinakaparuw jawsayäna ukatsti samkasitapwa yatiyäna. Ukampis jupanakax janiw kamsañsa yatipkänti.

Ukhakiw vino askatiripax Joseyat amtasïna. Ukat Faraonarux akham sänwa: ‘Kunapachatï carcelankkayäta ukhaxa, ukan mä jaqiw samkanak tuqit yatïna’ sasa. Faraonax ukaratpachaw Joseyar carcelat irpsuyanïna.

Faraonax akham sasaw Joseyar samkanakap yatiyäna: ‘Paqallqu suma lik’i vacanakwa uñjta. Ukxaruxa paqallq q’ala taxa vacanakrak uñjta. Ukat taxa vacanakaxa lik’i vacanakaruw manq’anti’ sasa.

Faraonax samkasiskiwa

‘Payïr samkajanxa, mä sapa trigo alit paqallqu suma trigo puyanak jilaskiri uñjta. Uka qhipatsti paqallqu jan wali ch’usu waña puyanak jilsurwa uñjarakta. Ukat ch’usu puyanakaxa suma puyanakaruw manq’antapxi’ sasa.

Joseyax akham sänwa Faraonaruxa: ‘Paypach samkamasti mayak sañ muni. Paqallqu lik’i vacanakasa, paqallqu suma trigo puyanakasa, paqallqu mara sañ muni, ukat paqallqu taxa vacanakasa ch’usu puyanakasa paqallqu mara sañwa munaraki. Egiptonxa paqallqu maraw wal manq’ax achuni. Ukatxa paqallq mararakiw mach’ax utjani’ sasa.

Ukatwa Joseyax Faraonar akham säna: ‘Mä suma amuyt’ani ch’ikhi jaqi utt’ayañamawa, aka paqallqu maran manq’a apthapiñapataki. Ukhamatwa jaqinakax jani manq’at jiwapkaniti uka paqallqu mach’a maranakanxa’ sasa.

Joseyan amuyt’atapasti Faraonatakixa wali askïnwa. Ukatsti Joseyaruw manq’añ apthapiñapataki utt’ayäna. Joseyasti Egipto markan jach’a jilïrit utt’ayatänwa, Faraonakiw jupatxa jilïrïnxa.

Kimsaqallqu maranak pasatatsti, mach’a maranxa, mä 10 chachanak jutirwa uñjäna. ¿Khitinakäpachas uk yattati? ¡Joseyan jilanakapawa! Jacob awkipawa Egiptor manq’a layku khitanïna, kunattix Canaán uraqinxa manq’ax pist’xänwa. Joseyasti jilanakaparux uñt’asïnwa, ukampisa jilanakapax janiw Joseyar uñt’apkänti. ¿Kunatsa? Kunattix Joseyax walja maranïxänwa, ukat mayja isitänwa.

Jilanakapax jupa nayraqatan alt’asipxañapäna uka samkapwa Joseyax amtasïna. Ukxa jisk’äkasin samkasïna, ¿uka tuqit aka libron liyt’atam amttati? Ukatwa Joseyax amuyt’asïna Diosapuniw Egipto markarux mä amtampi khitaniskitu sasa. ¿Ukat Joseyax kamachpachänsa? Uk yatxataskakiñäni.

Génesis 41:1-57; 42:1-8; 50:20.



Jiskt’äwinaka

  • ¿Mä arumax kunas Faraonar pasäna?
  • ¿Faraonan vino askatiripax kunatsa Joseyat amtasïna?
  • Kunjamtï aka dibujon uñacht’ayaskixa, ¿Faraonax kunanaks samkasïna?
  • ¿Samkanakax kunaw sänsa Joseyaxa?
  • ¿Kunjamatsa Joseyax Egipto markan jilïrit utt’ayatänxa?
  • ¿Kunatsa Joseyan jilanakapaxa Egipto markar sarapxäna, ukat kunatsa Joseyar jan uñt’apkäna?
  • ¿Kuna samksa Joseyax amtasïna, ukat kunas uka samka sum amuyañapatakix yanapt’äna?

Yaqha jiskt’äwinakampi

  • Liyt’añamawa Génesis 41:1-57.

    ¿Samkanakat yatiyasaxa kunjamatsa Joseyax Jehová Diosar jach’añchäna, ukat cristianonakax kunjamatsa uk yatiqasipxarakispa? (Gén. 41:16, 25, 28; Mat. 5:16; 1 Ped. 2:12.)

    Egipton manq’añax utjkäna uka maranakampi mach’a maranakampixa, ¿kunjamatsa ukhamankapxarakixa cristianüpxtwa sirinakampi Jehová Diosan markapampixa? (Gén. 41:29, 30; Amós 8:11, 12.)

  • Liyt’añamawa Génesis 42:1-8 ukat 50:20.

    Mä markan costumbrepächi ukhaxa, ¿Jehová Diosan yupaychirinakapaxa respet uñacht’ayañataki alt’asisipkaspati mä jaqi nayraqatanxa? (Gén. 42:6.)