Santiago 3:1-18

  • Lajjra mansoptayaña (1-12)

    • Janiw taqeni yatichirïpjjañamajj wakiskiti (1)

  • Alajjpachat jutki uka yatiña (13-18)

3  Jilatanaka, janiw jumanakat taqeni yatichirïpjjañamajj wakiskiti.* Jumanakajj yatipjjtawa, yatichirinakajj mayninakat sipansa jukʼamp juzgataw uñjasipjjäjja.  Taqeniw walja kuti pantjastanjja.* Maynitejj arsutapan jan pantjaskchejja, perfecto jaqewa, taqpach cuerpopsa sumwa apnaqarakispa.*  Caballonakampi istʼayasiñatakejj jakimampiw lakapat uchtanjja, ukampiw taqpach cuerpop apnaqaraktanjja.  Barconakar uñtapjjarakim, wali jachʼanakäpkchisa, jachʼa thayanakampi* apnaqatäpkchisa, kawkirutejj barco apnaqerejj apañ munki ukarojj mä jiskʼa timonampikiw api.  Lajjrampejj ukhamarakiwa, lajjrajj wali jiskʼakïkchis cuerponjja, wali jachʼañchasiriwa. Mä jiskʼa ninampikiw mä jachʼa montejj* nakhantaspa, ¿janich ukhamäki?  Lajjrajj ninar uñtasitarakiwa. Cuerposan taqpach partenakapatjja, lajjrajj jan walinakamp phoqantatawa, taqpach cuerposaruw qʼañuchi, maynin taqpach jakäwipsa ninampiw qʼal tukji, Gehenan* ninapampiw nakhantayaraki.  Jaqenakajj jan jakʼachaskañ taqe kasta animalanakaru, jamachʼinakaru, asirunakaru, jararankhunakaru,* qotan jakir animalanakaruw mansoptayapjjaspa, cheqansa jaqenakajj mansoptayapjjewa.  Lajjrarusti janiw khiti jaqes mansoptaykaspati. Lajjrajj jan apnaqañjam añcha jan waliwa, jiwayir venenompi phoqantatarakiwa.  Ukampiw Jehová* Dios Awkisarojj jachʼañchtanjja, ukampirakiw “Diosar uñtata” luratäpki uka jaqenakarojj maldistanjja. 10  Pachpa lakatwa bendicionas maldicionas mistu. Munat jilatanakaja, janiw ukanak utjañapajj walïkiti. 11  Mä pachpa uma jalsutjja janiw suma umampi kʼaskʼa umampejj jalsunkaspati, ¿janich ukhamäki? 12  Munat jilatanakaja, mä higos arbolajj janiw aceitunanak achuykaspati, janirakiw uvas alejj higonak achuykaspati, ¿janich ukhamäki? Ni jayukʼar uma jalsutsa suma umajj jalskaspati. 13  ¿Yatiñani amuytʼasiri jaqejj jumanak taypin utjiti? Utjchi ukhajja, yatiñanïñat jutki uka llampʼu chuymamp* luratanakapjja, suma sarnaqatapamp uñachtʼaypan. 14  Ukampis jumanakan chuymanakamantejj envidiasiñanakasa jiskhisiñanakasa* utjchejja, jan jachʼañchasipjjamti, janirak kunatï cheqäki uka contras kʼarinak* parlapjjamti. 15  Uka kasta yatiñajj janiw alajjpachat jutkiti, jan ukasti akapachan yatiñapawa, animalanakana demonionakan yatiñapawa. 16  Kawkintejj envidiasiñanakasa jiskhisiñanakasa* utjki ukanjja, jan waltʼäwinakampi kunayman jan wali luräwinakampiw utjani. 17  Ukampis alajjpachat jutki uka yatiña katoqer jaqejja, nayraqatajj qʼomawa, sumankiriwa, amuytʼiriwa, istʼañatakis jankʼakiwa, khuyapayasiñampi* phoqantatawa, suma achunakanirakiwa, janiw yaqhachirïkiti, janirakiw kʼari chuymani* jaqëkisa. 18  Ukhamarus cheqapar sarnaqañ achojja, sumankañajj utjki uka tiempon phawatawa,* ukajj sumankañ utjayirinakataki* phawatarakiwa.

Qhanañchäwinaka

Ukasti janiw taqenejj congregacionan yatichirïkaspati sañ muni.
Jan ukajja, “lanktʼastanjja”.
Jan ukajja, “sumwa jakimamp apnaqarakispa”.
Variante: “jachʼa wayranakampi”.
Variante: “bosquejj”.
“Gehena” siski uka cheq aka Biblian diccionariopan liytʼäta.
Jan ukajja, “qatatnaqtir animalanakaru”.
“Jehová” siski uka cheq aka Biblian diccionariopan liytʼäta.
“Llampʼu chuymanïña” siski uka cheq aka Biblian diccionariopan liytʼäta.
Ukajja, “maynitakik taqe kun munañanakasa” sasaw jaqokipasirakispa. Variante: “sikhintasiñanakasa; chhikhisiñanakasa”.
Variante: “llullanak”.
Ukajja, “maynitakik taqe kun munañanakasa” sasaw jaqokipasirakispa. Variante: “sikhintasiñanakasa; chhikhisiñanakasa”.
Variante: “khariptʼayasiñampi”.
Jan ukajja, “hipócrita”. Ukasti jan suma jaqëkasina suma jaqer tuktʼaña sañ muni.
Variante: “willintatawa”.
Ukajja, “utjayirinakana” sasaw jaqokipasirakispa.