Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 4 YATICHÄWI

Juchanakasat chuyma pisayasiña: “Jucha luratanakajjat qʼomachtʼita”

Juchanakasat chuyma pisayasiña: “Jucha luratanakajjat qʼomachtʼita”

“Jila pagoni trabajo jikjjatayäta, ukatwa familjamajj qollqenëjjapjjayäta. Ukampis kuntï Jehová Diosajj uñiski ukwa lurjjayäta. Politikaruw mitisjjayäta ukat fiestanakaru ukat iglesiar misa istʼir kunaw sarjjayäta. 40 maranakaw Jehová Diosat jitheqtawayta. Diosajj janipuniw perdonkitaniti sasaw marat maratjam amuyjjayäta. ¿Kunatsa? Kunatï cheqäki uk yatkasaw jan walinak luraskakiyäta ukatwa nä pachpas jan perdonaskayätti.” (Martha)

JUCHANAKASAT chuyma ustʼatäñajj mä jathi qʼepir uñtataw qʼal aynachtʼayistaspa. David reyejj juchanakapatwa chuym wal pisayasïna, ukatwa akham säna: “Juchanakajajj sintipuniw jatjjattitu” sasa (Salmo 38:4). Jehová Diosajj janipuniw perdonkitaniti sasaw yaqhep jilat kullakanakajj aynachtʼapjje (2 Corintios 2:7). ¿Juchanakam laykojj Diosat wali jayankkasmas ukhamti amuyasta? ¿Diosajj janipuniw juchanakajat perdonkitaniti sasat amuyta? Jan llakisimti, Diosaw yanaptʼaskätam.

“Jutapjjam uka jan wali luratanakamat parlapjjañäni”

Jehová Diosajj taqe chuyma juchanakapat arrepintisipki ukanakar yanaptʼañatakejj jankʼakiwa. Jesusajj herencia tukuntir waynatwa parläna. Uka waynajj utat sarjjasaw jan walinakan sarnaqäna ukat tiempompejj utar kuttʼaniñwa amtjjäna. Kuttʼanjjäna ukhajj ¿kunas pasäna? ‘Awkipajj jayankkipanwa juparojj uñjäna, ukatwa jupat khuyaptʼayasisin jikjjatirejj tʼiju, juparusti qhomantasa jampʼattʼasarakiw katoqäna’ (Lucas 15:11-20). Diosajj uka munasiri khuyaptʼayasiri awkjamarakiwa. ¿Jupar jakʼachasiñ munkasas wali jayankkasmas ukhamti amuyasta? Diosajj katoqañatakiw wal suyasktamjja.

“Wali jucharar jaqëtwa, ukat juchanakajajj sinti jan walinakarakiwa, Diosajj janiw perdonkitaspati” sasat ¿amuyta? Ukhamächi ukhajja, kuntï Isaías 1:18 qellqatan siski uk amuytʼañäni: “Jutapjjam, uka jan wali luratanakamat parlapjjañäni. Juchanakamajj wila colorar uñtatäkchinisa, nayajj khunjam janqʼow tukuyajja”. Juchanakasajj jan perdonkay wila colorar uñtatäkchisa, Diosajj perdonistaspawa.

Jehová Diosajj janiw jan wali luratanakamat chuyma ustʼat qheparañam munkiti. Diosampi perdonayasiñasa ukat qʼoma chuymanïñasa, sumaki jikjjatasiñatakiw yanaptʼistu. ¿Kunsa jumajj ukatak lurasma? David reyitwa yateqasisma. Jupajj akham sänwa: ‘Juchanakajat jumar arsusiñatakiw amtta’ sasa (Salmo 32:5). Diosajj akham saraktamwa: ‘Jutam, uka jan wali luratanakamat parlañäni’ sasa. Uka arunakar istʼañataki ukat oración toqe Jupar jakʼachasiñatakiw chʼamachasiñama. Juchanakamatsa ukat kunjamsa jikjjatasta uksa yatiyarakim. Davitajj taqe chuymaw akham mayisïna: “Jucha luratanakajat qʼomachtʼita” ukat “llampʼuptat chuymarojj janiw jumajj jiskʼach[kätati]” sasa (Salmo 51:2, 17).

Ukjjarojja, Diosan khitanit Natán profetampiw Davitajj yanaptʼayasïna (2 Samuel 12:13). Jichhürunakanjja, ukhamarakiw Diosajj irpir chuymaninak tamanakan uttʼayi. Uka jilatanakajja, juchanakapat arrepentisirinakaruw Diosampi sumankthapipjjañapatak yanaptʼapjje, ukatak wakichtʼatäpjjarakiwa. Irpir chuymaninakampi  parlkäta ukhajja, Biblian ewjjanakaparjamaw Diosar mayamp serviñamatakejj yanaptʼätam. Chuymaman sum jikjjatasiñamatakisa ukat jan wali amuyunak apanukuñamatakisa, jumamp chikaw Diosarojj mä oracionan mayirapipjjätam (Santiago 5:14-16).

Chuymas chuyma jikjjatasisma ukwa Jehová Diosajj muni

“Juchapat qʼomachayasir jaqejj kusisiñaniwa”

Juchanakasat Diosar arsusiñasa ukat irpir chuymaninakampi parlir sarañas chʼamakïspawa. Davitatakejj juchanakap arsusiñas chʼamarakïnwa. Qalltan Davitajj janiw khitirus juchanakap arsuskänti sasaw Bibliajj qhanañchki (Salmo 32:3). Uka qhepatjja, juchanakat arsusiñasa ukat jan wali luratanak askichañas wali askïtapwa jupajj amuyjjarakïna.

¿Kunjamsa ukajj Davitar yanaptʼäna? Wasitamp kusisit jakasiñatakiw yanaptʼäna. Ukatwa jupajj akham qellqäna: “Khititejj taqpach juchapat qʼomachat jikjjataski uka jaqejj kusisiñaniwa” sasa (Salmo 32:1). Ukat akham sasaw Diosar mayisirakïna: “Tatay, lakajay jistʼarita, lakajampisti jachʼañchasaw qʼochüma” sasa (Salmo 51:15). Davitajj juchanakapat arsusisajj chuymas chuymaw jikjjatasjjäna, Diosarus wal yusparäna ukat taqe jaqenak nayraqatanwa jachʼañchäna.

Jumajj qʼoma conciencian sum sarnaqasisma ukwa Diosajj muni. Kunapachatï jumajj Diosata ukat Jupan amtanakapat yatiyir sarkäta ukhajja, kusisitaki, qʼoma concienciampi ukat taqe chuyma yatiyir sarañamwa muni (Salmo 65:1-4). Ukat Diosajj akham sarakistuwa: ‘Jan wali lurañanakjja apanukupjjam, ukatsti arrepentisipjjam juchanakamajj perdonatäñapataki. Ukhamatwa jumanakar kusiskañ urunak churapjjäma’ sasa (Hechos 3:19).

Qalltan parlaniwayktan uka Martha kullakajj akham siwa: “Yoqajajj Yatiyañataki ukat ¡Despertad! revistanak apayasinkakitänwa. Jukʼat jukʼatwa Jehová Diosampi sum apasiñ qalltawayta. Nayatakejja, taqe juchanakajat oracionan Diosar perdón mayisiñaw wali chʼamänjja. Ukhampachas lurawaytwa. ¡Jehová Diosan markaparojj 40 maranakatwa kuttʼanta! Walja maranakas Diosat jitheqtatäkstanjja, markap taypinkañasa ukat Jupajj kunja munasirisa uk mayampi amuyañasatakejj wal suyaskistu. Ukwa naya pachpajj uñjawayta” sasa.