Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

8 sarnaqäwi: Jach’a jaqinaka

8 sarnaqäwi: Jach’a jaqinaka

UTAMARU wali jach’a jaqix jutaspa, utams jilakipaspa, ¿kamsasmasa? ¡Wali jach’a jaqirakisä! sasmawa. Mä tiempoxa ukham jaqinakaw aka Uraqin utjäna. Uka jaqinakax alaxpachan jakasir angelanakan wawanakapäpxänwa siw Bibliaxa. ¿Ukax kunjamäpachänsa?

Wali nuwasiri jach’a jaqinaka

Amtañäni, Supay ñanqha angelaw jan walinak utjayaskäna. Diosan angelanakaparusa ñanqhaptayañwa munäna. Ukat tiempompixa, yaqhip angelanakax Supayaruw ist’xapxäna. Alaxpachan Diosatak lurasipkän uk jaytasawa aka Uraqiru saraqanipxatayna, ukat cuerponak lurasipxatayna. ¿Kunatsa jutapxatayna uk yattati?

Kunattix suma uñtani warminakaruw uñch’ukinipxatayna, ukat jupanakampiw jakañ munapxäna siw Bibliaxa. Ukatwa alaxpachat saraqanisax jupanakamp chikachasipxatayna. Ukax janiw walïkänti siw Bibliaxa, kunattix angelanakaxa alaxpachan jakasipxañapatak luratäpxänwa.

Kunapachatï uka angelanakax warminakapampi wawanakanïxapxäna ukhaxa, mayja wawanakanïpxänwa. Inas wawäkasinxa jan mayjapkchïnti. Ukampisa, jilsusipkakïnwa jach’aptasipkakïnwa ch’amaniptasipkakïnwa, ukatxa, jach’a jaqinakaruw tukupxäna.

Uka jach’a jaqinakax wali qhurunakäpxänwa. Ukham jach’äsinsa ch’amanïsinsa, jaqinakaruw t’aqhisiyapxäna. Munkir jan munkir jaqinakarux jan walinak lurayañ munapxäna.

Enoc chachax jiwatäxanwa, ukampisa aka Uraqinxa mä suma jaqiw utjarakïna. Uka chachax Noé satänwa. Diosan munañaparupuniw kunsa luräna.

‘Tiempox purinxiw jan wali jaqinakar chhaqtayañatakix’ sasaw Noé tatarux mä urux Diosax säna. Ukampis Diosax Noempiru familiapampiru ukat animalanakampiru qhispiyañapänwa. Kunjamsa qhispiyatayna uk uñjañäni.

Génesis 6:1-8; Judas 6.



Jiskt’äwinaka

  • ¿Kunapachatï yaqhip angelanakax Supayar ist’apxatayna ukhax kamachapxataynasa?
  • ¿Kunatsa yaqhip angelanakax alaxpachan luräwip jaytasaxa saraqanipxatayna?
  • Angelanakax aka Uraqiruw saraqanipxatayna ukat cuerponak lurasipxatayna sarakisä, ¿kunatsa ukax jan walïkänxa?
  • ¿Kunatsa angelanakan wawanakapax mayjanakäpxänxa?
  • Kunjamtï aka dibujon uñxatktaxa, ¿angelanakan wawanakapax jach’a jaqinakaptasinxa kunanaksa lurapxäna?
  • Enoc tatan jiwatapatxa, ¿khiti suma jaqisa aka Uraqin jakäna, ukat kunatsa Diosan munatänxa?

Yaqha jiskt’äwinakampi

  • Liyt’añamawa Génesis 6:1-8.

    ¿Jan wal sarnaqksna ukhaxa Jehová Diosax kunjamsa jikxatasispa uka tuqit kamsis Génesis 6:6 jisk’a t’aqaxa? (Sal. 78:40, 41; Pro. 27:11.)

  • Liyt’añamawa Judas 6.

    Angelanakax ‘janiw sum imapkänti lurañanakapxa’ sarakisä ukaxa, ¿kunsa jiwasar amtayistu? (1 Cor. 3:5-9; 2 Ped. 2:4, 9, 10.)