Tito 3:1-15

  • Taqe chuyma istʼaña (1-3)

  • Suma luräwinak lurañatak wakichtʼatäpjjam (4-8)

  • Inamay jiskhisiñanakarusa sectanakarus jan mitisimti (9-11)

  • Ewjjtʼanakampi aruntanakampi (12-15)

3  Jilatanakarojj* akanak amtayaskakim: jupanakajj gobiernonakarusa autoridadanakarusa istʼapjjañapawa, suma luräwinak lurañatakis wakichtʼatäpjjañapawa,  janiw khiti contras jan walinak parlapjjañapäkiti, janirakiw jiskhisirïpjjañapäkisa,* jan ukasti amuytʼirïpjjañapawa, taqe jaqenakarus llampʼu chuymampiw* uñjapjjañapa.  Mä tiemponjja jiwasajj ukham jan amuytʼasiri, jan istʼasiri, cheqa thakit saranukut jaqëyätanwa, kunayman munañanakana jañchin munañanakapan esclavopäyätanwa, jan walinak luriri, envidiasiri, ajjtaskaña, jiwaskam uñisisiri ukham jaqëyätanwa.  Ukampis jiwasar Salviri Diosan suma chuymanïtapasa jaqenakar munasitapasa wali qhan uñjasjjäna  ukhaw jupajj salvistäna, janiw cheqapar luratasatjja, jan ukasti khuyapayasiñapatwa* salvistäna. Jupajj umamp qʼomachasaw jaktayistu, espíritu santopampiw* machaqar tukuyarakistu, ukhamatwa jupajj salvistu.  Diosajj jiwasar Salviri Jesucristo taypiw espíritu santop walj warjjatanistu,  ukhamat jupan wali khuyaptʼayasirïtapat* cheqapar sarnaqer jaqet uñjatäjjasajja, jiwasajj suytʼasktan uka wiñay jakañjja mä herenciar uñtat katoqañasataki.  Uka arunakajj wali confiykañawa, ukanakjjat jukʼamp qhanañchaskakisma uk nayajj munta, ukhamat khitinakatï Diosar creyipki ukanakajj suma luräwinak lurañjjat lupʼisipkakiñapataki.* Ukanakasti jaqenakatakejj wali sumawa, yanaptʼkirirakiwa.  Inamay jiskhisiñanakarusa,* nayra awkinakan sutinakap yatjjatañanakarusa, chʼajjwañanakarusa, Leyjjat jiskhisiñanakarusa jan mitisimti. Ukanakajj jan kunatak serviriwa, inamayakirakiwa. 10  Maynitejj mä secta uñstayañatak chʼamachasiskchejja, ewjjtʼañamawa. Jupatejj pä kuti ewjjtʼatajj jan istʼaskanejja, janiw jupamp chikachasjjañamäkiti. 11  Uka jaqen cheqa thakit saranukutapsa juch luraskatapsa jumajj yattawa, pachpa luratanakaparakiw juparojj juchañchaski. 12  Artemasaru jan ukajj Tiquicor khitankäma ukhajja, Nicópolis markar jutañatak chʼamachasim, uka markanwa nayajj juyphipach pasañ amtaskta. 13  Leyit yatjjattʼat Zenasampiru Apolosampiru yanaptʼañatak chʼamachtʼasim, ukhamat jupanakarojj viajen jan kunas faltañapataki. 14  Jilat kullakanakasajj suma luräwinak luraskakiñatakejj yateqapjjañapawa, ukhamat kuna urgencias utjani ukhajj yanaptʼapjjañapataki, ukhamatwa suma luräwinakapajj utjani. 15  Taqe khitinakatï nayamp chikäsipki ukanakajj aruntanipjjtamwa. Munasipkistu uka creyente masinakasarus aruntarakim. Diosan wali khuyapayasiñapajj* taqe jumanakampïpan.

Qhanañchäwinaka

Jilatanaka sasinjja, awisajj kullakanakamppachatwa Biblian parli.
Variante: “sikhintasirïpjjañapäkisa; chhikhisirïpjjañapäkisa”.
“Llampʼu chuymanïña” siski uka cheq aka Biblian diccionariopan liytʼäta.
Variante: “khariptʼayasirïtapatwa”.
Ukasti Diosan chʼamapa sañ muni.
Variante: “khariptʼayasirïtapat”.
Variante: “piensasipkakiñapataki”.
Variante: “sikhintasiñanakarusa; chhikhisiñanakarusa”.
Variante: “khariptʼayasiñapajj”.